छत्तीसगढ़ राज्य स्थापना दिवस के मउका म आज ले नवा रईपुर अटल नगर म राज्योत्सव अउ राज्य अलंकरण समारोह के आयोजन करे जात हे। छै नवंबर तक चलइया ए राज्योत्सव के उद्घाटन अब ले कुछेक देर बाद मध्यप्रदेश के मुख्यमंत्री डॉक्टर मोहन यादव ह करही। राज्योत्सव म ख्याति प्राप्त कलाकार मन ह रंगारंग सांस्कृतिक कारीकरम के प्रस्तुति दीहीं। उहें, शासकीय योजना अउ उपलब्धि के प्रचार-प्रसार बर आने-आने विभाग के प्रदर्सनी लगाय जाही। राज्योत्सव के पहिली दिन आज बॉलीवुड के प्रसिद्ध पार्श्व गायक शान के प्रस्तुति होही। उहें, रिखी क्षत्रीय के टीम डहार ले बारह लोक नृत्य के झलकी, महेन्द्र चौहान अउ संगी मन डहार ले आदिवृंदम, सुनील सोनी अउ उंखर टीम कोति ले पारंपरिक नृत्य, संगीत अउ विद्या वर्चस्वी डहार ले नाम रामायण के प्रस्तुति दे जाही।
उहें, छै नवंबर के समापन समारोह म उपराष्ट्रपति जगदीप धनखड़ सामिल होवइया हे। ए राज्य अलंकरण समारोह म आने-आने क्षेत्र म सुघ्घर काम करइया लोगन मन ल सम्मानित घलो करे जाही।
बतादन कि राज्योत्सव मेला ग्राउंड म होवइया राज्योत्सव अउ राज्य अलंकरण समारोह म रईपुर ले आयोजन स्थल तक आय-जाय वाला यात्री मन बर बी.आर.टी.एस. बस के सुविधा दे गेहे। ए बस ह रईपुर ले बिहनिया ग्यारह बजे ले रतिहा नौ बजे तक हर आधा घंटा म चलही।
दक्षता पदक
केंद्रीय गृह मंत्रालय ह ‘‘केंद्रीय गृह मंत्री दक्षता पदक‘‘ के घोसना कर देहे। गृह मंत्रालय ह देस के आने-आने राज्य के पुलिस के तीन सौ अड़तालीस अधिकारी अउ करमचारी मन ल पुरस्कार देके के घोसना करे हे। एमा सबले जादा एक सौ इक्यासी झिन छत्तीसगढ़ पुलिस के अधिकारी अउ जवान मन सामिल हे। केंद्रीय गृह मंत्रालय डहार दे जाय वाले दक्षता पुरस्कार बर जेन अधिकारी मन ल चुने गेहे, ओमा छत्तीसगढ़ पुलिस के एडीजी विवेकानंद सिन्हा, आईजी अमरेश मिश्रा, एसएसपी कल्याण एलेसेला, एसपी विजय पांडे अउ प्रभात कुमार के नाव सामिल हे।
उपचुनाव-प्रेक्षक
छत्तीसगढ़ के मुख्य निर्वाचन पदाधिकारी रीना बाबा साहेब कंगाले ले आज रईपुर नगर दक्षिण विधानसभा उप चुनई बर भारत निर्वाचन आयोग कोति ले नियुक्त सामान्य प्रेक्षक जी. रेखारानी, पुलिस प्रेक्षक करण शर्मा अउ व्यय प्रेक्षक कनुप्रिया दामोर ह भेंट करीन। मुख्य निर्वाचन पदाधिकारी कार्यालय म होय ए भेंट के बेरा रईपुर नगर दक्षिण विधानसभा उप चुनई ल निष्पक्ष अउ व्यवस्थित तरीका ले कराय ल लेके गोठ होइस। ए बेरा म जिला निर्वाचन अधिकारी अउ रईपुर कलेक्टर गौरव कुमार सिंह घलो मौजूद रिहीन।
भाजपा-पत्रकारवार्ता
भाजपा प्रदेस अध्यक्ष किरण सिंह देव ह आज रईपुर के भाजपा कार्यालय म पत्रकारवार्ता करत हुए कांग्रेस के आरोप के जवाब दीन। ओमन ह कांग्रेस उपर आरोप लगइन कि प्रदेस म बाढ़त अपराध, तनाव अउ अराजकता बर कांग्रेस जिम्मेदार हरय। श्री सिंह देव ह किहीन कि छत्तीसगढ़ म असांति फैलाय के काम कांग्रेस ह करत हे। ए बेरा म भाजपा प्रदेस अध्यक्ष ह कतकोन घटना अउ ओखर कांग्रेस ले जुड़े होय के प्रमाण घलो दीन।
इही बीच, प्रदेस कांग्रेस ह आज बिगड़त कानून व्यवस्था के खिलाफ जिला मुख्यालय म एक दिन के धरना प्रदर्सन घलो करीन।
गोलीकांड
रईपुर के केंद्रीय जेल के बाहिर आज होय गोलीबारी म एक झिन जवान लइका ह घायल होगे। जेला अंबेडकर अस्पताल म भर्ती कराय गेहे। जानबा के अनुसार पुराना विवाद के चलत ए घटना होय हे। उहें, गोलीकांड के आरोपी ह मउका पात भाग निकलिस। ए घटना ह गंज थाना क्षेत्र के हरय।
दुर्घटना-मौत
सक्ति जिला के बोड़ासागर गांव म आज टरक अउ मोटर साइकिल म टक्कर होय ले तीन झिन जवान लइका के मउत होगिस। ए तीनो झिन ह सारंगढ़-बिलाईगढ़ जिला के कोसीर थाना क्षेत्र के जशपुर गांव के रहइया रिहीन अउ एमन ह रायगढ़ जिला के चपले गांव म होवत मड़ई-मेला म घूमे बर जात रिहीन, तभे फगुरम के बोड़ासागर गांव म आगू ले आत टरक ले ओखर मोटर साइकिल टकरा गीस। ए हादसा म गाड़ी म सवार तीनो झिन जवान लइका मन ह गंभीर रूप ले घायल होगे, जेमन ल तुरते डभरा अस्पताल ले जाय गीस। जिहां डॉक्टर मन ह तीनो ल मृत घोसित कर दीन। ऐति, पुलिस ह टरक चलइया के खिलाफ मामला दरज कर लेहे।
उहें, रईपुर-बिलासपुर नेसनल हाइवे म किरना सरगांव करा टायर फटे ले एक ठिन गाड़ी ह अनियंत्रित होके पलट गे, एमा तीन झिन लोगन के मउत होगे, त उहें, चार झिन आने लोगन मन ह घायल होगे हे। जेखर इलाज बिलासपुर सिम्स म चलत हे। जानबा के अनुसार ए गाड़ी म कुल सात झिन लोगन मन सवार रिहीन।
ओति, कोरबा जिला के उरगा थाना क्षेत्र के कुदुरमाल मुख्य मार्ग म एक ठिन तेजी ले आत ट्रेलर ह जवान लइका ल टक्कर मार दीस, जेखर ले ओखर मउका म ही मउत होगे।
ऐति, बालोद जिला के डौण्डीलोहार थाना क्षेत्र म एक बस ह अनियंत्रित होके पलट गे बस म चालक-परिचालक समेत पंद्रह झिन लोगन मन सवार रिहीन। घायल मन ल इलाज बर बालोद जिला अस्पताल म भर्ती कराय गेहे। बताय जात हे कि ए घटना म बस कंडेक्टर के हालत नाजूक बने हे।
हाथी आतंक
कोरबा जिला के कटघोरा वन मंडल म पाछू रतिहा अरसिया गांव म पचास झन हाथी के एक झुण्ड ह जोरदरहा उत्पात मचाय हे। ए बेरा म हाथी मन ह एक घर ल घलो तोड़ डरिन। ए जघा म वन विभाग ह सरलग नजर राखत हे। राष्ट्रीय राजमार्ग एक सौ उनचास म हाथी के झुण्ड ह डेरा डाले हुए हे, जेखर चलत वन विभाग ह अलर्ट जारी करे हे।
उहें, इही जिला के बालको वन परिक्षेत्र के बेला गांव के तीर-तखार म एक झिन हाथी ह किंजरत हे। वन विभाग कोति ले हाथी उपर सरलग नजर राखे जात हे। ऐति, बालको वन परिक्षेत्र अधिकारी मन ह लोगन मन ल जंगल कोति जाय ले मना करे हे। संगेसंग ओमन ल सावधानी बरते बर घलो केहे हे।
छठ पर्व
काली ले सुरू होवइया चार दिन के छठ महापरब के राज्यपाल रमेन डेका ह प्रदेसवासी मन ल बधई दीन हे। राज्यपाल ह किहीन हे कि सुरूज उपास के परब ह हमन ल प्रकृति बर मया के संदेस देथे। छठ पूजा सिरिफ एक ठिन धार्मिक अनुष्ठान ही नइ हरय, बल्कि आस्था अउ बिस्वास के चिन्हारी घलो हवय।
छठ महापरब आयोजन समिति के रईपुर के अध्यक्ष राजेश कुमार सिंह ह बतइन कि काली पांच नवंबर के नहाय खाय के रसम होही। ओमन ह बतइन कि छठ परब रईपुर-बिलासपुर-भिलाई-दुरूग-को
ऐति, महादेव घाट म छठ परब के तीसर दिन सात नवंबर के अंतर्राष्ट्रीय लोकगायिका कल्पना पटवारी, गायत्री यादव, परिणीता राव पटनायक अउ छत्तीसगढ़ी लोकगायक दुकालू यादव ह महादेव घाट म अपन प्रस्तुति दीही।
शराबंदी-प्रस्ताव पारित
कोरबा जिला के ग्राम पंचायत शिवपुर के माईलोगिन मन ह सराबंदी बर एक ठिन नवा पहल करे हे। ए माईलोगिन मन ह ग्राम पंचायत के सभा म सराबंदी बर प्रस्ताव पारित करे हे। ग्राम पंचायत शिवपुर के सरपंच के कहना हे कि जब ले गांव म सराबंदी होय हे, तभे ले नसाखोरी म कमी आय हे। उहें, माईलोगिन मनके कहना हे कि ए प्रस्ताव के जानकारी पुलिस ल दे दे गेहे जउन भी मनखे ह ए नियम ल नइ मानही त फेर पुलिस कोति ले कार्रवाई करे जाही।