छत्तीसगढ़ राज्य स्थापना दिवस के मउका म काली 04 ले 06 नवंबर तक नवा रईपुर अटल नगर म राज्योत्सव अउ राज्य अलंकरण समारोह के आयोजन करे जाही। राज्योत्सव के उद्घाटन कारीकरम म मध्यप्रदेश के मुख्यमंत्री डॉक्टर मोहन यादव मुख्य अतिथि के रूप म सामिल होही। उहें, 06 नवंबर के समापन समारोह म उपराष्ट्रपति जगदीप धनखड़ सामिल होही अउ राज्य अलंकरण समारोह म आने-आने क्षेत्र म सुघ्घर काम करइया लोगन मन ल सम्मानित करही।
राज्योत्सव म ख्याति प्राप्त कलाकार मन ह रंगारंग सांस्कृतिक कारीकरम के प्रस्तुति दीहीं। उहें, शासकीय योजना अउ उपलब्धि के प्रचार-प्रसार बर आने-आने विभाग के प्रदर्सनी लगाय जाही। राज्योत्सव के पहिली दिन काली बॉलीवुड के प्रसिद्ध पार्श्व गायक शान के प्रस्तुति होही। उहें, रिखी क्षत्रीय के टीम डहार ले 12 ठिन लोक नृत्य के झलकी, महेन्द्र चौहान अउ संगी मन डहार ले आदिवृंदम, सुनील सोनी के संगीत अउ उंखर टीम डहार ले पारंपरिक नृत्य अउ विद्या वर्चस्वी डहार ले नाम रामायण के प्रस्तुति दे जाही।
राज्योत्सव मेला ग्राउंड म काली ले राखे गे राज्योत्सव अउ राज्य अलंकरण समारोह म रईपुर ले आयोजन स्थल तक आय-जाय वाला यात्री मन बर बी.आर.टी.एस. बस के सुविधा दे गेहे। ए बस रईपुर ले बिहनिया ग्यारह बजे ले रतिहा नौ बजे तक आधा-आधा घंटा म चलही।
ईव्हीएम-कमीशनिंग
रायपुर नगर दक्षिण विधानसभा उपचुनई म ईव्हीएम मसीन मनके कमीशनिंग के कामबूता 05 नवंबर के सेजबहार स्थित सासकीय इंजीनियरिंग महाविद्यालय म करे जाही। राज्य के मुख्य निर्वाचन पदाधिकारी रीना बाबा साहेब कंगाले ह अभ्यर्थी मन ले निर्धारित बेरा अउ जघा म मौजूद रहिके ईव्हीएम कमीशनिंग प्रक्रिया के अवलोकन करे के अपील करीन हे। कमीशनिंग के दउरान जम्मों ईव्हीएम मसीन मन म एक वोट डालके अउ रेंडम चुने गे 05 प्रतिशत मसीन मन म एक हजार वोट डालके मॉकपोल करे जाही।
दीपक बैज-पत्रकारवार्ता
कांग्रेस अध्यक्ष दीपक बैज ह आज रईपुर स्थित प्रदेस कांग्रेस कार्यालय राजीव भवन म पत्रकार मन ले गोठबात करत राज्य म कानून बेवस्था के बिगड़त स्थिति ल लेके सरकार उपर कतकोन आरोप लगईन। ओमन देवाही तिहार के दउरान रईपुर, दुरूग अउ भिलाई म 11 झिन लोगन मनके हत्या अउ आपराधिक घटना के जिकर करत पुलिस के कार्यप्रणाली उपर सवाल उठईन हे।
बलरामपुर-दुर्घटना
बलरामपुर जिला म पाछु रतिहा होय सड़क हादसा म 08 झिन लोगन मनके मउत होगीस। मिले जानबा के मुताबिक चारपहिया वाहन म सवार होके 08 झिन लोगन मन कुसमी ले लरीमा जावत रिहीन। इही दउरान राजपुर थाना क्षेत्र के लडुआ-धर्मकाटा के तीर चारपहिया गाड़ी ह अन्ते-तन्ते होके खेत म घुस गीस, जेखर ले मउकाच म 07 झिन लोगन मनके मउत होगीस। उहें, वाहन चालक ह इलाज के दउरान दम तोड़ दीस। मृतक मन म एक झिन नाबालिग घलो सामिल हवय।
जवान-घायल
सुकमा जिला के जगरगुंडा साप्ताहिक बाजार म ड्यूटी म तैनात जवान मन उपर आज बिहनिया माओवादी मन हमला कर हथियार ल लूट लीस। ए हमला म दू झिन जवान मन घायल होगीन हवय, जेन मन ल सुघ्घर उपचार खातिर हेलीकॉप्टर ले रायपुर लाय गीस। मिले जानबा के मुताबिक ए हमला माओवादी के स्मॉल एक्शन टीम ह करीस हवय। घायल जवान मन म करतम देवा अउ सोढ़ी कन्ना सामिल हवय। जेमा ले एक जवान के हालत गंभीर बताय जावत हवय। पुलिस ह ए इलाका म सर्च अभियान तेज कर दे हवय अउ माओवादी मनके पतासाजी म जुट गे हवय।
केदारनाथ/यमुनोत्री धाम-कपाट बंद
उत्तराखंड के विश्व प्रसिद्ध ग्यारहवां ज्योर्तिलिंग श्री केदारनाथ धाम अउ यमुनोत्री धाम के कपाट आज भाईदूज के पावन परब म वैदिक मंत्र के संग विधि-विधान ले सीतकाल बर बंद कर दे गे हवय। ए मउका म केदारनाथ म 15 हजार ले जादा श्रद्धालु मन मौजूद रिहीन। ए यात्राकाल म रिकॉर्ड साढ़े 16 लाख ले जादा तीर्थयात्री मन ह केदारनाथ धाम के यात्रा करीन।
भाईदूज
आज भाईदूज के परब पारंपरिक तरीका ले बड़ उछाह के संग मनाय जावत हे। राजधानी रईपुर समेत प्रदेसभर के आने-आने जिला मन म भाईदूज के मउका म बहिनी मन अपन भाई के माथा म तिलक लगाके उंखर उज्जवल भविष्य के कामना करीन। ए मउका म भाई मन घलो अपन बहिनी ल कतकोन उपहार दीन। कार्तिक मास के शुक्ल पक्ष के द्वितीया तिथि म मनाय जाने वाला ए परब ल यम द्वितीया घलो कहे जाथे।
राज्यपाल रमेन डेका अउ मुख्यमंत्री विष्णुदेव साय ह प्रदेशवासी मन ल भाईदूज परब के बधाई अउ अपन सुभकामना दीन हवय।
राज्यपाल रमेन डेका ले आज राजभवन म प्रजापिता ब्रम्हाकुमारी ईश्वरीय विश्वविद्यालय के बहिनी मन ह मुलाकात कर उनला देवारी तिहार के सुभकामना दीन अउ भाईदूज के टीका लगाके उंखर सुघ्घर जिनगी के कामना करीन।
उहें, प्रदेस के आने-आने जिला मन म आज मातर के तिहार घलो बड़ उछाह के संग मनाय जावत हे। ए मउका म कुछु-कुछु जघा मन म अखाड़ा के साधक मन ह आकर्षक करतब घलो दिखईन। गांव के मनखे मन ह देवी-देवता के पूजा-अर्चना कर सुख-समृद्धि के कामना घलो करीन। जानबा के मुताबिक आज के दिन राउत समुदाय के लोगन मन मैदान म गाय के झुंड के बीच जोरदरहा करतब दिखाथे। संगेसंग पारंपरिक लोकनृत्य राउत नाचा घलो करथे। फेर, संझा मड़ई के आयोजन करे जाथे।
जशपुर-चिकित्सा अधिकारी निलंबित
जशपुर जिला के कलेक्टर रोहित व्यास ह स्वास्थ्य सुविधा म लापरवाही बरते के मामला म दोकड़ा के चिकित्सा अधिकारी अनिल कुमार भगत ल निलंबित करे के निरदेस दीन हवय। कलेक्टर ह दोकड़ा के प्राथमिक स्वास्थ्य केन्द्र ल देखे बर पहुंचे रिहीन। इही दउरान उनला मरीज मन ल दे जाय वाला सुविधा म लापरवाही बरते के सिकायत मिलीस। निरीक्षण के दउरान अनिल कुमार भगत ड्यूटी म नइ पाय गीस, जेखर बाद कलेक्टर ह मुख्य चिकित्सा अउ स्वास्थ्य अधिकारी ल ओला निलंबित करे के निरदेस दीन। कलेक्टर ह जम्मों चिकित्सा अधिकारी अउ स्वास्थ्य कर्मचारी मन ल बेरा म केन्द्र म उपस्थित रेहे बर किहीन हवय। संगेसंग स्वास्थ्य केन्द्र परिसर के भीतर अउ बाहिर सी.सी.टी.वी. कैमरा लगाय के बात घलो किहीन हवय।
हाईकोर्ट-हाथी मौत
रायगढ़ जिला के घरघोड़ा इलाका म बीते दिन म 03 हाथी मनके करंट लगे ले होय मौत के मामला ल छत्तीसगढ़ उच्च न्यायालय ह खुदेच संज्ञान म लीन हवय। मुख्य न्यायाधीश रमेश सिन्हा के डिवीजन बेंच काली 04 नवंबर के ए मामला के सुनवाई करही।
गौरतलब हे कि रायगढ़ के चुहकीमार गांव के वन विभाग के नर्सरी म बिजली के तार ले तीन हाथी मनके मउत होगे रिहीस, जेमा छत्तीसगढ़ उच्च न्यायालय ह ए घटना खातिर जनहित याचिका स्वीकार करत खुदेच संज्ञान लीन। जनहित याचिका म राज्य के ऊर्जा सचिव, छत्तीसगढ़ राज्य विद्युत पारेषण कंपनी के प्रबंध निदेशक अउ प्रधान मुख्य वन संरक्षक ल पक्षकार बनाय गे हवय।
छठ पर्व
चार दिवसीय छठ महापरब 05 नवंबर के नहाय-खाय के संग सुरू होही। छठ परब ल लेके रईपुर के खारून नदी के महादेवघाट म जोरदरहा तियारी करे जावत हे। आज बिहनिया छठ महापरब आयोजन समिति के अध्यक्ष राजेश कुमार सिंह अउ सदस्य मन ह महादेव घाट पहुंच के श्रमदान करीन। रईपुर म छठ पूजा तकरीबन 50 ठिन जघा मन म होथे। छठ परब के तीसरइया दिन 07 नवंबर के अंतर्राष्ट्रीय लोक गायिका कल्पना पटवारी, गायत्री यादव, परिणीता राव पटनायक अउ छत्तीसगढ़ी लोक गायक दुकालू यादव महादेवघाट म होवइया आयोजन म अपन-अपन प्रस्तुति दीहीं।