उहें, मुख्यमंत्री ह किहीन कि छत्तीसगढ़ राज्य निर्माण के चौबीस बछर पूरा होवत हे। राज्य बने के बाद छत्तीसगढ़ ह हर क्षेत्र म प्रगति करे हे, ओमन किहीन कि राज्य सरकार आदिवासी, किसान, मजदूर अउ वंचित मनके अधिकार बर लगातार काम करत हे। प्रधानमंत्री नरेंद्र मोदी के नेतृत्व म डबल इंजन के सरकार विकास के लक्ष्य ल तेजी से हासिल करही। मुख्यमंत्री ह प्रदेसवासी मनले अपील करे हे कि स्थापना दिवस के अवसर म आज अपन-अपन घर म दीप जलावय अउ दीपोत्सव के संग राज्योत्सव घलो मनावय।
अइसने नवा रायपुर अटल नगर के राज्योत्सव मेला ग्राउण्ड म चार ले छै नवंबर तक आयोजित होवइया राज्योत्सव अउ राज्य अलंकरण समारोह म रायपुर ले आयोजन स्थल तक अवइया-जवइया मन बर बीआरटीएस बस मनके सुविधा दे गेहे। ए बस मन रायपुर ले बिहनिया ग्यारा बजे ले रतिहा नौ बजे तक हर आधा घंटा के अंतराल म चलही।
राज्य स्थापना दिवस-02
राज्य स्थापना दिवस के मउका म पांच नवंबर के जिला मुख्यालय म होवइया सांस्कृतिक कारीकरम म छत्तीसगढ़ के हर जिला म सांसद, मंत्री अउ विधायक मुख्य अतिथि के रूप सामिल होही। रायपुर जिला म होवइया सांस्कृतिक कारीकरम म मुख्यमंत्री विष्णुदेव साय मुख्य अतिथि होही। मनेन्द्रगढ़-चिरमिरी-भरतपुर जिला म केंद्रीय राज्य मंत्री तोखन साहू , बिलासपुर म उप मुख्यमंत्री अरूण साव, बस्तर म उप मुख्यमंत्री विजय शर्मा, राजनांदगांव म विधानसभा अध्यक्ष डॉक्टर रमन सिंह, सरगुजा म मंत्री रामविचार नेताम, महासमुंद म मंत्री दयालदास बघेल, दुर्ग म मंत्री केदार कश्यप, कोरबा म मंत्री लखनलाल देवांगन, बलौदाबाजार-भाटापारा म मंत्री श्याम बिहारी जायसवाल स्थापना दिवस के अवसर म आयोजित सांस्कृतिक कारीकरम म मुख्य अतिथि के रूप म उपस्थित रइही।
अइसने जांजगीर-चांपा जिला के कारीकरम म मंत्री ओपी चौधरी, रामानुजगंज म मंत्री लक्ष्मी राजवाड़े, सारंगढ़-बिलाईगढ़ म मंत्री टंकराम वर्मा, गरियाबंद म सांसद बृजमोहन अग्रवाल, बालोद म सांसद विजय बघेल, खैरागढ़-गंडई-छुईखदान म सांसद संतोष पाण्डेय मुख्य अतिथि के रूप म उपस्थित रइही।
खेलमंत्री राष्ट्रीय युवा पुरस्कार
केंद्रीय युवा कारीकरम अउ खेल मंत्री डॉक्टर मनसुख मांडविया ह युवा मनले आह्वान करे हे कि प्रतिष्ठित राष्ट्रीय युवा पुरस्कार दू हजार बाईस-तेईस बर आवेदन करय। ए पुरस्कार पंद्रह ले उनतीस बछर आयु वर्ग के लोगन अउ संगठन मनके विकास अउ समाज सेवा के अलग-अलग क्षेत्र म उत्कृष्ट कार्य अउ योगदान बर दे जाथे। पुरस्कार के रूप म व्यक्ति ल पदक, प्रमाण पत्र अउ एक लाख रूपिया नगद अउ संगठन के मामला म तीन लाख रूपिया नगद दे जाथे। राष्ट्रीय युवा पुरस्कार बर आवेदन गृहमंत्रालय के पुरस्कार पोर्टल के जरिया आमंत्रित करे गेहे। आज ले ए महिना के पंद्रह तारीख तक आवेदन करे जा सकत हे।
नमो ड्रोन दीदी
केंद्र सरकार ह केंद्रीय योजना ‘‘नमो ड्रोन दीदी‘‘ के संचालन बर दिसा-निरदेस जारी कर देहे। केंद्रीय कृषि अउ किसान कल्याण मंत्रालय ह दीनदयाल अंत्योदय योजना-राष्ट्रीय ग्रामीण आजीविका मिसन के अंतर्गत एक हजार दू सौ इकसठ करोड़ रूपिया के ए योजना ल स्वीकृति दे रिहीस। ए योजना म महिला मनके स्व-सहायता समूह मन ल ड्रोन उपलब्ध कराय जाथे। योजना म चालू वित्त बछर अउ आगामी वित्त बछर बर चौदह हजार पांच सौ चुनिंदा महिला स्व-सहायता समूह मन ल ड्रोन उपलब्ध कराय के लक्ष्य राखे हे।
दिसा-निरदेस के अनुसार नमो ड्रोन दीदी योजना केंद्रीय स्तर म एक अधिकार प्राप्त समिति संचालित करही। ए समिति म कृषि अउ किसान कल्याण विभाग, ग्रामीण विकास विभाग अउ उर्वरक विभाग के सचिव सामिल होही। ड्रोन अउ उंखर उपकरण मनके लागत के अस्सी प्रतिसत हिस्सा महिला स्व-सहायता समूह मन ल दे जाही, जेखर ले ओमन ड्रोन खरीद सकय। ए सहायता के अधिकतम रासि आठ लाख रूपिया हे। महिला स्व-सहायता समूह के कोनो एक सदस्य ल ड्रोन पायलट के रूप म प्रसिक्षण दे जाही। संगेसंग कृषि पोषक तत्व अउ कीटनासक मनके उपयोग के अलग से प्रसिक्षण दे जाही।
रेलवे-टिकट आरक्षण
रेलवे टिकिट के अग्रिम आरक्षण के नवा नियम आज ले लागू होगे हे। रेलवे ह अग्रिम आरक्षण के समय-सीमा एक सौ बीस दिन ले घटाके साठ दिन कर देहे। हालाकि, ए बछर इकतीस अक्टूबर तक करे गे सबो आरक्षित टिकिट बरकरार रइही। रेल मंत्रालय के अनुसार साठ दिन पहिली के आरक्षण ले टिकिट जमा करे के संभावना कम होही अउ यात्री मन ल जादा टिकिट मिल सकही।
स्पेशल ट्रेन
रेलवे डहार ले बिलासपुर ले हड़पसर पुणे स्टेसन बर बिलासपुर-हड़पसर-बिलासपुर स्पेसल ट्रेन एक फेरा बर चलाय जाही। ए ट्रेन बिलासपुर ले हड़पसर बर आठ नवंबर के रवाना होही। उहें, नौ नवंबर के हड़पसर ले बिलासपुर के बीच चलही।
बतादन कि दीपावली अउ छठ पूजा के दउरान यात्री मनके सुविधा बर भारतीय रेल डहार ले सात हजार ले जादा बिसेस गाड़ी चलाय जात हे।
आपसी विवाद-आगजनी
रायपुर जिला के सकरी गांव म पाछू रतिहा दू परिवार के बीच आपसी विवाद म एक ठन घर म आगजनी के घटना सामने आय हे। ए दउरान भीड़ ह घर के बाहिर खड़े कुछ गाड़ी अउ दूसर समान मन म तोड़फोड़ घलो करीन। स्थानीय प्रशासन ल ए घटना के जानकारी दे दे गीस। एखर बाद प्रशासन ह लोगन मन ल सांति बनाय राखे के अपील करे हे अउ दूनो पक्ष ल आपस म समझौता करे बर घलो केहे हे।
हत्या
राजधानी रायपुर म देवारी के दिन पाछू चौबीस घंटा के दउरान तीन झन के हत्या के मामला सामने आय हे। जिला के देवारपारा म नसा म धूत बदमास मन एक झन युवक के हत्या कर दीन। उहें, अज्ञात लोगन मन ह एक झन ड्राइवर के हत्या कर सव ल सड़क किनारे फेक दीन। उहें, एक आने घटना म एक झन बुजुर्ग के हत्या कर दे गेहे।
गोर्वधन पूजा
गोवर्धन पूजा अउ अन्नकूट के तिहार काली मनाय जाही। अब तक लक्ष्मी पूजा के दूसरइया दिन गोवर्धन पूजा अउ अन्नकूट के तिहार मनाय के परंपरा रेहे हे लेकिन ए बखत ए तिहार लक्ष्मी पूजा के एक दिन बाद मनाय जाही। गोवर्धन पूजा के दिन गौमाता के पूजा करे जाथे अउ सोहई बांधके खिचड़ी खवाय जाथे। उहें, प्रदेस के अलग-अलग जघा म गौरा-गौरी के विर्सजन घलो करे जात हे।
अउ अब थोरकुन समाचार सार म –
– दुरूग जिला के वैशाली नगर के थाना क्षेत्र म घर म झालर लगावत छत म चढ़े एक झन युवक हाई टेंसन लाइन के चपेट म आगे, जेखर ले गंभीर अवस्था म अस्पताल ले जाय गीस। जिहां इलाज के दउरान युवक के मउत होगे।
– कोरबा जिला के रामपुर स्थित परिवार परामर्स केंद्र म पति-पत्नी के काउंसलिंग के दउरान पति ह जहर के सेवन कर लीस, जेखर ले ओखर मउत होगे।
अउ
– सक्ति पुलिस ह जिला म अलग-अलग बारह जघा चोरी के घटना ल अंजाम देवइया चार झन चोर अउ एक खरीददार ल गिरफ्तार करे हे। ए सबो आरोपी मन ल न्यायिक हिरासत म भेज दे गेहे।