श्री मोदी ह देसवासी मन ले अनुरोध करीन हे कि सजग रहय अउ भारत के एकता म विविधता के भावना ल आत्मसात करय। प्रधानमंत्री ह किहीन कि भारत एक प्रगतिसील, समावेसी अउ विवेकसील राष्ट्र हवय जउन अनिश्चित वेश्विक परिस्थिति म तेजी ले विकास के रद्दा म आगू बढ़त हवय।
देस ल एक सूत्र म जोड़े बर लौह पुरूष के योगदान ल याद करत प्रधानमंत्री ह किहीन कि सरदार पटेल के एक सौ पचीसवां जयंती अवइया दू बछर तक देस म मनाय जाही। प्रधानमंत्री ह आज बिहनिया एकता नगर म स्टेचु ऑफ यूनिटी म सरदार वल्लभभाई पटेल ल पुष्पांजलि अर्पित करीन। ओमन लोगन मन ल एकता दिवस के सपथ दिलाय के संगेसंग एकता दिवस परेड के निरीक्षण करीन।
सरदार वल्लभभाई पटेल-जयंती
आज जम्मो देस सरदार वल्लभभाई पटेल के जयंती म उनला श्रध्दासुमन अर्पित करत हवय। लौह पुरूष के जयंती ‘‘राष्ट्रीय एकता दिवस‘‘ के रूप म मनाय जाथे। राष्ट्रपति द्रौपदी मुर्मु अउ उपराष्ट्रपति जगदीप धनखड़ आज बिहनिया नई दिल्ली के पटेल चौक म सरदार वल्लभभाई पटेल के मूर्ति म फूल माला चढ़ाइन।
उहें, छत्तीसगढ़ के मुख्यमंत्री विष्णुदेव साय ह आज जशपुर जिला के मुख्यमंत्री कार्यालय बगिया म आयोजित कारीकरम म सरदार वल्लभभाई पटेल ल नमन करीन। ओमन किहीन कि हम सबो के ए कर्तव्य हवय कि मिलजुल के अपन प्रदेस अउ देस के प्रगति म अपन योगदान देवय।
राष्ट्रीय एकता दिवस म आज विधानसभा सचिवालय म सचिव-दिनेश शर्मा ह अधिकारी मन ल सपथ घलो दिलाइन। एखरे संग विधानसभा परिसर म आयोजित कारीकरम म सरदार पटेल ल श्रध्दांजलि अर्पित करे गीस।
राज्यपाल-मोबाइल मेडिकल यूनिट
राज्यपाल रमेन डेका ह काली राजभवन म छत्तीसगढ़ रेडक्रास सोसायटी के 4 ठिन मोबाइल मेडिकल यूनिट के सुभारंभ करीन अउ ओला हरा झंडी दिखाके आने-आने जिला मन म भेजे गीस। ए मोबाइल वैन राज्य के 4 ठिन जिला-मोहला-मानपुर, कांंडागांव, सारंगड़-बिलाईगढ़ अउ मनेन्द्रगढ़-चिरमिरी-भरतपुर जिला मन म अपन सेवा देही।
ए मउका म राज्यपाल ह किहीन कि मोबाइल मेडिकल यूनिट डहार ले बिसेसकर ग्रामीण इलाका म रहइया मनखे मन ल सुघ्घर स्वास्थ्य सुविधा मिलही। राज्यपाल ह खुसी जाहिर करत किहीन कि ए मोबाइल मेडिकल यूनिट अइसन इलाका म जाही, जिहां स्वास्थ्य सेवा के पहुंचना बहुत कठिन हे अउ स्थानीय लोगन मन ल डॉक्टरी इलाज के जरूरत जादा हवय।
जानबा के मुताबिक मोबाइल युनिट म हेल्थ एटीएम मसीन लगाय गे हवय, जेखर ले लोगन मन ल स्वास्थ्य जांच रिपोर्ट जल्दीच मिल सकय।
राज्य स्थापना दिवस
छत्तीसगढ़ राज्य गठन के काली 24 बछर पूरा होवत हवय। ए मउका म काली प्रदेस के जम्मो जिला मुख्यालय अउ प्रमुख नगर मन म रंग-बिरंगा झालर लाइट अउ दीया बारे जाही। राज्यपाल रमेन डेका, मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह ह राज्य स्थापना दिवस के मउका म जम्मो प्रदेसवासी मन ल अपन बधई अउ सुभकामना दीन हवय। अपन संदेस म राज्यपाल ह किहीन हे कि ‘‘राज्य स्थापना दिवस‘‘ हमर प्रदेस के संस्कृति, समृध्दि अउ विकास के संकल्प ल एक ठिन नवा दिसा देवय के मउका हवय। ओमन सबो प्रदेसवासी मन ले किहीन हे कि जम्मो मनखे मन ल एकजुट होके राज्य के विकास खातिर अपन योगदान देवय के संकल्प लेना चाही।
उहें, विधानसभा अध्यक्ष डॉक्टर रमन सिंह ह किहीन हे कि छत्तीसगढ़ आज हम सबके मिलजुलके करे गे प्रयास सेति प्रगति करत हवय।
राज्यपाल-पुलिस अधिकारी मुलाकात
राज्यपाल रमेन डेका ले काली राजभवन म भारतीय पुलिस सेवा के परिवीक्षाधीन अधिकारी मन ह मुलाकात करीन। ए मउका म राज्यपाल ह किहीन कि पुलिस ल आम जनता ले मानवीय दृष्टिकोण ल धियान म राखत संवेदन सीलता के संग बेवहार करना चाही। ओमन किहीन कि पुलिस अधिकारी मन ल घलो थाना म आय पीड़ित मनखे मनके सहायता करे खातिर तियार रखना चाही।
दीपावली
कार्तिक अमावस्या के दिन मनाय जाने वाला दीया के तिहार देवारी आज छत्तीसगढ़ समेत जम्मों देसभर म बड़ उछाह के साथ मनाय जावत हे। ए तिहार अंधकार अउ निरासा ल दूर भगा के लोगन मनके जिनगी म सुख, सांति अउ समृद्धि लाय के तिहार हरय। देवारी के मउका म आज लोगन मन के घर-बार म दीया अउ बिजली के रंग-बिरंगा झालर मनके रोसनी ह जगमगावत हवय। अइसन मान्यता हवय कि लंका म जीत हासिल करे के बाद भगराम राम के अयोध्या पहुंचे के खुसी म लोगन मन ह दीया बार के उंखर सुवागत करे रिहीन। एखरे सेती ए खुसी म आज के दिन देवारी तिहार मनाय जाथे।
देवारी के मउका म ए बेरा छत्तीसगढ़ के आने-आने शहर अउ गांव मन म लोगन मन लक्ष्मी पूजा के तियारी करत हवय। घर अउ अंगना म दीया बार के रोसन करे गे हवय। घर के बाहिर सुघ्घर रंगोली घलो बनाय गे हवय, अउ लइका मन ह आतिसबाजी घलो सुरू कर दे हवय।
देवारी के मउका म आज बिहनिया ले लोगन मन खरीददारी करत रिहीन। बाजार म ग्राहक मनके भीड़ देखे ल मिलत हे। लोगन मन मिठाई, पटाखा अउ कपड़ा के संगेसंग मौसमी फल के घलो खरीदी करत हवय। उहें, पूजा बर देवी लक्ष्मी के आकर्षक मूर्ति अउ अपन घर ल सजाय के जिनिस घलो खरीदत हवय। समृध्दि के प्रतीक माने जाय वाला धान के बाली ले बने झालर, याने फाता के मांग घलो रिहीस। ज्योति परब देवारी म लोगन मन ह सोना-चांदी के संगेसंग बर्तन के घलो जम के खरीददारी करत हवय।
राष्ट्रपति द्रौपदी मुर्मू, उप राष्ट्रपति जगदीप धनखड़ अउ प्रधानमंत्री नरेन्द्र मोदी के संगेसंग छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह देसवासी मन ल देवारी के मउका म अपन बधाई अउ सुभकामना दीन।
पटाखे-सावधानी
देवारी तिहार के मउका म पटाखा फोड़े के दउरान होवइया हादसा ले बांचे खातिर सावधानी बरते के सलाह डॉक्टर मन ह दीन हवय। रईपुर के आंखी रोग के बिसेसज्ञ डॉक्टर दिनेश मिश्रा ह आकाशवाणी समाचार ले गोठबात करत किहीन कि दुर्घटना ले बांचे खातिर पटाखा हमेसा खुला जघा म ही फोड़ना चाही।
पेंशनभोगी-अतिरिक्त किश्त
पेंशन अउ पेंशनर कल्याण विभाग ह केंद्र सरकार के करमचारी अउ पेंशनभोगी मन खातिर महंगाई भत्ता अउ राहत के 3 प्रतिसत उपराहा किस्त देवय के अधिसूचना जारी कर दे हवय जउन ह ए बछर एक जुलाई ले प्रभावी माने जाही। केंद्रीय मंत्रिमंडल ह हाल ही म 3 प्रतिसत उपराहा किस्त के मंजूरी दे रिहीस। एखर बाद महंगाई भत्ता मूल वेतन या पेंशन के 50 प्रतिसत ले बाढ़के 53 प्रतिसत हो जही।
रेलवे-स्पेशल ट्रेन
यात्री मनके सुवधि ले देखत रेलवे डहार ले सनतनगर-रायपुर के बीच तीन फेरा करे खातिर देवारी अउ छठ पूजा स्पेसल ट्रेन के सुविधा दे जावत हे। ए ट्रेन सनतनगर ले रायपुर बर सात नवंबर, चौदह नवंबर अउ आज रवाना होही। उहें, रायपुर ले सनतनगर बर एक, 8 अउ 15 नवंबर के चलही। ए ट्रेन दुरूग , राजनांदगांव, गोंदिया, नागपुर अउ सिकंदराबाद म रूकत हुए जाही।