प्रधानमंत्री नरेंद्र मोदी ह आज धनवंतरी जयंती अउ नौवां आयुर्वेद दिवस के मउका म नई दिल्ली म करीबन बारह हजार आठ सौ पचास करोड़ रूपिया के लागत वाले स्वास्थ्य क्षेत्र ले जुड़े कतकोन परियोजना मनके उद्घाटन अउ सिलान्यास करीन। ए परियोजना म छत्तीसगढ़ के बिलासपुर म सरकारी मेडिकल कालेज म एक ठिन सुपर स्पेशियलिटी ब्लॉक के उद्घाटन घलो सामिल हे। एला दू सौ करोड़ रूपिया के खर्चा ले बनाय गेहे।
उहें प्रधानमंत्री ह रईपुर म बनइया सौ बिस्तर के केंद्रीय योग अउ प्राकृतिक चिकित्सा अनुसंधान संस्थान के सिलान्यास घलो करीन। एला नब्बे करोड़ रूपिया के खर्चा ले बनाय जाही। राज्य सरकार ह ए संस्थान बर दस एकड़ के भूईयां विभाग ल दे हवय। ए ह छत्तीसगढ़ के पहिली योग अउ प्राकृतिक चिकित्सा अनुसंधान केंद्र अउ अस्पताल होही। एमा मोटापा, प्री डायबिटीज, गठिया जइसन बीमारी के ईलाज करे जाही। संगेसंग प्रधानमंत्री ह आयुष्मान भारत प्रधानमंत्री जनआरोग्य योजना के तहत सत्तर साल अउ एखर ले जादा उमर के जम्मो सियनहा मनखे मन बर स्वास्थ्य कवरेज के बिस्तार के सुभारंभ करीन।
ए मउका म प्रधानमंत्री ह किहीन कि देस के लोगन मन ह जतका जादा स्वस्थ्य रइही देस के बिकास ह ओतके जादा होही।
प्रधानमंत्री-रोजगार मेला
प्रधानमंत्री नरेंद्र मोदी ह किहीन हे कि केंद्र सरकार ह आत्मनिर्भर भारत के दिसा म बड़का काम करे हे अउ अंतरिक्ष ले लेके इलेक्ट्रीक गाड़ी के संगेसंग हरेक जघा म मेक इन इंडिया ल बढ़ावा देहे। प्रधानमंत्री ह किहीन कि भारत विश्व के तीसर सबले बड़का अर्थव्यवस्था बने कोति आगू बाढ़त हे। प्रधानमंत्री ह आज कतकोन सरकार विभाग अउ संगठन मन म इंक्यावन हजार ले जादा नवा नियुक्त युवा मन ल नियुक्ति पत्र दीन। ओमन किहीन कि आज हर सेक्टर के उद्योग मन ल बढ़ावा मिलत हे। एखर ले अलग-अलग फिल्ड के युवा मन बर नवा मउका बनत हे। देस के चालीस जघा म रोजगार मेला आयोजित करे गीस। केंद्र सरकार के आने-आने मंत्रालय अउ विभाग मन म नवा नियुक्त लोगन मन ल करमयोग के माध्यम ले प्रसिक्षण लेके मउका मिलिस।
उपचुनाव-नामवापसी
रईपुर नगर दक्षिण विधानसभा सीट बर होवइया उपचुनई म नाम वापसी के काली आखिरी दिन हरय। एखर पहिली आज तीन झिन प्रत्यासी मन ह अपन नाव वापिस ले लीन। जम्मो बांकी प्रत्यासी मन ल काली चुनाव चिन्हा बांटे जाही।
ऐति, कांग्रेस अउ भारतीय जनता पार्टी ह अपन प्रचार-प्रसार जोरदरहा ढंग ले सुरू कर देहे।
मतदाता सूची-संक्षिप्त पुनरीक्षण
भारत निर्वाचन आयोग ह मतदाता सूची के बिसेस संक्षिप्त पुनरीक्षण बर कारीकरम जारी करे हे। जेमा आज निर्वाचक नामावली के प्रारंभिक प्रकासित करे गीस, जेखर बर आयोग ह दावा आपत्ति अट्ठाईस नवंबर तक मंगाय हे। मुख्य निर्वाचन पदाधिकारी कार्यालय म राजनीतिक दल मनके प्रतिनिधि मनके संग होय बइठका म बिसेस संक्षिप्त पुनरीक्षण मिसन कारीकरम के जानबा दे गीस। अवइया जनवरी, अप्रैल, जुलाई अउ अक्टूबर के पहिली तारिख के अट्ठारा बछर पूरा करइया युवा मन मतदाता सूची म नाम जोड़ाय बर अर्जी कर सकथे। दावा आपत्ति पाय बर नौ अउ दस नवंबर के संगेसंग सोलह अउ सत्रह नवंबर के जम्मो मतदान केंद्र मन म बिसेस सिविर लगाय जाही। पात्र लोगन मन वोटर्स हेल्प लाइन ऐप के माध्यम ले घलो अर्जी कर सकथे। छै जनवरी के मतदाता सूची के आखिरी प्रकासन होही।
रन फॉर-युनिटी
भारत रत्न सरदार वल्लभभाई पटेल के जयंती के सुरता म आज देस के संगेसंग प्रदेस म घलो रन फॉर यूनिटी के आयोजन करे जात हे। मुख्यमंत्री विष्णुदेव साय ह राजधानी रईपुर के तेलीबांधा तरिया म होय रन फॉर यूनिटी दउड़ म सामिल होइन अउ राष्ट्र के एकता अखंडता बर दउड़ लगइन। मुख्यमंत्री ह ए दउरान एकता दउड़ ल झंडा देखाके रवाना करीन।
प्रदेस के आने जिला मन म घलो सरदार वल्लभभाई पटेल के जयंती के सुरता म रन फॉर यूनिटी के कारीकरम होइस। जेमा कतकोन लोगन मन सामिल होइन। लोगन मन ल देस के एकता, अखंडता अउ सुरक्षा ल बने राखे बर राष्ट्रीय एकता के सपथ देवाय गीस।
माओवादी-गिरफ्तार
सुकमा जिला के भेज्जी अउ जगरगुण्डा थाना क्षेत्र म आने-आने मामला म सामिल होय उन्नीस झिन माओवादी मन ल पुलिस अउ सुरक्षा बल मन ह गिरफ्तार करे हे। गिरफ्तार माओवादी म तीन झिन उपर एक-एक लाख रूपिया के इनाम राखे गे रिहीस। पांच झिन माओवादी ल भेज्जी थाना क्षेत्र ले अउ चौदह झिन माओवादी मन ल जगरगुण्डा थाना क्षेत्र ले गिरफ्तार करे गेहे। ए माओवादी मन के तीर ले जिलेटिन राड, कोडेक्स वायर अउ डेटोनेटर के संगेसंग बिस्फोटक जिनिस बरामद करे गेहे। भेज्जी ले गिरफ्तार माओवादी मन ह जनमिलिसिया सदस्य के रूप म दस बछर ले जादा बेरा ले सक्रिय रिहीन।
ईडी-छापा
प्रवर्तन निदेशालय-ईडी के टीम ह छत्तीसगढ़ अउ झारखंड म सराब घोटाला के मामला म एके संघरा छापामारी करे हे। ए कार्रवाई म रईपुर स्थित होटल कारोबारी अनिल राठौर के घर म आज बिहनिया छापा मारे गीस।
जानबा के मुताबिक ए मामला म ईडी के टीम ह रांची म झारखंड के आईएएस अधिकारी विनय चौबे अउ उत्पाद विभाग के संयुक्त सचिव गजेन्द्र सिंह के संगेसंग कतकोन रिस्तेदार के घर म घलो छापा मारिन। सराब घोटाला मामला म रईपुर के आर्थिक अपराध अन्वेसन ब्यूरो ईओडब्ल्यू ह अनवर ढेबर, ए.पी.त्रिपाठी, अनिल टुटेजा, अरविंद सिंह के संगेसंग आने सात झिन लोगन मन ल आरोपी बनाय हे। एखर मन उपर धोखाधड़ी अउ आपराधिक साजिस के धारा मन म एफआईआर दरज करे गेहे।
ठगी-अंतर्राज्यीय गिरोह
मुंगेली पुलिस ह पंद्रह लाख रूपिया के ऑनलाइन ठगी करइया अतंर्राज्यीय ठग गिरोह के एक झिन माईलोगिन के संगेसंग तीन झिन सदस्य मन ल दिल्ली ले गिरफ्तार करे हे। आरोपी मन के तीर ले चार लाख बीस हजार रूपिया नगद अउ छै ठिन मोबाइल फोन जब्त करे हे। ठग गिरोह म सामिल पति-पत्नी ह फर्जी पता अउ नकली आईडी दिखाके कतकोन बैंक मन म खाता खुलवाय हवय। ओमन फर्जी सिमकार्ड ले फोन करके लोगन मन ल ठगत रिहीन।
करंट-मौत
मुंगेली जिला के सरगांव थाना क्षेत्र म स्थित एक ठिन पेट्रोल पंप म लाईट वाले झालर लगात बेरा हाईटेंसन तार के चपेट म आय ले चार झिन मनखे झुलस गे। एमा ले तीन झिन नाबालिक लइका मनके मउकच म मउत होगे। उहें, एक झिन आने मनखे गंभीर रूप ले घायल हे, जेखर ईलाज सिम्स अस्पताल म चलत हे। ए मामला म पेट्रोल पंप के संचालक उपर अपराध दरज करे गेहे। पुलिस ए मामला के जांच करत हे।
धनतेरस
छत्तीसगढ़ के संगेसंग पूरा देस म धनतेरस परब के तिहार आज भक्तिभाव अउ उछाह के संग मनाय जात हे। धनतेरस के संगेसंग आज ले पांच दिन तक चलइया देवारी तिहार सुरू होगे। आज के दिन रूपिया पइसा के देवता कुबेर अउ सरीर ह स्वस्थ्य राहय एखर बर आयुर्वेद के देवता धनवंतरी भगवान के पूजा करे जाथे। धनतेरस के परब कार्तिक कृष्ण पक्ष के त्रयोदसी के दिन मनाय जाथे। आज प्रदेस के बाजार मन म जिनिस मनके खरीददारी बर अब्बड़ भीड़ बाड़ गेहे।
राज्यपाल रमेन डेका, मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह ह प्रदेस के लोगन मन ल धनतेरस परब के बधई अउ सुभकामना दे हवय।