प्रधानमंत्री नरेंद्र मोदी ह डिजिटल अरेस्ट उपर संसो जताय हवय। आज आकाशवाणी ले ‘‘मन की बात‘‘ कारीकरम म किहीन कि कोनो भी मनखे ह कानून के हवाला देके डिजिटली अरेस्ट नइ करे जा सकय। ओमन किहीन कि डिजिटल अरेस्ट के नांव उपर करे जात धोखाधड़ी ल रोके बर जम्मो जांच एजेंसी मन ह मिलके काम करत हे। एखर बर नेशनल साइबर कोऑर्डिनेसन सेंटर बनाय गेहे। प्रधानमंत्री ह किहीन कि डिजिटल अरेस्ट के नांव म होवत स्कैम ले बचे बर जरूरी हे कि जम्मो लोगन मन जागरूक रहय। मन की बात म प्रधानमंत्री ह किहीन कि हर वर्ग अउ उमर के मनखे मन ह डिजिटल अरेस्ट के सिकार होय हे। ओमन लोगन मन ले अपील करीन कि अइसन फर्जी काल आय म झन डर्रावय।
आज मन की बात कारीकरम म प्रधानमंत्री ह विश्व एनिमेसन दिवस म भारत के एनिमेसन ल दुनिया म नवा क्रांति बतइन। प्रधानमंत्री ह किहीन कि अब एनिमेसन ह अइसन उद्योग बन गेहे, जउन ह अउ दूसर उद्योग मन ल घलो टक्कर देवत हे।
मन की बात-02
प्रधानमंत्री ह आत्मनिर्भर भारत अभियान के सफलता उपर खुसी जतइन। ओमन किहीन कि ए अभियान देस के सामूहिक चेतना के अंग बन गेहे। कभू दुनिया म सबले जादा रक्षा के सामान खरीदइया भारत आज खुद पच्यासी ठन देस मन ल रक्षा ले जुड़े समान मन ल बेचत हे। प्रधानमंत्री ह लोगन मनले नवाचार अउ आत्मनिर्भर भारत ले जुड़े उदाहरण सोसल मीडिया म साझा करे के अपील करीन। अभी के तिहार के बेरा म जिनिस मन ल बिसावत बेरा वोकल फॉर लोकल मंत्र ल धियान म राखे के अपील करीन। ओमन किहीन कि एसो दू झिन महान नायक सरदार पटेल अउ भगवान बिरसा मुंडा के एक सौ पचासवां जयंती हे।
मन की बात कारीकरम म प्रधानमंत्री ह फिट इंडिया के बारे म घलो बात करीन। श्री मोदी ह एसो इकतीस अक्टूबर के देवारी तिहार के दिन सरदार पटेल के जयंती के घलो जीकर करीन। ओमन किहीन कि देवारी तिहार के सेति रन फॉर यूनिटी एसो इकतीस अक्टूबर के जघा उनतीस अक्टूबर के मनाय जाही। प्रधानमंत्री ह अपन मन की बात कारीकरम म धनतेरस, देवारी तिहार, छठ पूजा अउ गुरूनानक जयंती के सुभकामना दे हवय।
मन की बात-नारायणपुर
प्रधानमंत्री ह ‘‘मन की बात‘‘ कारीकरम के आज के अपन एक सौ पंद्रहवां कड़ी म छत्तीसगढ़ के नारायणपुर जिला के देवगांव के लोक कलाकार बुटलूराम माथरा के घलो जिकर करीन। ओमन बतइन कि पाछू चार दसक ले अबूझमाड़िया जनजाति के सुघ्घर लोक कला ल बचाय अउ ओला आगू बढ़ाय बर बुटलूराम ह सरलग परयास करत हे।
उहें, आकाशवाणी समाचार ले गोठबात करत बुटलूराम माथरा ह बतइन कि भारत सरकार के आने-आने योजना मनके फायदा उठावत ओमन केंद्र सरकार के बेटी पढ़ाओ-बेटी बचाओ, हर घर तिरंगा, मेरा माटी मेरा देस जइसन अभियान ल जम्मो लोगन तक पहुंचाय म अपन योगदान देवत हे।
ऐति मुख्यमंत्री विष्णुदेव साय ह प्रधानमंत्री डहार ले लोक कला ल बचाय अउ आगू बढ़ाय म लगे नारायणपुर के बुटलूराम माथरा के तारीफ करे उपर खुसी जताय हे।
प्रधानमंत्री-सिम्स/चिकित्सा संस्थान
प्रधानमंत्री नरेंद्र मोदी ह उनतीस अक्टूबर के वीडियो कॉन्फ्रेंसिंग के माध्यम ले बिलासपुर जिला के सुपर स्पेसियलिटी अस्पताल-सिम्स के लोकार्पण अउ केंद्रीय योग प्राकृतिक चिकित्सा अनुसंधान संस्थान के सिलान्यास करही। दू सौ करोड़ रूपिया के लागत ले तियार ए सिम्स अस्पताल म दू सौ चालीस बिस्तर हवय। सिम्स अस्पताल तीन चरण म सुरू होही। पहिली चरण म ओपीडी, दूसर चरण म वार्ड आईसीयू, डायलिसिस यूनिट अउ तीसर चरण म कैथ लैब, ओटी, हार्ट अउ लंब के मसीन सुरू होही। ए अस्पताल के सुरू होय ले सरगुजा अउ बिलासपुर संभाग के मरीज मन ल रईपुर आय बर नइ पड़ही।
केंद्र-परामर्श
केन्द्र सरकार ह सोसल मीडिया कोति ले कतकोन जघा म बिस्फोटक जिनिस होय के झूठा धमकी दे उपर रोक लगाय बर एक ठिन परामर्स जारी करे हे। सरकार ह सोसल मीडिया म अइसन धमकी देवइया मन ल तुरते हटाय अउ अधिकारी मनके संग मदद करे के निरदेस दे हे। इलेक्ट्रानिकी अउ सूचना प्रौद्योगिकीय मंत्रालय ह किहीन हे कि सोसल मीडिया के माध्यम मन ल सूचना प्रौद्योगिकी अधिनियम दू हजार, सूचना प्रौद्योगिकी नियम दू हजार इक्कीस अउ भारतीय न्याय संहिता दू हजार तेइस के पालन करना जरूरी होही।
नामांकन-जांच
रईपुर नगर दक्षिण विधानसभा उपचुनई बर काली अट्ठाईस अक्टूबर के नामांकन पत्र मनके जांच करे जाही। ए उपचुनई म छियालिस झिन उम्मीदवार मन नामांकन दाखिल करे हे। उम्मीदवार मन तीस अक्टूबर तक अपन नामांकन वापिस ले सकही। वोट तेरह नवंबर के डारे जाही।
जानबा के मुताबिक भारतीय जनता पार्टी ह सुनील सोनी ल, त उहें, कांग्रेस ह आकाश शर्मा ल अपन प्रत्यासी बनाय हे।
बलरामपुर-पुलिसकर्मी लाइन अटैच
बलरामपुर जिला म कथित रूप ले पुलिस कस्टडी म एक झिन एनएचएम स्वास्थ्यकर्मी के मउत के बाद पुलिस अधीक्षक ह प्रधान आरक्षक के संग आठ झिन पुलिस कर्मी मन ल लाइन अटैच कर देहे। एखर पहिली ए मामला म बलरामपुर थाना म पदस्थ थाना प्रभारी अउ एक झिन आने आरक्षक ल घलो निलंबित कर दे रिहीन।
ऐति, मुख्यमंत्री ह बलरापुर के घटना ल लेके किहीन कि ए मामला के जांच करे जात हे।
नारायणपुर-सुरक्षा कैम्प
नारायणपुर जिला के गारपा गांव म ‘‘जन सुविधा अउ सुरक्षा कैम्प‘‘ बनाय गेहे। पुलिस कैम्प के निरीक्षण के दउरान पुलिस अधीक्षक प्रभात कुमार अउ एसडीएम वासु जैन ह गांव के लोगन मनके संग पढ़इया लइका मन ले मिलिन अउ ओमन इंहा के लोगन मनके समस्या ल सुन के जल्दी निपटारा करे के बात किहीन। संगेसंग गांव के जुन्ना स्कूल, ग्राम पंचायत भवन, अस्पताल अउ आने सरकारी भवन मन ल जल्दी ठीक-ठाक करे के बात किहीन। पुलिस अधीक्षक ह किहीन कि ए कैम्प के खुले ले ए क्षेत्र म माओवादी विरोधी अभियान के संगेसंग बिकास काम म घलो मदद मिलही। पुलिस कैम्प खुले के बाद बीस झिन परिवार के सदस्य मन ह गायत्री मंदिर म पूजा-पाठ करीन। बछर दू हजार तीन म ए गांव ले बीस ले जादा परिवार मन ल माओवादी मन ह भगा दे रिहीन, जउन मन अब वापिस लहुट गेहे।
दीवाली स्पेशल ट्रेन
देवारी तिहार के दउरान रेलगाड़ी मन म होवइया उपराहा भीड़ ल कम करे अउ यात्री मनके सुविधा बर बिलासपुर लोकमान्य तिलक टर्मिनल के बीच एक फेरा बर दीवाली स्पेसल ट्रेन के सुविधा दे जात हे। ए रेलगाड़ी बिलासपुर ले लोक मान्य तिलक टर्मिनल बर उनतीस अक्टूबर के छूटही। अइसने तीस अक्टूबर के ए रेलगाड़ी लोकमान्य तिलक टर्मिनल ले बिलासपुर बर छुटही।
अउ अब मौसम के हाल…
मौसम विभाग ले मिले जानबा के मुताबिक एक ठिन उपरी हवा के चक्रीय चक्रवाती घेरा तटीय ओडिसा के उपर बने हे, जेखर परभाव ले आवत नमी के सेति प्रदेस के दक्षिण छत्तीसगढ़ म काली गरज-चमक के संग हल्का बरसा हो सकथे।
अउ अब थोरकुन समाचार सार म –
– मुख्यमंत्री विष्णुदेव साय के अगुवई म काली अट्ठाईस अक्टूबर के मंत्रालय म राज्य मंत्रिपरिषद मनके बइठका होही।
– बिलासपुर जिला के तखतपुर स्थित सकरी पूर्व माध्यमिक स्कूल म छात्रा मनले अस्लील हरकत के आरोप म एक झिन सिक्षक ल निलंबित कर दे गेहे।
– सक्ति जिला के पिसौद गांव म पाछू तेइस अक्टूबर के उन्नीस झिन स्कूली लइका मन ल ले जात एक ठिन वेन ह सोन नदिया म गिर गे रिहीस, ए लइका मन ल बचइया चार झिन युवक मन ल आज हसौद थाना पुलिस ह सम्मानित करीन।
अउ
– जांजगीर-चांपा जिला के बुड़गहन गांव म सराब पिये के बाद दू झिन मनखे के मउत होगे।