राष्ट्रपति द्रौपदी मुर्मु ह अपन छत्तीसगढ़ दउरा के दूसर दिन आज आईआईटी भिलाई अउ आयुष विश्वविद्यालय नवा रईपुर के दीक्षांत समारोह म सामिल होइन।
राष्ट्रपति आईआईटी भिलाई के तीसर अउ चौथा दीक्षांत समारोह म सात झन विद्यार्थी मन ल स्वर्ण पदक अउ बछर दू हजार तेइस अउ चौबीस म स्नातक करइया तीन सौ छियानवे विद्यार्थी मन ल उपाधि प्रदान करीन।
ए मउका म राष्ट्रपति ह किहीन कि औपचारिक सिक्षा ग्रहण करे के अंत होवत हे, फेर पढ़े अउ सीखे के इच्दा कभू खतम नइ होना चाही। ओमन किहीन कि भिलाई आईआईटी परिसर ल आधुनिक सिक्षा अउ अनुसंधान सुविधा के संग विकसित करे गेहे अउ एला बनाय म प्राकृतिक संसाधन के उपयोग करे गेहे। राष्ट्रपति ह किहीन कि आदिवासी मनके जीवन सैली ले सीखे के हमन ह भारत के विकास म अपन योगदान दे सकत हन। श्रीमती मुर्मु ह किहीन कि आईआईटी भिलाई डहार ले आदिवासी समाज के प्रगति बर तकनीकी क्षेत्र म करे गे प्रयास सराहनीय हे। आईआईटी भिलाई ह ऐग्रीटैंक, हेल्थटैंक अउ थिंकटैंक म बिसेस रूप ले धियान दे गेहे हवय। आईआईटी भिलाई ह एक ठन बने सोच के संग आगू बढ़त हे अउ इंहा पिछड़ा वर्ग के युवा मन ल गुणवत्ता वाले सिक्षा दे जावत हे। ए संस्थान ह नोनी मनके संख्या अउ भागीदारी बढ़ाय बर घलो कदम उठाय गेहे। राष्ट्रपति ह किहीन कि आईआईटियन्स मन ह अपन खोज, वैज्ञानिक सोच अउ दूरगामी सोच ले देस अउ दुनिया के प्रगति म अपन योगदान देवत हे।
ए मउका म राज्यपाल रमेन डेका ह किहीन कि आईआईटी भिलाई के स्थापना ले राज्य के तकनीकी उच्च सिक्षा के क्षेत्र म कतकोन बेरा ले होय कमी पूरा होय हे। ओमन ह संस्थान के सबो विद्यार्थी, सिक्षक अउ कर्मचारी मन ले किहीन कि भविष्य म ए संस्थान देस बर बड़ उपलब्धि हासिल करही।
उहें, मुख्यमंत्री विष्णुदेव साय ह किहीन कि आईआईटी भिलाई कैम्पस के आधारसिला प्रधानमंत्री नरेंद्र मोदी डहार ले रखे गे रिहीस हे। ओमन किहीन कि ए समय ह तकनीक के हवय, जउन देस म तकनीक होही ओ देस ह ओतके जल्दी बिकास करही।
राष्ट्रपति-आयुष विवि दीक्षांत
राष्ट्रपति द्रौपदी मुर्मू आज रईपुर के पंडित दीनदयाल उपाध्याय स्मृति स्वास्थ्य विज्ञान अउ आयुष विश्वविद्यालय के तीसर दीक्षांत समारोह म घलो सामिल होईंन। जिहां ओमन किहीन कि सबो चिकित्सक मन ल अपन जीवन के कुछेक बछर गंवई क्षेत्र म देना चाही। राष्ट्रपति ह किहीन कि छत्तीसगढ़ जइसन राज्य म जड़ी बूटी के बड़े भंडार हे। एखर उपर सोध होना चाही। ए मउका म राष्ट्रपति ह तैंतीस विद्यार्थी मन ल स्वर्ण पदक प्रदान करीन।
राष्ट्रपति-मुक्तांगन
राष्ट्रपति द्रौपदी मुर्मु ह काली नवा रईपुर के पुरखौती मुक्तांगन म राखे गे कारीकरम म आदिम जाति विभाग डहार ले प्रकासित तीन ठन पुस्तक ‘‘आदि नारीः आदिवासी महिलाओं की अस्मिता और गौरव गाथा, वन अधिकारों की मान्यता अधिनियम के क्रियान्वयन के लिए मार्गदर्शिका‘‘ अउ पोदड़गुमा पेन के करसाड के विमोचन करीन। ए मउका म राज्यपाल रमेन डेका ह राष्ट्रपति ल पुस्तक भेंट करीन। ए पुस्तक मन छत्तीसगढ़ के जनजातीय संस्कृति, महिला सशक्तिकरण अउ वन अधिकार के सुरक्षा उपर केंद्रित हे।
उहें, राष्ट्रपति श्रीमती मुर्मु ह छत्तीसगढ़ के जनजातीय समुदाय के जीवन -पध्दति, खान-पान, लोक नृत्य, संगीत, लोक वाद्य, कला, रीति-रिवाज, तीज -त्यौहार, अउ दूसर परंपरा मनले बहुत प्रभावित होइन। ओमन ह पुरखौती मुक्तांगन म छत्तीसगढ़ के पारंपरिक वेसभूषा म सजे नर्तकदल के संग फोटो खिंचवाईन।
राष्ट्रपति-छत्तीसगढ़
राष्ट्रपति द्रौपदी मुर्मू अउ राज्यपाल रमेन डेका ह आज रईपुर के गायत्री नगर के जगन्नाथ मंदिर म महाप्रभू श्री जगन्नाथ भगवान के पूजा-पाठ करके देसवासी मन बर समृध्दि अउ सुख-सांति के कामना करीन। ए मउका म मुख्यमंत्री विष्णुदेव साय, केंद्रीय राज्य मंत्री तोखन साहू अउ सांसद बृजमोहन अग्रवाल मौजूद रिहीन। उहें, राष्ट्रपति ह आज मुख्यमंत्री के नवा रईपुर स्थित निवास परिसर म बेल के पउधा घलो लगइन।
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके 5 मिनट ले छै बजके 10 मिनट तक करे जाही। ए कारीकरम ल प्रदेस के जम्मों आकाशवाणी केंद्र मन ह एके संघरा रिले करही। ए बखत के अंक म ‘‘सारंगढ़-बिलाईगढ़‘‘ जिला के गतिविधि के बारे म जानकारी दे जाही।
मन की बात
प्रधानमंत्री नरेंद्र मोदी काली बिहनिया ग्यारा बजे आकाशवाणी ले ‘‘मन की बात‘‘ कारीकरम म अपन बिचार साझा करही। मासिक रेडियो कारीकरम के ए ह एक सौ पंद्रहवां कड़ी होही। कारीकरम के प्रसारण आकाशवाणी अउ दूरदर्शन के जम्मो नेटवर्क म होही। मन की बात कारीकरम आकाशवाणी समाचार के वेबसाइट अउ न्यूज ऑन एआईआर ऐप म घलो उपलब्ध रइही। दूरदर्शन समाचार, प्रधानमंत्री कार्यालय अउ सूचना अउ प्रसारण मंत्रालय के यूट्यूब चैनल म घलो एखर सीधा प्रसारण करे जाही। हिन्दी प्रसारण के तुरते बाद क्षेत्रीय भाखा मन म घलो एला प्रसारित करे जाही।
श्रमिक योजना
राज्य सरकार निर्माण श्रमिक मन बर तीन ठन नवा योजना सुरू करही। जेखर अनुमोदन श्रम मंत्री लखनलाल देवांगन के अगुवई म नवा रईपुर म होय संचालक मंडल के बइठका म ले गीस। ए योजना म श्रमिक मन के लइका मन बर कौसल विकास म निर्माण मजदूर परिवार सशक्तिकरण योजना, श्रमिक मनके लइका मन ल उच्च सिक्षा संस्थान के प्रवेस परीक्षा बर निसुल्क कोचिंग योजना अउ अटल उत्कृष्ट शिक्षा योजना सुरू होही। मुख्यमंत्री निर्माण श्रमिक मृत्यु अउ दिव्यांग सहायता योजना म अब अपंजीकृत निर्माण श्रमिक के घलो कार्यस्थल म मृत्यु होय म उंखर परिवार वाला मन ल एक लाख रूपिया के सहायता रासि दे जाही।
अटल उत्कृष्ट सिक्षा योजना के प्रक्रिया राज्य स्थापना दिवस के मउका म एक नवंबर के सुरू हो जाही। एखर अलावा राज्य के सबो जिला म श्रम अन्न योजना घलो सुरू करे जाही।
सुगम ऐप
प्रदेस म जमीन अउ संपत्ति के दस्तावेज के पंजीयन के प्रक्रिया ल आसान बनाय खातिर ‘‘सुगम ऐप‘‘ सुरू करे गेहे। नेशनल जेनरिक डॉक्यूमेंट रजिस्ट्रेसन सिस्टम म सुगम मोबाइल ऐप के माध्यम ले प्रदेस के सबो पंजीयन कार्यालय मन म नवा सुविधा सुरू होय हे। ए सुविधा धोखाधड़ी के मामला ल रोके म मदद करही। सुगम ऐप के उपयोग संपत्ति के तीन कोण ले फोटो अपलोड बर करे जाही। जेखर ले संपत्ति के वास्तविक स्थिति ल चिन्हांकित करे जा सकय। ए तकनीक के उपयोग ले दस्तावेज के सुरक्षा म बढ़ोत्तरी होही।
अरूण साव-लोकार्पण
उपमुख्यमंत्री अरूण साव ह आज रईपुर जिला के खरोरा म बीस करोड़ रूपिया ले जादा के लागत के आने-आने विकास काम के लोकार्पण अउ भूमिपूजन करीन। ए मउका म श्री साव ह प्रधानमंत्री आवास योजना- सहरी के लाभार्थी मन ल आवास पूर्णता प्रमाण पत्र सौंपिन। ओमन ह महिला स्व-सहायता समूह अउ प्रधानमंत्री विश्वकर्मा योजना के हितग्राही मन ल चेक घलो दीन।
रायगढ़-हाथी मौत
रायगढ़ जिला म पाछू रतिहा करेंट के चपेट म आय ले तीन झन हाथी मनके मउत होगे। बताय जात हवय कि घरघोड़ा-तमनार वन परिक्षेत्र के सीमा ले लगे क्षेत्र म ग्यारा हजार केवी के तार टूट के गिर गे रिहीस हे, जेखर चपेट म ए तीनो हाथी आ गीन। ए घटना म तीन झन हाथी मनके मउत होगे। घटना के सूचना मिलतेसाठ वन विभाग के टीम ह मउक म पहुंच के जांच सुरू कर देहे।
हल्बी/गोण्डी-समाचार बुलेटिन
अउ अब मौसम के हाल…
बंगाल के खाड़ी ले आवत नमी के सेति प्रदेस म अवइया चौबीस घंटा म कुछेक जघा म हल्का बरसा होय के अउ गरज-चमक के संग छींटा पड़े के संभावना हे। ए दउरान न्यूनतम तापमान म मामूली गिरावट हो सकत हे।