राष्ट्रपति द्रौपदी मुर्मु दू दिन के छत्तीसगढ़ प्रवास म आज राजधानी रईपुर पहुंचिन। रईपुर पहुंचे के बाद राष्ट्रपति अखिल भारतीय आयुर्विज्ञान संस्थान-एम्स रईपुर के द्वितीय दीक्षांत समारोह म सामिल होइन। ए मउका म राष्ट्रपति ह उत्कृष्ट प्रदर्सन करइया दस विद्यार्थी मन ल स्वर्ण पदक अउ उपाधि प्रदान करीन। कारीकरम के दउरान एम्स ले पांच सौ चौदह विद्यार्थी मन ल उपाधि दे गीस। ए मउका म राज्यपाल रमेन डेका, मुख्यमंत्री विष्णुदेव साय, स्वास्थ्य मंत्री श्यामबिहारी जायसवाल, एम्स रईपुर के अध्यक्ष प्रोफेसर जार्ज ए. डिसूजा अउ एम्स के कार्यपालक निदेसक लेफ्टिनेंट जनरल अशोक कुमार जिंदल घलो मौजूद रिहीन।
समारोह ल संबोधित करत राष्ट्रपति ह किहीन कि देस के जम्मो नागरिक मन तक स्वास्थ्य सेवा पहुंचाय बर भारत सरकार लगातार परयास करत हे। पाछू एक दसक म देसवासी मन ल यूनिवर्सल हेल्थ कवरेज दे बर अनेक कदम उठाय गेहे।
राष्ट्रपति ह किहीन कि सुदूर क्षेत्र के लोगन मन के कल्याण बर आधुनिक प्रौद्योगिकीय के उपयोग करे जाना चाही। ओमन विद्यार्थी मनके आह्वान करीन कि ओमन वंचित वर्ग के सेवा के काम ल प्राथमिकता देवय।
समारोह ल संबोधित करत राज्यपाल रमेन डेका ह किहीन कि एम्स रईपुर ह छत्तीसगढ़ संघरा पूरा देस म स्वास्थ्य सेवा अउ चिकित्सा सिक्षा म उत्कृष्टता प्राप्त करे हे। ओमन किहीन कि ए संस्थान ह छत्तीसगढ़, ओडिसा अउ मध्य प्रदेस के लोगन मनके चेहरा म मुस्कान लाय के काम करे हे।
राष्ट्रपति-छत्तीसगढ़-02
कारीकरम ल संबोधित करत मुख्यमंत्री विष्णुदेव साय ह किहीन कि राज्य सरकार के प्राथमिकता छत्तीसगढ़ म स्वास्थ्य सेवा ल बेहतर बनाय के हरय। राज्य म डॉक्टर अउ मेडिकल स्टाफ के भर्ती बड़का पैमाना म करे जात हे। अस्पताल भवन मन ल बेहतर बनाय जात हे। आधुनिक उपकरण के व्यवस्था घलो करे जात हे। छत्तीसगढ़ ल मध्य भारत के मेडिकल हब बनाय म अपन योगदान दे बर हमर शासकीय अस्पताल घलो पूरा तियार हरय। हमन राज्य के स्वास्थ्य सेवा अउ सुविधा मन ल दुर्गम क्षेत्र के आखिरी मनखे तक पहुंचाय म प्रतिबध्द हवन।
राष्ट्रपति-एनआईटी
राष्ट्रपति आज मंझनिया के बाद रईपुर म राष्ट्रीय प्रौद्योगिकीय संस्थान-एनआईटी के दीक्षांत समारोह म घलो सामिल होइन। ए मउका म राज्यपाल रमेन डेका, मुख्यमंत्री विष्णुदेव साय, केंद्रीय राज्य मंत्री तोखन साहू घलो मौजूद रिहीन। कारीकरम के दउरान राष्ट्रपति ह इंजीनियरिंग के आने-आने साखा मन म पहला स्थान प्राप्त करइया ग्यारा झिन विद्यार्थी मन ल स्वर्ण पदक प्रदान करीन। ए मउका म एक हजार चार सौ ले जादा विद्यार्थी मन ल उपाधि दे गीस।
राष्ट्रपति-पुरखौती मुक्तांगन
एखर बाद राष्ट्रपति ह आज संझा नया रईपुर स्थित पुरखौती मुक्तांगन म आयोजित कारीकरम म सामिल होइन। कारीकरम के दउरान राष्ट्रपति ह छत्तीसगढ़ सरकार के महतारी वंदन योजना के तहत नौवां किस्त के रासि ल करीबन सत्तर लाख हितग्राही महिला मन के बैंक खाता म ऑनलाइन जारी करीन। बतादन कि ए योजना के हितग्राही महिला मन ल हर महिना एक-एक हजार रूपिया के आर्थिक सहायता दे जात हे।
ए मउका म राष्ट्रपति ह महतारी वंदन योजना के हितग्राही महिला मन के संघरा स्थानीय जनजातीय समुदाय के लोगन मन संग घलो चर्चा करीन।
राष्ट्रपति ह पुरखौती मुक्तांगन म बने सरगुजा प्रखंड के घलो लोकार्पण करीन। ए मउका म राज्यपाल रमेन डेका अउ मुख्यमंत्री विष्णुदेव साय मौजूद रिहीन।
बातों-बातों में
प्रधानमंत्री मुद्रा योजना
प्रधानमंत्री मुद्रा योजना के तहत मुद्रा ऋण के मौजूदा सीमा ल दस लाख रूपिया ले बढ़ाके बीस लाख रूपिया कर दे गेहे। ए संबंध म जारी अधिसूचना के अनुसार तरूण प्लस के नवा श्रेणी दस लाख रूपिया ले जादा अउ बीस लाख रूपिया तक के ऋण बर हे अउ फेर ओ उद्यमी मन बर उपलब्ध होही, जेमन तरूण श्रेणी के अंतर्गत पाछू के ऋण मनके फायदा उठावत ओखर सफलता पूर्वक भुगतान करे हे। बीस लाख रूपिया तक के प्रधानमंत्री मुद्रा योजना ऋण के गारंटी कवरेज माइक्रो यूनिट्स बर क्रेडिट गारंटी फंड के तहत प्रदान करे जाही।
श्रमिक-योजना
राज्य सरकार निर्माण श्रमिक मन बर तीन ठन नवा योजना सुरू करही। एखर अनुमोदन आज श्रम मंत्री लखनलाल देवांगन के अध्यक्षता म नवा रईपुर म होय संचालक मंडल के बइठका म ले गीस। ए योजना म श्रमिक मनके लइका मनके कौसल विकास बर निर्माण मजदूर, परिवार, सशक्तिकरण योजना, श्रमिक मनके लइका मन ल उच्च सिक्षण संस्थान मनके प्रवेस परीक्षा बर निसुल्क कोचिंग योजना अउ श्रमिक के लइका मन बर अटल उत्कृष्ट शिक्षा योजना सुरू होही।
अटल उत्कृष्ट शिक्षा योजना के प्रक्रिया राज्य स्थापना दिवस के मउका म एक नवंबर ले सुरू हो जही।
एखर अलावा राज्य के जम्मो जिला मन म श्रम अन्न योजन घलो सुरू करे जाही।
नामांकन-दाखिल
रईपुर नगर दक्षिण उप चुनाव बर नामांकन दाखिल करे के आज आखिरी दिन रिहीस। आज कुल बाईस उम्मीदवार मन नामांकन दाखिल करीन। एला मिलाके आज आखिरी दिन तक छियालिस उम्मीदवार मन संतावन नामांकन दाखिल करीन हे। नामांकन पत्र के जांच अट्ठाईस अक्टूबर के करे जाही। उम्मीदवार तीस अक्टूबर तक अपन नामांकन वापिस ले सकही।
बतादन कि भारतीय जनता पार्टी ह सुनील सोनी ल अउ कांग्रेस ह आकाश शर्मा ल ए उप चुनाव बर अपन प्रत्यासी बनाय हे।
भाजपा-संगठन चुनाव
भारतीय जनता पार्टी के प्रदेस इकाई ह राज्य म संगठन चुनई बर जिला संगठन चुनाव अधिकारी अउ सह अधिकारी मनके नियुक्ति कर देहे। ए जानकारी भाजपा के प्रदेस चुनाव अधिकारी खूबचंद पारख ह दीन हे। एखरे संग छत्तीसगढ़ म भारतीय जनता पार्टी के संगठन चुनाव के तियारी सुरू होगे हे। राज्य म पार्टी के मंडल इकाई, जिला इकाई अउ प्रदेस इकाई मनके चुनाव होही। प्रदेस इकाई मनके चुनाव के बाद पार्टी के राष्ट्रीय अध्यक्ष के चुनाव होही।
बलरामपुर-पुलिस कस्टडी मौत
बलरामपुर जिला म कथित रूप ले पुलिस कस्टडी म एक झन एनएचएम स्वास्थ्य कर्मी के मउत के बाद तनाव के स्थिति बने हे। घटना के बाद आक्रोसित ग्रामीण मन थाना के बाहर हंगामा करे रिहीन, जेमा सरकार संपत्ति के तोड़फोड़ अउ गाड़ी मन उपर पथराव जइसे घटना सामिल रिहीस। ए मामला म पुलिस अधीक्षक ह बलरामपुर कोतवाली के थाना प्रभारी प्रमोद रूसिया अउ आरक्षक अजय यादव ल निलंबित कर देहे। लेकिन अभी भी तनाव ल देखत जिला म पुलिस बल तैनात कर दे गेहे। उहें, पुलिस अधीक्षक कार्यालय, एसपी अउ कलेक्टर बंगला समेत दूसर प्रमुख जघा मन म बैरीकेट लगा के सुरक्षा बढ़ा दे गेहे। इही बीच, सरगुजा रेंज के पुलिस महानिरीक्षक अंकित गर्ग स्थिति के जायजा ले बर बलरामपुर पहुंचिन।
बतादन कि बलरामपुर सिटी कोतवाली के अंतर्गत ग्राम संतोषी नगर के राष्ट्रीय स्वास्थ्य मिसन म काम करइया चतुर्थ वर्ग के कर्मचारी गुरूचंद मंडल के पत्नी पाछू कुछेक दिन ले गायब रिहीस। जेखर रिपोर्ट थाना म दरज कराय गे रिहीस। इही सिलसिला म गुरूचंद मंडल ल पुलिस डहार ले सरलग पूछताछ बर बलाय जात रिहीस। इही बीच, एक दिन बिहनिया छै बजे ले संझा देरी तक ओला थाना म बिठाके पुलिस ह पूछताछ करिस। इही दउरान गुरूचंद मंडल ह काली बाथरूम जाके फांसी लगाके आत्महत्या कर लीस।
जवान-आत्महत्या
बीजापुर जिला के पातरपारा-भैरमगढ़ म तैनात केंद्रीय रिजर्व पुलिस बल-सीआरपीएफ के हेड कांस्टेबल पवन कुमार ह खुद के सर्विस रायफल ले गोली मारके आत्महत्या कर लेहे। ए जवान बटालियन मुख्यालय के टॉवर मोर्चा नंबर-दू म तैनात रिहीस। हेड कांस्टेबल पवन कुमार हरियाणा के रेवाड़ी के रहवासी रिहीस।