राष्ट्रपति अपन दू दिवसीय छत्तीसगढ़ प्रवास के दउरान एम्स रायपुर, एनआईटी रायपुर, आईआईटी भिलाई अउ पंडित दीनदयायल स्मृति स्वास्थ्य विज्ञान आयुष विश्वविद्यालय के दीक्षांत समारोह म माईपहुना के रूप सामिल होही।
मुख्यमंत्री-खनिज विकास निधि
मुख्यमंत्री विष्णुदेव साय के पगरइती म आज रायपुर स्थित उंखर निवास कार्यालय म छत्तीसगढ़ खनिज विकास निधि सलाहकार समिति के बीसवां बइठका होइस। बइठका म आने-आने खनिज परियोजना अउ अधोसंरचना बर रासि मंजूर करे गेहे। ए दउरान छत्तीसगढ़ रेलवे कार्पोरेसन ल डोंगरगढ़-कबीरधाम-मुंगेली-कटघोरा रेलमार्ग बर भू-अर्जन अउ प्रारंभिक निर्माण काम बर तीन सौ करोड़ रूपिया के रासि दे जाय के स्वीकृति प्रदान करे गीस। उहें, संचालनालय भौमिकी अउ खनिकर्म के खनिज अन्वेषण, खनिज ब्लॉक नीलामी अउ खान मनके आईटी आधारित नियमन बर तिरासी करोड़ रूपिया के मंजूरी घलो दे गीस। बइठका म खनन क्षेत्र म सुधार बर बिसेसज्ञ संस्था मन के सेवा ले बर बीस करोड़ रूपिया के उपराहा रासि दे जाय के निर्णय ले गीस।
मन की बात
प्रधानमंत्री नरेंद्र मोदी ईतवार सत्ताईस अक्टूबर के आकाशवाणी म ‘मन की बात‘ कारीकरम म देस-विदेस के लोगन मनके संग अपन बिचार साझा करही। ए मासिक रेडियो कारीकरम के एक सौ पंद्रहवां कड़ी होही। सुनइया मन ए कारीकरम ले जुड़े अपन सुझाव टोल फ्री नंबर-एक आठ सून्य सून्य -एक एक -सात आठ सून्य सून्य (1800 -11-7800) म भेज सकत हे। माई जीओवी नमो एप म घलो सुझाव भेजे जा सकत हे। ए सुझाव काली पच्चीस अक्टूबर तक भेजे जा सकत हे। कारीकरम के प्रसारण आकाशवाणी अउ दूरदर्शन के जम्मो नेटवर्क म करे जाही।
रेरा-बिल्डर नोटिस
छत्तीसगढ़ भू-संपदा विनियामक प्राधिकरण-रेरा डहार अधिनियम के प्रावधान के पालन म चूक करइया चार सौ बारह बिल्डर्स मन ल नोटिस जारी करे गेहे। संबंधित बिल्डर्स डहार बेरा म त्रैमासिक रिपोर्ट अउ वार्षिक लेखा परीक्षण रिपोर्ट प्रस्तुत नइ करे गे रिहीस। कुछ प्रोजेक्ट निर्धारित बेरा के बाद घलो पूरा नइ होय हे तेन मन ल नोटिस दे गेहे। ए बिल्डर मन ले पंद्रह दिन के भीतर ऑनलाइन जानकारी अपडेट करे अउ प्रोजेक्ट अधूरा होय के स्थिति म कारण बतात समय बिस्तारण बर आवेदन प्रस्तुत करे के निरदेस जारी करे गेहे।
चक्रवात तूफान
चक्रवाती तूफान ‘‘दाना’’ के असर छत्तीसगढ़ के मौसम म घलो पड़ही। काली उत्तर अउ मध्य छत्तीसगढ़ म कतकोन जघा म हल्का ले मध्यम बरसा होय के संभावना हे। मौसम विभाग के मुताबिक उत्तर-पश्चिम अउ ओखर ले लगे मध्य बंगाल के खाड़ी के उपर बने चक्रवाती तूफान ‘‘दाना‘‘ बारह किलोमीटर हरेक घंटा के गति ले उत्तर-पश्चिम कोति बाढ़त हे। एखर काली बिहनिया तक पुरा अउ सागर द्वीप के बीच उत्तर ओडिसा अउ पश्चिम बंगाल के तट ले टकराय के आसंका हे। ए दउरान हवा के जादा गति एक सौ दस किलोमीटर प्रति घंटा रहय के संभावना हे।
चक्रवार्ती तूफान दाना के असर छत्तीसगढ़ ले होके जवइया ट्रेन मन ल घलो पड़ही। ए तूफान के सेति कई ठिन ट्रेन मन ल रद्द कर दे गेहे।
नामांकन-दाखिल
रायपुर नगर दक्षिण उप चुनाव बर नामांकन दाखिल करे के काली आखिरी दिन हरय। नामांकन पत्र मन के जांच अट्ठाईस अक्टूबर के करे जाही। उम्मीदवार तीस अक्टूबर तक अपन नामांकन वापिस ले सकही। ए विधानसभा सीट बर अब तक सोलह उम्मीदवार मन ह अपन नामांकन पत्र दाखिल करे हे। एमा भारतीय जनता पार्टी के सुनील सोनी, इंडियन नेशनल कांग्रेस के आकाश शर्मा समेत आने-आने पार्टी के प्रत्यासी अउ निर्दलीय उम्मीदवार सामिल हे।
मुख्यमंत्री-क्षेत्रीय संस्कृति महोत्सव
मुख्यमंत्री विष्णुदेव साय ह काली रायपुर के रोहिणीपुरम स्थित सरस्वती शिशु मंदिर म राखेगे तीन दिवसीय क्षेत्रीय संस्कृति महोत्सव के सुभारंभ करीन। ए दउरान ओमन किहीन कि नवा पीढ़ी ल संस्कारवान बनाय अउ भारतीय संस्कृति ले जोड़े म विद्या भारती डहार बिसेसकर काम करे जावत हे। मुख्यमंत्री ह नवा सिक्षा नीति के सफल क्रियान्वयन बर सरस्वीत शिशु मंदिर म जरूरी संसाधन के व्यवस्था बर पचास लाख रूपिया दे के घोसना करीन। कारीकरम ल रायपुर सांसद बृजमोहन अग्रवाल ह घलो संबोधित करीन। ए मउका म ओमन खरोरा स्थित सरस्वती शिशु मंदिर म सांस्कृतिक भवन के निर्माण बर तीस लाख रूपिया के मंजूरी दीन हे।
सुगम ऐप
राज्य सरकार ह संपत्ति संबंधी धोखाधड़ी रोके अउ रजिस्ट्री प्रक्रिया ल अउ जादा पारदर्सी बनाय बर ‘सुगम ऐप‘ लॉन्च करे हे। सुगम ऐप लागू करे जाय के बाद ले प्रदेस म अब तक बारह सौ ले जादा रजिस्ट्री हो गेहे। वित्त मंत्री ओ.पी. चौधरी ह किहीन हे कि राज्य सरकार रजिस्ट्री काम म टेक्नॉलाजिकल अनुप्रयोग अउ प्रक्रिया के सुधार के दिसा म प्रतिबध्दता के संग काम करत हे। ‘सुगम ऐप‘ के माध्यम ले सरकार ल राजस्व नुकसान पहुंचाय के घटना मन ल रोके जा सकही।
अरूण साव-कोरबा
उपमुख्यमंत्री अरूण साव ह काली कोरबा म अधिकारी मन के बइठका लेके जिला म विकास काम अउ सरकारी योजना मनके क्रियान्वयन के समीक्षा करीन। ओमन शासन के जम्मो कल्याणकारी योजना मनके फायदा आम नागरिक मन तक प्राथमिकता ले पहुंचाय के निरदेस दीन। बइठका म श्री साव ह नसीली, नकली अउ अवैध दवई मनके बिक्री उपर कड़ाई ले प्रतिबंध लगाय ल किहीन। संगेसंग राजस्व न्यायालय मन म किसान मनके समस्या ल निराकरण तुरते करे के निरदेस दीन।
श्री साव कोरबा के दर्री रोड स्थित एक महाविद्यालय म लोकमाता देवी अहिल्या बाई होलकर त्रिशताब्दी जयंती समारोह म घलो सामिल होइन।
योग शिविर
महिला अउ बाल विकास मंत्री लक्ष्मी राजवाड़े ह काली रायपुर के तुलसी-बाराडेरा स्थित केंद्रीय रिजर्व पुलिस बल पैंसठवां वाहिनी मुख्यालय म तीन दिवसीय योग सिविर के उद्घाटन करीन। ए मउका म ओमन किहीन कि दुनिया म योग ले बढ़के कोनो सक्ति नइ हे। हर बछर इक्कीस जून के अंतर्राष्ट्रीय योग दिवस के आयोजन करे जात हे। योगाभ्यास सिविर म जवान मन ल छत्तीसगढ़ योग आयोग के योग प्रसिक्षक मन डहार ले आसन, प्राणायाम, ध्यान अउ योग के माध्यम ले मानसिक तनाव दूरिहा करे अउ शारीरिक, मानसिक स्वास्थ्य लाभ बर बिसेस योग प्रसिक्षण दे जावत हे।
मुख्य सचिव-बस्तर ओलंपिक
मुख्य सचिव अमिताभ जैन के पगरइती म आज वीडियो कॉन्फ्रेंसिंग के माध्यम बस्तर ओलंपिक के तियारी मन ल लेके राज्य स्तरीय आयोजन समिति के बइठका होइस। मुख्य सचिव ह अधिकारी मन ल क्षेत्रीय भाषा म आने-आने प्रचार माध्यम ले ए आयोजन के प्रचार-प्रसार करे के निरदेस दीन। उहें, आयोजन स्थल म व्यापक-व्यवस्था करे अउ खिलाड़ी मन ल जम्मो जरूरी सुविधा प्रदान करे ल किहीन। श्री जैन ह बस्तर ओलंपिक म बस्तर संभाग के जम्मो गांव के युवा मन के भागीदारी सुनिश्चित करे के निरदेस दीन।
खबर के मुताबिक हे कि बस्तर ओलंपिक के तहत एक ले बीस नवंबर तक विकासखंड स्तरीय खेल प्रतियोगिता मन के आयोजन करे जाही। उहें, इक्कीस ले पच्चीस नवंबर तक जिला स्तरीय अउ छब्बीस ले तीस नवंबर के बीच संभाग स्तरीय प्रतियोगिता होही। बस्तर ओलंपिक म एथेलेटिक्स, तीरंदाजी, बैडमिंटन, फुटबॉल, हॉकी, वेटलिफि्ंटग, कराटे, कबड्डी, खो-खो, व्हालीबॉल अउ रस्साकसी जइसन खेल मन ल सामिल करे गेहे।