प्रधानमंत्री नरेंद्र मोदी ह आज वाराणसी म राखे गे एक कारीकरम म करीब छै हजार सात सौ करोड़ रूपिया के तेईस विकास परियोजना के लोकार्पण अउ सिलान्यास करीन। एमा छत्तीसगढ़ के अंबिकापुर म, मां महामाया एयरपोर्ट के नवा टर्मिनल भवन के उद्घाटन घलो सामिल हे। कारीकरम म गोठियात हुए प्रधानमंत्री ह किहीन कि ए सब परियोजना देस के विकास ल नवा उचाई दीही। ओमन किहीन कि एनडीए सरकार के ए तीसरइया कार्यकाल के मात्र एक सौ पच्चीस दिन म देस भर म पंद्रह लाख करोड़ रूपिया ले जादा के योजना अउ परियोजना उपर काम सुरू हो चुके हे। एमा ले जादातर योजना अउ परियोजना गरीब, किसनहा अउ नौजवान मनके कल्याण बर हे। श्री मोदी ह किहीन कि पाछू दस बछर म देसभर म अधोसंरचना के निर्माण बर बड़का अभियान सुरू करे गेहे। एखर लक्ष्य निवेस करके लोगन मन बर सुविधा सुरू करना हे अउ नौजवान मन बर रोजगार के मउका घलो उपलब्ध कराना हे।
प्रधानमंत्री-महामाया एयरपोर्ट शुभारंभ
ए मउका म अंबिकापुर के तीर दरिमा म मां महामाया एयरपोर्ट परिसर म राखेगे कारीकरम म छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह घलो सामिल होइन। ए मउका म राज्यपाल ह किहीन कि मां महामाया एयरपोर्ट के सुरू होय ले सरगुजा ले विकास के नवा रद्दा खुलही। ओमन किहीन कि बस्तर के बाद सरगुजा ह प्रदेस के दूसरइया बड़का आदिवासी बहुल जघा हे, जिहां ए सुविधा सुरू होवत हे।
उहें, मुख्यमंत्री ह किहीन कि इंहा एयरपोर्ट के मांग सरगुजा के रहइया मन ह बने दिन ले करत रिहीन। एखर सुरू होना एक ठिन सपना के पूरा होय जइसन हे। ओमन किहीन कि ए एयरपोर्ट ह प्रदेस के दू बड़का आदिवासी संभाग ल जोड़ही। एखरे सेति ए लोकार्पण राज्य के आदिवासी समाज के विकास बर घलो बड़का कदम हे।
कारीकरम ल केंद्रीय आवास अउ सहरी विकास राज्य मंत्री तोखन साहू, उप मुख्यमंत्री अरूण साव, कृषिमंत्री रामविचार नेताम, स्वास्थ्य मंत्री श्याम बिहारी जायसवाल अउ सरगुजा सांसद चिंतामणि महाराज ह घलो संबोधित करीन।
सुनइया मन ल बतादन कि मां महामाया एयरपोर्ट म हवाई पट्टी के विकास केंद्र सरकार के रीजनल कनेक्टिविटी स्कीम के अंतर्गत करे गेहे। ए एयरपोर्ट ह तीन सौ पैंसठ एकड़ म फैले हे, जेला अस्सी करोड़ रूपिया लगा ले तियार करे गेहे। एमा बहत्तर सीटर हवाई जहाज उतर सकथे। प्रदेस म राजधानी रईपुर के बाद हवाई पट्टी के हिसाब से ए ह दूसरइया बड़का एयरपोर्ट हे।
भाजपा-सुनील सोनी
रईपुर दक्षिण विधानसभा सीट म होवइया उप चुनाव बर भारतीय जनता पार्टी ह सुनील सोनी ल अपन प्रत्यासी घोसित करे हे। पार्टी कोति ले उम्मीदवार घोसित करे जाय के बाद सुनील सोनी ह केंद्रीय नेतृत्व के आभार जतात हुए किहीन कि ओमन ह पार्टी के विस्वास उपर खरा उतरही। श्री सोनी ह किहीन कि लोगन के बीच जाके भाजपा के उपलब्धि ल बताबो।
‘‘अमृत भारत स्टेसन योजना‘‘ के तहत अंबिकापुर रेलवे स्टेसन के कायाकल्प करे जावत हे। अंबिकापुर स्टेसन म यात्री सुविधा ल बढ़ाय के अउ आधुनिकीकरण के काम आठ करोड़ सतहत्तर लाख रूपिया के लागत ले होवत हे। एमा स्टेसन के चारो कोति बने फुटपात, स्टेसन भवन, प्रवेस द्वार के संग अवई-जवई के रद्दा ल अलग-अलग करे गेहे, जेखर ले यात्री मन ल भीड़ म परेसानी नइ होय। एखर अलावा स्थानीय कला-संस्कृति के आनी-बानी के चित्रकारी ले स्टेसन ल सजाय जावत हे। दिव्यांग मन बर सौचालय, वाटर बूथ, अउ बुकिंग काउंटर म अतिरिक्त सुविधा दे गेहे। एखर संगेसंग रेंप अउ टेक्टाइल घलो लगाय गेहे।
सुनइया बन ल बतादन कि ए ‘‘अमृत भारत स्टेसन योजना‘‘ म दक्षिण पूर्व मध्य रेलवे के सोलह ठन स्टेसन के पुर्नविकास करे जावत हे। योजना के उद्देस्य आधुनिक सुविधा देके संगेसंग अभी मिलत सुविधा ल अपग्रेड घलो करना हे।
वन खेल प्रतियोगिता-समापन
राजधानी रईपुर म राखे गे पांच दिनी सत्ताईसवां अखिल भारतीय वन खेल प्रतियोगिता ह आज सिरागे। रईपुर के स्वामी विवेकानंद स्टेडियम म आयोजित आखिरी कारीकरम म मुख्य अतिथि विधानसभा अध्यक्ष डॉ. रमन सिंह रिहीन। एखर अध्यक्षता वन मंत्री केदार कश्यप ह करीन। समापन कारीकरम म पेरिस ओलंपिक के पदक विजेता मनु भाकर ह बिसेस आमंत्रित सदस्य के रूप म मौजूद रिहीन।
कारीकरम के मुख्य अतिथि विधानसभा अध्यक्ष डॉ. रमन सिंह ह प्रतियोगिता म पदक जीते खिलाड़ी मन ल बधई दीन। उहें, राज्यपाल रमेन डेका ह अपन वीडियो संदेस म खिलाड़ी मन ल टूर्नामेंट म बढ़िया खेल खेले बर सुभकामना दीन।
रेलवे-खोखो प्रतियोगिता
बेलासपुर म सत्रह ले उन्नीस अक्टूबर तक होय अट्ठारवां अखिल भारतीय अंतर रेलवे पुरूष खो-खो प्रतियोगिता ह सिरागे। काली खेले गे फाइनल मैच म मध्य रेलवे के टीम ह दक्षिण पूर्व मध्य रेलवे के टीम ल हराके खिताब अपन नाम करीन। उहें, दूसर नंबर म दक्षिण पूर्व मध्य रेलवे के टीम अउ तीसरइया नंबर म पश्चिम रेलवे के टीम रिहीस। ए मउका म दक्षिण पूर्व मध्य रेलवे के महाप्रबंधक नीनु इटियेरा ह टीम मन ल ईनाम दीन। ए प्रतियोगिता म रेलवे के छै ठन टीम ह भाग लीन।
राजनांदगांव-कस्टम मीलिंग
राजनांदगांव जिला म कस्टम मीलिंग म गड़बड़ी के मामला म प्रशासन ह नौ झन राईस मिलर उपर कार्रवाई करे हे। जांच म पता चले हे कि ए राईस मिलर मन एफसीआई अउ नान म कस्टम मीलिंग के चांउर ल जमा करे म लापरवाही करे हे। एमा ले एक झन मिल संचालक ले प्रशासन ह एक करोड़ चालीस लाख रूपिया के वसूली के कार्रवाई घलो सुरू कर देहे। उहें, एक राईस मिल ल ब्लैक लिस्टेड कर दे गेहे। जिला कलेक्टर संजय अग्रवाल ह सबो राईस मिलर्स ल कस्टम मीलिंग के बांचे चांउर ल झटकन जमा करे के निरदेस देहे।
डॉक्टर धोखाधड़ी-गिरफ्तार
प्रदेस के परसिध्द लइका मनके डॉक्टर अउ भिलई अपोलो अस्पताल के पूर्व डायरेक्टर डाक्टर एम.के. खंडूजा ल पुलिस ह पाछू रतिहा कोलकाता ले गिरफ्तार करे हे। डाक्टर खंडूजा उपर करीब 19 करोड़ रूपिया के धोखाधड़ी करे के आरोप हे।
कोरिया-जांच दल
कोरिया जिला म स्वच्छता किट के नाम म धोखाधड़ी के जानकारी मिले उपर प्रशासन ह तीन सदस्यीय जांच दल बनाय हे। ए जांच दल म कोरिया के डिप्टी कलेक्टर उमेश पटेल, जिला पंचायत के लेखा अधिकारी धनराज सिंह अउ मनरेगा के सिकायत समन्वयक विकास अवधिया ल सामिल करे गेहे, एमन मामला के जांच दस दिन म करके अपन प्रतिवेदन देही।
दुर्घटना
धमतरी जिला के सलोनी गांव म आज बिहनिया टहले बर निकले दू छात्र ल हाईवा ह अपन चपेट म ले लीस। जेमा ले एक झन के मउका म मउत होगे। फेर गंभीर रूप ले घायल दूसर छात्र ह अस्पताल ले जावत बेरा रद्दा म ही दम तोड़ दीस। एक झन कक्षा छठवीं अउ दूसरइया ह सातवीं म पढ़त रिहीस। घटना के बाद हाइवा चालक फरार होगे। घुस्साय लोगन मन रद्दा ल जाम कर दीन।
मुख्यमंत्री विष्णुदेव साय ह ए घटना उपर दुख व्यक्त करत हुए दूनो मृतक के परिवार ल चार-चार लाख रूपिया के सहायता रासि दे के निरदेस जिला प्रशासन ल दीन हे।
उहें, रायगढ़ जिला के रूडूकेला गांव म ट्रेलर के चपेट म आय ले मोटरसाइकिल सवार युवक के मउका म ही मउत होगे।
ऐति, गरियाबंद जिला म पाछू रतिहा एक कार ह बीस फीट के गहरा गडढ़ा म मिले हे। संका जताय जात हे कि ए कार ह रईपुर ले देवभोग जात होही अउ दुर्घटना के बाद एमा आगी लग गे होही। कार के दरवाजा ह भीतरी ले बंद हे। पुलिस ह मामला के जांच करत हे।