प्रधानमंत्री नरेंद्र मोदी बीस अक्टूबर के अंबिकापुर के दरिमा स्थित मां महामाया एयरपोर्ट के वर्चुअली सुभारंभ करही। सांसद चिंतामणि महाराज, लुण्ड्रा विधायक प्रबोध मिंज, कलेक्टर विलास भोसकर अउ पुलिस अधीक्षक योगेश पटेल ह आज एयरपोर्ट के निरीक्षण करीन अउ तियारी के जायजा लीन।
एखर पहिली, अंबिकापुर कलेक्ट्रेट सभाकक्ष म तियारी अउ विभागीय दायित्व मन के संबंध म बइठका आयोजित करे गीस। बइठका म सांसद चिंतामणि महराज ह किहीन हे कि लंबा समय बाद सरगुजा के बहुप्रतीक्षित मांग पूरा होवइया हे। एखर ले सरगुजा वासी मन म बड़ उछाह हे। सुभारंभ कारीकरम म बड़का संख्या म आम लोगन मन घलो सामिल होही। एला देखत ओमन अधिकारी मन ल सुभारंभ कारीकरम के जम्मो तियारी जल्दी पूरा करे बर जरूरी निरदेस दीन।
प्रधानमंत्री-कर्मयोगी राष्ट्रीय शिक्षण सप्ताह
प्रधानमंत्री नरेंद्र मोदी काली नई दिल्ली म कर्मयोगी राष्ट्रीय शिक्षण सप्ताह – एनएलडब्ल्यू के सुभारंभ करही। हफ्ता के दउरान हरेक कर्मयोगी कम से कम चार घंटा के शिक्षा के लक्ष्य प्राप्त करे बर प्रतिबध्द होही। ए हफ्ता व्यक्तिगत प्रतिभागी, मंत्रालय विभाग अउ संगठन डहार ले आने-आने तरह के भागीदारी के माध्यम ले सीखे बर समर्पित होही। सप्ताह के दउरान प्रख्यात वक्ता अपन विसेसज्ञता ले जुड़े बिसय उपर व्याख्यान दिही।
दक्षिण विधानसभा-नामांकन
रायपुर नगर दक्षिण विधानसभा उपचुनाव बर आज अधिसूचना जारी कर दे गेहे। एखर संगेसंग नामांकन दाखिल करे के प्रक्रिया सुरू होगे हे। नामांकन दाखिल करे के आखिरी तारिख पच्चीस अक्टूबर हरय। अट्ठाईस अक्टूबर के नामांकन पत्र मनके जांच करे जाही। उहें, तीस अक्टूबर तक अपन नांव वापिस ले सकही। ए विधानसभा सीट बर तेरह नवंबर के मतदान होही।
मुख्य निर्वाचन पदाधिकारी रीना बाबासाहेब कंगाले ह बतइन कि नांव निरदेसन बर अभ्यर्थी के सिरिफ तीन ठन गाड़ी ही नामांकन केंद्र के सौ मीटर के परिधी म प्रवेस कर सकही। नांव निरदेसन बर अभ्यर्थी समेत कुल पांच मनखे ही नामांकन कक्ष म भीतर जा सकही। प्रत्यासी बिहनिया ग्यारा बजे ले मंझनिया तीन बजे तक कलेक्टोरेट के कक्ष क्रमांक नौ म नामांकन पत्र जमा कर सकत हे। शासकीय अवकास के दिन म नामांकन नइ ले जाही।
मुख्य निर्वाचन पदाधिकारी ह यहू बतइन कि ऑनलाइन नांव निरदेसन अउ सपथ पत्र के वैकल्पिक सुविधा भारत निर्वाचन आयोग डहार ले उपलब्ध कराय गे हे। एमा नामांकन पत्र अउ सपथ पत्र के प्रविष्टि करके ओखर मुद्रण करके अभ्यर्थी ल नांव निरदेसन रिटर्निंग ऑफिसर के आगू प्रस्तुत करना होही। एक अभ्यर्थी अधिकतम चार सेट नांव निरदेसन प्रस्तुत कर सकत हे।
निर्वाचन नामावली-ग्रामसभा
प्रदेस के जम्मो ग्राम पंचायत मन म अवइया छब्बीस अउ सत्ताईस अक्टूबर के ग्राम सभा के आयोजन करे जाही। राज्य निर्वाचन आयुक्त अजय सिंह ह निर्वाचक नामावली के सुध्दता सुनिश्चित करे बर जिला कलेक्टर मन ल ग्रामसभा के आयोजन करे के निरदेस दीन हे।
राज्य निर्वाचन आयुक्त ह बतइन कि त्रिस्तरीय पंचायत मनके आम निर्वाचन बर प्रदेस म ग्राम पंचायत के निर्वाचक नामावली के पुनरीक्षण के काम करे जात हे। छब्बीस अउ सत्ताईस अक्टूबर के आयोजित ग्राम सभा मन म संबंधित ग्राम पंचायत के निर्वाचक नामावली के पठन करे जाही। ए दउरान निर्वाचक नामावली के संबंध म मतदाता दावा आपत्ति प्रस्तुत कर सकही। प्राप्त दावा आपत्ति के जांच घलो ग्रामसभा मन म करे जा सकही।
‘‘चीफ मिनिस्टर कॉन्क्लेव‘‘
एनडीए शासित राज्य मनके मुख्यमंत्री अउ उप मुख्यमंत्री मनके बिसेस बइठका ‘‘चीफ मिनिस्टर कॉन्क्लेव‘‘ काली चंडीगढ़ म राखे गीस। एमा छत्तीसगढ़ के मुख्यमंत्री विष्णुदेव साय घलो सामिल होइन। प्रधानमंत्री नरेंद्र मोदी ह ए कॉन्क्लेव के अध्यक्षता करीन।
मुख्यमंत्री मनके ए बिसेस बइठका म राष्ट्रीय विकास ले जुड़े आने-आने मुद्दा उपर विचार-विमर्स होइस। ‘‘संविधान का अमृत महोत्सव‘‘ अउ ‘‘लोकतंत्र की हत्या का प्रयास‘‘ के पचासवां वर्षगांठ जइसे जरूरी बिसय घलो चर्चा के मुख्य केंद्र म रिहीस। छत्तीसगढ़ के मुख्यमंत्री विष्णुदेव साय ह ए मउका म राज्य के विकास योजना, कृषि सुधार अउ औद्योगिक विकास उपर अपन विचार साझा करीन। ओमन छत्तीसगढ़ म संचालित आने-आने परियोजना मनके सफल क्रियान्वयन बर केंद्र सरकार के सहयोग के सराहना करीन।
‘‘धोखाधड़ी से बचो‘‘-अभियान
ऑनलाइन ठगी के बाढ़त खतरा ले निपटे बर केंद्र सरकार अउ मेटा ह मिलके ‘‘धोखाधड़ी से बचो‘‘ अभियान सुरू करे हे। केंद्रीय सूचना अउ प्रसारण सचिव संजय जाजू ह काली नई दिल्ली म ए अभियान के उद्घाटन के मउका म किहीन कि ए पहल ऑनलाइन धोखाधड़ी ले बचाव बर एक जरूरी कदम हरय। ओमन किहीन कि सरकार डिजीटल सुरक्षा अउ सतर्कता ल बढ़ावा देना चाहत हे।
श्रम विभाग-कार्यशाला
श्रम विभाग डहार ले ‘श्रमिकों का सशक्तिकरण भविष्य का निर्माण‘ बिसय उपर रायपुर म दू दिन के कार्यशाला राखे गीस। कार्यशाला के समापन के मउका म श्रम मंत्री लखनलाल देवांगन ह विभागीय अधिकारी मन ले किहीन कि प्रदेस म श्रमिक मन ल रोजगार देवाय बर तुरते कार्यवाही करे अउ शासन के योजना मनके लाभ देवाय। ओमन किहीन कि श्रम विभाग डहार ले चौरासी लाख श्रमिक मनके पंजीयन करके ओमन ल योजना के लाभ दे जात हे। ए मउका म श्रम मंत्री ह अच्छा काम करइया विभाग के मैदानी अधिकारी मन ल प्रशस्ति पत्र देके सम्मान करीन।
सोना-बरामद
राजधानी रायपुर के टिकरापारा थाना क्षेत्र म भाठागांव अंतर्राज्यीय बस टर्मिनल करा पुलिस ह बारह किलो आठ सौ ग्राम सोना के गहना बरामद करे हे। एखर कीमत करीबन आठ करोड़ रूपिया बताय गेहे। ए मामला म तीन मनखे मन ल गिरफ्तार करे गेहे।
पुलिस के मुताबिक ए सोना जगदलपुर ले एक बस के माध्यम ले भाठागांव बस टर्मिनल लाय जात रिहीस। पुलिस ह तलासी के दउरान तीन झन आरोपी करा ले बैग म माढ़े सोना के जेवर ल बरामद करीस। पुलिस ह एखर सूचना आयकर विभाग ल दे देहे।
रेलवे-टिकट आरक्षण
रेलवे ह अग्रिम आरक्षण के मौजूदा समय-सीमा एक सौ बीस दिन ले घटाके साठ दिन कर देहे। अब ले अग्रिम टिकिट दू महिना पहिली ही ले जा सकही। ए बदलाव पहला नवंबर ले लागू होही। हालांकि, ए महिना के इकतीस तारीख तक चार महिना बाद तक के टिकिट ले जा सकही।
बस्तर दशहरा
पचहत्तर दिन तक चलइया विश्व प्रसिध्द बस्तर दशहरा परब के काली समापन होही। दशहरा परब म सामिल होय बर सक्तिपीठ दंतेवाड़ा ले आय मावली माता के डोली अउ मां दंतेश्वरी के छत्र के काली पूजापाठ के बाद दंतेवाड़ा बर बिदा दे जाही।
बतादन कि पचहत्तर दिन के विश्व प्रसिध्द बस्तर दशहरा के सुरूआत सावन महिना के अमावस्या तिथि के पाट जात्रा विधान के संग होय रिहीस।
सक्ति-मौत
सक्ति जिला के बारद्वार थाना क्षेत्र के तांदुडीह गांव म एके परिवार के दू मनखे मन के संदिग्ध हालत म मउत होगे। ए दूनो अपन घर म पूजापाठ कारीकरम के दउरान बेहोस मिलिन, जेमन ल ईलाज बर अस्पताल ले जाय गीस। जिहां डॉक्टर मन ओमन ल मृत घोसित कर दीन। उहें, परिवार के दूसर चार मनखे मन ल सक्ति के अस्पताल म भर्ती कराय गेहे। पुलिस ए मामला के जांच करत हे।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ म ए बखत मानक महोत्सव म आधारित भारतीय मानक ब्यूरो के निदेशक अउ रायपुर कार्यालय के प्रमुख सुमीत कुमार ले लेगे भेंटवार्ता के प्रसारण करे जाही। ए कारीकरम आकाशवाणी केन्द्र रायपुर ले काली उन्नीस अक्टूबर के बिहनिया साढ़े दस बजे ले प्रसारित होही। एला छत्तीसगढ़ स्थित आकाशवाणी के जम्मो केन्द्र रिले करही।
अउ अब थोरकुन समाचार सार म –
– कबीरधाम जिला म पहली घांव स्वदेसी मेला के आयोजन करे जात हे। महिला अउ बाल विकास मंत्री लक्ष्मी राजवाड़े ह कवर्धा के पीजी कॉलेज मैदान म ए स्वदेसी मेला के सुभारंभ करीन।
अउ
– नगर-निगम दुरूग म ड्यूटी के दउरान सराब पार्टी करे के वीडियो वायरल होय के बाद नगर-निगम आयुक्त लोकेश चंद्राकर ह राजस्व अधिकारी, दुर्गेश गुप्ता अउ दू झन दूसर सफाई कर्मचारी मन ल निलंबित कर देहे।