रायपुर दक्षिण विधानसभा सीट म उपचुनाव बर नामांकन के प्रक्रिया काली अट्ठारा अक्टूबर ले सुरू होही। नामांकन के आखिरी तिथि पच्चीस अक्टूबर हे। उहें, अट्ठाईस अक्टूबर के नामांकन पत्र के जांच करे जाही। नामांकन वापसी के आखिरी तारिख तीस अक्टूबर हे। ए विधानसभा सीट म तेरह नवंबर के मतदान होही अउ तेईस नवंबर के रिजल्ट घोसित करे जाही।
इही बीच, मुख्य निर्वाचन पदाधिकारी रीना बाबासाहेब कंगाले ह काली प्रदेस के मान्यता प्राप्त राजनीतिक दल मनके प्रतिनिधि मनके बइठका लीन। ओमन मुख्य निर्वाचन पदाधिकारी कार्यालय म राखेगे बइठका म रायपुर दक्षिण विधानसभा उप चुनाव बर आदर्स आचार संहिता, निर्वाचन व्यय, मतदान के दिन के व्यवस्था अउ भारत निर्वाचन आयोग के दिसा-निरदेस के जानकारी दीन। ओमन बतइन कि मतदान बर रायपुर के दक्षिण विधानसभा क्षेत्र म दू सौ तिरपन सहरी मतदान केंद्र हे। ओमन यहू किहीन कि एक हजार पांच सौ ले जादा मतदाता संख्या वाले तेरह मतदान केंद्र मन म सहायक मतदान केंद्र बनाय जाही। श्रीमती कंगाले ह बइठका म जानकारी दीन कि नामांकन बर अभ्यर्थी मनके सिरिफ तीन गाड़ी ही नामांकन केंद्र के सौ मीटर के दूरिहा म रइही। नाम निर्देसन बर अभ्यर्थी समेत कुल पांच झिन मनखे मन ही नामांकन कक्ष म जाही। श्रीमती कंगाले ह बतइन कि आदर्स आचार संहिता के उल्लंघन के सिकायत सी-विजिल एप के माध्यम ले करे जा सकत हे। ओमन किहीन कि चुनाव के दौरान अभ्यर्थी डहार ले करइया खरचा के सीमा चालीस लाख रूपिया होही। एखर निगरानी बर नौ उड़नदस्त दल अउ बारह स्थैतिक निगरानी दल-एसएसटी के गठन करे संगेसंग निगरानी बर जिला म उन्नीस सेक्टर मजिस्ट्रेट के नियुक्ति घलो करे गेहे। एखरे संगे चुनावी खरचा म कड़ा निगरानी बर जिला निर्वाचन अधिकारी रायपुर डहार ले आने-आने क्षेत्र मन म चार स्थैतिक नाका मनके घलो स्थापना करे गेहे।
एमओयू-हस्ताक्षर
मुख्यमंत्री विष्णुदेव साय के मौजूदगी म काली मंत्रालय म छत्तीसगढ़ के तकनीकी शिक्षा अउ रोजगार सचिव डॉक्टर एस. भारतीदासन अउ गुजरात सरकार के तकनीकी शिक्षा आयुक्त बंछानिधि पाणि ह एमओयू उपर हस्ताक्षर करीन। ए मउका म मुख्यमंत्री ह नवाचार अउ उद्यमिता ल प्रोत्साहित करे के दिसा म ए साझेदारी ल एक ऐतिहासिक कदम बतइन। मुख्यमंत्री ह आई-हब गुजरात के मॉडल के बड़ई करत किहीन कि ए साझेदारी छत्तीसगढ़ म घलो युवा मन ल नवाचार के क्षेत्र म आगू बढ़ाय बर जरूरी संसाधन, मार्गदर्सन अउ मउका प्रदान करही। मुख्यमंत्री ह किहीन हे कि ए समझौता न सिरिफ तकनीकी सुविधा मन उपर केंद्रित ह, बल्कि युवा मन ल सलाहकार, निवेसक अउ उद्योग विसेषज्ञ मनके संग जोड़के ओमन ल ससक्त बनाय के मंच प्रदान करही। ए साझेदारी ले छत्तीसगढ़ नवाचार अउ स्टार्ट-अप के क्षेत्र म अग्रणी बनही।
उहें, छत्तीसगढ़ म वन अधिकार-दू हजार छै के सुघ्घर काम बर आदिम जाति या अनुसूचित जाति विभाग अउ स्वयं सेवी संस्था अशोका ट्रस्ट फॉर रिसर्च इन इकोलॉजी एण्ड एनवायरोमेंट के बीच घलो एमओयू होइन। विभागीय मंत्री रामविचार नेताम के मौजूदगी म ए.टी.आर.ई.ई. के प्रतिनिधि डॉक्टर शरतचंद्र लेले अउ विभाग के सचिव नरेंद्र कुमार दुग्गा ह एमओयू म हस्ताक्षर करीन। ए मउका म मंत्री श्री नेताम ह किहीन कि ए समझौता वन अधिकार अधिनियम के उचित अनुपालन म मील के पत्थर साबित होही। ओमन किहीन हे कि ए समझौता के माध्यम ले एफआरए अधिनियम के उचित क्रियान्वयन म मदद मिलही।
माया वारियर-गिरफ्तार
डी.एम.एफ. घोटाला मामला म माया वारियर ल प्रवर्तन निदेशालय ईडी ह काली रईपुर ले गिरफ्तार करे हे। माया वारियर कोरबा म आदिवासी विकास विभाग म सहायक आयुक्त के पद म पदस्थ रिहीस। गिरफ्तारी के बाद ईडी ह ओमन ल रईपुर के बिसेस न्यायालय म पेस करीन, जिहां ले अदालत ह ओला तेईस अक्टूबर तक रिमांड म सौंपे हे।
भारतीय सड़क कांग्रेस अधिवेशन
भारतीय सड़क कांग्रेस के तिरासवीं वार्षिक अधिवेसन सात नवंबर ले ग्यारा नवंबर तक राजधानी रईपुर के पंडित दीनदयाल उपाध्याय ऑडिटोरियम म राखे जाही। उप मुख्यमंत्री अउ लोक निर्माण मंत्री अरूण साव ह विभागीय सचिव डॉक्टर कमलप्रीत सिंह समेत अधिवेसन ले जुड़े जम्मो अधिकारी मन ल एखर तियारी के संबंध म जरूरी दिसा- निरदेस दीन हे।
रईपुर के नवीन विश्राम भवन म होय समीक्षा बइठका म उपमुख्यमंत्री ह अधिकारी मन ले किहीन हे कि अधिवेसन म सामिल होवइया अतिथि छत्तीसगढ़ के संस्कृति अउ इंहा के विकास के आने-आने आयाम के अनुभव कर सकही। ओमन अतिथि मन ल छत्तीसगढ़ के कला, सिल्प अउ लोक संस्कृति ले अवगत कराय बर छत्तीसगढ़ हस्तसिल्प, ग्रामोद्योग, पर्यटन, संजीवनी अउ वन विकास के स्टॉल्स लगाय के निरदेस घलो दीन हे।
वन खेलकूद महोत्सव
रईपुर म चलत सत्ताईसवां अखिल भारतीय वन खेलकूद महोत्सव के दूसरइया दिन आज आने-आने खेल मन के आयोजन करे जावत हे। स्वामी विवेकानंद स्टेडियम कोटा म प्रतियोगिता के सुभारंभ मउका म काली केंद्रीय वन मंत्री भूपेंद्र यादव ह अपन वर्चुअल सुभकामना संदेस म किहीन हे कि वन के संरक्षण म वन कर्मी मन के अहम भूमिका रहिथे। अखिल भारतीय वन खेलकूद प्रतियोगिता म बड़ संख्या म वनबल के कर्मचारी हिस्सा लेवत हे। वन कर्मी मन बर खेल मनके बिसेस महत्व आय। एखर ले एकाग्रता, साहस अउ टीम भावना ले काम करे म मदद मिलथे।
मुख्यमंत्री विष्णुदेव साय ह किहीन कि ए आयोजन बर वन विभाग के बड़ई करीन हे। छत्तीसगढ़ सरकार खेल अउ खिलाड़ी मनके विकास बर प्रतिबध्द हे। सरकार डहार करे जात परयास ले प्रदेस के खिलाड़ी मन के मनोबल बाढ़त हे।
बिहार के वन मंत्री डॉक्टर प्रेमकुमार ह किहीन कि वन अउ वन्य प्राणियो मन के संरक्षण या जागरूकता लाय बर हमन ल आगू आना होही। डॉ. कुमार ह सबो खिलाड़ी मन ल बधई अउ सुभकामना दीन।
अंतर्राष्ट्रीय टी-ट्वेंटी के भारतीय कप्तान सूर्य कुमार यादव ह छत्तीसगढ़ म वन मनके संरक्षण बर करे जावत कोसिस के सराहना करीन।
खबर के मुताबिक छत्तीसगढ़ के मेजबानी म चार बछर बाद सत्ताईसवां ऑल इंडिया फॉरेस्ट स्पोर्ट्स मीट म छब्बीस खेल के तीन सौ विधा मन म प्रतियोगिता होही। ए प्रतियोगिता सोलह ले बीस अक्टूबर तक राजधानी के 16 आने-आने खेल मैदान मन म होही। एमा देसभर ले दू हजार नौ सौ बीस खिलाड़ी मन भाग लिही, जेमा दू हजार तीन सौ कइतीस पुरूष अउ पांच सौ पच्यासी महिला खिलाड़ी सामिल हे।
महिला आयोग-पदभार
छत्तीसगढ़ राज्य महिला आयोग के रिक्त पांच पद म राज्य शासन डहार सदस्य मन के नियुक्ति करे गेहे। आज नवनियुक्त सदस्य मन ह पदभार ग्रहण कर लेहे। महिला आयोग कार्यालय म प्रियंवदा सिंह जूदेव, सरला कोसरिया, ओजस्वी मंडावी अउ दीपिका सोरी ह आज पदभार ग्रहण करीन। जबकि एक सदस्य लक्ष्मी वर्मा ह सात अक्टूबर के पदभार ग्रहण कर ले रिहीस।
साइबर-जागरूकता
साइबर जागरूकता पखवाड़ा के तहत गौरेला-पेण्ड्रा-मरवाही जिला के विद्यालय मन म चौदह अउ पंद्रह अक्टूबर के पोस्टर मेकिंग प्रतियोगिता के आयोजन करे गीस। ए प्रतियोगिता म करीबन साढ़े आठ सौ विद्यार्थी मन ह भाग लीन।
उहें, नारायणपुर जिला के गांव मैनपुर बाजार स्थल अउ देवगांव पोटाकेबिन के हायर सेकण्डरी स्कूल म साइबर क्राईम जन-जागरूकता कारीकरम के आयोजन करे गेहे। एमा साइबर टीम ह गांव अउ स्कूली लइका मन के संग शिक्षक मन ल संदिग्ध कॉल, लिंक या अंजान व्हाट्सएप ग्रुप अउ आने-आने साइबर फ्रॉड ले बचाव के जानकारी दीन। ए दौरान बैनर-पोस्टर के माध्यम ले साइबर सुरक्षा बर जन-जागरूकता अभियान चलाके गांव वाले मन ल जागरूक करे गीस।
अंतर्राष्ट्रीय सेमिनार
रईपुर स्थित शासकीय दूधाधारी बजरंग महिला महाविद्यालय डहार ले आज ले दू दिवसीय अंतर्राष्ट्रीय सेमिनार के आयोजन करे जावत हे। सेमिनार के बिसय ‘‘मॉडन एस्पेक्ट्स इन साइंस एंड टेक्नालॉजी‘‘ आय। सेमिनार के उद्घाटन सत्र म माई पहुना पंडित रविशंकर शुक्ल विश्वविद्यालय के कुलपति प्रोफेसर सच्चिदानंद शुक्ल ह किहीन कि विज्ञान म रोज नवा आविष्कार होथे। भारतीय ज्ञान परंपरा म विज्ञान के परयोग देख जा सकत हे।