केंद्र सरकार ह आज विपणन बछर दू हजार पच्चीस-छब्बीस बर रबी फसल के न्यूनतम समर्थन कीमत म बढ़वार करे हे। प्रधानमंत्री नरेंद्र मोदी के अगुवई म नई दिल्ली म केंद्रीय मंत्रिमंडल के बइठका होइस। बइठका के बाद सूचना अउ प्रसारण मंत्री अश्विनी वैष्णव ह पत्रकार मन ल बइठका म लेगे फइसला के संबंध म जानकारी दीन। ओमन बतइन कि सरसो के फसल म अधिकतम तीन सौ रूपिया कुंटल अउ मसूर दाल म दू सौ पचहत्तर रूपिया कुंटल बढ़वार करे गेहे।
उहें, चना के न्यूनतम समर्थन कीमत दू सौ दस रूपिया कुंटल अउ गहू एक पचास रूपिया कुंटल बढ़ाय गेहे। श्री वैष्णव ह बतइन कि केंद्रीय करमचारी अउ पेंसनभोगी मनके महंगाई भत्ता म तीन प्रतिसत के बढ़वार के घोसना करे हे। ओमन बतइन कि भत्ता म बढ़वार के फायदा उनचास लाख ले जादा केंद्रीय करमचारी अउ चौंसठ लाख ले जादा पेंसन भोगी मन ल मिलही।
राज्य मंत्रिमंडल-निर्णय
मुख्यमंत्री विष्णुदेव साय के अगुवई म आज मंत्रालय म होय राज्य मंत्रिमंडल के बइठका म होय कतकोन फइसला ले गीस। बइठका म चालू खरीफ विपणन बछर म समर्थन कीमत म धान बिसाय अउ कस्टम मिलिंग नीति के अनुमोदन करे गीस। बइठका के बाद पत्रकार मनले गोठबात करत उप मुख्यमंत्री अरूण साव ह बतइन कि मंत्री मंडलीय उप समिति के अनुसंसा के आधार म राज्य म चौदह नवंबर ले समर्थन कीमत म धान बिसाय के फइसला ले गीस, जउन इकतीस जनवरी तक होही। ओमन किहीन कि धान बिसाय बर एकीकृत किसाना पोर्टल ले पंजीयन के काम चलत हे जउन इकतीस अक्टूबर तक चलही। एसो एक सौ साठ लाख मीट्रिक टन धान बिसाय के अनुमान हवय। श्री साव ह यहू किहीन कि धान बिसाय बर चार लाख दू हजार गठान नवा जूट बारदाना बिसाय के मंजूरी दे गेहे। धान बिसाय बर आठ लाख गठान बारदाना के जरूरत होही। बइठका म सरकारी समिति म काम करइया डाटाएंट्री आपरेटर मन ल अटठारा हजार चार सौ बीस रूपिया हरेक महिना के मान ले बारह महिना के मानदेय भुगतान के फइसला ले गीस।
उहें, राजनीतिक आंदोलन के दउरान दरज उनचास प्रकरण ल वापिस ले जाय के फइसला ले गीस। मंत्री परिसद ह छत्तीसगढ़ पुलिस म सूबेदार, उपनिरीक्षक अउ प्लाटून कमांडर के पद म नियुक्ति खातिर एसो के भर्ती प्रक्रिया म सिरिफ एक घांव बर आयु सीमा म पचास बछर के छूट देके फइसला ले गेहे।
अइसेन मंत्रिमंडल ह जलापूति,र् पंचायत शिक्षक, अनुकंपा नियुक्ति, लोकतंत्र सेनानी मनके परिवार ल मिलइया सहायता रासि के संगेसंग छत्तीसगढ़ के औद्योगिक नीति म स्टील डाउन स्ट्रीम प्रोजेक्ट ऐथेनॉल इकाई अउ सीमेंट उद्योग बर बिसेस निवेस प्रोत्साहन पैकेज तय करे के अनुमोदन करीन।
महंगाई-भत्ता
राज्य सरकार ह प्रदेस के सरकारी कर्मचारी मनके महंगाई भत्ता म चार प्रतिशत के बढ़वार ल मंजूरी दे देहे। प्रदेस म अब कर्मचारी मनके महंगाई भत्ता छियालीस फीसदी ले बढ़ाके पचास प्रतिशत कर दे गेहे। मुख्यमंत्री विष्णुदेव साय ह आज कैबिनेट बइठका के पहिली एखर घोसना करीन। महंगाई भत्ता के फायदा कर्मचारी मन ल एक अक्टूबर ले मिलही।
प्रधानमंत्री-सदस्यता अभियान
प्रधानमंत्री नरेन्द्र मोदी ह आज भारतीय जनता पार्टी के राष्ट्रीय अध्यक्ष जे.पी. नड्डा के मौजूदगी म सक्रिय सदस्यता अभियान के सुरूवात करीन। ए सोसल मीडिया पोस्ट म श्री मोदी ह किहीन कि पार्टी कार्यकर्ता के रूप म ओमन ल पहिली सक्रिय सदस्य बने म गरब हे। ओमन किहीन कि ये एक आंदोलन हे, जउन जमीनी स्तर म भाजपा ल अउ मजबूत करही। संगेसंग राष्ट्रीय प्रगति बर पार्टी कार्यकर्ता मनके परभावी योगदान ल बताही। प्रधानमंत्री ह किहीन कि सक्रिय सदस्य बने बर कार्यकर्ता मन ल एक बूथ या एक विधानसभा सीट म पचास सदस्य के पंजीयन कराय बर पड़ही।
मुख्य निर्वाचन पदाधिकारी-प्रेसवार्ता
चुनाव आयोग कोति ले रईपुर दक्षिण विधानसभा सीट म उपचुनाव के तारीख के घोषणा के संगेसंग ए विधानसभा आदर्श आचार संहिता प्रभावशील होगे हे। रीना बाबा साहेब कंगाले ह आज एक पत्रकारवार्ता म बोलत किहीन कि नगर निगम अउ महानगर होय के सेती रईपुर जिला म आदर्श आचार संहिता लागू नइ होही। ए विधानसभा सीट म तेरह नवंबर के मतदान होही।
ओमन बतईन कि अट्ठारह ले पच्चीस अक्टूबर तक नामांकन भरे जाही। रईपुर दक्षिण विधानसभा क्षेत्र म कुल मतदाता के संख्या दू लाख सत्तर हजार नौ सौ छत्तीस हे। ए विधानसभा क्षेत्र म दू सौ तिरपन मतदान केन्द्र बनाय जाही, जेमा ले दस ठिन संगवारी मतदान केन्द्र, पांच आदर्श मतदान केन्द्र अउ पांच युवा मतदान केन्द्र होही। वोट डारे के बेरा सुरक्षा खातिर पांच कंपनी तैनात करे जाही।
रईपुर दक्षिण विधानसभा सीट म उपचुनाव बर संयुक्त कलेक्टर पुष्पेंद्र शर्मा ल रिटर्निंग ऑफिसर बनाय गेहे। उहें, तहसीलदार राकेश देवांगन अउ अतिरिक्त तहसीलदार विनोद कुमार साहू ल सहायक रिटर्निंग ऑफिसर बनाय गेहे।
वन खेलकूद महोत्सव
सत्ताईसवां अखिल भरतीय वन खेलकूद महोत्सव आज ले रईपुर म सुरू होगे हे। समारोह के अगुवई मुख्यमंत्री विष्णुदेव साय ह करीन। समारोह म बिसेस रूप ले बलाय गे सदस्य के रूम म राज्य के वनमंत्री केदार कश्यप अउ बिहार के वन मंत्री प्रेमकुमार के संग भारतीय टी-ट्वेंटी क्रिकेट टीम के कप्तान सूर्यकुमार यादव मौजूद रिहीन। ए प्रतियोगिता म उनतीस राज्य अउ दस केंद्रशासित प्रदेस के दू हजार तीन सौ इकतीस पुरूष खिलाड़ी अउ पांच सौ पचयासी महिला खिलाड़ी भाग लेवत हे। उद्घाटन के बेरा खिलाड़ी मन सुघ्घर मार्चपास्ट करीन।
उहें, इंहा के कलाकार मन कोति ले सांस्कृतिक कारीकरम प्रस्तुत करीन। पांच दिवसीय ए महोत्सव के समापन बीस अक्टूबर के राज्यपाल रमेन डेका के मौजूदगी म होही।
नक्सल भयमुक्त-जागरूकता अभियान
नारायणपुर जिला म पुलिस कोति ले माड़ क्षेत्र म नक्सल भयमुक्त जागरूकता अभियान चलाय जात हे। ए अभियान म काली सुरक्षा बल ह तुरूषमेटा, रोहताड़, चिहरा, मढ़ोनार अउ कचोरा गांव म लोगन ले भेंट करके हालचाल जानिन अउ माओवाद विरोधी अभियान म मिले सफलता के संबंध म बतइन। एखर उद्देस्य माड़ क्षेत्र म सांति, सुरक्षा, विकास अउ सुशासन लाना हे। ए दउरान सुरक्षा बल के जवान मन ह माओवादी मन ले राज्य शासन के आत्मसमर्पण पुर्नवास नीति ल अपना के समाज के मुख्यधारा ले जुड़े के अपील करीन।
बलौदाबाजार-एडमिशन
बलौदाबाजार जिला के पुराना खर्वें गांव म मेडिकल कॉलेज म दाखिला के नाव म चालीस लाख रूपिया के धोखाधड़ी के मामला आगू आय हे। आरोपी मन ह पीड़ित ले दस लाख रूपिया नगद अउ तीस लाख रूपिया ऑनलाइन लेहे। आरोपी पइसा लेके पीड़ित ल सालभर ले घुमावत रिहीस। एखर बाद पीड़ित ह एखर सिकईत पुलिस ले करीस। पीड़ित के सिकईत म कसडोल पुलिस ह मामला दरज करके दू झिन आरोपी ल गिरफ्तार कर लेहे।
सूरजपुर दोहरा-हत्याकांड
सूरजपुर दोहरा हत्याकांड मामला म सरगुजा रेंज के आईजी अंकित गर्ग ह खुलासा करीन कि ए घटना म पांच झिन आरोपी सामिल रिहीन। ओमन बतइन कि कुलदीप साहू समेत पांच झिन आरोपी ल गिरफ्तार कर ले गेहे। एमा एनएसयूआई के जिलाध्यक्ष सी.के. चौधरी घलो सामिल हे।
उहें, कबीरधाम जिला के लोहारीडीह गांव म होय घटना के मामला म बालाघाट पुलिस ह चार झिन आरोपी ल गिरफ्तार करके जेल भेज दे हे। बालाघाट पुलिस ह पत्रकार मनले गोठबात करत ए घटना के संबंध म बतइन कि पुलिस ह संबंधित संदेही मनके जानकारी मिले के बाद मोबाइल लोकेसन ले आरोपी मन ल गिरफ्तार करे हे। ओमन बतइन कि आरोपी टेकचंद पटेल, रोशन साहू, दिनेश साहू अउ राखी लाल हिरवाने ह मृतक कचरू साहू ल ओखरे गमछा ले फांसी म लटका दे रिहीन।
खबर के मुताबिक पाछू महिना पंद्रह सितंबर के कवर्धा के बिरसा थाना क्षेत्र के गांव रेलवाही बीजाटोला के जंगल कोति ले रद्दा तीर पेड़ उपर अज्ञात मनखे के फांसी म लटके शव मिले रिहीस।