चुनाव आयोग ह महाराष्ट्र अउ झारखंड म विधानसभा चुनाव के संगेच रायपुर दक्षिण विधानसभा सीट म उपचुनाव के तारीख के ऐलान कर देहे। रायपुर दक्षिण विधानसभा सीट म तेरह नवंबर के मतदान होही अउ तेईस नवंबर के नतीजा घोषित करे जाही। ए सीट बर नामांकन के प्रक्रिया अट्ठारह अक्टूबर ले सुरू होही। नामांकन के आखिरी तारीख पच्चीस अक्टूबर तय करे गेहे। अट्ठाईस अक्टूबर के नामांकन पत्र के जांच करे जाही। नामांकन वापसी के आखिरी तारीख तीस अक्टूबर हे।
खबर के मुताबिक बीते विधानसभा चुनाव म रईपुर दक्षिण सीट म भारतीय जनता पार्टी के बृजमोहन अग्रवाल जीत हासिल करे रिहीन। एखर बाद लोकसभा चुनाव म श्री अग्रवाल के जीत के बाद रईपुर दक्षिण विधानसभा सीट खाली होगे रिहीस, जिहां अभी उपचुनाव होही।
मतदाता सूची-प्रकाशन
प्रदेस म नगरीय निकाय चुनाव बर काली सोलह अक्टूबर के मतदाता सूची के प्रारंभिक प्रकासन करे जाही। राज्य निर्वाचन आयुक्त अजय सिंह ह सबो जिला निर्वाचन अधिकारी मन ल मतदाता सूची शुद्ध अउ निर्धारित समय-सीमा म पूरा करे अउ अट्ठारह बछर के उमर पूरा करइया लोगन के नाव मतदाता सूची म जोड़ाय के निरदेस दीन हे। ओमन किहीन कि आयोग डहार ले जारी कार्यक्रम के अनुसार सबो कार्रवाई ल निश्चित करे जाय। खबर के मुताबिक राज्य के एक सौ सड़सठ नगरीय निकाय म चुनाव होना हे।
मुख्यमंत्री-बस्तर
मुख्यमंत्री विष्णुदेव साय आज बस्तर दशहरा के मउका होवइया मुरिया दरबार म सामिल होइन। ए दउरान ओमन माडिया साराय म विकास काम बर पचास लाख रूपिया दे जाय के घोसना करीन। उहें, मांझी, चालकी अउ मेम्बर-मेंबरीन के मानदेय म बढ़ोतरी बर प्रसासन अउ बस्तर दशहरा समिति ल प्रस्ताव देके निरेदस दीन।
अपन प्रवास के दउरान मुख्यमंत्री ह बस्तर जिला म करीबन तीन करोड़ रूपिया के लागत ले बस्तर दशहरा पसरा के विकास काम के लोकार्पण करीन। इहे दंतेश्वरी मंदिर तीर के पुराना तहसील कार्यालय ल जीर्णोद्धार के बाद दशहरा बर समर्पित करे गेहे। एखर नाव बस्तर दशहरा पसरा दे गे हवय। मुख्यमंत्री ह पसरा म बस्तर दशहरा के सबो रस्म के फोटो प्रदर्शनी, रथ अउ देवी-देवता के प्रतीक ल देखे के बाद ओखर तारीफ करीन।
श्री साय आज बस्तर चेम्बर ऑफ कॉमर्स एंड इंडस्ट्रीज के सपथ ग्रहण समारोह म घलो सामिल होइन। ए मउका म ओमन ह नवा चुने गे पदाधिकारी मन ल सपथ देवइन। संगेसंग ट्रांजिस्ट हॉस्टल के लोकार्पण अउ चेंबर पत्रिका के विमोचन घलो करीन।
मुख्यमंत्री-लैलूंगा/सूरजपुर
मुख्यमंत्री विष्णुदेव साय ह काली रायगढ़ जिला के लैलूंगा म उरांव समाज डहार ले राखे गे कर्मा महोत्सव म सामिल होइन। ए मउका म ओमन ह लैलूंगा म सामाजिक भवन, स्टेडियम के जीर्णोद्वार अउ बास्केटबॉल कोर्ट के निर्माण बर एक करोड़ रूपिया ले जादा के रासि देके जाय के घोसना करीन। महोत्सव म ओमन किहीन कि खम्हार पाकुट बांध ले लैलूंगा म जल आपूर्ति के बंद प्रोजेक्ट के काम फिर ले सुरू करे जाही। मुख्यमंत्री ह किहीन कि गहिरा गुरू के जन्मस्थली अउ कर्मस्थली म उरांव समाज के गौरवशाली इतिहास रेहे हे।
ऐति, सूरजपुर जिला के ग्राम सिलौटा-प्रतापपुर राखे गे आदिवासी करमा महातिहार कार्यक्रम म घलो मुख्यमंत्री सामिल होइन। ए दउरान मुख्यमंत्री ह ‘‘हमर सुघ्घर गांव‘‘ अउ ‘‘समाधान सूरजपुर ऐप‘‘ के सुरूआत करीन। कार्यक्रम म श्री साय ह प्रतापपुर म नवा एसडीएम कार्यालय के निर्माण के संगेच आने-आने विकास काम के घोसना करीन। ओमन ह जिला के विकास काम म आधारित विकास पत्रिका के ‘‘प्रगति पत्रक‘‘ के विमोचन करीन अउ जिला प्रसासन म सुघ्घर प्रदर्सन करइया मन ल प्रोत्साहित करे बर चैंपियंस ऑफ चेंज अवॉर्ड के घलो सुरूवात करीन।
केन्द्रीय पर्यटन मंत्री-मुलाकात
केन्द्रीय पर्यटन मंत्री गजेन्द्र सिंह शेखावत ले काली नई दिल्ली म छत्तीसगढ़ टूरिज्म बोर्ड के प्रबंध संचालक विवेक आचार्य ह भेंट करीन। ओमन ह छत्तीसगढ़ के करीबन तीन सौ करोड़ रूपिया के आने-आने पर्यटन योजना ल प्रस्तुत करीन। संगेसंग राज्य म चलत श्री रामलला अयोध्या दर्शन योजना संघरा आने-आने पर्यटन योजना के बारे म केन्द्रीय मंत्री ल जानकारी दीन, जेमा केन्द्रीय पर्यटन मंत्री ह प्रदेस म चलत पर्यटन योजना के काम बर पूरा मदद दे जाय के आश्वासन दीन। ए दउरान श्री आचार्य ह केन्द्रीय मंत्री ल बस्तर शिल्पकार मन डहार ले बनाय वनवासी राम के बेलमेटल के प्रतिमा भेंट करीन।
न्यायाधीश संरक्षण अधिनियम
राज्य सासन ह छत्तीसगढ़ कनिष्ठ प्रशासनिक सेवा के संघ के मांग ल पूरा करत राजस्व अधिकारी मन बर न्यायाधीश संरक्षण अधिनियम ल लागू कर देहे। एमा अभी तक तहसीलदार अउ नायब तहसीलदार मन उपर बिना विभागीय अनुमति के सीधा एफ.आई.आर. दर्ज नइ करे जा सकही। ए संबंध म राजस्व सचिव अविनाश चंपावत ह आदेस जारी करके प्रदेस के सबो कमिश्नर अउ कलेक्टर मन ल एला लागू करे के निरदेस दीन हे।
वन खेलकूद महोत्सव
राजधानी रईपुर म सोलह ले बीस अक्टूबर तक सत्ताईसवां अखिल भारतीय वन खेलकूद महोत्सव आयोजित करे जाही। प्रधान मुख्य वन संरक्षक अउ वन बल प्रमुख व्ही. श्रीनिवास राव ह आज रईपुर म राखे गे पत्रकारवार्ता म बतईन कि केन्द्रीय पर्यावरण मंत्री भूपेन्द्र यादव, मुख्यमंत्री विष्णुदेव साय अउ वन मंत्री केदार कश्यप के मौजूदगी म काली संझा कोटा के स्वामी विवेकानंद स्टेडियम म उद्घाटन समारोह होही। ए प्रतियोगिता म देस के उनतीस राज्य, दस केन्द्रसासित प्रदेस अउ केन्द्र सासन के आने-आने वानिकी संस्था अउ केन्द्रीय पर्यावरण, वन अउ जलवायु परिवर्तन मंत्रालय के कुल उनतीस सौ सोलह प्रतिभागी मन भाग लीहीं। एमा पांच सौ पच्यासी माईलोगिन सामिल हे।
उद्घाटन समारोह म भारतीय टी-टवेंटी टीम के कप्तान सूर्यकुमार यादव घलो सामिल होही। ए प्रतियोगिता म रईपुर के सोलह ठन जगह म तीन सौ खेल कराय जाही। प्रतियोगिता के समापन बीस अक्टूबर के कोटा के स्वामी विवेकानंद स्टेडियम म होही। राज्यपाल रमेन डेका समापन समारोह के मुख्य अतिथि होही।
मुख्यमंत्री विष्णुदेव साय ले आज रईपुर के उंखर निवास कार्यालय म वन मंत्री केदार कश्यप अउ वन विभाग के अधिकारी मन ह भेंट करके ओमन ल महोत्सव म सामिल होय के नेवता दीन।
सिम्स बिलासपुर-पीजी कोर्स
राज्य सरकार ह सिम्स बिलासपुर म पीजी के दू ठन नवा कोर्स एमडी रेडियो डायग्नोस्टिक्स अउ एमडी रेस्पिरेटरी मेडिसीन ल मंजूरी दे देहे। एखर अलावा चिकित्सा विभाग ह सिम्स बिलासपुर म छह ठिन पीजी कोर्स बर सीट मन म बढ़ोतरी के सहमति घलो दे हवय। राज्य सासन ह ए बारे म जरूरी प्रमाण पत्र घलो जारी कर देहे।
स्वास्थ्य मंत्री श्यामबिहारी जायसवाल ह किहीन हे कि सीट मन म बढ़ोतरी ले राज्य म एम.बी.बी.एस. करइया मेडिकल के विद्यार्थी मन ल फायदा मिलही। पीजी पाठ्यक्रम म प्रवेस के संभावना बाढ़े ले लइका मन ल राज्य म ही उच्च सिक्षा हासिल करे के मउका मिलही। ओमन किहीन कि एखर ले न सिर्फ मेडिकल म उच्च सिक्षा के गुणवत्ता बाढ़ही, फेर राज्य ल अउ जादा बिसेसज्ञ डॉक्टर मिलही।
हत्या-आरोपी गिरफ्तार
सूरजपुर म प्रधान आरक्षक के पत्नी अउ बेटी के हत्या के आरोपी ल पुलिस ह बलरामपुर जिला के गांव गोदमाना ले गिरफ्तार कर लेहे। आरोपी कुलदीप साहू ल कड़ा सुरक्षा के बीच सूरजपुर लाय जावत हे। आरोपी के गिरफ्तारी बलरामपुर के पुलिस अधीक्षक के अगुवई म करे गीस, जेमा बलरामपुर पुलिस के टीम ह बड़े भूमिका निभईस।
कांग्रेस पत्रकारवार्ता
वरिष्ठ कांग्रेस नेता अउ पूर्व उपमुख्यमंत्री टी.एस. सिंहदेव ह आज प्रदेस कांग्रेस कार्यालय राजीव भवन म एक ठन पत्रकारवार्ता म प्रदेस म बिगड़त कानून व्यवस्था उपर राज्य सरकार के कड़ा आलोचना करीन। श्री सिंहदेव ह सूरजपुर जिला म एक झिन आदिवासी युवती संग सामूहिक दुष्कर्म अउ प्रधान आरक्षक के पत्नी अउ बेटी के हत्या के मामला म सरकार उपर लापरवाही के आरोप लगईन। पूर्व उपमुख्यमंत्री ह किहीन कि राज्य सरकार बेरा म निष्पक्ष कार्रवाई नइ करत हे, जेखर सेती प्रदेस म कानून व्यवस्था बिगड़त हे।
श्री सिंहदेव ह दावा करीन हे कि कुलदीप साहू ह जिला बदर हे, ओखर बावजूद आरोपी ह दुर्गापूजा के मउका म प्रधान आरक्षक उपर हमला करके ओखर बेटी अउ पत्नी के हत्या कर दीस।
ट्रेन-सुविधा
यात्री मनके सुविधा ल ध्यान म राखत रेलवे डहार ले गया अउ लोकमान्य तिलक टर्मिनस-एलटीटी के बीच एक ठन सुपरफास्ट ट्रेन के सुविधा दे जावत हे, जउन ह गया ले तेईस अक्टूबर ले हरेक बुधवार के अउ एलटीटी ले पच्चीस अक्टूबर ले हरेक सुक्रवार के चलही। ए ट्रेन म कुल बाईस ठन कोच होही, जेखर स्टॉपेज, रायगढ़, बिलासपुर, रईपुर अउ दुरूग रेलवे स्टेसन म घलो दे जाही।
विमान लैंडिंग
जगदलपुर के मां दंतेश्वरी एयरपोर्ट म आज मंझनिया इंडियो विमान के आपातकाली लैंडिंग कराय गीस। ए विमान ह मंझनिया एक बजे जगदलपुर ले रईपुर बर उड़ान भरे रिहीस। फेर उड़ान के सिर्फ बारह मिनट बाद खिड़की टूटे के सेती विमान के आपातकालीन लैंडिंग कराय बर पड़ीस। बताय जात हवय कि विमान म करीब सत्तर झिन यात्री बइठे रिहीन, ओमन सबो झन सुरक्षित हे।
बारनवापारा-बटरफ्लाई मीट
वन विभाग अउ बारनवापारा अभ्यारण्य डहार ले इक्कीस ले तेईस अक्टूबर तक बटरफ्लाई मीट के आयोजन करे जाही। बारनवापारा अभ्यारण्य म होवत ए मीट म प्रकृति प्रेमी मन ल बिसेसज्ञ मन डहार ले तितली मन ल अउ जादा जाने के मउका मिलही। विभाग डहार ले एखर सबो तैयारी कर ले गेहे। आयोजन म भाग ले बर अउ जानकारी ले बर क्यूआर कोड घलो बनाय गे हवय, जेखर माध्यम ले आसानी ले पंजीयन कराय जा सकत हे।
छठ पर्व
छत्तीसगढ़ संघरा देसभर म छठ महापर्व पांच ले आठ नवंबर तक मनाय जाही। एखर बर तैयारी सुरू होगे हे। छठ महापर्व आयोजन समिति के अध्यक्ष राजेश कुमार सिंह ह आज रईपुर म एक ठिन पत्रकारवार्ता म बतईन कि चार दिवसीय छठ महापर्व पांच नवंबर के नहाय-खाय रस्म के संग सुरू होही। छह नवंबर के खरना के रसम होही। उहें, सात नवंबर के संझा अर्घ्य अउ आठ नवंबर के उषा अर्घ्य होही। छठ पूजा रईपुर, बिलासपुर, भिलाई, दुरूग, कोरबा, बस्तर अउ दूसर सहर म धूमधाम ले मनाय जाथे। रईपुर म छठ पूजा खारून नदी के महादेव घाट संघरा पचास ले जादा जघा म मनाय जाथे।