प्रधानमंत्री-गतिशक्ति योजना
प्रधानमंत्री नरेंद्र मोदी ह ‘‘प्रधानमंत्री-गतिशक्ति राष्ट्रीय मास्टर प्लान‘‘ के तीन बछर पूरा होय के सराहना करत हुए किहीन कि ए पहल ह भारत के बुनियादी ढांचा ल नवा स्वरूप दे म महत्वपूर्ण भूमिका निभाय हे। एक ठन सोसल मीडिया पोस्ट म श्री मोदी ह किहीन कि गतिशक्ति ह मल्टीमॉडल कनेक्टिविटी म महत्वपूर्ण वृध्दि करे हे अउ अलग-अलग क्षेत्र के तीव्र अउ कारगर विकास ल सुनिश्चित घलो करे हे। प्रधानमंत्री ह यहू किहीन कि गतिशक्ति के विकसित भारत के सपना ल साकार करे म गति मिलत हे अउ एखर ले प्रगति, उद्यमिता, अउ नवाचार ल बढ़ावा मिलही।
मुख्यमंत्री दशहरा समारोह
मुख्यमंत्री विष्णुदेव साय ह काली रायपुर के डब्ल्यू आर.एस. कालोनी म आायोजित दसहरा कार्यक्रम म सामिल होइन। कार्यक्रम ल संबोधित करत मुख्यमंत्री ह किहीन कि ए परब असत्य उपर सत्य अउ बुराई उपर अच्छाई के जीत के परब आय। ओमन किहीन कि माता कौशल्या के नगरी अउ भांचा श्रीराम के ननिहाल छत्तीसगढ़ म रावण रूपी जउन भी बुराई हे, ओला हम सब ल मिलके दूर करे के संकल्प लेना होही। मुख्यमंत्री ह ए मउका म रावण कुंभकरण अउ मेघनाथ के पुतला के दहन करीन।
एखर बाद मुख्यमंत्री विजयादसमी के मउका म दूधाधारी मठ, रावणभाठा के दसहरा मैदान म आयोजित रावण दहन कार्यक्रम म घलो सामिल होइन। ए अवसर म मुख्यमंत्री ह रावणभाठा दसहरा मैदान के सौंदर्यीकरण अउ ओला व्यवस्थित करे बर पचास लाख रूपिया रासि देके घोसना घलो करीन।
बस्तर दशहरा
पचहत्तर दिन ले जारी बस्तर दशहरा अब अपन अंतिम चरण म पहुंच चुके हे। बस्तर दशहरा के तहत आज भीतर रैनी विधान के निर्वहन करे जाही।
भीतर रैनी विधान के तहत मां दंतेश्वरी के छत्र ल विधि विधान पूर्वक पूजा अनुष्ठान के बाद दू मंजिला रथ के जरिया सीरासार चौक, गोलबाजार चौक अउ मिताली चौक होवत सिंह ड्योढ़ी पहुंचाय जाही। एखर बाद मांई जी के रथ ल मां दंतेश्वरी मंदिर म रखे जाही।
बस्तर दशहरा के तहत काली बाहर रैनी के परंपरा के विधान संपन्न होही।
साइबर-संकल्प
गौरेला पेण्ड्रा मरवाही जिला म पुलिस ह दशहरा के अवसर म रावण दहन कार्यक्रम के दौरान हजारों लोगन मन ल साइबर सुरक्षा ल लेके संकल्प दिलाइन। जिला के पुलिस अधीक्षक भावना गुप्ता किहीन कि असत्य उपर सत्य के जीत असन साइबर फ्रॉड रूपी बुराई उपर सतर्कता के अच्छाई ह जीत दिलाही।
साइबर जागरूकता पखवाड़ा के सेल्फी पाइंट म घलो लोगन मन बिसेस रूची देखाइन अउ सेल्फी प्वाइंट म फोटो खिंचवा के खुसी जाहिर करीन।
दुर्घटना
जशपुर जिला के पत्थल गांव म पाछू रतिहा सड़क हादसा म तीन झन के मौत होगे। पुलिस के मुताबिक ए सबो झन दसहरा म आयोजित नाटक देखके घर लहुटत रिहीन। इही बेरा ग्रामीण मन ल लेके जात ट्रैक्टर अनियंत्रित होके पलट गे, जेखर ले घटना स्थल म ही दू झन महिला समेत तीन झन के मौत होगे। फेर छै ले जादा झन घायल होगे हे। घायल मन ल सिविल अस्पताल पत्थलगांव म भर्ती कराय गेहे, जिहां उंखर ईलाज चलत हे।
उहें, मुंगेली जिला के बोरड़तरा गांव म अनियंत्रित पिकअप ह पुलिस कांस्टेबल ल टक्कर मार दीस। ए हादसा म कांस्टेबल के मउका म ही मौत होगे। पुलिस कांस्टेबल के पहिचान प्रशांत मसीह के नाम के रूप म होय हे। बताय जात हे कि आरक्षक प्रशांत मसीह दसहरा कार्यक्रम के ड्यूटी ले लहूटत बेरा हादसा के सिकार होगे।
ओति, जांजगीर-चांपा जिला के तरौद गांव म सड़क हादसा म एक झन महिला के मौत होगे। बताय जात हे कि तेज रफ्तार ट्रेलर ह ए महिला ल अपन चपेट म ले लीस, जेखर ले मउका म ही ओखर मौत होगे। घटना के बाद ग्रामीण मन घटना स्थल म तीन घंटा तक चक्काजाम करीन। पुलिस अउ प्रशासन के समजाइस के बाद ग्रामीण मन चक्काजाम खतम करीन।
ऐति, बिलासपुर जिला के बेलगहना म ईंटा परिवहन के दौरान ट्रैक्टर पलटे ले एक झन ग्रामीण के मउका म ही मौत होगे। उहें, दू झन घायल होगे। घायल मन ल उपचार बर अस्पताल म भर्ती कराय गेहे।
सरस मेला
जगदलपुर के लालबाग मैदान म काली बारह अक्टूबर ले बस्तर मड़ई अउ क्षेत्रीय सरस मेला सुरू होगे हे। उन्नीस अक्टूबर तक चलइया ए मेला के सुभारंभ वनमंत्री केदार कश्यप ह करीन। ए मेला म शासकीय योजना उपर आधारित प्रदर्सनी अउ स्व-सहायता समूह डहार ले उत्पादित वस्तु मनके प्रदर्सनी अउ बिक्री करे जात हे। मेला म कई ठन जिला के स्व-सहायता समूह मनके हस्तसिल्प, कृषि उत्पाद, जैविक खाद्य पदार्थ, कपड़ा अउ दूसर स्थानीय वस्तु मनके प्रदर्सनी घलो करे गेहे।
सुभारंभ समारोह ल संबोधित करत हुए वन मंत्री ह किहीन कि ग्रामीण अर्थव्यवस्था ल मजबूत बनाय बर लगाय गे सरस मेला स्थानीय उत्पाद मन ल बाजार उपलब्ध कराय अउ महिला अउ ग्रामीण समुदाय मन ल सशक्त बनाय के माध्यम आय। समारोह ल बस्तर सांसद महेश कश्यप अउ विधायक किरण सिंह देव ह घलो संबोधित करीन।
चेन स्नेचिंग-महिला गिरफ्तार
जशपुर जिला के पत्थलगांव पुलिस ह दुर्गा विसर्जन के दौरान चेन स्नेचिंग करइया दस झन महिला मन ल गिरफ्तार करे हे। कुसमी गिरोह के ए आरोपी महिला मन करा ले पुलिस ह आठ ठन मंगल सूत्र बरामद करे हे। ए महिला मन अलग-अलग क्षेत्र म चोरी के घटना ल अंजाम देहे। जिला के पुलिस निरीक्षक शशि मोहन सिंह ह बतइन कि पत्थलगांव म दुर्गा विसर्जन के दौरान सात झन महिला मनके गला ले चेन चोरी होय के सूचना मिले रिहीस। सीसीटीवी फुटेज के आधार म जब ए मामला के जांच करे गीस त, वीडियो म कुछ महिला मन चेन स्नेचिंग करत नजर अइन। एखर आधार म पुलिस ह दस झन महिला मन ल गिरफ्तार करे हे।
अउ अब थोरकुन समाचार सार म –
– वित्त मंत्री ओपी चौधरी ह काली रायगढ़ म करीब तेरह करोड़ रूपिया के निर्माण काम के भूमिपूजन करीन।
– बलरामपुर जिला के महेवा गांव म दुर्गा विसर्जन के दौरान एक झन युवक के बूड़े ले मौत होगे।
– धमतरी पुलिस ह नौकरी लगाय के नाम म करीब सोलह लाख रूपिया के धोखाधड़ी करइया एक झन आरोपी ल गिरफ्तार करे हे।
– बेमेतरा पुलिस ह नवागढ़ म किसान मन संग इक्कीस लाख रूपिया के धोखाधड़ी करइया आरोपी ल गिरफ्तार करे हे।
अउ
– कोरबा जिला के ग्राम लालपुर म पाछू रतिहा हाथी के हमला ले एक झन नोनी घायल होगे।