आज दिनभर के खबर ल अपन गुरतुर छत्तीसगढ़ी भाखा म पढ़व

प्रधानमंत्री इंटर्नशिप योजना

प्रधानमंत्री इंटर्नशिप योजना बर रजिस्ट्रेसन आज ले सुरू होगे हवय। ए बछर के केन्द्रीय बजट म घोसित करे गे ए पहल ह युवा मन ल कारोबारी माहौल म व्यवहारिक अनुभव पाय खातिर सहायता करे बर 12 महिना के इंटर्नशिप देथे। रजिस्ट्रेसन के प्रक्रिया ए महिना के 25 तारीख तक चलही।
प्रधानमंत्री इंटर्नशिप योजना के चलत अब तक 193 कंपनी मन तकरीबन 91 हजार इंटर्नशिप के मउका देवय के घोसना करीन हवय। सरकार के लक्ष्य ए वित्त बछर म सवा लाख इंटर्नशिप मउका देना हवय। ए परियोजना म 8 सौ  करोड़ रूपिया के लागत आही। इंटर्नशिप के ए मउका 36 ठिन राज्य अउ केंद्रशासित प्रदेस मनके 737 ठिन जिला मन म उपलब्ध होही।

मुख्यमंत्री-गुरूदर्शन मेला

मुख्यमंत्री विष्णुदेव साय आज बलौदाबाजार-भाटापारा जिला म बाबा    गुरूघासी दास के कर्मभूमि अउ सतनाम पंथ के संत- अमरदास के तपोभूमि           तेलासीधाम म आयोजित गुरू दर्सन मेला म सामिल होइन। ए मउका म मुख्यमंत्री ह गुरू गद्दी के पूजा-पाठ कर नमन करीन अउ प्रदेसवासी मन के खुसहाली के कामना करीन। कारीकरम म मुख्यमंत्री ह सीसी रोड बनाय अउ गुरू अमरदास जलासय के सौंदर्यीकरण समेत अनुसूचित जाति छात्रावास, तेलासीबाड़ा के विकास खातिर 3 करोड़ रूपिया ले जादा के रासि स्वीकृत करीन। संगेसंग गैतरा रोड ले बोहरडीह तक सड़क निर्माण के घोसना घलो करीन।
ए मउका म तेलासीधाम के सबले बड़का गुरू गद्दी नसीन आसमदास साहेब घलो मौजूद रिहीन।

तोखन साहू- आवास मेला

केन्द्रीय आवास अउ सहरी विकास राज्यमंत्री तोखन साहू ह किहीन हे कि प्रधानमंत्री नरेंद्र मोदी ह गरीबहा मनके सपना ल साकार करे के संकल्प लीन हवय। ओमन तीसरा बार प्रधानमंत्री बनतेच सबले पहिली 3 करोड़ घर बनाय के स्वीकृति दीन। श्री साहू ह काली मुंगेली म ‘हमर आवास-हमर विकास‘ के थीम म आयोजित आवास मेला म सामिल होइन। ओमन किहीन कि मुंगेली जिला म 20 हजार ले जादा हितग्राही मन ल रहे के पक्का घर मिलही। ए मउका म उप मुख्यमंत्री अरूण साव, जिला के प्रभारी मंत्री लखनलाल देवांगन अउ विधायक पुन्नूलाल मोहले समेत कतकोन जन-प्रतिनिधि अउ हितग्राही मन सामिल होही।

वन खेलकूद महोत्सव

सत्ताईसवीं अखिल भारतीय वन खेलकूद महोत्सव के आयोजन रईपुर म 16 ले 22 अक्टूबर तक करे जाही। ए महोत्सव के उदघाटन 16 अक्टूबर के केंद्रीय वन मंत्री भूपेन्द्र यादव ह करही। उहें, भारतीय टी-ट्वेन्टी क्रिकेट टीम के कप्तान सूर्यकुमार यादव ह बिसेस अतिथि के रूप म सामिल होही। ए महोत्सव म 23 खेल मनके 300 विधा के तकरीबन 3 हजार खिलाड़ी मन भाग लिही, जेमा पांच सौ चौरासी महिला खिलाड़ी मन घलो सामिल होही। ए प्रतियोगिता म 29 ठिन राज्य, 8 ठिन केंद्र शासित प्रदेस अउ 6 ठिन वानिकी संस्थान, पर्यावरण, वन अउ जलवायु परिवर्तन मंत्रालय के अधिकारी-कर्मचारी मन भाग लिही। प्रतियोगिता म विजयी खिलाड़ी मन ल स्वर्ण, सिल्वर अउ कांस्य पदक के अलावा उत्कृष्टता के प्रमाण पत्र घलो दे जाही। संगेसंग राज्य के सुघ्घर प्रदर्सन करे खातिर वीनर अउ रनरअप के टॉ्रफी दे जाही। खेल महोत्सव म क्रिकेट, हॉकी, फुटबॉल, व्हालीबॉल, बैडमिंटन, सतरंज अउ ब्रिज के प्रतियोगिता होही। एखर अलावा एथलीट के जम्मो खेल घलो आयोजित करे जाही।
20 अक्टूबर के खेलकूद महोत्सव के समापन समारोह म ए बछर ओलंपिक म कांस्य पदक जीतइया निशानेबाज मनु भाकर घलो सामिल होही।

विजयदशमी

असत्य उपर सत्य के जीत के प्रतीक दशहरा तिहार आज छत्तीसगढ़ समेत जम्मो देस म पारंपरिक उल्लास अउ बड़ उछाह के संग मनाय जावत हवय। ए मउका म रावण मेघनाथ अउ कुंभकर्ण के पुतला ल जलाय जाही।  राजधानी रईपुर समेत प्रदेस के जम्मो जिला मन म दशहरा उत्सव के आयोजन करे जावत हे। राजधानी रईपुर के डब्ल्यू.आर.एस. कालोनी अउ रावण भाठा मैदान म बिसेस आयोजन करे जावत हे।
दशहरा तिहार के मउका म आज रईपुर, दुरूग, राजनांदगांव, बिलासपुर, रायगढ़ समेत प्रदेस के आने-आने थाना, चौकी अउ सशस्त्रगार म राखे सस्त्र के साफ-सफाई कर ओखर पूजा पाठ करे गीस। दुरूग के पुलिस लाइन के सस्त्रागार म आयोजित पूजन-हवन कारीकरम म ‘‘एक भारत-श्रेष्ठ भारत‘‘ अभियान के चलत गुजरात ले आय पुलिस के अधिकारी-कर्मचारी मन सामिल होइन। ए मउका म सस्त्र मनके विधि विधान ले पूजा अर्चना करे के बाद पुलिस के अधिकारी मन ह हवई फायरिंग कर विजयादशमी के सुभकामना दीन।
राज्यपाल रमेन डेका आज राजभवन म आयोजित सस्त्र पूजन अउ हवन म सामिल होइन। ए मउका म ओमन देस अउ प्रदेस के सुख-समृध्दि के कामना करीन। ओमन राजभवन परिसर म विधिवत सस्त्र पूजा करीन। ओमन राजभवन सचिवालय के अधिकारी अउ कर्मचारी मन ल विजयादसमी के अपन सुभकामना दीन। ए मउका म राज्यपाल ह किहीन कि असत्य म सत्य के जीत के ए तिहार हमन ल अहंकार अउ अधर्म ल खतम करे के सीख देथे। हमन ल दशहरा के ए पावन परब म सत्य के राह म चले के संकल्प लेना चाही।
उहें, मुख्यमंत्री विष्णुदेव साय रईपुर स्थित अपन निवास कार्यालय म आयोजित सस्त्र पूजन म सामिल होइन। ओमन विधि-विधान ले सस्त्र के पूजा करीन अउ मां भगवती के अराधना घलो करीन। ए मउका म मुख्यमंत्री सचिवालय अउ मुख्यमंत्री सुरक्षा के अधिकारी कर्मचारी मन मौजूद रिहीन। ए मउका म श्री साय ह प्रदेसवासी मन ल दसहरा परब के अपन सुभकामना दीन। ओमन कामना करीन कि विजयादसमी के ए परब जम्मो लोगन मनके जीवन म नकारात्मकता अउ कठिनाई ल खतम करे के संगेसंग सुख-समृध्दि अउ खुसहाली लेके आवय।बस्तर दशहरा

विश्व प्रसिध्द बस्तर दशहरा परब के चलत आज मावली परघाव के रस्म अदा करे जावत हे, जेमा सक्तिपीठ दंतेवाड़ा ले बस्तर दशहरा म सामिल होय बर आईस, मावली माता अउ मां दंतेश्वरी के डोली अउ छत्र के पूजा अर्चना करे के बाद राज परिवार के सदस्य, राजगुरू, पुजारी मन बाजा-गाजा अउ आतिसबाजी के संग परघा के लाही। एला ही मावली परघाव केहे जाथे। उहें, काली भीतर-रैनी के रस्म घलो अदा करे जाही। ए रस्म म 8 पहिया वाला दू मंजिला एक ठिन बड़का रथ म मां दंतेश्वरी के छत्र ल रखके ओखर परिक्रमा करे जाही।
इही बीच, बस्तर दशहरा म सामिल होय खातिर आज कांंडागांव ले मांझी, चालकी, गायता अउ पुजारी मनके परंपरागत समूह ह विदाई लीन। विदाई समारोह म स्थानीय विधायक अउ बस्तर विकास प्राधिकरण के अध्यक्ष लता उसेंडी सामिल होइन। कांडागांव ले रवाना होइस ए टोली जगदलपुर म आयोजित बस्तर दशहरा महोत्सव म सामिल होहीं।

जिले की चिट्ठी

आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके 5 मिनट ले छै बजके 10 मिनट तक करे जाही। ए कारीकरम ल प्रदेस के जम्मों आकाशवाणी केंद्र मन ह एके संघरा रिले करही। ए बखत के अंक म ‘‘बीजापुर‘‘ जिला के गतिविधि के बारे म जानकारी दे जाही।

हल्बी/गोण्डी-समाचार बुलेटिन

सुनइया मन ल बतादन कि काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन प्रसारित करे जाही। ए दूनों बुलेटिन आकाशवाणी केंद्र, जगदलपुर ले प्रसारित होही। जेला बस्तर संभाग म ही सुने जा सकही। हल्बी म समाचार बुलेटिन बिहनिया साढ़े सात बजे ले अउ गोण्डी म समाचार बुलेटिन संझा साढ़े छे बजे ले प्रसारित करे जाही।