राष्ट्रपति द्रौपदी मुर्मु के पच्चीस अउ छब्बीस अक्टूबर के दू दिन के छत्तीसगढ़ प्रवास ल देखत आज राजभवन म राज्यपाल के सचिव यशवंत कुमार ह बइठका लेके जरूरी दिसा-निरदेस दीन। ओमन अधिकारी मन ले किहीन कि राष्ट्रपति के प्रवास के दउरान जम्मो तियारी निर्धारित प्रोटोकाल के अनुसार करे जाय।
अपन प्रवास के दउरान राष्ट्रपति एम्स रईपुर, एनआईटी रईपुर, आईआईटी भिलाई अउ पंडित दीनदयाल स्मृति स्वास्थ्य विज्ञान आयुष विश्वविद्यालय के दीक्षांत समारोह म मुख्य अतिथि के रूप म सामिल होही। राज्यपाल के सचिव ह जम्मो सैक्षणिक संस्थान मन म जरूरी व्यवस्था सुनिश्चित करे के निरदेस दीन हे। एखर अलावा रईपुर अउ दुरूग जिला प्रशासन, लोक निर्माण विभाग, नगर-निगम, लोक स्वास्थ्य यांत्रिकी, स्वास्थ्य विभाग, पुलिस, राज्य प्रोटोकाल के अधिकारी मन ल घलो सबो तियारी निर्धारित बेरा म पूरा करे के घलो निरदेस दीन हे।
सौरभ चंद्राकर-गिरफ्तार
महादेव ऑनलाइन सट्टा ऐप के मुख्य संचालक सौरभ चंद्राकर ल दुबई ले गिरफ्तार कर ले गेहे। प्रवर्तन निदेशालय-ईडी, विदेस मंत्रालय अउ गृह मंत्रालय ह संयुक्त कार्रवाई करत सौरभ चंद्राकर ल गिरफ्तार करे हे। दुरूग के पुलिस महानिरीक्षक रामगोपाल गर्ग ह सौरभ चंद्राकर के गिरफ्तारी के पुष्टि करत बतइन कि यूएई के अधिकारी मन भारत सरकार अउ सीबीआई ल सौरभ चंद्राकर के गिरफ्तारी के बारे म जानकारी दीन। अब प्रत्यर्पण के प्रक्रिया ल पूरा करे के बाद ‘‘प्रोविजनल अरेस्ट‘‘ करके ओला भारत लाय जाही।
बतादन कि लगभग डेढ़ महिना पहिली राज्य सरकार ह महादेव ऑनलाइन सट्टा म करीबन छै हजार करोड़ रूपिया ले जादा के घोटाला के जांच सीबीआई ल सौंपे रिहीस।
डॉक्टर-निजी प्रेक्टिस प्रतिबंध
चिकित्सा शिक्षा विभाग ह प्रदेस के जम्मो शासकीय चिकित्सा महाविद्यालय अउ शासकीय दंत चिकित्सा महाविद्यालय के स्नात्कोत्तर छात्र मनके पाठ्यक्रम अवधि के दउरान निजी प्रेक्टिस, सेवा अउ नौकरी उपर प्रतिबंध लगा देहे। एखर अंतर्गत जम्मो चिकित्सा महाविद्यालय अउ दंत चिकित्सा महाविद्यालय के अधिष्ठाता अउ प्राचार्य मन ल ए सुनिश्चित करे के निरदेस दे गेहे कि स्नात्कोत्तर छात्र-छात्रा मन ए नियम के कड़ाई ले पालन करय। जम्मो छात्र-छात्रा मन ले ए संबंध म एक सपथ पत्र प्रस्तुत करे के घलो निरदेस दे गेहे।
चिकित्सक-सूची
चिकित्सा शिक्षा विभाग ह नॉन प्रैक्टिसिंग एलाउंस लेवइया चिकित्सक मनके सूची अपन वेबसाइट म जारी कर देहे। पारदर्सिता बनाय राखे बर सूची म ओ चिकित्सक मनके नाव सामिल करे गेहे, जउन मन निजी प्रैक्टिस नइ करत हे।
बतादन कि अइसे चिकित्सक अउ चिकित्सा शिक्षक जउन मन निजी प्रैक्टिस नइ करे ओमन ल शासन डहार ले वेतन के अतिरिक्त नॉन प्रैक्टिसिंग एलाउंस-एनपीए घलो दे जाथे। एनपीए लेहे के बाद भी निजी प्रैक्टिस करना प्रतिबंधित हरय अउ ए नियम विरूध्द हरय।
आईपीएस अधिकारी-तबादला
राज्य सरकार ह भारतीय पुलिस सेवा के चार अधिकारी मनके तबादला करे हे। जारी आदेस के अनुसार निखिल अशोक राखेचा ल गरियाबंद के नवा पुलिस अधीक्षक बनाय गेहे। उहें, अमित तुकाराम कांम्बले ल कांकेर के नवा डीआईजी नियुक्त करे गेहे। अइसने, उपेश प्रसाद गुप्ता ल सुकमा जिला के अतिरिक्त पुलिस अधीक्षक के पद म पदस्थ करे गेहे। पूजा कुमार ल बीजापुर के अतिरिक्त पुलिस अधीक्षक के जिम्मेदारी सौंपे गेहे।
श्रम सम्मान-राशि
वन मंत्री केदार कश्यप के निरदेस म दैनिक वेतन भोगी कर्मचारी मन बर श्रम सम्मान रासि जारी कर दे गेहे। प्रधान मुख्य वन संरक्षक अउ वन बल प्रमुख छत्तीसगढ़ डहार ले बारह करोड़ चौतीस लाख रूपिया श्रम सम्मान रासि भुगतान बर आबंटित करे गेहे। ए रासि ले वन विभाग के करीबन छै हजार ले जादा दैनिक वेतन भोगी कर्मचारी मन ल हर महिना चार हजार रूपिया के दर ले श्रम सम्मान रासि के भुगतान करे जाही।
महाअष्टमी
छत्तीसगढ़ समेत देसभर म आज दुर्गाष्टमी अउ महानवमी श्रध्दा अउ धार्मिक उछाह के संग मनाय जात हे। आज के दिन महागौरी अउ सिध्दिदात्री के रूप म सक्ति के उपासना करे जाथे। राजधानी रईपुर समेत प्रदेस के आने-आने सक्तिपीठ अउ मंदिर देवालय मन म आज हवन-पूजा के बिसेस कारीकरम राखे जात हे। मंदिर अउ दुर्गोत्सव समिति मन के संगेसंग व्रत उपास रखइया श्रध्दालू मन आज कन्या भोज घलो कराइन।
मुख्यमंत्री विष्णुदेव साय ह प्रदेसवासी मन ल दुर्गाष्टमी अउ महानवमी के बधई अउ सुभकामना दीन हे।
उहें, राज्यपाल रमेन डेका काली भिलाई के वैशाली नगर स्थित काली बाड़ी के दुर्गा पूजा उत्सव म सामिल होइन। ए दउरान राज्यपाल ह पूजा-पाठ करके देस अउ प्रदेस के खुसहाली के कामना करीन।
भाजपा सदस्यता अभियान
भाजपा के सदस्यता अभियान के तहत सोलह ले तीस अक्टूबर तक प्रदेस म सक्रिय सदस्यता अभियान चलाय जाही। ए अभियान के जानकारी देवत सक्रिय सदस्यता समीक्षा समिति के संयोजक संजय श्रीवास्तव ह बतइन कि हरेक मंडल म एक लाख सक्रिय सदस्य बनाय के लक्ष्य राखे गेहे। एखर बर आज ले चौदह अक्टूबर तक जिला मन म प्रत्यक्ष रूप ले कार्यसाला राखे जात हे। उहें, एक ले चार नवंबर तक सक्रिय सदस्यता के फार्म के सत्यापन अउ अनुमोदन होही। जेखर बाद पांच नवंबर के सक्रिय सदस्य मनके सूची जारी करे जाही
जशप्योर ब्रांड
मुंबई के आने-आने जघा मन म जशप्योर ब्रांड के स्टाल लगाय गेहे, जिहां जशपुर जिला के स्थानीय कच्चा माल ले बने उत्पाद मन ल प्रदर्सित करे जात हे। ए स्टाल मन म महुआ सिरप, महुआ आधारित चीनी मुक्त च्यवनप्राश, विकल्प फॉरेस्ट गोल्ड वन्यप्राश अउ बाजरा पास्ता जइसे उत्पाद मौजूद हरय। ए प्रदर्सनी म जशपुर के आदिवासी महिला मन कोति ले तियार करे गे उत्पाद के बहुते मांग देखे जात हे। ए स्टाल गतिविधि मन ल महाराष्ट्र के जवाहर जिला के स्थानीय आदिवासी किसनहा मन कोति ले चलाय जात हे। ए पहल ले जशपुर जिला के आदिवासी मनके संघरा महाराष्ट्र के जवाहर जिला के आदिवासी मन ल घलो रोजगार के मउका मिलत हे।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ म ए बखत छत्तीसगढ़ के पर्वतारोही निशा यादव ले लेगे भेंटवार्ता के प्रसारण करे जाही। ए कारीकरम आकाशवाणी केन्द्र रायपुर ले काली बारह अक्टूबर के बिहनिया साढ़े दस बजे ले प्रसारित होही। एला छत्तीसगढ़ स्थित आकाशवाणी के जम्मो केन्द्र रिले करही।
साइबर-जागरूकता
रायगढ़ जिला म आज साइबर सुरक्षा अउ जल सरंक्षण ल लेके एक ठिन कार्यसाला राखे गीस। ए कारीकरम सुप्रीम कोर्ट के जस्टिस प्रशांत मिश्रा मुख्य अतिथि अउ वित्त मंत्री ओ.पी. चौधरी विशिष्ट अतिथि के रूप म सामिल होइन। विधिक सेवा प्राधिकरण अउ जिला अउ पुलिस प्रशासन के संयुक्त तत्वाधान म आयोजित ए कार्यसाला लोगन मन ल साइबर सुरक्षा अउ जल संरक्षण के प्रति जागरूक करे गीस। कार्यसाला ल संबोधित करत जस्टिस प्रशांत मिश्रा ह किहीन कि बदलत तकनीक के बीच लोगन मन ल साइबर अपराध के जानकारी होना जरूरी हे। ओमन किहीन कि बचाव के तरीका ल अमल म लाके अइसे अपराध ले बांचे जा सकत हे।
उहें, महासमुंद पुलिस कोति ले ए दिन म साइबर ठगी ले मनखे मन ल बचाय खातिर जन- जागरूकता अभियान चलाय जात हे। एखर तहत जिला के दुर्गा पंडाल मन म साइबर फ्राड संबंधी जानकारी, साइबर ठगी करे के तरीका अउ एखर बचाव के अलावा एला लेके किए जाने वाला कार्रवाई के बारे म पोस्टर अउ पाम्पलेट के माध्यम ले जागरूक करे गीस।
ओति, नारायणपुर जिला म घलो राज्य व्यापी साइबर जन-जागरूकता पखवाड़ा अभियान के तहत चलाय जात अभियान के जानकारी मंत्री केदार कश्यप ह लीन। ए दउरान ओमन अधिकारी मन ल लोगन मन तक साइबर ठगी के बारे म जानकारी पहुंचाय के निरदेस दीन। पुलिस अधीक्षक प्रभात कुमार ह संदिग्ध कॉल, लिंक या अंजान व्हाट्सग्रुप अउ दूसर साइबर फ्राड ले दूर रहे अउ रासि निवेस करे के पहिली जांच करे के अपील करीन।