राष्ट्रपति द्रौपदी मुर्मू के अवइया पच्चीस अक्टूबर ले दू दिन के छत्तीसगढ़ दउरा प्रस्तावित हे। श्रीमती मुर्मू के पच्चीस अक्टूबर के दिन ही भिलाई म आई.आई.टी. के दीक्षांत समारोह म सामिल होय के संभावना हे। जेखर बाद ओमन एनआईटी रायपुर के दीक्षांत समारोह म घलो हिस्सा ले सकथे। छब्बीस अक्टूबर के दिन श्रीमती मुर्मू के एम्स अउ ट्रिपल आईटी के दीक्षांत समारोह म मुख्य अतिथि के रूप म सामिल होय के संभावना हे।
केन्द्र-फोर्टिफाइड चावल
केन्द्र सरकार ह प्रधानमंत्री गरीब कल्याण अन्न योजना अउ आने कल्याणकारी योजना के तहत एसो जुलाई ले दिसंबर दू हजार अट्ठाईस तक मुफत म फोर्टिफाइड चाउर देके मंजूरी जारी कर देहे। सूचना अउ प्रसारण मंत्री अश्वनी वैष्णव ह काली नई दिल्ली म किहीन कि ए पहल ले एनीमिया अउ सूक्ष्म पोषक तत्व मनके कमी मनके समस्या ह दूर होही। फोर्टिफाइड चाउर म आयरन, फोलिकएसिड अउ विटामिन-बी टवेलभ जइसन सूक्ष्य पोषक मिलाय जाथे।
राज्य निर्वाचन आयुक्त अजय सिंह ह त्रिस्तरीय पचांयत चुनई के तैयारी ल लेके आज नवा रईपुर म समीक्षा बइठका लीन। बइठका म पंचायत अउ ग्रामीण विकास विभाग के संगेसंग सामान्य प्रसासन विभाग के अधिकारी मन ह घलो सामिल होइन। राज्य निर्वाचन आयुक्त ह त्रिस्तरीय पंचायत के चुनई बर परिसीमन अउ आरक्षण के कामकाज ल बेरा म पूरा करे के निरदेस दीन। बइठका म पंचायत अउ ग्रामीण विकास विभाग के प्रमुख सचिव निहारिका बारिक ह परिसीमन अउ आरक्षण के बारे म अब तक होय कामकाज के बारे म जानबा दीन। बइठका म मतदाता सूची के जांच जइसन कतकोन बिसय उपर घलो गोठबात करे गीस।
सोनमणि बोरा-समीक्षा
आदिम जाति अउ अनुसूचित जाति विकास विभाग के प्रमुख सचिव सोनमणि बोरा ह गोंडी बोली ल बचाय बर ट्रिपल आईटी के मदद तियार करे जात आर्टिफिशियल इंटेलीजेंस ऐप के समीक्षा करीन। ओमन विशेषज्ञ अनुवादक मनके माध्यम ले जल्दी ले जल्दी जनजातीय जीवन ले सरोकार रखइया बिसय मनके वाक्य ल सामिल करे बर किहीन।
आर्टिफिशियल इंटेलीजेंस आधारित ट्रांसलेशन ऐप विकसित करे बर करीबन पचास हजार हिन्दी-गोंडी वाक्य मनके अनुवाद के लक्ष्य राखे गेहे। बइठका म प्रमुख सचिव ह बनत शहीद वीरनारायण सिंह आदिवासी स्वतंत्रता संग्राम सेनानी संग्रहालय ल बेरा म पूरा करे बर किहीन। आज के बइठका के बाद एक घांव फेर सोलह अक्टूबर के समीक्षा बइठका राखे जाही।
पीडब्ल्यूडी-अभियंता भर्ती
वित्त विभाग ह लोक निर्माण विभाग म सब इंजीनियर मनके एक सौ दू पद म भर्ती के मंजूरी दे देहे, जेमा छियासी सिविल अउ सोलह विद्युत यांत्रिकी के उप-अभियंता के पद सामिल हे। एखर पहिली, लोक स्वास्थ्य यांत्रिकी विभाग म एक सौ अट्ठाईस अभियंता मनके पद निकाले गे रिहीस। प्रदेस म अब तक आठ ले जादा विभाग म आने-आने पद बर भर्ती के काम सुरू होगे हे। एमा स्वास्थ्य, लोक स्वास्थ्य यांत्रिकी, कृषि, ग्रामीण आजीविका मिशन, गृह अउ विधि विभाग के संगेसंग आदिम जाति कल्याण विभाग मन म भर्ती के काम चलत हे।
उहें, पंचायत अउ ग्रामीण विकास विभाग ह चार सौ इक्कीस अभियंता मन ल उंखर लंबा सेवा देके सेती समयमान तनखा देके आदेस जारी करे हे। एमा उप अभियंता, सहायक अभियंता, कार्यपालन अभियंता अउ अधीक्षण अभियंता सामिल हे।
सहकार से समृद्धि-कार्यशाला
सहकारिता मंत्री केदार कश्यप ह काली रईपुर म ‘‘सहकार से समृद्धि‘‘ बिसय उपर राखे गे कार्यशाला म सामिल होइन। कार्यशाला म केन्द्र सरकार के सहकारिता मंत्रालय डहार ले ‘‘सहकार से समृद्धि‘‘ बिसय उपर करे गे पहल म राज्य म होवत कतकोन कामकाज उपर गोठबात करे गीस। ए मउका म सहकारी बैंक डहार ले आठ लाख छत्तीस हजार ले जादा किसान मन ल रूपे किसान क्रेडिट कार्ड जारी करे गीस। कार्यशाला म सहकारिता मंत्री ह पांच झिन किसान मन ल प्रतीकात्मक रूप ले रूपे किसान कार्ड अउ नीलम चौहान ल अनुकम्पा नियुक्ति के पत्र दीन।
कार्यशाला के बाद होय विभागीय समीक्षा बइठका म मंत्री ह अवइया छह महीना म दू हजार पैक्स, मछुआ समिति, लघु वनोपज समिति अउ दुग्ध समिति बनाय उपर गोठबात करीन। बइठका म अंबिकापुर अउ जगदलपुर के जम्मों पैक्स म माइक्रो एटीएम ल एक्टिव राखे बर केहे गीस।
रतन टाटा-निधन
जाने-माने उद्योगपति रतन टाटा के काली मुंबई म निधन होगे। छियासी साल के श्री टाटा के एक ठिन प्राईवेट अस्पताल म इलाज चलत रिहीस। राष्ट्रपति द्रौपदी मुर्मू, उपराष्ट्रपति जगदीप धनखड़ अउ प्रधानमंत्री नरेन्द्र मोदी के संगेसंग समाज के कतकोन प्रमुख मनखे मन ह रतन टाटा के मउत म सोक व्यक्त करे हे।
त उहें, छत्तीसगढ़ के मुख्यमंत्री विष्णुदेव साय, उपमुख्यमंत्री अरूण साव अउ भारतीय जनता पार्टी के प्रदेस अध्यक्ष किरण सिंह देव ह घलो रतन टाटा के मउत म सोक व्यक्त करे हे। मुख्यमंत्री ह अपन सोशल मीडिया हैंडल ‘‘एक्स‘‘ म लिखे हे कि उंखर निधन भारत अउ उद्योग जगत बर बड़का नकसान हरय।
नेशनल गोल्फ चैंपियनशिप
नवा रईपुर म चौबीस ले छब्बीस अक्टूबर तक नेशनल गोल्फ चैंपियनशिप होही। मुख्य सचिव अमिताभ जैन ह आज नवा रईपुर स्थित गोल्फ कोर्ट म गोल्फ फेडरेशन ऑफ इंडिया डहार ले राखे गे नेशनल गोल्फ चैंपियनशिप प्री-लांच के उद्घाटन करीन। ए राष्ट्रीय प्रतियोगिता म प्रदेस के संगेसंग बीस ठिन राज्य के टीम मन भाग लीहीं। हरेक टीम म छह सदस्य होही। चैंपियनशिप के पहली पुरस्कार दस लाख रूपिया अउ रनरअप ल छह लाख रूपिया दे जाही।
ए मउका म मुख्य सचिव ह किहीन कि नेशनल गोल्फ चैंपियनशिप बर छत्तीसगढ़ के टीम के चुने ले आने खेल के संग गोल्फ खेल कोति घलो लोगन मनके इच्छा बाढ़ही।
बस्तर दशहरा
विश्व प्रसिद्ध बस्तर दशहरा म आज फूल रथ के आखिरी परिक्रमा होही। ए रथ म मां दंतेश्वरी के छत्र ल राखके गोलबाजार अउ मिताली चउक होवत वापिस सिंहड्योढ़ी के तीर लाय जाही, जेखर बाद रथ ले मांई जी के छत्र ल उतारके मंदिर म राखे जाही। एखर पहिली, आज बेल पूजा विधि-विधान ले होइस। ए विधान म जगदलपुर के तीर स्थित सरगीपाल गांव के बेल चबूतरा म बेल के पेड़ के पूजापाठ करे गीस, जेखर बाद उहां ले बेल फल ल लाके मां दंतेश्वरी मंदिर म राखे गीस। काली रतिहा दंतेश्वरी मंदिर के पुजारी, मांझी अउ चालकी मन ह बेल देवी मन ल नेवता दे बर गे रिहीन। मंदिर के पुजारी के मुताबिक बस्तर दशहरा म ए रस्म बछर सत्रह सौ सत्ताईस ले चले आत हे।
मुख्यमंत्री निवास-कामकाज शुरू
मुख्यमंत्री विष्णुदेव साय ह आज नवा रईपुर स्थित नवा मुख्यमंत्री निवास म कामकाज सुरू कर दीन। ए दउरान मुख्यमंत्री ह कोनों-कोनों फाइल म दस्तखत करीन। ए जानबा देवत ओमन अपन सोशल मीडिया हैंडल ‘‘एक्स‘‘ म लिखीन कि ए निवास प्रदेस के तीन करोड़ जनता के हरय, जेखर बर दरवाजा ह हर समय खुले रइही। नवा रईपुर के सेक्टर चौबीस स्थित मुख्यमंत्री के नवा निवास कार्यालय म उंखर सचिव राहुल भगत, पी.दयानंद अउ बसवराजु एस. ह मुख्यमंत्री के स्वागत करीन। ए मउका म मुख्यमंत्री सचिवालय के अधिकारी अउ कर्मचारी मन घलो सामिल होइन।
अउ अब मौसम के हाल…
प्रदेस म बंगाल के खाड़ी ले सरलग नमी आवत हे, जेखर असर ले काली प्रदेस के एक-दू जघा म गरज-चमक के संग हल्का ले मध्यम बरसा होय के संभावना हे। रईपुर स्थित मौसम विज्ञान केन्द्र के मौसम विज्ञानी एच.पी. चन्द्रा ह आकाशवाणी ल बतईन कि प्रदेस के कोनों-कोनों जघा म हवा-गरेर के संग गाज घलो गीर सकथे।
अउ अब थोरकुन समाचार सार म –
– मुख्यमंत्री विष्णुदेव साय के अगुवई म इक्कीस अक्टूबर के जशपुर के जिला पंचायत सभाकक्ष म सरगुजा क्षेत्र आदिवासी विकास प्राधिकरण के बइठका होही।
– भिलाई इस्पात संयंत्र के एस.एम.एस.-थ्री म आज बिहनिया होय दुर्घटना म एक झिन ठेका म मजूरी करत मनखे के मउत होगे। बताय जात हे कि दू ठिन क्रेन के टक्कर म स्टॉपर ह टूट के मजूर उपर गीर गे।
अउ
– कांकेर जिला के देवीनवागांव म करेंट के चपेट म आय ले तीन ठिन भालू के मउत होगे।