केन्द्र सरकार ह छत्तीसगढ़ के छह ठिन जिला म तीन सौ चौबीस किलोमीटर सड़क निर्माण बर आठ सौ बयानवे करोड़ रूपिया मंजूर करे हे। लोक निर्माण मंत्री अरूण साव ह एखर बर प्रधानमंत्री नरेन्द्र मोदी अउ केन्द्रीय सड़क परिवहन अउ राजमार्ग मंत्री नितिन गडकरी के आभार जतईन हे। बतादन कि केन्द्रीय मंत्री नितिन गडकरी ह पाछु तीस सितंबर के मुख्यमंत्री विष्णुदेव साय अउ उपमुख्यमंत्री अरूण साव के संग नई दिल्ली म होय बइठका म ए प्रस्ताव उपर सैद्धांतिक सहमति दे रिहीन। श्री गडकरी ह सोशल मीडिया साइट ‘एक्स‘ म भारत सरकार डहार ले ए प्रस्ताव ल मंजूर करे जाय के जानकारी साझा करीन हे। ओमन लिखिन कि छत्तीसगढ़ के बेमेतरा, मुंगेली, राजनांदगांव जशपुर, बिलासपुर अउ खैरागढ़ जिला म आठ सड़क खंड के विकास बर मंजूरी दे गेहे।
मंत्रिमंडल-फैसले
केन्द्र सरकार ह लोगन मन म खून अउ पोषक तत्व के कमी ल दूर करे बर सूक्ष्म पोषक तत्व वाला चाउर के आपूर्ति ल मंजूरी दे देहे। प्रधानमंत्री नरेन्द्र मोदी के अध्यक्षता म आज मंत्रिमंडल के बइठका म ए फइसला ले गीस। केन्द्रीय सूचना अउ प्रसारण मंत्री अश्वनी वैष्णव ह नई दिल्ली म संवाददाता मन ल ए जानकारी दीन। ओमन किहीन कि ए ह समावेशी विकास अउ पोषण सुरक्षा के दिसा म उठाय गे कदम हे। ए योजना उपर सत्रह हजार करोड़ रूपिया ले जादा के खरचा आही।
महतारी सदन
अवइया पांच साल म प्रदेस के जम्मों ग्राम पंचायत म महतारी सदन बनाय जाही। पहिली चरण म प्रत्येक विकासखंड म महतारी सदन बनाय के काम सुरू करे जात हे। महतारी सदन के निर्माण लगभग पच्चीस सौ वर्गफूट म कराय जाही। उपमुख्यमंत्री विजय शर्मा ह किहीन कि महिला मन ल आत्मनिर्भर बनाय म महतारी सदन सहायक होही। ओमन बतईन कि प्रदेस म एक सौ उनयासी महतारी सदन बनाय के मंजूरी मिले हे। एखर बर बावन करोड़ बीस लाख रूपिया मंजूर करे गेहे। महतारी सदन म महिला मन बर कमरा, बरामदा, हॉल, किचन, स्टोर रूम, पेयजल बर ट्यूबवेल अउ सामुदायिक सौचालय जइसे सुविधा होही।
अग्निवीर-भर्ती रैली
जबलपुर के रानी दुर्गावती विश्वविद्यालय म तेरह नवंबर के बिहनिया चार बजे ले अग्निवीर मन ल सैन्य पुलिस भर्ती रैली के आयोजन करे जाही। रैली म सामिल होवइया उम्मीदवार मन ल जबलपुर के एयरपोर्ट रोड स्थित प्रवेस द्वार म बिहनिया दू बजे तक रिपोर्ट करना होही। ए रैली म कॉमन एंट्रेस एग्जाम-सीईई म सफल मध्यप्रदेश अउ छत्तीसगढ़ के दू सौ इकचालीस युवती मन भाग लीहीं। जम्मों अभ्यर्थी मन ल पाछु तीन अक्टूबर के उंखर पंजीकृत ई-मेल आईडी म एडमिट कार्ड भेज दे गेहे। उम्मीदवार मन ल एडमिट कार्ड अउ रैली नोटिफिकेशन के अनुसार जम्मों दस्तावेज अउ आधार कार्ड ले जुड़े मोबाइल नंबर लाना अनिवार्य होही। रैली संबंधी कोनों भी तरह के जानकारी बर जबलपुर स्थित भर्ती कार्यालय के मोबाइल नंबर – सात दो चार सात शून्य दो आठ नौ नौ छह म संपर्क करे जा सकत हे।
छत्तीसगढ़ माध्यमिक सिक्षा मंडल डहार ले स्वाध्यायी परीक्षार्थी मन बर हाईस्कूल अउ हायर सेकेंडरी मुख्य परीक्षा बर फॉर्म भरे के आखिरी तारीख आठ अक्टूबर ले बढ़ाके तीस अक्टूबर कर दे गेहे। विद्यार्थी विशेष विलम्ब शुल्क पन्द्रह सौ चालीस रूपिया के संग फार्म भर सकत हे। जम्मों मान्यता प्राप्त संस्था मन ल निरदेस दे गेहे कि ओमन ए समय अवधि म ऑनलाइन प्रविष्टि अउ सुल्क भुगतान के प्रक्रिया ल पूरा करय। निर्धारित बेरा के बाद पोर्टल दुबारा सुरू नइ करे जाही।
माओवादी-शिनाख्त
नारायणपुर जिला म सुरक्षा बल अउ माओवादी मनके बीच पाछु चार अक्टूबर के होय मुठभेड़ म मारे गे सात झिन अउ माओवादी मनके पहिचान के संघरा अब तक कुल उनतीस माओवादी मनके शिनाख्त कर ले गेहे। मुठभेड़ म मारे गे दू झिन दूसर माओवादी मनके पहिचान करे जात हे। बस्तर रेंज के पुलिस महानिरीक्षक सुंदरराज पी. ह बतईन कि अब तक जेन उनतीस माओवादी मनके पहिचान करे गेहे, ओमन ले एक झन डी.के.एस.जेड.सी., एक झन सी.वाय.पी.सी. कमांडर, तीन झन डी.वी.सी.एम., चौदह झन पी.एल.जी.ए. कंपनी नंबर-छह के सदस्य, दू झन डी.के.एस.जेड.सी. गार्ड अउ छह झिन एरिया कमेटी के सदस्य रिहीन। ए उनतीस माओवादी मन उपर दू करोड़ पन्द्रह लाख रूपिया के इनाम घोसित रिहीस।
अस्पताल-लापरवाही मामला
राज्य नोडल एजेंसी डहार ले आयुष्मान भारत जन-आरोग्य योजना म निजी अस्पताल मन कोति ले लापरवाही के मामला आगू आय हे। एखर अंतर्गत रईपुर के दू ठिन निजी अस्पताल उपर कार्रवाई करे गेहे। एमा ले एक अस्पताल के पंजीयन निरस्त कर दे गेहे। उहें, दूसर अस्पताल उपर इकतीस लाख बत्तीस हजार रूपिया के जुर्माना लगाय गेहे। एखरे संग तीन महीना बर ए अस्पताल ल योजना ले निलंबित कर दे गेहे।
राज्य नोडल एजेंसी ल दूनों अस्पताल मनके विरूद्ध गैर जरूरी पैकेज ब्लॉक करे, बिना मतलब आई.पी.डी. अउ आई.सी.यू. के पैकेज ब्लॉक करे, योजना के लाभ देहे ले मना करे अउ अतिरिक्त नगद राशि ले जाय जइसे सिकायत मिले रिहीस, जेखर सेती अस्पताल मन ल कारण बताओ नोटिस जारी करे गे रिहीस। संतोषजनक जवाब नइ मिले म ए अस्पताल मन उपर कार्रवाई करे गेहे।
हादसा-मौत
सरगुजा जिला म आज छुही खदान धंसे ले दू मनखे के मउत होगे हे। ए घटना लखनपुर थाना क्षेत्र के बिजोरा नाला करा के बताय जात हे। जानकारी के मुताबिक ए दूनों ग्रामीण बिहनिया छह बजे छुही माटी निकाले गे रिहीन, इही दउरान ए हादसा होइस। घटना के सूचना मिलतेच पुलिस अउ ग्रामीण मउका म पहुंचीन।
उहें, रईपुर के खमतराई इलाका म तरिया म डूबे ले दू भाई मनके मउत होगे। ए घटना खमतराई थाना क्षेत्र के गोंदवारा के शीतला तालाब के हरय। जानकारी के मुताबिक गोंदवारा निवासी दू भाई शीतला तालाब म नहाय बर गे रिहीन। ए दउरान ओमन गहरा पानी म चल दीन अउ डूब गीन। घटना के सूचना मिलतेच पुलिस के टीम मउका म पहुंचीस अउ दूनों के सव बाहिर निकालीस।
कार्यशाला
छत्तीसगढ़ बायोटेक प्रमोशन सोसायटी डहार ले रईपुर म स्टार्टअप उपर दू दिन के कार्यशाला के आयोजन करे जात हे। कार्यशाला के सुभारंभ काली इंदिरा गांधी कृषि विश्वविद्यालय के कुलपति डॉक्टर गिरीश चंदेल ह करीन। ए कार्यशाला म देस के जाने-माने विशेषज्ञ, स्टार्टअप बनाय के रणनीति, संभावना, शासकीय नीति, राज्य म मौजूद सुविधा अउ अनुदान अउ स्टार्टअप बनाय म अवइया कठिनाई अउ चुनौती के बारे म प्रतिभागी मनके मार्गदर्शन करत हे।
धमतरी-आयुष रसशाला
धमतरी जिला के सिंगपुर गांव म आयुष विभाग डहार ले आयुष रसशाला-बूटीगढ़ के स्थापना करे गेहे। ए प्रदेस म अपन तरह के पहिली नवाचार माने जात हे। बूटीगढ़ म जल संरक्षण अउ आयुर्वेदिक चिकित्सा पद्धति के समन्वय देखे बर मिलत हे। मुख्यमंत्री विष्णुदेव साय ह आयुष विभाग अउ जिला प्रशासन के ए पहल के सराहना करीन हे। संघरा ओमन वन संपदा ल सहेजे अउ आम मनखे मन ल आयुर्वेद के प्रति जागरूक करे बर घलो कहिन हे। बूटीगढ़ क्षेत्र म प्राकृतिक रूप ले औषधि गुण ले भरपूर पौधा पाय जाथे, तेखरे सेती यहां हर्बेरियम बनाय जात हे। उहें, हालेच म जिला म राखे गे ‘‘जल जगार कार्यक्रम के माध्यम ले जल संरक्षण के संघरा आयुर्वेदिक पेय पदार्थ अउ दवाई मनके उपयोगिता ल घलो प्रदर्सित करे गे रिहीस।
अरूण साव-निर्माण कार्य
लोक निर्माण मंत्री अरूण साव ह काली रईपुर अउ नवा रईपुर म विभागीय काम के जायजा लीन। ओमन लोक निर्माण विभाग डहार ले बनाय जात विधानसभा के नवा भवन अउ कचना फ्लाई ओवर के निरीक्षण करके काम मन म फूर्ति लाय के निरदेस दीन। श्री साव ह रईपुर स्मार्ट सिटी लिमिटेड डहार ले रईपुर म घड़ी चउक करा मल्टी-लेवल पार्किंग म संचालित बीपीओ, तक्षशिला स्मार्ट रीडिंग जोन अउ जयस्तंभ चउक करा मल्टी-लेवल पार्किंग म संचालित इन्क्युबेशन सेंटर के निरीक्षण करीन। एखर अलावा ओमन भाठागांव अंतर्राज्यीय बस टर्मिनल के संगेसंग निर्माणाधीन विधानसभा भवन के घलो निरीक्षण करके काम के प्रगति के जानकारी लीन।
रिजर्व बैंक-छात्रवृत्ति
भारतीय रिजर्व बैंक ह शैक्षणिक संस्थान मनके संकाय सदस्य मन बर छात्रवृत्ति योजना के घोसना करे हे। योजना के तहत भारत म विश्वविद्यालय अनुदान आयोग-यूजीसी या ए.आई.सी.टी.ई. मान्यता प्राप्त कोनों भी विश्वविद्यालय या कॉलेज म अर्थशास्त्र या वित्त विषय पढ़ाने वाला पूर्णकालिक संकाय सदस्य अल्पकालिक शोध बर आवेदन के पात्र हरय। छात्रवृत्ति बर सोध म सामिल क्षेत्र मौद्रिक अउ वित्तीय अर्थशास्त्र, बैंकिंग, वास्तवित क्षेत्र के मुद्दा उ आरबीआई के हित के बिसय उपर आधारित हवय। ए योजना के उद्देश्य संकाय अउ छात्र मनके बीच आरबीआई के गतिविधि के बारे म जागरूकता बढ़ाना हे। आवेदन जमा करे के आखिरी तारीख पांच नवंबर हरय। इच्छुक उम्मीदवार आवेदन पत्र अउ जानकारी बर आरबीआई के आधिकारिक वेबसाइट ल देख सकत हे।
अउ अब थोरकुन समाचार सार म –
– राज्यपाल रमेन डेका ह काली डोंगरगढ़ म मां बम्लेश्वरी के पूजा-अर्चना करीन। ओमन मां बम्लेश्वरी ले प्रदेसवासी मनके खुसहाली, उन्नति अउ सुख-समृद्धि बर प्रार्थना करीन।
– मुख्यमंत्री विष्णुदेव साय के रईपुर स्थित निवास कार्यालय म हर गुरूवार के होवइया ‘‘जनदर्शन‘‘ काली दस अक्टूबर के अपरिहार्य कारण के सेती स्थगित कर दे गेहे।
– कोंडागांव जिला के माकड़ी थाना म साइबर जागरूकता पखवाड़ा के आयोजन करे गीस। ए दउरान नाच-गाना अउ नुक्कड़ नाटक के जरिया लोगन मन ल साइबर ठगी के बारे म जागरूक करे गीस।