हरियाणा-जम्मू कश्मीर-मतगणना
हरियाणा अउ जम्मू कश्मीर म विधानसभा चुनाव के तहत आज मतगणना चलत हे। ताजा मिले समाचार के अनुसार हरियाणा म नब्बे सीट मन म ले अड़तालीस सीट उपर भारतीय जनता पार्टी ह निर्णायक बढ़त हासिल करके तीसरइया बार प्रदेस म सरकार बनाय म कदम बढ़ा देहे।
उहें, कांग्रेस सैंतीस सीट म आगू हे। ओति, जम्मू कश्मीर म नब्बे विधानसभा सीट मन म ले नेसनल कांफ्रेंस के उम्मीदवार बयालीस सीट उपर अउ भारतीय जनता पार्टी उनतीस सीट उपर आगू हे। उहें, कांग्रेस छै सीट उपर बढ़त बनाय हे।
मुख्यमंत्री-प्रधानमंत्री मुलाकात
छत्तीसगढ़ के मुख्यमंत्री विष्णुदेव साय ह काली प्रधानमंत्री नरेंद्र मोदी ले नई दिल्ली स्थित उंखर निवास म मुलाकात करीन। ए दौरान मुख्यमंत्री ह प्रधानमंत्री ल बतइन कि केंद्रीय गृहमंत्री अमित शाह के अध्यक्षता म नक्सल प्रभावित राज्य मनके बइठका म नक्सल समस्या के समीक्षा करे गेहे। मुख्यमंत्री ह प्रधानमंत्री ल बतइन कि माओवाद के खिलाफ सरलग कार्रवाही करे गेहे। एखर संगेसंग ओमन ह राज्य म हाल ही म होय सफल नक्सल ऑपरेसन के जानकारी प्रधानमंत्री ले साझा करीन। प्रधानमंत्री ह ए ऑपरेसन के सफलता उपर सुरक्षा बल मनके साहस के सराहना करीन। मुलाकात के दौरान श्री साय ह प्रधानमंत्री आवास योजना के तहत आठ लाख आवास स्वीकृत करे जाय म श्री मोदी के आभार जतइन। श्री साय ह बतइन कि बस्तर अउ आदिवासी अंचल मन म युवा मनके कौशल उन्नयन बर सरकार विसेस योजना चलावत हे। एखर तहत युवा मन ल आने-आने तकनीकी अउ व्यावसायिक प्रसिक्षण दे जात हे। जेखर ले उच्च शिक्षा लेके रोजगार के अच्छा अवसर पा सकय।
निकाय चुनाव-बैठक
राज्य निर्वाचन आयुक्त अजय सिंह के अध्यक्षता म आज नवा रईपुर म स्थानीय निकाय चुनाव मनके तियारी ल लेके बइठका आयोजित करे गीस। ए बइठका म सामान्य प्रशासन अउ नगरीय प्रशासन विभाग के सचिव अउ संबंधित अधिकारी मन ह भाग लीन। बइठका म राज्य निर्वाचन आयुक्त ह परिसीमन अउ आरक्षण के प्रक्रिया समय सीमा म पूरा करे के निरदेस दीन। ओमन किहीन कि मतदाता सूची के सत्यता के जांच करना जरूरी हे। ताकी हर पात्र मतदाता अपन मताधिकार के सही तरीका ले परयोग कर सकय। बइठका म नगर पालिका म स्थान के आरक्षण म वर्तमान स्थिति के संग नगरीय निकाय मन म न्यायालय के स्थगन होय के सेति परिसीमन के जानकारी नइ मिले के संबंध म चर्चा करे गीस।
माओवादी मुठभेड़/आत्मसमर्पण
सुकमा जिला के ग्राम पामलूर के जंगल म काली संझा पुलिस अउ माओवादी मनके बीच मुठभेड़ होगे। ए मुठभेड़ म मारे गे एक झिन माओवादी के सव बरामद कर ले गेहे। मारे गे माओवादी के पहिचान लोकेश के रूप म होईस, जउन ह किस्टाराम एरिया कमेटी के सदस्य रिहीस। ए माओवादी के सव के तीर ले हथियार घलो बरामद करे गेहे। बताए जाथे कि छह अक्टूबर के डीआरजी, बस्तर फाईटर्स, कोबरा बटालियन अउ सीआरपीएफ के संयुक्त टीम ग्राम डब्बाकोंटा, एंटापाड़, बुर्कलंका, पामलूर, सिंघनमड़गू अउ तीर-तखार के क्षेत्र म सर्चिंग बर निकले रहीन। ए दउरान इखर मनके मुठभेड़ माओवादी मन ले होगे।
उहें, दंतेवाड़ा जिला म चार इनामी माओवादी मन ह आत्मसमर्पण करे हे। एमा ले दू माओवादी मन उपर दू-दू लाख अउ दू आने माओवादी उपर एक-एक लाख रूपिया के इनाम घोसित रिहीस। आत्मसमर्पण करइया माओवादी दरभा डिवीजन के अंतर्गत कटेकल्याण, केरलापाल अउ मलांगेर एरिया कमेटी म सक्रिय रिहीस। ए माओवादी मन उपर हत्या, मारपीट करे, पुलिस पार्टी उपर हमला करे के संग कतकोन आरोप हे। आत्मसमर्पण करइया ए माओवादी मन ल राज्य सरकार ह पुर्नवास नीति के तहत पच्चीस-पच्चीस हजार रूपिया के सहायता रासि दे जाही।
टीबी रोगी-सहायता राशि
केंद्रीय स्वास्थ्य मंत्री जे.पी. नड्डा ह क्षय रोगी अउ ओखर संपर्क म अवइया परिजन मन ल जादा पोषण उपलब्ध कराए बर कतकोन पहल के घोषणा करे हे। देस ले क्षय रोग के उन्मूलन उपर बल देत श्री नड्डा ह किहीन कि ‘‘नि-क्षय पोषण’’ योजना के अंतर्गत सबों टीबी रोगी मन बर इलाज के दउरान मासिक पोषण सहायता पांच सौ रूपिया ले बढ़ाके एक हजार रूपिया कर देहे।
आवास मेला-बेमेतरा
उपमुख्यमंत्री अरूण साव काली बेमेतरा म प्रधानमंत्री आवास योजना ग्रामीण के तहत होवइया आवास मेला म मुख्य अतिथि के रूप म सामिल होइन। ओमन ह आवास मेला म बारह लाभार्थी ल उंखर नवा बने आवास के चाबी सौंपिन। ओमन ह हितग्राही मन ल आवास स्वीकृति प्रमाण पत्र घलो सौंपिन। ए मउका म श्री साव किहीन कि प्रधानमंत्री आवास योजना के उद्देस्य हर गरीब ल सम्मानजनक आवास उपलब्ध कराना हे। छत्तीसगढ़ सरकार ए लक्ष्य ल हासिल करे बर सरलग परयासरत हे। ओमन ह बतइन कि ए योजना के तहत बेमेतरा जिला म बीते सितंबर महिना म करीबन पंद्रह हजार नवा आवास स्वीकृत करे गीस।
गुजरात पुलिस-दौरा
एक भारत-श्रेष्ठ भारत अभियान के तहत गुजरात पुलिस के पंद्रह सदस्य मनके दल दुरूग जिला के दउरा म हे। गुजरात ले आए पुलिसकर्मी मन ल छत्तीसगढ़ पुलिस के कार्यसैली के बारे म बताए गीस। टीम ल पहिली दिन दुरूग संभाग के पुलिस महानिरीक्षक कार्यालय के दउरा कराए गीस अउ कार्य संचालन के जानकारी दे गीस। पुलिस महानिरीक्षक रामगोपाल गर्ग ह आकासवाणी समाचार ल बतईन कि ए अभियान के मुख्य उद्देश्य दूनों राज्य मनके पुलिस के बीच समन्वय स्थापित करना हे। गुजरात पुलिस ल पुलिसिंग के संग भिलाई इस्पात संयंत्र अउ डोंगरगढ़ स्थित मां बम्लेश्वरी मंदिर के घलो भ्रमण कराए जाही। अवईया दिन म गुजरात पुलिस के टीम स्थानीय पुलिस के काम ल समझे के संगेसंग जिला के सीमावर्ती क्षेत्र मनके घलो दउरा करही।
कार्यशाला
छत्तीसगढ़ बायोटेक प्रमोशन सोसायटी डहार ले रईपुर म स्टार्टअप उपर दू दिन के कार्यसाला के आयोजन करे जात हे। कार्यसाला के सुरूआत काली इंदिरागांधी कृषि विश्वविद्यालय के कुलपति डॉक्टर गिरिश चंदेल ह करीन। ए कार्यसाला म देस के जाने माने विसेसज्ञ स्टार्टअप स्थापित करे के रणनीति, संभावना, शासकीयनीति, राज्य म उपलब्ध सुविधा, अनुदान अउ स्टार्टअप स्थापित करे म अवइया कठिनाई अउ चुनौती के बारे म प्रतिभागी मनके मार्गदर्सन करत हे। कार्यसाला म छत्तीसगढ़ के आने-आने विद्यालय अउ सैक्षणिक संस्थान मन म स्थापित इन्क्यूबेशन सेन्टर्स के प्रतिनिधि, स्टार्टअप संचालक, नवा उद्यमी अउ विद्यार्थी सामिल होवत हे।
कार्यसाला ल संबोधित करत डॉक्टर चंदेल ह किहीन हे कि छत्तीसगढ़ म कृषि आधारित स्टार्टअप विसेसकर बायोटेक अउ फूड प्रोसेसिंग स्टार्टअप के बड़का संभावना हे। ओमन किहीन कि छत्तीसगढ़ बायोटेक प्रमोशन सोसायटी अउ सुभाषचंद्र बोस इन्क्यूबेसन सेंटर डहार ले छत्तीसगढ़ म कृषि आधारित स्टार्टअप स्थापित करे बर युवा मन ल प्रोत्साहन अउ मार्गदर्सन दे जात हे।
कवर्धा-नशामुक्ति अभियान
समाज कल्याण विभाग डहार ले कवर्धा के शासकीय स्नात्कोत्तर महाविद्यालय म ‘‘नशा मुक्ति थीम‘‘ उपर भाषण, चित्रकला, रंगोली अउ निबंध प्रतियोगिता के आयोजन करे गीस। आने-आने प्रतियोगिता म विद्यार्थी मन ह बड़चढ़ के हिस्सा लीन। कारीकरम म महाविद्यालय के प्राचार्य डॉक्टर बी.एस.चौहान संग सबो स्टाफ अउ छात्र-छात्रा मन ह नसा मुक्ति के सपथ लीन।
गांजा-बरामद
गौरेला-पेण्ड्रा-मरवाही जिला म गांजा तस्करी करत दू अंतर्राज्यीय तस्कर मन ल पुलिस ह गिरफ्तार करे हे। पकड़ेगे आरोपी मन के तीर दू सौ बीस किलो गांजा बरामद करे गेहे। जब्त गांजा के कीमत करीबन इकतालीस लाख रूपिया बताय गेहे। आरोपी गांजा ल ओडिसा ले मध्यप्रदेस लेके जात रिहीस। ए दउरान पेण्ड्रा पुलिस ह पतगंवा के तीर घेराबंदी कर ए आरोपी मन ल गिरफ्तार करीन।
अउ अब थोरकुन समाचार सार म –
– राजनांदगांव म डॉक्टर भीमराव अंबेडकर चौक के तीर आज एक ठिन तेज रफ्तार मोटर साइकिल अनियंत्रित होके सर्विस रोड के किनारे लगे हाई मास्क पोल ले टकरा गे। ए घटना म मोटरसाइकिल सवार युवक अउ युवती के मउका म ही मउत होगे।
– सक्ति जिला के बरदुली गांव म अज्ञात वाहन के चपेट म आय ले दू लोगन के मउका म ही मउत होगे।
– कोरबा जिला के परसाखोला वाटरफॉल म बूड़े ले दसवीं के एक झिन छात्र के मउत होगे। बताय जात हे कि ए छात्र अपन दोस्त मनके संग पिकनिक मनाय बर आय रिहीस। उहें, एक झिन आने छात्र ल बचा ले गेहे।
अउ
– राजनांदगांव के भरकापारा स्थित इंदिरा सरोवर तरिया म आज बिहनिया बूड़े ले दस बछर के एक झन लइका के मउत होगे। बताय जात हे कि ए लइका नहाय बर तरिया म उतरे रिहीस। ए दउरान ओहा हादसा के सिकार होगे।