केंद्रीय गृह मंत्री अमित शाह ह काली नई दिल्ली म वामपंथी उग्रवाद ले प्रभावित राज्य मनके मुख्यमंत्री मन संग समीक्षा बइठका करही। बइठका म छत्तीसगढ़ समेत आंध्रप्रदेस, बिहार, झारखंड, तेलांगाना, ओडिशा, महाराष्ट्र अउ मध्यप्रदेस के मुख्यमंत्री मन जुरही। संगेसंग वामपंथी उग्रवाद ले परभावित क्षेत्र म विकास के काम ल गति दे बर राज्य के सहयोग करत केंद्रीय मंत्रालय मनके पांच केंद्रीय मंत्री अउ बड़का अधिकारी मन घलो बइठका म सामिल होही। एखर अलावा उप राष्ट्रीय सुरक्षा सलाहकार, केंद्रीय सशस्त्र पुलिस बल अउ राज्य के बड़का अधिकारी मन घलो बइठका म भाग लिही।
छत्तीसगढ़ के मुख्यमंत्री विष्णुदेव साय ह आज संझा नई दिल्ली बर रवाना होही, जिहां ओमन वामपंथी उग्रवाद परभावित राज्य के मुख्यमंत्री मन संग बइठका म सामिल होही।
एक राष्ट्र-एक चुनाव
एक राष्ट्र-एक चुनाव बर बनाय गे समिति के अध्यक्ष अउ पूर्व राष्ट्रपति रामनाथ कोविंद ह किहीन हे कि देस भर म एके संग चुनई कराय ले देस ल बड़का फायदा होही। काली नई दिल्ली म लालबहादुर शास्त्री स्मृति व्याख्यान म ओमन किहीन कि एके संग चुनई ले अच्छा प्रशासन, नीतिगत स्थिरता, सामाजिक एकजुटता अउ आर्थिक विकास के संग वैश्विक रूप ले प्रतिस्पर्धी बने जा सकथे। श्री कोविंद ह किहीन हे कि ए सिफारिस जादा समावेसी अउ सुघ्घर भविष्य बर बुनियादी सुधार साबित होही।
राज्यपाल-हरित शिखर सम्मेलन
राज्यपाल रमेन डेका ह काली रईपुर म राखेगे हरित शिखर सम्मेलन के समापन कारीकरम म सामिल होइन। कारीकरम म गोठियात हुए ओमन किहीन कि पानी अउ रूख-राई दूनो ल बचा के रखना जरूरी हवय। प्रधानमंत्री नरेंद्र मोदी के पहल म सुरू करे गे ‘‘एक पेड़ मां के नाम‘‘ अभियान म सबो झन ल अपन भागीदारी निभाना होही। ओमन किहीन कि छत्तीसगढ़ म ईको टूरिज्म ल बढ़ावा देके संगेसंग जल संरक्षण बर सबो ल धियान देके जरूरत हे। ओमन जम्मो झन ले आग्रह करीन कि ओमन अपन लोक संस्कृति ल सहेजे के संगेसंग एला पर्यावरण बचाय बर एक प्रेरणा के रूप म अपनावय। तीन दिनी हरित शिखर सम्मेलन ल वन और जलवायु परिवर्तन विभाग के मदद ले निजी संस्थान मन आयोजित करे रिहीस।
जल जगार महोत्सव
धमतरी जिला के रविशंकर जलाशय यानी गंगरेल बांध म राखे गे दू दिनी जल जगार महोत्सव के आज रतिहा समापन हो जही। जल जगार महोत्सव म आज बिहनिया हाफ मैराथन के आयोजन करे गीस, जेमा बड़ संख्या म लोगन भाग लीन। ए ह तीन श्रेणी म होइस, जेमा गंगरेल हाफ मैराथन, एन्डुरन्स रन अउ वॉकेथान सामिल रिहीस।
जल जगार महोत्सव के दूसरइया दिन आज रईपुर समेत प्रदेसभर के प्रतिभागी जल ओलंपिक के हिस्सा बनही। ए दौरान ओमन कयाकिंग, तैराकी, बनाना राईड, फ्री स्टाइल तैराकी, फ्लैग रैन, थ्रो-रो अउ रिवर क्रॉसिंग जइसन आने-आने खेल खेलही।
महोत्सव म आज जल सभा के आयोजन घलो करे गीस। एमा प्रदेसभर के कॉलेज के छात्र-छात्रा मन जल असेंबली म सामिल होइन। ए दउरान जल संरक्षण, पर्यावरण संरक्षण, मानवीय सभ्यता अउ संस्कृति म जल के भूमिका, संकट अउ भविष्य के दिसा उपर गोठबात होइस।
एखर ले पहिली मुख्यमंत्री विष्णुदेव साय ह काली जल जगार महोत्सव के सुभारंभ करीन। कारीकरम म गोठियात हुए ओमन किहीन कि जल अउ पर्यावरण संरक्षण बर धमतरी जिला प्रशासन डहार ले मनाय जावत ए महोत्सव ह सुघ्घर हिजगा करे लायक पहल हे। ए मउका म मुख्यमंत्री ह लोगन ले ‘‘एक पेड़ मां के नाम‘‘ अभियान म पउधा लगाय के अपील करीन। कारीकरम म मुख्यमंत्री ह सतासी करोड़ पच्चीस लाख रूपिया ले जादा के आने-आने विकास काम के लोकार्पण अउ सिलान्यास करीन। ओमन जल बचाय ल बढ़ावा देबर एक विसेस नवा मॉडल ‘पीकू द वाटर गार्जियन‘ संरचना के लोकार्पण घलो करीन।
सैन्य प्रदर्शनी
रईपुर के साईंस कॉलेज मैदान म राखे गे सैन्य समारोह के दूसरइया दिन आज भारतीय सेना के फौजी मन अपन करतब ले लोगन ल रोमांचित करीन। सैन्य समारोह अउ प्रदर्सनी काली सात अक्टूबर के सिरा जाही। भारतीय सेना के अधिकारी मन आकाशवाणी रईपुर ल बतइन कि प्रदर्सनी म बिहनिया आठ बजे ले दस बजे तक अउ संझा छै बजे ले आठ बजे तक पैरा जंपिंग, खुखरी डांस, डेयर डेविल मोटरसाइकलिंग अउ घुड़संवारी जइसन आने-आने गतिविधि करे जावत हे। ओमन बतइन कि बिसेस बल के कमांडो मन कोति ले आज स्लिदरिंग अउ बाइक शो घलो दिखाय गीस। उहें, ग्रेनेडियर्स, सिग्नल अउ गोरखा प्रसिक्षण केंद्र ह सैन्य पाइप, ब्रास बैंड अउ बिसेस गोरखा रेजिमेंट के सांस्कृतिक दल ह खुखरी नाच के प्रस्तुति दीन।
माओवादी-शिनाख्त
नारायणपुर जिला म सुरक्षा बल अउ माओवादी मनके बीच पाछू चार अक्टूबर के होय मुठभेड़ म मारेगे एक अउ माओवादी के पहिचान के संग अभी तक कुल बाईस झन माओवादी मनके पहिचान होगे हे। मुठभेड़ म मारे गे नौ झन अउ माओवादी मन ल चिन्हे के काम जारी हे। मारे गे माओवादी मन म अठ्ठारा पुरूष अउ तेरह माईलोगिन सामिल हे। आज चिन्हे गे माओवादी मन म एक महिला माओवादी उपर पच्चीस लाख रूपिया के इनाम राखे गे रिहीस। सुरक्षा बल ह ए मुठभेड़ म अब्बड़ अकन माओवादी मनके घायल होय के संभावना जताय हे।
रेलवे-स्वच्छता पखवाड़ा
स्वच्छता पखवाड़ा के तहत दक्षिण पूर्व मध्य रेलवे के रईपुर मंडल म आने-आने कारीकरम के आयोजन करे जावत हे। एखर तहत आज स्वच्छ रेलगाड़ी थीम उपर आयोजित कारीकरम म अधिकारी अउ कर्मचारी मन ह मंडल ले गुजरत गाड़ी मन म स्वच्छता के निरीक्षण करीन। ए दउरान ओमन गाड़ी के अंदर बायोटॉयलेट के उपयोग करे के निरदेस दीन।
रिखी क्षत्रिय-लोकमंथन
रईपुर म तीन ले पांच अक्टूबर के बीच होय हरित शिखर सम्मेलन म भिलई के रहइया लोकवाद्य जोरइया रिखी क्षत्रिय ह एक सौ आठ लोक वाद्य के प्रस्तुति दे रिहीन, जेखर मुख्यमंत्री विष्णुदेव साय ह घलो बड़ई करे रिहीन। रिखी अउ उंखर संगी मन ल हैदराबाद म इक्कीस ले चौबीस नवंबर तक होवइया ‘लोकमंथन‘ के चौथा संस्करण म सामिल होय के नेवता मिलिस हे। उंहा रिखी ह देस भर के आदिवासी कलाकार मनके बीच अपन प्रस्तुति दीही।
भाजपा-सदस्यता अभियान
उपमुख्यमंत्री अरूण साव ह काली मुंगेली जिला के लोरमी विधानसभा क्षेत्र के आने-आने गांव मनके दउरा करीन। रवेली, सेम्हरापारा, खेकतरा, कौहाबांधा, हड़गांव, औराबांधा, छिरहुट्टी, बैगाकापा, नारायणपुर, बिजराकापा अउ लोरमी के दउरे के दौरान ओमन भारतीय जनता पार्टी डहार ले चलाय जावत सदस्यता अभियान म ग्रामीण मन ल पार्टी के सदस्यता दिलाइन। श्री साव ह ए गांव मन म करीबन एक करोड़ रूपिया के विकास के काम के घोसना घलो करीन।
सक्ती-युवक डूबे
सक्ति जिला के चंद्रपुर के तीर महानदी म तीन युवक डूब गेहे, जेमन ल पुलिस अउ एसडीआरएफ के टीम ह खोजत हे। बताय जावत हे कि ए तीनो भिलाई के रहइया हे अउ चंदरपुर म दाई चंद्रहासिनी के दर्सन बर आय रिहीन, तभे नदिया म नहाय के दउरान तीनो झिन डूब गे।