नारायणपुर जिला म आज सुरक्षाबल के संग होय मुठभेड़ म करीबन चउदा माओवादी मारे गेहे। पुलिस अधीक्षक प्रभात कुमार ह बतइन कि ए मुठभेड़ ह नारायणपुर जिला के अबूझमाड़ इलाका म आज मंझनिया होइस। ए इलाका म माओवादी मनके होय के सूचना मिले म नारायणपुर अउ दंतेवाड़ा जिला के पुलिस के संयुक्त टीम इलाका म जब तलासी अभियान चलात रिहीन, तभे ए मुठभेड़ होइस। पुलिस के जवान मन ह मउका ले मारेगे तेरह माओवादी मनके सव बरामद कर ले हे। एखर संगेसंग घटना स्थल ले एके-फोर्टीसेवन अउ सेल्फ लोडिंग रायफल के संग कतकोन आने हथियार घलो बरामद करे गेहे। इलाका म सर्च अभियान अभी जारी हे।
मुख्यमंत्री-दंतेवाड़ा
मुख्यमंत्री विष्णुदेव साय ह अपन एक दिन के दंतेवाड़ा प्रवास के दौरान दंतेवाड़ा विकासखंड के ग्राम मसेनार अउ गीदम विकासखंड के पाहुरनार ल संपूर्ण जैविक ग्राम के प्रमाण पत्र दीन। ए गांव मन म सबले जादा रकबा म किसान मन डहार ले जैविक खेती करे जात हे। ए प्रमाण पत्र भारत सरकार के कृषि मंत्रालय डहार ले उपलब्ध कराय गेहे। जिला म खेती म रासायनिक उर्वरक के उपयोग पूरा तरह ले प्रतिबंधित करे गेहे अउ जैविक खेती ल प्रोत्साहित करे बर जिला के दू सौ बीस गांव मन म तीन चरण म कृषक पाठसाला के आयोजन करे जात हे। एखर संगेसंग जिला के तीन सौ ले जादा प्रगतिसील किसान मन ल राज्य ले बाहर प्रसिक्षण उपलब्ध कराके जैविक कारीकरम अउ मास्टर ट्रेनर के रूप म तियार करे गेहे।
उहें, मुख्यमंत्री ह आज दंतेवाड़ा जिला के एक सौ सड़सठ करोड़ ले जादा विकास कारीकरम के लोकार्पण अउ भूमिपूजन करीन।
मुख्यमंत्री ह दंतेवाड़ा प्रवास के दौरान आज मां दंतेश्वरी के पूजा-पाठ करके प्रदेस के जनता के सुख-समृध्दि अउ खुसहाली के कामना करीन। ए मउका म विधानसभा अध्यक्ष डॉक्टर रमन सिंह अउ वन मंत्री केदार कश्यप घलो उपस्थित रिहीन। मुख्यमंत्री ह दंतेवाड़ा के सर्किट हाउस परिसर म ‘‘एक पेड़ मां नाम‘‘ अभियान के अंतर्गत केसर आम के पउधा लगाइन। ए दौरान छत्तीसगढ़ विधानसभा के अध्यक्ष डॉक्टर रमन सिंह ह आम अउ वन मंत्री केदार कश्यप ह नारियल के पउधा लगइन। उहें, बस्तर सांसद महेश कश्यप ह बदाम अउ विधायक चैतराम अटामी ह कटहल के पउधा लगइन।
मुख्यमंत्री-बीजापुर
मुख्यमंत्री विष्णुदेव साय आज बीजापुर म दू सौ तिरसठ करोड़ ले जादा के विकास काम के सौगात दीन। ए बेरा ओमन बीजापुर जिला अस्पताल ल सौ बिस्तर ले बढ़ाके दू सौ बिस्तर करे, अउ नर्सिंग कॉलेज खोले के घोसना करीन।
ओखर पहिली, आज बीजापुर म आयोजित युवा संवाद कारीकरम म मुख्यमंत्री सामिल होइन। ए दौरान ओमन ह युवा मन ले संवाद करीन। ओमन किहीन कि प्रतिभासाली युवा मन ल सरकार ह आगू बाढ़े के पूरा मउका दिही। मुख्यमंत्री ह युवा मनके मांग म बीजापुर कलेक्टर ल निरदेस दीन कि, इंहा के युवा मन ल तुरते ही सून्य प्रतिसत ब्याज म एजुकेसन लोन के सुविधा दे जाय। श्री साय ह युवा मन ल सरकार के आने-आने योजना मनके घलो जानकारी दीन।
राज्य स्थापना दिवस कार्यक्रम
छत्तीसगढ़ राज्य स्थापना दिवस के मउका म रईपुर के संगेसंग प्रदेस के सबो जिला मुख्यालय मन म पांच नवंबर के एक दिवसीय कारीकरम के आयोजन करे जाही। ए दौरान कारीकरम स्थल म आने-आने विभाग के प्रदर्सनी लगाय जाही। ए प्रदर्सनी म सरकार के उपलब्धी महत्वपूर्ण योजना अउ परियोजना के बिसेस रूप ले प्रदर्सित करे जाही। उहें, जिला स्तर म स्थानीय कलाकार मन डहार ले सांस्कृतिक कारीकरम के आयोजन घलो करे जाही। अइसने एक ले छै नवंबर तक सबो शासकीय भवन म रोशनी करे जाही।
सशस्त्र-सैन्य प्रदर्शनी
रईपुर के साईंस कॉलेज मैदान म काली ले दू दिन के सशस्त्र सैन्य प्रदर्सनी के आयोजन करे जाही। भारतीय सेना के अधिकारी अउ छत्तीसगढ़ संग ओडिसा सब एरिया के कमांडर ब्रिगेडियर अमन आनंद ह बतइन कि ए कारीकरम म सेना के सौर्य प्रदर्सन के संगेसंग टी-नाइंटी भीष्म टैंक अउ आधुनिक हथियार संग उपकरण घलो प्रदर्सित करे जाही। ओमन ह बतइन कि ए सैन्य प्रदर्सनी म सैनिक पैरा जंपिंग, खुखरी डांस, डेयरडविल मोटरसाइकलिंग राइडिंग अउ घुड़संवारी के घलो प्रदर्सन करे जाही। कारीकरम के दौरान आधुनिक उपकरण के संग युध्द म उपयोग होवइया ड्रोन के प्रदर्सनी लगाय जाही। लोगन बर साईंस कॉलेज मैदान तक पहुंचे बर अलग-अलग जघा ले बस चलाय जाही। सैन्य प्रदर्सनी बिहनिया नौ बजे ले संझा चार बजे तक आम लोगन बर खुले रइही।
उहें, छत्तीसगढ़ अउ ओडिसा उप क्षेत्र डहार ले रईपुर के साईंस कॉलेज मैदान म काली ले दू दिन के सशस्त्र बल आउटरीच कारीकरम के घलो आयोजन करे जाही। ए कारीकरम म राज्य सरकार अउ नागरिक प्रशासन के गणमान्य नागरिक भाग लिही। उहें, मध्य कमान अउ मध्य भारत क्षेत्र के वरिष्ठ सैन्य अधिकारी घलो उपस्थित रइही। भारतीय सेना के ताकत अउ कौसल के प्रदर्सन करे बर आने-आने इकाई अउ संरचना ले तीन सौ ले जादा भारतीय सेना के जवान ए कारीकरम म भाग लिही।
अइसने, मुख्यमंत्री विष्णुदेव साय ल सशस्त्र सैन्य समारोह म सामिल होय बर भारतीय सेना के ब्रिगेडियर अमन आनंद अउ कलेक्टर डॉक्टर गौरव सिंह ह नेवता दीन।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ म ए बखत केंद्र सरकार कोति सुरू करे गे ‘‘धरती आबा जनजातीय ग्राम उत्कर्ष अभियान‘‘ म जाने-माने विश्लेषक अउ पूर्व आईएएस अधिकारी डॉक्टर सुशील त्रिवेदी ले लेगे भेंटवार्ता के प्रसारण करे जाही। ए कारीकरम आकाशवाणी केन्द्र रायपुर ले काली पांच अक्टूबर के बिहनिया साढ़े दस बजे ले परसारित होही। एला छत्तीसगढ़ स्थित आकाशवाणी के जम्मो केन्द्र रिले करही।
स्वच्छता ही सेवा-विशेष कार्यक्रम
स्वच्छता ही सेवा अभियान म आकाशवाणी रईपुर ले काली पांच अक्टूबर के संझा सात बजे बिसेस कारीकरम के प्रसारण करे जाही। ए कारीकरम के निर्माण अउ प्रस्तुतिकरण प्रादेसिक समाचार एकांश ह करे हे।
रोहित यादव-कार्यभार ग्रहण
छत्तीसगढ़ राज्य विद्युत कंपनी के नवा अध्यक्ष डॉक्टर रोहित यादव ह आज कार्यभार ग्रहण कर लेहे। एखर पहिली काली राज्य सरकार ह आईएएस अधिकारी डॉक्टर रोहित यादव ल ऊर्जा विभाग के सचिव नियुक्त करे हे। संगेसंग ओमन ल छत्तीसगढ़ राज्य विद्युत कंपनी के अध्यक्ष के अतिरिक्त जिम्मेदारी घलो दे गेहे। डॉक्टर यादव हाल ही म केंद्रीय प्रतिनियुक्ति ले लहुटे हे। मुख्यमंत्री के सचिव पी.दयानंद ल ऊर्जा विभाग के सचिव अउ छत्तीसगढ़ स्टेट पॉवर कंपनीज के चेयरमेन के जिम्मेदारी ले मुक्त कर दे गेहे।
अउ अब थोरकुन समाचार सार म –
– केंद्रीय राज्य मंत्री तोखन साहू आज बिलासपुर म जिला विकास समन्वय अउ मूल्यांकन समिति के बइठका म सामिल होइन। ए दौरान ओमन ह विकास कार्य के समीक्षा करीन।
– राज्य सरकार ह धमतरी जिला के नेहरू राम निषाद ल छत्तीसगढ़ पिछड़ा वर्ग आयोग के अध्यक्ष नियुक्त करे हे। ए संबंध म पिछड़ा वर्ग अउ अल्पसंख्यक विकास विभाग ह आदेस जारी कर देहे।
– छत्तीसगढ़ के वरिष्ठ पत्रकार नितिन चौबे के आज निधन होगे। मुख्यमंत्री विष्णुदेव साय अउ भारतीय जनता पार्टी के प्रदेस अध्यक्ष किरण सिंह देव उंखर निधन म गहरा दुःख जताय हे।
– भारतीय जनता पार्टी के सदस्यता अभियान के तहत आज जांजगीर-चांपा जिला के अकलतरा विधानसभा क्षेत्र म आयोजित कारीकरम म संगठन महामंत्री अजय जामवाल अउ प्रदेस संगठन महामंत्री पवन कुमार साय सामिल होइन।