जशपुर-एकलव्य आवासीय विद्यालय
प्रधानमंत्री नरेंद्र मोदी ह काली झारखंड के हजारीबाग ले जशपुर जिला के सुखरापारा स्थित एकलव्य आदर्स आवासीय विद्यालय के वर्चुअली लोकार्पण करीन। एखरे संग ओमन ह गांव ढुढरूडांड़ अउ फरसाबाहर म एकलव्य आदर्स आवासीय विद्यालय के आधारसिला घलो रखिन। ए मउका म सरगुजा विकास प्राधिकरण के उपाध्यक्ष अउ पत्थलगांव विधायक गोमती साय ह सुखरापारा के एकलव्य आदर्स आवासीय विद्यालय के प्रतीकात्मक लोकार्पण करीन। ए बेरा म ओमन ह विद्यालय परिसर म ‘‘एक पेड़ मां के नाम‘‘ अभियान के तहत आम के पउधा लगाइन।
जानबा के मुताबिक सुखरापारा स्थित एकलव्य आदर्स आवासीय विद्यालय के निर्माण बर साढ़े तैंतीस करोड़ रूपिया के रासि स्वीकृत करे गेहे। पहिली चरण म उन्नीस करोड़ चालीस लाख रूपिया के लागत ले पूरा हो चुके हे। वर्तमान म दसवीं तक के पढ़ाई विद्यालय म संचालित करे जाही। उहें, दूसर चरण म निर्माण काम पूरा होय के बाद बारहवीं तक पढ़ई सुरू होही।
मन की बात-दस साल
प्रधानमंत्री नरेंद्र मोदी के लोकप्रिय रेडिया कारीकरम ‘‘मन की बात‘‘ के आज दस बछर पूरा होगे हे। बछर दू हजार चौदह म आज के दिन श्री मोदी ह आकाशवाणी म ए कारीकरम के जरिया ले देसवासी मन संग अपन बिचार साझा करना सुरू करे रिहीन। कारीकरम के दस बछर के ए यात्रा म, प्रधानमंत्री ह जरूरी सामाजिक, सांस्कृतिक, पर्यावरण संरक्षण अउ सामान्य व्यवहार जइसन बिसय म अपन विचार रखिन। पाछू महिना ‘‘मन की बात‘‘ म श्री मोदी ह केहे रिहीन कि कारीकरम के दस बछर के लंबा यात्रा ह एक माला के रूप ले लेहे, जेखर हर कड़ी म नवा अनुभव, नवा कहानी, नवा सख्सियत जुड़ते चले गेहे।
मुख्यमंत्री-बलरामपुर
मुख्यमंत्री विष्णुदेव साय ह काली बलरामपुर-रामानुजगंज जिला के राजपुर म होवइया ‘‘धरती आबा जनजाति ग्राम उत्कर्ष अभियान‘‘ के सुभारंभ के बेरा म एक सौ बयानवे करोड़ साठ लाख रूपिया के लागत ले होवइया एक सौ आठ विकास काम के भूमिपूजन, सिलान्यास अउ लोकार्पण करीन। ओमन ह कुसमी-सामरी रद्दा ल बनाय बर, नवापारा अउ वाड्रफ नगर म एकलव्य आदर्स आवासीय विद्यालय के नवीन भवन के निर्माण, बांकी नदी, व्यपवर्तन योजना के तहत करोड़ो के काम, पीएम जनमन योजना के तहत नौ बसाहट म बहुउद्देसीय केंद्र भवन अउ बलरामपुर जिला चिकित्सालय म पीडियाट्रिक केयर यूनिट अउ हवाई पट्टी ल बनाय बर भूमिपूजन अउ सिलान्यास करीन।
अरूण साव-इंटीग्रेटेड लाइब्रेरी
उपमुख्यमंत्री अरूण साव ह काली बिलासपुर के सेंट्रल लाइब्रेरी के फेस-टू म स्मार्ट इंटीग्रेटेड लाइब्रेरी अउ कैंटीन सुविधा के लोकार्पण करीन। डिजीटल लाइब्रेरी म पाठक मन ल पुस्तकालय म राखे सबो किताब के डिजीटल संस्करण मिलही। संगेसंग पोर्टल के जरिया ले किताब जारी करे अउ वापस करे के घलो सुविधा मिलही। डिजीटल लाइब्रेरी वेब पोर्टल पुस्तकालय म राखे सबो भौतिक पुस्तक के विवरण हे। ए पोर्टल ले छात्र पुस्तक जारी करे अउ वापसी के प्रक्रिया खुदे कर सकत हे। डिजीटल लाइब्रेरी के जरिया ले ग्रामीण क्षेत्र के स्कूली अउ महाविद्यालयीन छात्र-छात्रा मन ल ऑनलाइन शैक्षणिक सुविधा उपलब्ध कराय जा सकही।
सैन्य-समारोह
छत्तीसगढ़ अउ ओडिशा उप क्षेत्र डहार ले पांच अउ छै अक्टूबर के रईपुर के साईंस कॉलेज मैदान म सशस्त्र बल आउटरीच कारीकरम के आयोजन करे जाही। ए कारीकरम म राज्य सरकार अउ नागरिक प्रशासन के वरिष्ठ गणमान्य नागरिक भाग लीही। उहें, मध्य कमान अउ मध्य भारत क्षेत्र के वरिष्ठ सैन्य अधिकारी घलो मौजूद रइही। भारतीय सेना के ताकत अउ कौसल के प्रदर्सन करे बर आने-आने इकाई अउ संरचना ले तीन सौ ले जादा भारतीय सेना के जवान ए कारीकरम म भाग लीही।
इही बीच, भारतीय सेना के भीष्म टी-नाइंटी टैंक अउ आने आर्टिलरी के आज रईपुर पहुंचे म जोरदार स्वागत करे गीस। एखर बाद ए रैली के रूप म टैंक अउ सैन्य उपकरण तेलीबांधा, मरीन ड्राइव, कलेक्टोरेट, जयस्तंभ चौक अउ आश्रम चौक होवत साईंस कॉलेज मैदान पहुंचिस। ए रैली ल लेके सहर के नागरिक मन म कतकोन उछाह देखे गीस।
राज्य स्थापना दिवस-स्थानीय अवकाश
छत्त्तीसगढ़ राज्य स्थापना दिवस के बेरा म एक नवंबर के राज्य के सबो शासकीय कार्यालय अउ संस्था मन बर स्थानीय अवकास घोसित करे गेहे। ए अवकास बैंक, कोषालय, उप कोषालय अउ आने वित्तीय संस्थान बर लागू नइ होही। ए संबंध म सामान्य प्रशासन विभाग डहार ले आदेस जारी कर दे गेहे।
स्वच्छता ही सेवा-समापन
प्रदेस म सत्रह सितंबर ले आयोजित ‘‘स्वच्छता ही सेवा‘‘ पखवाड़ा के काली समापन होइस। उप मुख्यमंत्री अरूण साव काली बिलासपुर म ‘‘स्वच्छता ही सेवा‘‘ पखवाड़ा के राज्य स्तरीय समापन समारोह म सामिल होइन। ए बेरा म श्री साव ह स्वच्छता दीदी मनके पांव पखार के उंखर सम्मान करीन। ओमन ह प्रदेस भरके नगरीय निकाय के स्वच्छता ग्राही, स्वच्छता दीदी, स्वच्छता कमांडोस अउ स्वच्छता पखवाड़ा म अच्छा काम करइया आने-आने संगठन मन ल घलो सम्मानित करीन। ए बेरा म श्री साव ह स्वच्छता पेट्रोलिंग गाड़ी ल हरा झंडी दिखाके रवाना करीन। ओमन ह कारीकरम म मौजूद लोगन मन ल प्रदेस ल स्वच्छ अउ सुंदर बनाय राखे के आह्वान करत स्वच्छता के सपथ दिलाइन।
कारीकरम म श्री साव ह बिलासपुर जिला म करीब पैंसठ करोड़ रूपिया के आने-आने विकास कार्य के लोकार्पण अउ भूमिपूजन करीन।
शारदेय-नवरात्र
मां सक्ति के अराधना के परब शारदेय नवरात्र आज ले सुरू होगे हे। आज ले लेके नौ दिन तक सब्बो सक्तिपीठ अउ देवी मंदिर म मां सक्ति के आने-आने रूप के बिसेस पूजा-पाठ करे जाही। मंदिर म आज ले घट स्थापना के संगेसंग मनोकामना ज्योतिकलस जलाय गेहे। उहें, चौक-चौराहा म स्थित पंडाल मन म घलो देवी प्रतिमा स्थापित करे जात हे।
इही बीच, मुख्यमंत्री विष्णुदेव साय ह आज रईपुर स्थित अपन निवास ले डोंगरगढ़ स्थित मां बम्लेश्वरी के दर्सन बर जावत श्रध्दालु मनके बस ल झंडी दिखाके रवाना करीन। ए मउका म मुख्यमंत्री ह प्रदेसवासी मन ल नवरात्रि के बधई दीन। जानबा के मुताबिक मां काली अन्नदाता भंडार समिति डहार ले श्रध्दालु मन ल पाछू नौ बछर ले लगातार नवरात्रि के बेरा म मां बम्लेश्वरी धाम के निसुल्क यात्रा कराय जाथे। ए बछर घलो पांच दिन तक रोज चार बस के जरिया ले श्रध्दालु मन ल मां बम्लेश्वरी दर्सन बर भेजे जाही।
आकाशवाणी-स्थापना दिवस
आज आकाशवाणी रईपुर के बैंसठवां स्थापना दिवस रिहीस। ए बेरा म आज आकाशवाणी रईपुर केंद्र म आने-आने कारीकरम आयोजित करे गीस। उहें स्वच्छता पखवाड़ा के तहत बिसेस काम करइया दस स्वच्छताकर्मी के सम्मान करे गीस।
हिन्दी कार्यशाला
रईपुर स्थित राजीव गांधी राष्ट्रीय भूमिजल प्रसिक्षण अउ अनुसंधान संस्थान म संयुक्त हिन्दी कार्यसाला के आयोजन करे गीस। ए कार्यसाला म नेहरू युवा केंद्र संगठन, राजीव गांधी राष्ट्रीय भूमिजल प्रसिक्षण अउ अनुसंधान संस्थान, नगरीय विमानन अउ सुरक्षा ब्यूरो, अंतर राज्य पुलिस बेतार केंद्र, एमएसटीसी, एकीकृत नासीजीव प्रबंधन केंद्र अउ केंद्रीय जल आयोग के चालीस ले जादा अधिकारी मन भाग लीन।
अउ अब मौसम के हाल…
मौसम विभाग के अनुसार एक उपरी हवा के चक्रीय-चक्रवाती घेरा दक्षिण पूर्व बांग्ला देस अउ उंखर तीर-तखार म हे। उहें, एक द्रोणिका उत्तर-पूर्व बिहार ले उत्तर-अंडमान सागर तक बने हे। एखर प्रभाव ले अवइया चौबीस घंटा म एक निम्न दाब के क्षेत्र उत्तर बंगाल के खाड़ी अउ ओखर तीर बने के संभावना हे। एखर असर ले प्रदेस म काली एक-दू जघा म हल्का बरसा होय अउ गरज-चमक के संग छींटा पड़े के संभावना हे।