प्रधानमंत्री नरेन्द्र मोदी ह किहीन कि स्वच्छता के प्रतिबद्धता जीवनभर के प्रतिज्ञा हरय। ओमन ह लोगन मन ले आग्रह करीन कि स्वच्छता ल जीवन के अभिन्न हिस्सा बनाय के संकल्प लेवय। स्वच्छ भारत मिशन के दस बछर पूरा होय के मउका म आज नई दिल्ली म ‘‘स्वच्छता ही सेवा‘‘ कार्यक्रम ल संबोधित करत श्री मोदी ह स्वच्छता ल जन आंदोलन बनाय बर एक सौ चालीस करोड़ भारतीय के अटूट भावना ल नमन करीन।
श्री मोदी ह ए बात म जोर दीन कि स्वच्छ भारत मिशन विश्व के सबले बड़े अउ लोगन के भागीदारी ले चलाय जाने वाला सबले बड़े आंदोलन हे। ए बेरा म केन्द्रीय जल शक्ति मंत्री सी.आर. पाटिल के संग सहरी मामला के राज्यमंत्री तोखन साहू अउ आने-आने मंत्रालय के सचिव उपस्थित रिहीन।
प्रधानमंत्री-जल प्रदाय योजना
प्रधानमंत्री नरेन्द्र मोदी ह आज नई दिल्ली म वीडियो कॉन्फ्रेंसिंग के माध्यम ले छत्तीसगढ़ के सूरजपुर जिला के भटगांव नगर पंचायत बर लगभग संतावन करोड़ रूपिया के लागत के जल प्रदाय योजना के सिलान्यास करीन। ए कार्यक्रम म उपमुख्यमंत्री अरूण साव वर्चुअली सामिल होइन। अमृत मिशन के तहत मंजूर करे गे ए जल प्रदाय योजना के काम अवइया दू बछर म पूरा करे जाही। ए मउका म श्री साव ह किहीन कि जल प्रदाय योजना के सुरू होय ले भटगांव के लोगन मनके पेयजल के समस्या दूर होही।
गांधी/शास्त्री-जयंती
देस आज राष्ट्रपिता महात्मा गांधी अउ पूर्व प्रधानमंत्री लाल बहादुर शास्त्री के जयंती म ओमन ल श्रद्धांजलि अर्पित करत हे। नई दिल्ली के राजघाट म महात्मा गांधी के समाधि अउ विजय घाट स्थित लाल बहादुर शास्त्री के समाधि म राष्ट्रपति द्रौपदी मुर्मू, उपराष्ट्रपति जगदीप धनखड़, प्रधानमंत्री नरेन्द्र मोदी, लोकसभा अध्यक्ष ओम बिरला अउ लोकसभा म विपक्ष के नेता राहुल गांधी ह महात्मा गांधी के समाधि म पुष्पांजलि अर्पित करीन।
ऐति, राजधानी रईपुर संग छत्तीसगढ़ म घलो आने-आने कार्यक्रम आयोजित करे जात हे। मुख्यमंत्री विष्णुदेव साय ह रईपुर स्थित अपन निवास कार्यालय म राष्ट्रपिता महात्मा गांधी अउ पूर्व प्रधानमंत्री लाल बहादुर शास्त्री के जयंती म उंखर छायाचित्र म पुष्प अर्पित कर ओमन ल नमन करीन। उहें, मुख्यमंत्री ह राजधानी के आजाद चौक स्थित महात्मा गांधी के प्रतिमा म माल्यार्पण कर उनला श्रद्धांजलि अर्पित करीन। ए बेरा मुख्यमंत्री ह स्वच्छता अभियान म हिस्सा लीन अउ लोगन मन ल स्वच्छता के सपथ दिलईन।
उपमुख्यमंत्री अरूण साव ह आज बिलासपुर के कलेक्ट्रेट परिसर म महात्मा गांधी के प्रतिमा म माल्यार्पण करीन। ओमन पूर्व प्रधानमंत्री लालबहादुर शास्त्री के जयंती म ओमन ल घलो श्रद्धांजलि अर्पित करीन।
मुख्यमंत्री-स्वच्छता अभियान
मुख्यमंत्री विष्णुदेव साय ह आज रायपुर के पंडित दीनदयाल उपाध्याय ऑडिटोरियम म आयोजित ‘‘स्वच्छता ही सेवा‘‘ कार्यक्रम सामिल होइन। ए बेरा म ओमन किहीन कि स्वच्छता अभियान ह राज्य म जन-आंदोलन के रूप ले लेहे। ओमन किहीन कि प्रधानमंत्री नरेन्द्र मोदी के आह्वान अउ स्वच्छता अभियान ले हम जम्मों अपन स्कूल-कालेज, कार्यालय के संग सार्वजनिक स्थान ल स्वच्छ रखे के प्रेरणा मिले हे। श्री साय ह किहीन कि स्वच्छता ल हमन अपन आदत म सामिल करन। ओमन लोगन ल छत्तीसगढ़ ल स्वच्छ अउ सुंदर बनाय के सपथ देवइन अउ स्वच्छता के क्षेत्र म जोरलगहा ढंग ले बूता करइया मनखे अउ संस्थान ल सम्मानित करीन। उहें, प्रधानमंत्री आवास योजना के हितग्राही मन ल आवास के चाबी सौंपे गीस। संगेसंग मच्छर उन्मूलन बर चलित वाहन अउ ससक्त सैन्य कार्यक्रम के गाड़ी मन ल हरा झंडा देखाके रवाना करे गीस। ए कार्यक्रम ल वन मंत्री केदार कश्यप अउ रायपुर सांसद बृजमोहन अग्रवाल ह घलो संबोधित करीन।
मुख्यमंत्री-बलरामपुर
मुख्यमंत्री विष्णुदेव साय ह आज बलरामपुर जिला के राजपुर म आयोजित राज्य स्तरीय ‘‘धरती आबा जनजातीय ग्राम उत्कर्ष‘‘ अभियान के सुभारंभ कार्यक्रम म सामिल होइन। ए मउका म ओमन जिला म एक सौ बयानवे करोड़ ले जादा के लागत के आने-आने विकास कार्य के भूमिपूजन, सिलान्यास अउ लोकार्पण करीन। कार्यक्रम म श्री साय ह राजपुर म अपर कलेक्टर लिंक कोर्ट सुरू करे, हायर सेकेंडरी स्कूल बर नया भवन निर्माण अउ पंडो जनजाति बर पचास-पचास सीटर बालक-बालिका छात्रावास निर्माण करे के घोसना करीन। उहें, नरसिंहपुर ले मरकाडाड़ के बीच महान नदी म पुल निर्माण अउ उफिया गांव म चन्दर मुसखोर नाला म पुलिया निर्माण करे के घलो घोसना करीन। संगेसंग मुख्यमंत्री ह बिलासपुर अउ सरगुजा संभाग म हर बछर कर्मा महोत्सव आयोजन कराय के घलो घोसना करीन।
सैन्य प्रदर्शन
छत्तीसगढ़ के लोगन मन ल पांच अउ छह अक्टूबर के भारतीय सेना के कौशल अउ ताकत ल तीर ले देखे के मउका मिलही। भारतीय सेना के अधिकारी अउ छत्तीसगढ़-ओड़िशा सब एरिया के कमांडर अमन आनंद ह बतईन कि साईंस कॉलेज मैदान म होवइया ए कार्यक्रम म आधुनिक उपकरण के संगेसंग युद्ध के बेरा उपयोग करे जाने वाला ड्रोन के प्रदर्शनी लगाय जाही। दू दिन तक होवइया ए कार्यक्रम बिहनिया नौ बजे ले संझा चार बजे तक चलही।
कांग्रेस न्याय यात्रा-समापन
प्रदेस कांग्रेस डहार ले निकाले गे छह दिवसीय छत्तीसगढ़ न्याय यात्रा के आज रईपुर के गांधी मैदान म समापन होगे। ए यात्रा सत्ताईस सितंबर के गिरौदपुरी धाम ले प्रदेस कांग्रेस अध्यक्ष दीपक बैज के अगुवई म सुरू होय रिहीस। न्याया यात्रा के समापन म आज राजधानी के गांधी मैदान म एक आमसभा के आयोजन करे गीस, जेमा अखिल भारतीय कांग्रेस कमेटी के महासचिव अउ छत्तीसगढ़ प्रभारी सचिन पायलट सामिल होइन।
सभा ल संबोधित करत प्रदेस कांग्रेस अध्यक्ष दीपक बैज ह प्रदेस म कानून व्यवस्था बिगड़े के आरोप लगात एखर बर राज्य सरकार ल जिम्मेदार ठहरईन। ओमन न्याय यात्रा ल सफल बनाय बर पार्टी के जम्मों नेता अउ कार्यकर्ता मन ल धन्यवाद दीन।
आमसभा ल छत्तीसगढ़ प्रभारी सचिन पायलट, नेता प्रतिपक्ष डॉक्टर चरणदास महंत, पूर्व मुख्यमंत्री भूपेश बघेल, पूर्व उपमुख्यमंत्री टी.एस. सिंहदेव अउ पार्टी के आने-आने नेता मन संबोधित करीन।
शारदेय-नवरात्र
सक्ति अउ अराधना के परब कुंवार नवरात्रि काली ले सुरू होही। ए बेरा म प्रदेस के आने-आने माता देवाला म नौ दिन ले बिसेस पूजापाठ करे जाही। देवी मंदिर अउ सक्तिपीठ मन म मनोकामना ज्योति कलश के स्थापना घलो करे जाही। राजधानी रईपुर के संग प्रदेस के जम्मों देवी मंदिर मन म साज-सज्जा के काम करे जात हे। उहें, कई समिति डहार ले सार्वजनिक जघा म पंडाल लगाके माता के प्रतिमा स्थापित करे जाही। राजनांदगांव जिला के डोंगरगढ़ स्थित मां बम्लेश्वरी के दर्सन बर अवइया भक्त मन ल सुरक्षा के संगेसंग जम्मों जरूरी सुविधा दे जाही। ऐति, दंतेवाड़ा म मां दंतेश्वरी, रतनपुर म मां महामाया देवी, सक्ती जिला म चन्द्रहासिनी अउ धमतरी म विंध्यवासिनी मंदिर म नवरात्रि के जम्मों तैयारी पूरा कर ले गेहे।
इही बीच, स्वास्थ्य मंत्री श्याम बिहारी जायसवाल ह नवरात्रि के दउरान प्रदेस के प्रमुख जघा मन म स्वास्थ्य सिविर लगाय के निरदेस देहे।
पुलिस विभाग-आयु छूट
राज्य म पुलिस के पद म भर्ती बर आवेदक मन ल आयु सीमा म पांच बछर के छूट दे जाही। ए संबंध म राज्य सरकार डहार ले आदेस जारी कर दे गेहे। ए छूट सूबेदार, उप निरीक्षक संवर्ग अउ प्लाटून कमांडर के पद म नियुक्ति बर भर्ती प्रक्रिया बछर दू हजार चौबीस म केवल एक बार बर दे जावत हे। ए अनुसार निर्धारित अधिकतम आयु सीमा म पांच बछर के छूट दे जाही। फेर, जम्मों छूट ल मिलाके अधिकतम आयु सीमा पैंतालीस बछर ले जादा नइ होही।
खेल-प्रतियोगिता
राजधानी रईपुर म सोलह ले बीस अक्टूबर तक अखिल भारतीय वन खेल प्रतियोगिता के आयोजन करे जाही। ए प्रतियोगिता म छत्तीसगढ़ के संगेसंग देशभर के वन विभाग के खिलाड़ी आने-आने खेल स्पर्धा म भाग लीहीं। प्रतियोगिता के समापन म पेरिस ओलंपिक के पदक विजेता अउ निशानेबाज मनुभाकर विशेष रूप ले उपस्थित रइही।