केंद्रीय सड़क परिवहन अउ राजमार्ग मंत्री नितिन गडकरी ह प्रदेस म राजमार्ग परियोजना मन बर दस हजार करोड़ रूपिया के मंजूरी देहे। ए पइसा ले राज्य म चार ठिन नवा राष्ट्रीय राजमार्ग परियोजना के रिपोर्ट तियार करे जाही। आज नई दिल्ली म मुख्यमंत्री विष्णुदेव साय के संग समीक्षा बइठका के दौरान केंद्रीय सड़क परिवहन अउ राजमार्ग मंत्री ह राष्ट्रीय राजमार्ग परियोजना उपर गोठबात करीन।
मुख्यमंत्री ह केंद्रीय मंत्री ल धन्यवाद देवत किहीन कि पइसा के मिले ले राज्य के आर्थिक अउ सामाजिक विकास म तेजी आही। मुख्यमंत्री ह किहीन कि राज्य सरकार ह जम्मो परियोजना मन ल बेरा म पूरा करही। संगेसंग हर हफ्ता कामकाज के समीक्षा करे जात हे। समीक्षा बइठका के दौरान केंद्रीय मंत्री श्री गडकरी ह रईपुर ले विशाखापट्नम के बीच बनइया सड़क के पहिली दौर के काम बेरा म पूरा करे उपर प्रदेस सरकार के अधिकारी मन ल बधई दीन।
सीजीपीएससी-परिणाम
छत्तीसगढ़ लोक सेवा आयोग ह राज्य सेवा मुख्य परीक्षा दू हजार तेईस के रिजल्ट घोसित कर देहे। ए परीक्षा म तीन हजार पांच सौ संतान्वे उम्मीदवार मन परीक्षा दे रिहीन, जेमा ले सात सौ तीन परीक्षार्थी मन ल साक्षत्कार बर चुने गेहे। परीक्षा परिणाम आयोग के वेबसाइट म अपलोड करके देखे जा सकथे। मुख्य परीक्षा पास करइया परीक्षार्थी मन ल साक्षात्कार के एक दिन पहिली अपन मूल दस्तावेज ल सत्यापन बर लोकसेवा आयोग के आफिस म जाना जरूरी हे। परीक्षार्थी मनके साक्षात्कार के तारीख अउ पूरा जानबा आयोग के वेबसाइट म जारी करे जाही। जानबा के मुताबिक छत्तीसगढ़ लोकसेवा आयोग ह पाछू साल दू हजार तेइस म सत्रह ठिन आने-आने सेवा मन बर दू सौ बियालीस पद म भर्ती बर विज्ञापन जारी करे रिहीन, जेखर प्रारंभिक परीक्षा ग्यारा फरवरी दू हजार चौबीस के होय रिहीस।
भर्ती-प्रक्रिया
राज्य सरकार ह आने-आने विभाग मन के तीन हजार सात सौ ले जादा पद मन म भर्ती के काम सुरू कर देहे। मुख्यमंत्री विष्णुदेव साय के निरदेस उपर वित्त विभाग ह अब तक करीबन आठ ठिन विभाग मन म भर्ती बर अपन मंजूरी देहे अउ संगेसंग खाली पड़े पद म भर्ती के काम ल लेके जम्मो विभाग ह अपन-अपन प्रस्ताव बनावत हे।
ट्राई-रेडियो प्रसारक
भारतीय दूरसंचार विनियामक प्राधिकरण-ट्राई ह प्राइवेट रेडियो प्रसारक मन बर डिजीटल रेडियो प्रसारण नीति कार्यान्वयन उपर एक ठिन परामर्स पत्र जारी करे हे। ट्राई ह निजी रेडियो प्रसारक मन बर डिजीटल रेडियो प्रसारण नीति के कामकाज ले जुड़े आने-आने मुद्दा उपर हितधारक मनके टिप्पणी के प्रक्रिया के सुरूआत करे हे। हितधारक मन अटठाईस अक्टूबर तक परामर्स पत्र उपर अपन टिप्पणी कर सकथे। त उहें, आकाशवाणी ह अपन एनालॉग मीडियम वेव अउ शॉर्ट वेव रेडियो प्रसारण नेटवर्क के डिजिटिकरण के सुरूआत करे हे अउ अपन अभी के अड़तीस ठिन एनालॉग ट्रांसमीटर ल डिजिटल ट्रांसमीटर म बदले हे। आकाशवाणी ह एफ.एम.बैंड म घलो डिजिटल रेडियो तकनीक के ट्रायल करे हे। डिजिटल रेडियो प्रसारण एनालॉग रेडियो प्रसारण म कतकोन सुविधा दीही।
सैनिक प्रदर्शनी
राज्य सरकार डहार ले रईपुर के साईंस कॉलेज मैदान म पांच अउ छै अक्टूबर के सैन्य-प्रदर्सनी राखे गेहे। ए सैन्य प्रदर्सनी म युध्दक टैंक टी-नाइंटी के संगेसंग कतकोन नवा-नवा सैन्य उपकरण मन ल देखे बर राखे जाही। ए उपकरण मनके परयोग हमर सेना मन ह दूश्मन मन उपर करथे। ए सैन्य प्रदर्सनी म सैनिक पैरा जंपिंग, खुखरी डांस, डेयरडविल मोटरसाइकलिंग राइडिंग अउ घुड़संवारी के घलो प्रदर्सन करे जाही।
मुख्यमंत्री विष्णुदेव साय ह लोगन मनले अपील करत किहीन हे कि जम्मो मन ए कारीकरम ल देखे बर आवय।
स्वच्छता ही सेवा
‘‘स्वच्छता ही सेवा‘‘ अभियान म ए बेरा प्रदेस म कतकोन कारीकरम राखके लोगन मन ल साफ-सफाई के बारे म जागरूक करे जात हे। इही कड़ी म गौरेला-पेण्ड्रा-मरवाही जिला के ग्राम पंचायत बंशीताल म आज विकासखंड स्तरीय कारीकरम होइस, जेमा पढ़इया स्कूली लइका मन डहार ले स्वच्छता दौड़, रैली, रंगोली, पेटिंग, प्रश्नोत्तरी, निबंध अउ कविता लेखन प्रतियोगिता के कारीकरम होइस। कारीकरम म मारवाही विधायक ह लोगन मन ल साफ-सफाई करे के सपथ देवाइन।
ओति, जशपुर जिला अउ सत्र न्यायालय परिसर म राखेगे स्वच्छता अभियान म प्रधान जिला अउ सत्र न्यायाधीश मन्सूर अहमद के संग प्रधान कुटुम्ब न्यायाधीश गीता नेवारे, जिला सत्र न्यायाधीश शैलेष अच्युत पटवर्धन के संगेसंग जम्मो जिला न्यायालय, परिवार न्यायालय अउ जिला विधिक सेवा प्राधिकरण के कर्मचारी मन ह मिलके न्यायालय परिसर म साफ-सफाई करीन।
ऐति, पद्मश्री फूलबासन बाई ह बतइन कि राजनांदगांव जिला के मां बम्लेश्वरी जनहित कार्य समिति ह अब्बड़ बेरा ले साफ-सफाई के क्षेत्र म काम करत हे, जेमा दू लाख माईलोगिन मन जुड़े हवय। ओमन प्रदेस के लोगन मनले ए अभियान ल अउ आगू बढ़ाय के अपील करे हे।
पोषण माह-चित्र प्रदर्शनी
राष्ट्रीय पोषण माह के मउका म रईपुर के डॉक्टर राधाबाई शासकीय नवीन कन्या महाविद्यालय म दू दिन तक चलइया चित्र प्रदर्सनी आज ले सुरू हो गेहे। ए प्रदर्सनी केंद्रीय संचार ब्यूरो रईपुर डहार ले लगाय गेहे। पोषण माह के मउका म प्रदर्सनी के संगेसंग कतकोन आने कारीकरम करे जात हे, जेमा कालेज के छात्र-छात्रा मन भाग लेवत हे।
नशा मुक्ति अभियान
दुरूग जिला के आनंद सरोवर प्रजापिता ब्रह्मकुमारी आश्रम बघेरा म नशा मुक्त भारत अभियान के मउका म आज जिला स्तरीय कारीकरम राखे गीस, जेखर सुभारंभ सांसद विजय बघेल अउ विधायक गजेन्द्र यादव ह करीन। ए मउका म ओमन नशा मुक्ति प्रचार रथ ल हरा झंडी देखाके भेजिन।
प्राचार्य-निलंबन
जशपुर जिला के स्वामी आत्मानंद अंग्रेजी माध्यम विद्यालय मनोरा के प्राचार्य आर.बी.निराला ल निलंबित कर दे गेहे। ए प्राचार्य डहार ले स्कूल म काम करइया महिला करमचारी, शिक्षिका अउ छात्रा मन के संग गलत व्यवहार करे के सिकायत मिले रिहीस।
अउ अब मौसम के हाल…
मौसम विभाग के मुताबिक एक ठिन द्रोणिका कोंकण ले दक्षिण-पूर्व मध्यप्रदेस तक बने हे अउ संगेसंग प्रदेस म बंगाल के खाड़ी ले घलो नमी आवत हे। अवइया चौबीस घंटा के दौरान एक-दू जघा म गरज-चमक के संग हल्का ले मध्यम बरसा होय के संभावना हे। त उहें, कोनो-कोनो जघा म गाज गिरे के संसो जताय गेहे। मौसम विभाग ह दक्षिण छत्तीसगढ़ म भारी बरसा होय के चेतावनी देहे।
ऐति, लोकल प्रभाव ले आज मंझनिया राजधानी रईपुर के कोनो-कोनो जघा म तेज बरसा होइस।
अउ अब थोरकुन समाचार सार म –
– मुख्यमंत्री विष्णुदेव साय ह आज नई दिल्ली स्थित छत्तीसगढ़ भवन म राज्यपाल रमेन डेका ले मिलिन। ए मउका म उप मुख्यमंत्री अरूण साव घलो साथ म रिहीन।
– जीएसटी के तहत कंपनसेशन सेस के पुनर्गठन बर मंत्री मनके समूह बनाय गेहे। केंद्रीय वित्त राज्य मंत्री पंकज चौधरी के अगुवई म बनाय गे, ए समूह म छत्तीसगढ़ के वित्त मंत्री ओ.पी. चौधरी ल सदस्य नियुक्त करे गेहे।
– अग्निवीर म भर्ती बर होय ऑनलाइन प्रवेस परीक्षा म पास होय अभ्यर्थी मन बर चार ले बारह दिसंबर तक रायगढ़ म भर्ती रैली राखे जाही, जेमा प्रदेस के तैंतीस ठिन जिला मनके आठ हजार पांच सौ छप्पन अभ्यर्थी मन सामिल होही।
अउ
– दुरूग जिला के रानीतराई पुलिस ह एक ठिन गाड़ी ले गांजा तस्करी करत तीन झिन आरोपी मन ल गिरफ्तार करे हे। एखर तीर ले पांच किलो ले जादा के गांजा जब्त करे गेहे।