राज्य सरकार ह पांच ठिन विकास प्राधिकरण मनके उपाध्यक्ष के नियुक्ति के आदेस जारी कर देहे। पत्थलगांव के विधायक गोमती साय ल सरगुजा क्षेत्र विकास प्राधिकरण के उपाध्यक्ष बनाय गेहे। उहें, कांडागांव के विधायक लता उसेंडी ल बस्तर क्षेत्र आदिवासी विकास प्राधिकरण के उपाध्यक्ष अउ आरंग के विधायक गुरू खुशवंत साहेब ल अनुसूचित जाति विकास प्राधिकरण के उपाध्यक्ष नियुक्त करे गेहे। अइसने मरवाही कि विधायक प्रणव कुमार मरपच्ची ल मध्य क्षेत्र आदिवासी विकास प्राधिकरण के उपाध्यक्ष अउ दुर्ग ग्रामीण के विधायक ललित चंद्राकर ल छत्तीसगढ़ राज्य ग्रामीण अउ अन्य पिछड़ा वर्ग क्षेत्र विकास प्राधिकरण के उपाध्यक्ष बनाय गेहे।
एखर पहिली राज्य मंत्रीपरिषद के बइठका म एक ठिन अहम फैसला लेवत विकास प्राधिकरण के पुर्नगठन आदेस म संसोधन के प्रस्ताव के अनुमोदन करे गीस। ए संसोधन ले ए पांच विकास प्राधिकरण म जनप्रतिनिधित्व के दायरा काफी बाढ़ गेहे। ए प्राधिकरण मन म अब ले राज्य मंत्रिमंडल के जम्मो मंत्रि मनके संघरा ही संबंधित क्षेत्र के राज्य सभा अउ लोकसभा सांसद अउ जिला पंचायत अध्यक्ष घलो एखर सदस्य होही। उहें, आदिम जाति अउ अनुसूचित जनजाति विकास विभाग के प्रमुख सचिव ल घलो प्राधिकरण म सदस्य के रूप म सामिल करे गेहे।
मंत्रिमंडल निर्णय
राज्य मंत्रिपरिषद के आज होय बइठका म सहरी विकास नीति के अनुमोदन करे गीस। ए नीति सहर मनके सुव्यवस्थित विकास के संगेसंग विकास योजना मन म प्रस्तावित जन उपयोगी भूमि के समुचित विकास करे के संग अतिक्रमण अउ अवैध निर्माण ल हतोत्साहित करे के सेति बनाय गेहे। ए नीति के तहत राज्य के सहरी आबादी जेन सुविधा के कमी महसूस करत हे, तेला दूर करे जाही। ए नीति के बारे म विस्तृत निरदेस आवास अउ पर्यावरण विभाग कोति ले जारी करे जाही।
गृह मंत्री-माओवाद प्रभावित मुलाकात
बस्तर शांति समिति के अगुवई म बस्तर क्षेत्र के लगभग सत्तर माओवाद पीड़ित मनके एक दल ह काली केंद्रीय गृह मंत्री अमित शाह ले नई दिल्ली स्थित उंखर निवास म भेंट करीन। पीड़ित मन बतइन कि माओवादी हमला के सेति ओमन के जीवन म गंभीर रूकावट आय हे। ओमा ले कई मनखे मन अपन परिवार वाला मन ल गंवाय हे, अउ कई झिन अपाहिज होगे हे। मुलाकात के दौरान गृह मंत्री ह पीड़ित मनके गोठ सुनके उंखर समस्या उपर विचार करे के बात किहीन। संघरा आस्वासन दीन कि सरकार उंखर समस्या ल हल करे बर प्रतिबध्द हवय।
ए दल काली इक्कीस सितंबर के राष्ट्रपति द्रौपदी मुर्मू ले घलो भेंट करही। ए दौरान माओवाद प्रभावित इलाका मन म शांति अउ विकास के संबंध म चर्चा करे जाही।
राज्यपाल-स्थापना दिवस समारोह
राज्यपाल रमेन डेका आज रईपुर स्थित पंडित रविशंकर शुक्ल विश्वविद्यालय के इकसठवां स्थापना दिवस समारोह म सामिल होइन। ए मउका म राज्यपाल ह किहीन कि विश्वविद्यालय ल गरब देवाय बर उत्साह के संग अउ कड़ा मेहनत करंय, जेखर ले ए देस के शीर्ष सौ ठिन विश्वविद्यालय म सामिल हो सकय।
राज्यपाल ह विद्यार्थी मन ले किहीन कि ए सफलता के कोनो सार्टकट रस्ता नइ हे। अपन सपना ल पूरा करे बर मेहनत करना होही। राज्यपाल ह किहीन कि मातृ भाखा म शिक्षा लेहे विद्यार्थी मनके संर्वांगीण विकास होथे। एखरे सेति भाखा ल लेके कोनो हीन भावना झन रखय। ओमन किहीन कि विश्वविद्यालय म रिसर्च अउ नवाचार ल लेके ओखर ऊंचा अपेक्षा हरय। ओमन ए बात म जोर दीन कि शिक्षा संस्थान म महिला, शिक्षक अउ छात्रा मन ल अनुकूल माहौल मिलना चाही। ओमन रईपुर ल एजुकेसन हब बनाय के दिसा म काम करे बर किहीन।
समारोह म अच्छा प्रदर्सन करइया महाविद्यालय अउ छात्र-छात्रा मन ल सम्मानित करे गीस। ए मउका म पंडित रविशंकर शुक्ल विश्वविद्यालय अउ शिलांग विश्वविद्यालय के बीच टीचर-स्टूडेंट एक्सचेंज प्रोग्राम अउ ट्राइबल बेस्ड स्टडीज बर एमओयू करे गीस।
मुख्यमंत्री-युवा उत्सव
मुख्यमंत्री विष्णुदेव साय आज भारतीय उद्योग परिसंघ कोति ले राजधानी रईपुर म राखेगे युवा उत्सव कारीकरम म सामिल होइन। समारोह ल संबोधित करत मुख्यमंत्री ह किहीन कि युवा मन ल जॉब गिवर बनना चाही न की जॉब सीकर। विकसित भारत बनाय के सबले बड़का जिम्मेदारी युवा मन उपर हरय अउ ए लक्ष्य ल पाय म छत्तीसगढ़ के युवा सक्ति के महत्वपूर्ण भूमिका हरय।
मुख्यमंत्री ह किहीन कि विकसित भारत के संकल्पना ल आयोजन के थीम बनाय गेहे। युवा उत्सव के दौरान आने-आने विसय उपर चर्चा होही, जेमा युवा मन बर उद्यम म अवसर उपर बात होही। ओमन किहीन कि उद्योग जगत शिक्षा के संघरा नवा प्रौद्योगिकीय अउ रोजगार जरूरत मनके मुताबिक कौसल शिक्षा करे उपर जोर देवत हे। इही कड़ी म प्रदेस के आदिवासी बहुल क्षेत्र के युवा मन ल अब रोबोटिक अउ आर्टिफिसियल इंटेलिजेंट जइसे तकनीकी विसय पढ़ाय जात हे। मुख्यमंत्री श्री साय ह किहीन कि जल्द ही स्वास्थ्य विभाग ह छै सौ पचास पद मन म मेडिकल स्टाफ के नियुक्ति करे जाही। एखरे संग पुलिस म आने-आने पद म भर्ती बर मंजूरी घलो दे गेहे।
राष्ट्रीय लोक अदालत
प्रदेस के न्यायालय मन म काली इक्कीस सितंबर के राष्ट्रीय लोक अदालत के आयोजन करे जाही। ए लोक अदालत म परिवारिक मामला मनके संगे राजस्व, लेनदेन, चेक बाउंस, बिजली बिल, जलकर, सफाई कर अउ दूसर प्रकरण मनके आपसी रजामंदी के संग निराकरण करे जाही। छत्तीसगढ़ राज्य विधिक सेवा प्राधिकरण बिलासपुर डहार ले प्रदेस के न्यायालय मन म पेंसन लोक अदालत के आयोजन करे जाही।
जिला विधिक सेवा प्राधिकरण रईपुर के अध्यक्ष अउ जिला न्यायाधीश अब्दुल जाहिद कुरैशी ह नागरिक मन ले अपील करे हे, कि यदि उंखर मामला सिविल न्यायालय या राजस्व न्यायालय म लंबित हे, त ओमन काली इक्कीस सितंबर के राष्ट्रीय लोक अदालत के माध्यम ले फायदा ले सकत हे।
राज्य निर्वाचन आयुक्त-निर्देश
छत्तीसगढ़ के राज्य निर्वाचन आयुक्त अजय सिंह ह स्थानीय निकाय के निर्वाचन बर निर्वाचक नामावली प्रेक्षक मनके ब्रीफिंग म किहीन कि मतदाता सूची के सुध्दता ही चुनाव के पारदर्सिता अउ निष्पक्षता के आधार हे। ओमन किहीन कि राज्य निर्वाचन आयोग डहार ले निर्वाचन नामावली ल सुध्द अउ त्रुटिरहित बनाय बर आज बिसेस ब्रीफिंग के आयोजन करे गेहे। एखर मुख्य उद्देस्य नामावली म संभावित गलती मन ल दूर करना अउ जम्मो योग्य मतदाता मनके नाव सूची म दरज करना हे।
ब्रीफिंग म प्रेक्षक मन ल निरदेसित करे गेहे कि ओमन मतदाता सूची के जांच अउ सुधार प्रक्रिया म पूरा सतर्कता बरतय।
पाठ्य पुस्तक महाप्रबंधक-निलंबित
चालू शैक्षणिक सत्र के नवा किताब मन ल कबाड़ी म बेचे जाय के मामला म राज्य सरकार ह छत्तीसगढ़ पाठ्य पुस्तक निगम के महाप्रबंधक प्रेमप्रकाश शर्मा ल निलंबित कर देहे।
बतादन कि मुख्यमंत्री विष्णुदेव साय ह सिलयारी स्थित रियल बोर्ड पेपर मिल म पाठ्य पुस्तक निगम कोति ले छापे गे चालू सत्र के नवा किताब मन ल कबाड़ी म बेचे जाय के घटना ल संज्ञान म लेवत अपर मुख्य सचिव रेणु पिल्ले ल जांच के निरदेस दे रिहीन। पहिली देखत जांच म दोषी पाय जाय म पाठ्य पुस्तक निगम के महाप्रबंधक प्रेमप्रकाश शर्मा ल तत्काल प्रभाव ले निलंबित कर देहे।
बातों-बातों में
पॉक्सो एक्ट-कार्यशाला
जगदलपुर म आज यूनिसेफ संस्था अउ छत्तीसगढ़ पुलिस विभाग के संयुक्त तत्वावधान म एक दिन के कार्यसाला के आयोजन करे गीस। ए कार्यसाला म बस्तर संभाग के जम्मो जिला ले आय एक सौ बीस पुलिस अधिकारी मन ल किशोर न्याय अधिनियम अउ पॉक्सो एप के बारे म प्रसिक्षण दे गीस। ए कार्यसाला म बस्तर रेंज के पुलिस महानिरीक्षक सुंदरराज पी. अउ पुलिस अधीक्षक शलभ सिन्हा घलो मौजूद रिहीन।