राज्यपाल रमेन डेका ह आज प्रदेस के जम्मो शासकीय विश्वविद्यालय मनके कुलपति मनके बइठका लेके ओखर काम-काज के समीक्षा करीन। बइठका म राज्यपाल ह जम्मो कुलपति मन ल शैक्षणिक कलेन्डर के कड़ाई ले पालन करे के निरदेस दीन। ओमन किहीन कि विद्यार्थी मनके समस्या सुनके ओला दूर करे के परयास करे जाय। राज्यपाल ह नवा शिक्षानीति के क्रियान्वयन के जानकारी लीन। ओमन आने-आने विश्वविद्यालय म खाली पद मन उपर जल्दी नियुक्ति करे के निरदेस घलो दीन।
बइठका म राज्यपाल ह आयुष विश्वविद्यालय म टी.बी. अउ कैंसर जइसे बीमारी मनके रोकथाम बर अनुसंधान करे उपर जोर दीन। उहें, कृषि विश्वविद्यालय ल निरदेस दीन के जादा उत्पादन देवइया धान के कीसम राज्य म लावय अउ कृषि विकास केंद्र के जरिया कैंप लगाके किसान मन ल बतावंय कि ओमन कोन-कोन कीसम के फसल लगा सकत हे।
विश्व बांस दिवस
विश्व बांस दिवस म काली केंद्रीय सड़क परिवहन अउ राजमार्ग मंत्री नितिन गडकरी ह बेमेतरा म तियार विश्व के सबले ऊंचा बांस टॉवर के ऑनलाइन लोकार्पण करीन। ए कारीकरम म विधानसभा अध्यक्ष डॉक्टर रमन सिंह वर्चुअल रूप ले सामिल होइन। ए मउका म श्री गडकरी ह बांस ले बने ए टॉवर के तारिफ करत किहीन कि ए वजन म हल्का हे अउ एखर जीवन काल कम से कम पचीस बछर के हे। वॉच टॉवर, टेलीकॉम टॉवर, ट्रांसमिसन टॉवर अउ रेडियो टॉवर के रूप म एला बउरे जा सकत हे। श्री गडकरी ह किहीन कि ए छत्तीसगढ़ सरकार यदि बांस के उपयोग के बारे म कोनो नीति बनाथे अउ ओला प्रोत्साहित करथे, त उंहा के आदिवासी मनके जीवन बदल जाही। छत्तीसगढ़ के हैण्डलूम, हैण्डीक्राफ्ट, अउ मेटलक्राफ्ट म नवा डिजाइन बनही, त ओखर अच्छा बिक्री होही।
बतादन कि बेमेतरा जिला के कठिया गांव म एक ठिन निजी उद्योग डहार ले विश्व के सबले ऊंचा बांस टॉवर के निर्माण करे गेहे। करीबन ग्यारा लाख रूपिया के लागत ले बने पेरिस के एफिल टॉवर जइसे डिजाइन वाला ए टॉवर के ऊंचाई एक सौ चालीस फीट अउ वजन सात हजार चार सौ किलोग्राम हरय।
जनदर्शन कार्यक्रम
मुख्यमंत्री विष्णुदेव साय के रईपुर स्थित निवास म आज जनदर्सन कारकीरम राखे गीस। ए दौरान कुछ युवा मन मुख्यमंत्री ले पीएससी समेत शासकीय भर्ती म आयु सीमा बढ़ाय के मांग करीन, जेमा मुख्यमंत्री ह युवा मन ल बतइन कि राज्य सरकार ह केबिनेट बैठक म पुलिस समेत शासकीय भर्ती मन म निर्धारित आयु सीमा म पांच साल के छूट देके निर्णय लीन हे। ओमन बतइन कि अभ्यर्थी मन ल इकतीस दिसंबर दू हजार अट्ठाइस तक आयु सीमा म पांच साल के छूट के फायदा मिलही।
उहें, दक्षिण कोरिया म पचीस ले तीस अगस्त तक आयोजित एशियन कप बीच वुडबॉल चैम्पियनशिप म हिस्सा लेके लहुटे महासमुंद के चैन कुमारी निषाद अउ रईपुर के रंजीता खलको ह मुख्यमंत्री ले जनदर्सन कारीकरम के दौरान भेंट करीन। ए खिलाड़ी मन मुख्यमंत्री ल बतइन कि ओमन ए प्रतियोगिता म कांस्य पदक जीते हे।
प्रधानमंत्री नरेंद्र मोदी ह किहीन कि देस म एके संग चुनई कराय म उच्च स्तरीय समिति के सिफारिस मन ल केंद्रीय मंत्रिमंडल कोति ले स्वीकार करई ह भारतीय लोकतंत्र ल अउ जीवंत अउ सहभागी बनाय के दिसा म महत्वपूर्ण कदम हरय। श्री मोदी ह ए परयास के अगुवई करे अउ संबंधित पक्ष के संग परामर्स करे बर पूर्व राष्ट्रपति रामनाथ कोविंद के सराहना करीन।
केंद्रीय राज्यमंत्री-परिवर्तन यात्रा
झारखंड के चतरा जिला के प्रभारी अउ केंद्रीय राज्यमंत्री तोखन साहू ह भारतीय जनता पार्टी के पच्चीस सितंबर के निकलइया परिवर्तन यात्रा के तियारी ल लेके आज कोर कमेटी के बइठका लीन। ए परिवर्तन यात्रा म सांसद मनोज तिवारी अउ रवि किशन सामिल होके कार्यकर्ता मनके उत्साह बढ़ाही।
सूचना अउ प्रसारण मंत्रालय क्षेत्रीय कार्यालय मन संग मिलके दू ले इकतीस अक्टूबर के बीच बिसेस स्वच्छता अभियान ‘फोर प्वाइंट ओ‘ चलाही। ए अभियान के तहत कार्यालय परिसर के स्वच्छता, मामला निराकरण, बेहतर स्थानीय प्रबंधन अउ संचार के आने-आने माध्यम ले जागरूकता फैलाय उपर धियान केंद्रीत करे जाही। सूचना अउ प्रसारण सचिव संजय जाजू ह जम्मो मीडिया इकाई प्रमुख मन संग बिसेस अभियान ‘फोर प्वाइंट ओ‘ के प्रगति के समीक्षा करीन।
ऐति, स्वच्छता ही सेवा अभियान के तहत छत्तीसगढ़ के कोंडागांव जिला म आज हस्ताक्षर अभियान चलाय गीस। कलेक्टर कुणाल दुदावत ह बतइन कि स्वच्छता ही सेवा अभियान के तहत लोगन मन ल जागरूक करे बर आने-आने गतिविधि के आयोजन करे जाही। ए गतिविधि म जनभागीदारी बढ़ाय बर सरलग परयास करे जात हे। ए अभियान म विद्यार्थी, एनसीसी, एनएसएस अउ स्काउट गाइड के कैडेट्स समेत स्वयं सेवी संगठन घलो हिस्सा लेवत हे। ओमन जिला के नागरिक मन ले जादा ले जादा संख्या म स्वच्छता अभियान म अपन सहभागिता देके अपील करीन।
उहें, सक्ति जिला म घलो स्वच्छता ही सेवा अभियान के तहत जनपद पंचायत मन म श्रमदान अउ स्वच्छता के दूसर कारीकरम मनके आयोजन करे जात हे। जनपद पंचायत सक्ति म आज मुख्य कार्यपालन अधिकारी के अगुवई म श्रमदान अउ सफई कारीकरम के आयोजन करे गीस।
कबीरधाम-मामला
कबीरधाम जिला म जेल म बंद विचाराधीन कैदी के मउत के बाद प्रशासन ह जिला के अतिरिक्त पुलिस अधीक्षक विकास कुमार ल निलंबित कर देहे। बतादन कि काली संदिग्ध परिस्थिति म अस्पताल ले जाय के बेरा विचाराधीन कैदी प्रशांत साहू के मउत होगे रिहीस। एखर बाद परिजन मन पुलिस उपर सक करत प्रताड़ना के आरोप लगाय रिहीन। बताय जात हे कि मुख्यमंत्री के निरदेस के बाद अतिरिक्त पुलिस अधीक्षक ल हटाय के कार्रवाई करे गेहे।
इही बीच, गृहमंत्री विजय शर्मा ह मृतक के परिवार वाला मन ल दस लाख रूपिया मुआवजा देके घोसना करीन हे।
पटवारी/एएसआई-निलंबित
कोरबा जिला म रिस्वत मांगे के आरोप म कलेक्टर अजीत वसंत ह भैसमा के पटवारी विमल सिंह ल निलंबित कर देहे। आरोप हे कि पटवारी ह फौती नामांतरण बर एक ग्रामीण ले अस्सी हजार रूपिया के रिस्वत मांगे रिहीस, जेखर सिकायत पीड़ित ह जिला प्रशासन ले करे रिहीस। एखर बाद सरकारी काम म उदासीनता अउ लापरवाही बरते उपर पटवारी ल पहिली कारण बताओ नोटिस जारी करे गे रिहीस।
उहें, इही जिला के दीपका थाना म पदस्थ एक झिन पुलिस उप निरीक्षक परमेश्वर राठौर अउ प्रधान आरक्षक योगेश रात्रे ल पुलिस अधीक्षक ह निलंबित कर देहे। आरोप हे कि एक ठिन प्रकरण ल रफा-दफा करे के बदला एएसआई ह एक मनखे ले करीबन दू लाख चालीस हजार रूपिया मांगे रिहीस, जेखर सिकायत म मामला के जांच दर्री के नगर पुलिस अधीक्षक ले कराय गीस। सिकायत सही पाय जाय म पुलिस सेवा आचरण नियम के प्रतिकूल काम करे के मामला म एएसआई अउ प्रधान आरक्षक ल निलंबित करे गीस।
ऐति, सक्ति जिला के पुलिस अधीक्षक अंकिता शर्मा ह मालखरौदा थाना म पदस्थ प्रधान आरक्षक अश्वनी जायसवाल ल अवैध गतिविधि म लिप्त पाय जाय म निलंबित कर देहे।
भाजपा-सदस्यता अभियान
भारतीय जनता पार्टी सदस्यता अभियान के जरिया अलग-अलग क्षेत्र म अपन पहिचान बना चुके प्रतिभावान लोगन मनके जानकारी सकेलही। भाजपा प्रदेस सदस्यता अभियान के संयोजक अनुराग सिंह देव ह बतइन कि ए अभियान के तहत एक ठिन अलग प्रतिभा पंजीकृत पत्र भरवाय जाही, जेखर माध्यम ले सदस्यता पवइया लोगन मनके रूझान के जानकारी ले जाही। चुने गे सदस्य मन ल पार्टी अलग-अलग मंच म जघा देके ओखर प्रतिभा ल अउ निखारे के काम करही।
उहें, पूर्व केंद्रीय मंत्री कौशल किशोर इक्कीस सितंबर के अनुसूचित जाति समाज के सदस्य अउ प्रबुध्द नागरिक मनले प्रदेस भाजपा कार्यालय कुशाभाऊ ठाकरे परिसर म भेंट करही।