केन्द्र सरकार ह देशभर म एके संघरा चुनाव कराय ‘‘एक राष्ट्र-एक चुनाव‘‘ बर बने उच्च स्तरीय समिति के सिफारिश ल स्वीकार कर लेहे। नई दिल्ली म आज संवाददाता मन ले बातचीत म सूचना अउ प्रसारण मंत्री अश्विनी वैष्णव ह किहीन कि पूर्व राष्ट्रपति रामनाथ कोविंद के अध्यक्षता म गठित समिति ह राजनीतिक दल अउ विशेषज्ञ मन संघरा हितधारक मन संग गोठबात करीन। ओमन किहीन कि एला दू चरण म लागू करे जाही। श्री वैष्णव ह किहीन कि पहिली चरण म लोकसभा अउ विधानसभा चुनाव एके संघरा होही अउ पंचायत अउ नगर पालिका जइसन स्थानीय निकाय चुनाव आम चुनाव के सौ दिन के भीतर कराय जाही।
श्री वैष्णव ह बतईन कि राज्य सरकार ह विज्ञान अउ प्रौद्योगिकी क्षेत्र ल बढ़ावा दे बर चन्द्रयान-फोर मिशन अउ वीनस ऑर्बिटर मिशन ल मंजूरी दीन हे। ओमन बतईन कि सरकार ह चालू रबी सीजन बर फास्फेट अउ पोटाश उर्वरक उपर पोषण आधारित सब्सिडी ल घलो मंजूरी दीन हे। एमा चौबीस हजार करोड़ रूपिया ले जादा के खरचा होही। ओमन किहीन कि प्रधानमंत्री अन्नदाता आय संरक्षण योजना ल घलो मंत्रिमंडल ह जारी राखे के मंजूरी देहे। केन्द्रीय मंत्री ह बतईन कि सरकार ह उनयासी हजार एक सौ छप्पन करोड़ रूपिया के व्यय के साथ प्रधानमंत्री जनजातीय उन्नत ग्राम अभियान ल घलो मंजूरी दीन हे। ओमन किहीन कि ए योजना ले जनजातीय समुदाय के सामाजिक-आर्थिक स्थिति म सुधार होही।
एनपीएस वात्सल्य योजना
केन्द्रीय वित्त मंत्री निर्मला सीतारमण ह आज ‘‘एनपीएस वात्सल्य योजना‘‘ के सुरूवात करीन। बिलासपुर के तारबाहर के आत्मानंद शासकीय अंग्रेजी माध्यम स्कूल म राज्य स्तरीय बैंकर्स समिति डहार ले नाबार्ड के सहयोग ले कार्यक्रम कराय गीस। ए आयोजन म वीडियो कॉन्फ्रेंसिंग के माध्यम ले स्कूली लइका मन ह अपन माता-पिता संग सामिल होइन।
उहें, दुरूग जिला के सुरपा के महंत पोसूदास शासकीय हाईस्कूल म घलो वात्सल्य योजना के सुरू होय के मउका म कतकोन लइका मन अपन माता-पिता संग पहुंचीन।
खबर के मुताबिक ‘‘एनपीएस वात्सल्य योजना‘‘ माता-पिता के पेंशन खाता म निवेश करके उंखर लइका मनके भविष्य बर बचत करे के संग लंबा अवधि बर पइसा जमा करे के मंजूरी दीहीं। योजना म माता-पिता अपन लइका के नाव म सालाना एक हजार निवेस कर सकत हे। ए योजना पेंशन फंड विनियामक अउ विकास प्राधिकरण के तहत चलाय जाही।
राज्यपाल-स्टार्टअप
राज्यपाल रमेन डेका ह आज राजभवन म दुर्ग के स्वामी विवेकानंद तकनीकी विश्वविद्यालय म बने ग्रामीण प्रौद्योगिकी अउ उद्यमिता फाउंडेशन म करे जावत स्टार्टअप के प्रस्तुतिकरण देखीन। ओमन सबो स्टार्टअप के तारीफ करत एला आम लोगन बर सरल बनाय जाय उपर जोर दीन। ओमन किहीन कि स्टार्टअप के माध्यम ले जादा ले जादा युवा मन ल रोजगार ले जोडे़ जा सकय, अइसन योजना बनाय जाय। ए संबंध म ओमन ह उद्यमी मनके मार्गदर्शन करीन अउ सुझाव घलोक दीन।
केन्द्रीय मंत्री-मुख्यमंत्री मुलाकात
मुख्यमंत्री विष्णुदेव साय ह काली रईपुर के उंखर निवास म केन्द्रीय इस्पात अउ भारी उद्योग मंत्री एच.डी. कुमार स्वामी ले भेंट करीन। श्री साय ह केन्द्रीय मंत्री संग चर्चा म सेल अउ एन.एम.डी.सी. के उत्पादन बढ़ाय के, दूनों उपक्रम अउ राज्य सरकार के बीच मिलजुल के काम करे के बारे म गोठबात करीन। मुख्यमंत्री ह किहीन कि सेल अउ एन.एम.डी.सी. ल सी.एस.आर. मद के काम म अउ जादा गति दे जाय के जरूरत हे। ओमन किहीन कि नगरनार अंचल म स्थानीय युवा मन बर कौशन उन्नयन के काम करे जाय, जेखर ले युवा मन ल रोजगार के बने मउका मिल सकय।
सीबीएसई-पंजीकरण
केन्द्रीय माध्यमिक शिक्षा बोर्ड सीबीएसई के बछर दू हजार पच्चीस के बोर्ड परीक्षा म भाग लेवइया नवमीं अउ ग्यारहवीं कक्षा के लइका मनके पंजीयन के काम आज ले सुरू होगे हे। सीबीएसई के अधिसूचना के अनुसार पंजीकरण के आखिरी तारीख सोलह अक्टूबर हे। सीबीएसई ले जुड़े स्कूल मन ह सीबीएसई डॉट जीओवी डॉट इन म अपन विधार्थी मनके पंजीयन करवा सकत हे। अधिसूचना म बताय गे हवय कि सत्र दू हजार पच्चीस-छब्बीस म दसवीं अउ बारहवीं के बोर्ड परीक्षा म ओ सबो छात्र मन ह परीक्षा दे सकही, जिखर नाव अउ विवरण उंखर स्कूल डहार ले दाखिल कराय गे हवय। स्कूल मन ल लइका मनके विवरण डारे के पहिली सीबीएसई पोर्टल म अपनो पंजीकरण कराय बर पड़ही। सीबीएसई ह केहे हे कि स्कूल मन ल ए निश्चित करे बर पड़ही कि असंबद्ध संस्थान के लइका मन ह उंखर स्कूल म नियमित कक्षा म भाग नइ लेवत हे। बोर्ड ह यहू केहे हे कि विद्यार्थी मन ल सीबीएसई के अलावा अउ दूसर बोर्ड म पंजीकृत नइ करवाय जा सकय। स्कूल मन ल केहे गे हवय कि लइका के नाव, उंखर माता-पिता के नाव, विषय के नाव अउ दूसर सूचना ल सही तरीका ले भरे जाय।
जल सप्ताह-केदार कश्यप
छत्तीसगढ़ के जल संसाधन मंत्री केदार कश्यप नई दिल्ली म जलशक्ति मंत्रालय डहार ले राखे गे आठवां भारत जल सप्ताह कारीकरम म सामिल होइन। ए दउरान ओमन ह छत्तीसगढ़ म जल प्रबंधन के क्षेत्र म करे गे काम ल साझा करीन। ओमन किहीन कि जल संरक्षण, संवर्धन, पर्यावरण, कृषि अउ विकास ले जुड़े कतकोन बिसय के बारे म चर्चा भारत बर ही नहीं, फेर पूरा विश्व बर जरूरी हे। श्री कश्यप ह किहीन कि जल संसाधन विभाग ह अवइया बेरा म राज्य के बाढ़त पेयजल अउ सिंचाई के जरूरत के बारे म पूरा सजग हे। राज्य म जल के उपयोग बर घलो भविष्य के योजना उपर काम करे जावत हे।
झारखंड विस चुनाव-तैयारी
झारखंड म विधानसभा चुनाव ले पहिली भारतीय जनता पार्टी ह अपन तैयारी बढ़ा देहे। इही कड़ी म दू जिला के प्रभारी के रूप म केन्द्रीय राज्यमंत्री तोखन साहू ह कार्यकर्ता मनके बइठका लीन, जेमा सबो झन ल परिवर्तन यात्रा के तैयारी म लगे बर किहीन। पच्चीस ले अट्ठाईस सितंबर के बीच परिवर्तन यात्रा म झारखंड के लातेहार विधानसभा म सांसद मनोज तिवारी अउ रविकिशन सामिल होही।
बलरामपुर-जवान फायरिंग
बलरामपुर जिला म आज छत्तीसगढ़ सशस्त्र बल-सीएएफ के एक जवान ह अपन साथी मन उपर गोली चला दीस। ए घटना म दू झन जवान के मउत होगे अउ दू जवान मन गंभीर रूप ले घायल होगे हवय। ए घटना सामरी थाना क्षेत्र के सीएएफ के भूताही कैंप म होइस। घायल जवान मन ल सामरी के प्राथमिक स्वास्थ्य केन्द्र म भर्ती कराय गेहे।
जिला के पुलिस अधीक्षक राजेश अग्रवाल ह घटना के पुष्टि करत बतईन कि सी.ए.एफ. के एक झन जवान ह अपन सर्विस रायफल ले अपनेच साथी मन उपर गोली चला दीस, जेखर ले एक झन पुलिसकर्मी के मउकाच म मउत होगे अउ दूसर के मउत अस्पताल ले जाय के बेरा होगीस। मृतक मनके पहिचान रूपेश पटेल अउ संदीप पांडेय के रूप म होय हे। मिले जानकारी के अनुसार कैंप म मौजूद दूसर जवान मन ह जवान अजय सिदार ल पकड़ लीन हे। जवान ह गोली काबर चलईस एखर पता नइ चल पाय हे। पुलिस ह मामला के जांच करत हे।
दुर्ग-विशाखापट्नम वंदेभारत एक्सप्रेस
दुर्ग-विशाखापट्टनम वंदेभारत एक्सप्रेस के परिचालन बीस सितंबर ले नियमति रूप ले करे जाही। ए ट्रेन हफ्ता म छह दिन दूनों डहार ले चलाय जाही। ट्रेन ह दुरूग अउ विशाखापट्टनम के बीच के दूरी ल आठ घंटा तक तय करही। जेमा करीबन तीन घंटा बाचही। ए ट्रेन ल पर्यटन अउ व्यापार के दृष्टि ले जरूरी माने जावत हे। ए ट्रेन के स्टॉपेज रईपुर, महासमुंद, खरियार रोड, कांटाभांजी, टिटलागढ़, केसिंगा, रायगड़ा, पार्वतीपुरम अउ विजयनगरम रइही।
अउ अब थोरकुन समाचार सार म –
– मुख्यमंत्री विष्णुदेव साय के रईपुर निवास म काली उन्नीस सितंबर के बिहनिया ग्यारह बजे ले एक बजे तक जनदर्शन कार्यक्रम कराय जाही।
– रायगढ़ जिला म ‘‘विकसित भारत मोदी जी की संकल्पना‘‘ उपर राखे गे छायाचित्र प्रदर्शनी के सुरूवात वित्तमंत्री ओ.पी. चौधरी ह करीन। एमा प्रधानमंत्री नरेन्द्र मोदी के जीवन ल प्रस्तुत करे गेहे, जेला देखे बर बड़ संख्या म लोगन पहुंचत हे।
अउ
– खैरागढ़ नगर पालिका म आज अध्यक्ष पद बर चुनाव होइस, जेमा भाजपा के गिरजा चंद्राकर ह जीत हासिल करीन। एखर पहिली, कांग्रेस के तीन झन पार्षद मन ह भाजपा म सामिल होइन।