उहें, मुख्यमंत्री ह किहीन कि आवासहीन परिवार मनके सपना ल प्रधानमंत्री आवास योजना के माध्यम ले पूरा करे जात हे। ओमन किहीन कि देसभर म बत्तीस लाख आवास मंजूर करे गेहे, जेमा ले करीबन तीस प्रतिशत आवास ह छत्तीसगढ़ ल मिल गे हवय।
स्वच्छता ही सेवा
देसभर म ‘‘स्वच्छता ही सेवा‘‘ अभियान के आज सुरूवात करे गीस। ए अभियान ल दू अक्टूबर तक चलाय जाही। ए बछर के थीम ‘‘स्वभाव स्वच्छता, संस्कार स्वच्छता‘‘ हवय।
ऐति, छत्तीसगढ़ म घलो आज ले ‘‘स्वच्छता ही सेवा‘‘ अभियान के सुरूआत करे गीस। मुख्यमंत्री विष्णुदेव साय ह रईपुर के तेलीबांधा तालाब परिसर म राखे गे कारीकरम म ‘‘स्वच्छता ही सेवा‘‘ पखवाड़ा के राज्य स्तरीय शुभारंभ करीन। ओमन कारीकरम म लोगन मन ल स्वच्छता के सपथ देवईन अउ तेलीबांधा तालाब परिसर म झाडू लगाके सफई करीन। ओमन स्वच्छता दीदी अउ सहर ल स्वच्छ बनाय म सहभागिता देवइया सामाजिक संस्था मन ल सम्मानित करीन अउ स्वच्छता दीदी मनके काम के बड़ई करीन। ए दउरान मुख्यमंत्री ह स्वच्छता मैराथन ल हरियर झंडा दिखाके रवाना। संगेसंग नवा स्वच्छता गाड़ी मन ल घलो रवाना करीन।
एखर बाद मुख्यमंत्री ह रईपुर के इंडोर स्टेउयम म ‘‘स्वच्छता ही सेवा‘‘ अभियान-ग्रामीण के सुभारंभ करीन। समारोह म मुख्यमंत्री ह ग्रामीण क्षेत्र म काम करइया समूह मन ल सुरक्षा किट बांटीन। ‘‘स्वच्छता ही सेवा‘‘ अभियान बर राज्य स्वच्छ भारत मिशन-ग्रामीण डहार ले बनाय गे पोस्टर के अनावरण घलो करे गीस। मुख्यमंत्री ह ए दउरान लोगन मन ल स्वच्छता के सपथ देवईन।
उहें, प्रादेशिक समाचार एकांश, आकाशवाणी केन्द्र, रईपुर म आज ‘‘स्वच्छता ही सेवा‘‘ अभियान के तहत स्वच्छता के सपथ देवाय गीस। समाचार प्रमुख विकल्प रंजन शुक्ला ह प्रादेशिक समाचार एकांश के जम्मों अधिकारी अउ कर्मचारी मन ल स्वच्छता के सपथ देवईन हे।
विश्वकर्मा जयंती-श्रमिक सम्मेलन
आज देस के संगेसंग प्रदेस म घलो विश्वकर्मा जयंती मनाय जात हे। मुख्यमंत्री विष्णुदेव साय ह ए मउका म इंदिरा गांधी कृषि विश्वविद्यालय म राज्य स्तरीय श्रमिक सम्मेलन म सामिल होइन। ए मउका म ओमन संतावन हजार मजदूर मनके खाता म उनचास करोड़ रूपिया के रासि ल डीबीटी के माध्यम ले ट्रांसफर करीन।
ए कारीकरम म मुख्यमंत्री ह श्रम विभाग के वेबसाइट ‘‘श्रमेव जयते‘‘ सुरू करीन। ए वेबसाइट म ई-टिकटिंग प्रणाली के माध्यम ले मजदूर मनके सिकायत अउ निराकरण ल सरल बनाय गेहे। श्रमिक मन बर हेल्पलाइन नंबर – शून्य-सात-सात-एक तीन-पांच-शून्य पांच-शून्य-पांच शून्य जारी करे गेहे।
प्रधानमंत्री-जन्मदिन
आज प्रधानमंत्री नरेन्द्र मोदी के चौहत्तरवां जन्मदिन हरय। राष्ट्रपति द्रौपदी मुर्मू, उपराष्ट्रपति जगदीप धनखड़ अउ गृहमंत्री अमित शाह ह प्रधानमंत्री ल जनमदिन के मउका म सुभकामना दीन।
उहें, छत्तीसगढ़ के मुख्यमंत्री विष्णुदेव साय ह रईपुर के इंडोर स्टेडियम म प्रधानमंत्री के विकसित भारत के संकल्पना उपर आधारित फोटू प्रदर्सनी के सुभारंभ करीन।
एनपीएस वात्सल्य योजना
केन्द्रीय वित्त मंत्री निर्मला सीतारमण ह काली अट्ठारह सितंबर के नई दिल्ली म ‘‘एनपीएस वात्सल्य योजना‘‘ के सुरूवात करही। ए कारीकरम ल छत्तीसगढ़ के रईपुर, दुरूग अउ बिलासपुर के संगेसंग देसभर के करीबन पचहत्तर ठन जघा मन म राखे जाही।
इही कड़ी म राज्य स्तरीय बैंकर्स समिति डहार ले नाबार्ड के मदद ले रईपुर, दुरूग अउ बिलासपुर म ‘‘एनपीएस वात्सल्य योजना‘‘ के आयोजन करे जात हे। ए कारीकरम म स्कूली लइका मन अपन माता-पिता के संग सामिल होही। एनपीएस वात्सल्य योजना के तहत माता पिता मनके पेंसन खाता म पइसा जमा करके अपन लइका मनके भविष्य बर बचत करे जा सकथे। ए योजना ल पेंशन फंड विनियामक अउ विकास प्राधिकरण के माध्यम ले चलाय जाही।
विश्वकर्मा जयंती
विश्वकर्मा जयंती के मउका म आज मुख्यमंत्री विष्णुदेव साय ह रईपुर म अपन निवास म विधि-विधान अउ मंत्रोच्चार के संग भगवान विश्वकर्मा के पूजापाठ करीन। ए मउका म ओमन श्रमवीर समेत प्रदेसवासी मन ल विश्वकर्मा जयंती के बधाई अउ सुभकामना दीन। मुख्यमंत्री ह किहीन कि हमर श्रमवीर मन ह छत्तीसगढ़ ल गढ़हे म सुघ्घर भागीदारी निभावत हें।
विश्वकर्मा जयंती के मउका म आज राजधानी रईपुर समेत प्रदेस के कई ठिन कारखाना, राईस मिल अउ निर्माणाधीन भवन मन म भगवान विश्वकर्मा अउ मसीन मनके पूजापाठ करे गीस।
राज्यपाल-चक्रधर समारोह
रायगढ़ म राखे गे उनचालीसवां चक्रधर समारोह ह काली सिरा गे। समापन समारोह म राज्यपाल रमेन डेका ल माईपहुना बनाय गे रिहीस। ए मउका म ओमन किहीन कि ए मंच ह न सिरिफ हमर संस्कृति के पहिचान के चिन्हारी कराथे, भलूक हमर कला संगीत अउ परंपरा ल आगू बढ़ाय म बहुत बड़े भूमिका निभाथे। ओमन यहू किहीन कि चक्रधर समारोह के माध्यम ले राज्य के सांस्कृतिक धरोहर अउ लोक कला ल नवा पहिचान मिलही। श्री डेका ह लोगन मन ल पर्यावरण ल बचाय खातिर ‘‘एक पेड़ मां के नाम‘‘ अभियान के तहत पेड़ लगाय के अपील करीन।
अनंत चतुर्दशी
आज अनन्त चतुर्दशी हरय। ए मउका म आज ले छोटे-छोटे भगवान गणेश के मूर्ति मन ल विजर्सन करे जात हे। भगत मन ह पूजापाठ करे के बाद भगवान गणपति ल बिदाई देवत हे। संगेसंग कई ठन पंडाल मन म भंडारा के कारीकरम करे जात हे। राजधानी रईपुर म उन्नीस सितंबर के भगवान गणेश के झांकी निकाले जाही।
मुख्यमंत्री विष्णुदेव साय ह राज्य के जनता मन ल अनंत चतुर्दशी के बधाई अउ सुभकामना दीन हे।
प्रसार भारती-हिन्दी दिवस
प्रसार भारती के अध्यक्ष नवनीत कुमार सगहल ह किहीन कि जम्मों भासा मनके सम्मान करत हिन्दी ल जादा बढ़ावा देना चाही। आज नई दिल्ली म प्रसार भारती सचिवालय म हिन्दी दिवस के संबंध म राखे गे एक ठन कारीकरम म श्री शहगल ह किहीन कि हिन्दी भासा ह बोले म सरल हे। संगेसंग ए भासा ल आसानी ले समझे जा सकथे।
उहें, प्रसार भारती के मुख्य कार्यकारी अधिकारी गौरव द्विवेदी ह कार्यालय मन म रोजमर्रा के काम म हिन्दी के परयोग करे म जोर दीन। ओमन किहीन कि जम्मों भारतीय भासा मन म हिन्दी के एक अलग पहिचान हे।
आकाशवाणी के महानिदेशक प्रज्ञा पालीवाल गौड़, दूरदर्शन के महानिदेशक कंचन प्रसाद अउ कई झन बड़का अधिकारी मन ह कारीकरम म सामिल होइन।
सुकमा हत्या-आरोपी गिरफ्तार
सुकमा जिला म एकेच परिवार के पांच झिन लोगन मन के हत्या के मामला म पुलिस ह अब तक एक माईलोगिन अउ सत्रह झिन आरोपी मन ल गिरफ्तार करे हे। पुलिस ह घटना म उपयोग करे गे लवड़ी ल घलो बरामद कर लेहे अउ जम्मों आरोपी मन ल गिरफ्तार करके न्यायालय म पेस कर दे गेहे। पुलिस टीम डहार ले ए मामला के जांच करे जात हे।
खबर के मुताबिक सुकमा जिला के कोंटा थाना क्षेत्र के एतकल गांव म पाछु पन्द्रह सितंबर के गांव वाले मन ह जादू-टोना के सक म पांच झिन लोगन मनके हत्या कर दे रिहीन।