प्रधानमंत्री नरेंद्र मोदी ह गांधी नगर के सेक्टर-एक मेट्रो स्टेसन ले अहमदाबाद मेट्रो के दूसरइया चरण ल झंडी देखाके रवाना करीन। एखरे संगेसंग श्री मोदी ह प्रधानमंत्री अहमदाबाद अउ भुज के बीच देस के पहिली वंदे भारत मेट्रो ट्रेन के सुभारंभ करीन। संगे-संग प्रधानमंत्री ह पीएम आवास ग्रामीण योजना के तहत तीस हजार ले जादा घर मन के स्वीकृति प्रदान कर एखर बर पहिली किस्त घलो जारी करीन।
कार्यक्रम के दौरान प्रधानमंत्री ह वीडियो कॉन्फ्रेंसिंग के माध्यम ले छत्तीसगढ़ के दुर्ग ले विशाखापट्नम के बीच चलइया दुर्ग-विशाखापट्नम वंदे भारत एक्सप्रेस ट्रेन ल घलो हरी झंडी देखाके रवाना करीन। ए ट्रेन बृहस्पत ल छोड़ के हफ्ता म छै दिन दूनो डहार ले चलाय जाही। ए ट्रेन के परिचालन बीस सितंबर ले नियमित रूप ले करे जाही। ए ट्रेन म सोला ठन कोच सामिल हे।
रायपुर म आयोजित कार्यक्रम म राज्यपाल रमेन डेका, केंद्रीय राज्यमंत्री तोखन साहू, सांसद बृजमोहन अग्रवाल अउ रेल मंडल प्रबंधक संजीव कुमार उपस्थित रिहीन।
रेलवे-अपील
रेलवे प्रशासन ह यात्री मन ले ट्रेन एंबुलेंस जइसन सुविधा बर टिकट बेचइया ठग मन ले सावधान रेहे के अपील करे हे। बतादन कि सालीमार पोरबंदर एक्सप्रेस म ट्रेन एंबुलेंस के सुविधा के नाम ले टिकट जारी कर यात्री मनले ठगी के मामला आगू आय हे। एला देखत हुए रेलवे प्रशासन ह स्पष्ट करे हे कि रेलवे ह अइसना यात्रा के अनुमति नइ देवय। फेर अइसना सुविधा दे के नाम म ठगी करइया मन सावधान रहाय।
स्वच्छता ही सेवा अभियान
देसभर म काली ले स्वच्छता ही सेवा अभियान सुरू होही। दू अक्टूबर तक चलइया ए अभियान के तहत पर्यटन स्थल, सार्वजनिक भवन, व्यवासायिक क्षेत्र, जलासय सामुदायिक अउ सार्वजनिक भवन के संगेसग अलग-अलग जघा मन म सामूहिक रूप ले श्रमदान कर साफ-सफाई करे जाही। एखरे संग ही अलग-अलग गतिविधि मनके संचालन घलो करे जाही। एमा आम लोगन मन के भागीदारी होही। ए बछर के बिसय ‘‘स्वभाव स्वच्छता-संस्कार स्वच्छता‘‘ राखे गेहे।
ऐति, छत्तीसगढ़ म घलो स्वच्छता ही सेवा अभियान के तहत काली कई ठन कार्यक्रम आयोजित करे जाही। जांजगीर-चांपा जिला के जांजगीर हाई स्कूल मैदान म स्वच्छता दौड़ अउ श्रमदान कार्यक्रम के आयोजन करे जाही।
उहें, राजनांदगांव जिला म ग्राम स्तर म स्वच्छता मैराथन के आयोजन करे जाही। संगेसंग स्वच्छता रैली घलो निकाले जाही। एखर बर ग्राम पंचायत के सचिव मन ल प्रसिक्षण दे गेहे।
मुख्यमंत्री-इन्वेटर्स मीट
मुख्यमंत्री विष्णुदेव साय ह आज गुजरात के गांधी नगर म आयोजित ग्लोबल रिन्यूएबल एनर्जी इन्वेटर्स मीट एण्ड एक्सपो म सामिल होइन। ए दौरान ओमन छत्तीसगढ़ राज्य के रिन्यूएबल एनर्जी के क्षेत्र म होय प्रगति के बारे म जानकारी दीन। ओमन किहीन कि प्रधानमंत्री नरेंद्र मोदी के संकल्प हे कि अवइया बछर दू हजार तीस तक देस म पांच सौ मेगावाट रिन्यूअल एनर्जी के उत्पादन होवय अउ ए क्षेत्र म छत्तीसगढ़ के घलो काफी योगदान रइही। मुख्यमंत्री ह किहीन कि प्रदेस म सोलर, हाईड्रल अउ बायो गैस के क्षेत्र म अच्छा काम होवत हे। श्री साय ह बतइन कि अभी छत्तीसगढ़ के कुल खपत पांच हजार पांच सौ मेगावाट हे, जेमा ले करीबन पंद्रह प्रतिसत रिन्यूअल एनर्जी उपर आधारित हे, जेला पैंतालीस प्रतिसत तक बढ़ाय के योजना हे।
विश्वकर्मा जयंती-श्रमिक सम्मेलन
विश्वकर्मा जयंती के अवसर म काली सत्रह सितंबर के रायपुर के इंदिरा गांधी कृषि विश्व विद्यालय म राज्य स्तरीय श्रमिक सम्मेलन के आयोजन करे जाही। ए मउका म मुख्यमंत्री विष्णुदेव साय संतावन हजार ले जादा पंजीकृत श्रमिक अउ ओखर परिवार ल उनचास करोड़ सैतालिस लाख रूपिया ले जादा के रासि डी.बी.टी. के माध्यम ले वितरित करही। कार्यक्रम के अध्यक्षता श्रम मंत्री लखनलाल देवांगन करही।
केंद्रीय मंत्री-चक्रधर समारोह
रायगढ़ के रामलीला मैदान म आयोजित चक्रधर समारोह म काली केंद्रीय सामाजिक न्याय अउ अधिकारिता राज्य मंत्री रामदास आठवले मुख्य अतिथि के रूप म सामिल होइन। समारोह ल संबोधित करत हुए ओमन किहीन कि संगीत के क्षेत्र म रायगढ़ के अलग पहिचान हे। रायगढ़ के नाम देसभर म फैलय एखर बर हम सब ल शास्त्रीय संगीत ल जीवित बनाय रखना हे। ओमन वर्तमान म बनत फिल्म अउ गीत संगीत के परवाह न करत हुए, शास्त्रीय संगीत ल जीवित रखे के दिसा म अइसन आयोजन मन ल महत्वपूर्ण बतइन।
बतादन कि सात सितंबर ले सुरू होय ए समारोह के आज संझा समापन होही। समापन समारोह म राज्यपाल रमेन डेका सामिल होही।
उहें, समापन अवसर म कवि सम्मेलन के आयोजन करे जाही। एमा कवि डॉक्टर कुमार विश्वास, डॉक्टर सुरेन्द्र दुबे, दिनेश बावरा, सुदीप भोला अउ साक्षी तिवारी कविता पाठ करही। अइसने, गुवाहाटी के मानसी दत्ता अउ संगी मन बीहू लोकनृत्य अउ बिलासपुर के अनिल कुमार गढ़ेवाल अउ संगी मन गेड़ी लोकनृत्य के प्रस्तुति दीही।
आरक्षक-गिरफ्तार
गौ-तस्करी के मामला म पाटन थाना म पदस्थ आरक्षक ल दुर्ग पुलिस ह गिरफ्तार कर लेहे। आरक्षक ल छापामार कार्रवाई के बात ल लीक करे जाय के मामला म गिरफ्तार करे गेहे। एसडीओपी आशीष बंछोर ह बतइन कि पुलिस ल नौ सितंबर के ग्राम फुण्डा म एक ठन फार्म हाउस ले चार पहिया वाहन म मवेसी मनके अवैध रूप ले परिवहन करे के सूचना मिले रिहीस। सूचना उपर पाटन पुलिस डहार ले फार्म हाउस म छापा मारे गीस। ए दौरान वाहन म तिरालीस ठन मवेसी पाय गीस। ए मामला म उत्तर प्रदेस के वाहन चालक ल गिरफ्तार कर ले गेहे, लेकिन फार्म हाउस संचालक फरार होगे हे। बाद म जांच के दौरान छापा मारे जाय के सूचना आरक्षक डिलेश्वर प्रसाद डहार ले लीक करे जाय के पुष्टि होय उपर ओला गिरफ्तार कर जेल भेज दे गेहे।
नकली पुलिस-गिरफ्तार
कोरबा पुलिस ह नकली पुलिस बन के बायपास मार्ग म लूटपाट करे के आरोप म पांच झन ल गिरफ्तार करे हे। आरोपी मन म एसईसीएल के चार झन अधिकारी अउ कर्मचारी सामिल हे।
पुलिस ह बतइन कि पाछू चौदह सितंबर के कटघोरा थाना क्षेत्र के ढेलवाडीह बायपास मार्ग म कुछ लोगन मन डहार ले खुद ल थाना प्रभारी अउ पुलिस बताके वाहन मन ल रोक के वसूली करे जाय के सूचना मिलिस। एखर उपर कटघोरा पुलिस के टीम ह मउका म पहुंच के पांच झन ल गिरफ्तार करीन। ए मामला म झारखंड निवासी ट्रक चालक के लिखित सिकायत उपर कार्रवाई करे गीस।
ईद-मिलाद-उन-नबी
इस्लाम धर्म के प्रवर्तक पैगम्बर हजरत मोहम्मद के जन्मदिवस ईद-मिलाद-उन-नबी आज छत्तीसगढ़ समेत देसभर म हर्षोल्लास के संग मनाय जात हे। राष्ट्रपति द्रौपदी मूर्मू, उप राष्ट्रपति जगदीप धनखड़, प्रधानमंत्री नरेंद्र मोदी अउ छत्तीसगढ़ के मुख्यमंत्री विष्णुदेव साय ह ईद-मिलाद-उन-नबी के उपलक्ष्य म देसवासी मन ल सुभकामना देहे।
ए मउका म रायपुर म मुस्लिम समाज ह जुलूसे मोहम्मदी निकालीन। सर्व आस्था मंच ह जयस्तंभ चौक म मंच बनाके ए जुलूस के आगवानी करीन। एखरे संगेसंग प्रदेस के कई ठन जघा म जुलूस निकाले गीस।
बस्तर दशहरा-डेरी गड़ाई रस्म
पचहत्तर दिन तक चलइया विश्व प्रसिध्द बस्तर दसहरा पर्व के तहत जगदलपुर के सिरहासार भवन म आज डेरी गड़ाई पूजा के रस्म विधि- विधान के संग संपन्न होइस। ए मउका म बस्तर दसहरा समिति के अध्यक्ष अउ सांसद महेश कश्यप, विधायक विनायक गोयल अउ जिला प्रशासन के वरिष्ठ अधिकारी मनके संग बस्तर दसहरा समिति के सदस्य मन उपस्थित रिहीन। डेरी गड़ाई विधान के बाद अब बस्तर दसहरा बर दू मंजिला रथ बनाय के काम सुरू हो जही।