सुकमा जिला के कोटा क्षेत्र के एतकल गांव म ग्रामीण मन ह जादू टोना के संका म एके परिवार के पांच झन के हत्या कर दीन। मृतक म तीन माईलोगिन अउ दू पुरूष सामिल हे। घटना के सूचना मिलत ही पुलिस अधीक्षक किरण चव्हान अउ अतिरिक्त पुलिस अधीक्षक निखिल राखेचा ह घटना स्थल म पहुंचिन। पुलिस ह ए घटना म सामिल पांच आरोपी मन ल गिरफ्तार करे हे।
सुनइया मन ल बतादन कि एखर ले पहिली भी जादू टोना के संका म बलौदाबाजार जिला म एके परिवार के चार झन के हत्या कर देगे रिहीस। ए मामला म पुलिस ह छै झन ल गिरफ्तार करे हे।
माओवादी शिनाख्त-शिक्षक हत्या
सुकमा जिला के चिंतागुफा थाना क्षेत्र म काली होय मुठभेड़ म मारेगे माओवादी ल चीन ले गेहे। मारेगे माओवादी माड़वी कोसा ह जगरगुंडा थाना क्षेत्र के रहइया बताय जावत हे, जेखर उपर पांच लाख रूपिया के इनाम रिहीस। ए माओवादी के तीर ले हथियार समेत अब्बड़ अकन माओवादी समान बरामद करे गेहे। ए माओवादी उपर पुलिस पार्टी उपर हमला करे, रद्दा खोदे के अउ बेनर पोस्टर लगाय समेत आने-आने घटना म सामिल रहय के आरोप रिहीस।
उहें, सुकमा जिला के जगरगुंडा थाना क्षेत्र म ही माओवादी मन जनअदालत लगाके एक झन शिक्षादूत के हत्या कर दीन। जिला के पुलिस अधीक्षक किरण चव्हाण ह ए घटना के पुष्टि करे हे। बताय जावत हे कि शिक्षादूत दुधी अर्जुन ह गोंदपल्ली गांव के रहइया रिहीस।
पीएम ग्रामीण आवास योजना-राशि
प्रधानमंत्री नरेंद्र मोदी ह आज वीडियो कॉन्फ्रेंसिंग के माध्यम ले पीएम ग्रामीण आवास योजना के लाभार्थी मन ल पहिली किस्त जारी करीन। एमा बत्तीस करोड़ रूपिया लाभार्थी मनके बैंक खाता म सीधा भेजे गीस। एखर अलावा बत्तीस हजार मकान के स्वीकृति पत्र घलो बांटे गीस। ए मउका म श्री मोदी ह किहीन कि अवइया पांच बछर म दू करोड़ अतकहा मकान बनाय जाही। ओमन किहीन कि पीएम आवास योजना ले जुड़े क्षेत्र म रोजगार के मउका म बढ़ोत्तरी होही।
दुर्ग-विशाखापट्नम वंदेभारत
दुरूग सांसद विजय बघेल ह दुरूग ले विशाखापट्नम के बीच चलइया वंदेभारत एक्सप्रेस ट्रेन के सुरू होय ले पहिली दुरूग स्टेसन पहुंच के ट्रेन के निरीक्षण करीन। ओमन आत्मनिर्भर भारत कारीकरम के बड़ई करीन अउ वंदेभारत ट्रेन के तकनीक ल घलो देखिन।
सुनइया मन ल बतादन कि प्रधानमंत्री नरेंद्र मोदी ह काली दुरूग ले विशाखापट्नम के बीच सुरू होवइया प्रदेस के दूसर वंदेभारत एक्सप्रेस ट्रेन ल वीडियो कॉन्फ्रेंसिंग ले हरियर झंडा देखाके रवाना करही। ए रेलगाड़ी ह रईपुर ले संझा चार बजके पंद्रा मिनट म रवाना होही अउ रतिहा बारह बजके बीस मिनट म विशाखापट्नम पहुंच जही। ए ट्रेन ह बिरस्पत के छोड़ हफ्ता म छै दिन चलही।
आज अभियंता दिवस हवय। ए दिन महान अभियंता सर एम. विश्वेश्वरैया के जयंती के बेरा म मनाय जाथे। ए मउका म प्रधानमंत्री नरेंद्र मोदी ह अभियांत्रिकी के क्षेत्र म योगदान बर सर एम. विश्वेश्वरैया ल सुरता करीन। सोसल मीडिया पोस्ट म ओमन किहीन कि देस ल आगू बढ़ाय म, नवाचार अउ चुनौती ले निपटे म अभियंता मनके योगदान बड़ई के लायक हे।
उहें, छत्तीसगढ़ के मुख्यमंत्री विष्णुदेव साय ह घलो सबो इंजीनियर मन ल अभियंता दिवस के बधई अउ सुभकामना दीन हे। ओमन किहीन कि कोनो भी देस अउ राज्य के निर्माण म इंजीनियर मनके बड़का भूमिका होथे। ओमन किहीन कि सर विश्वेश्वरैया के निष्ठा अउ समर्पण ह सबो झन बर प्रेरणादायक अउ अनुकरणीय हवय।
छत्तीसगढ़/मध्यप्रदेश-यात्री बस
छत्तीसगढ़ अउ मध्यप्रदेस के बीच यात्री मन के सुविधा बर नवा रद्दा ले चलइया बस के अवई-जवई बर दूनो राज्य के परिवहन विभाग के बीच सहमति बन गेहे। एखर बर भोपाल म एक बड़का बइठका होइस, जेमा परिवहन विभाग के अधिकारी मन भाग लीन। ए बइठका म छत्तीसगढ़ के चौतीस अउ मध्यप्रदेस के उन्नीस नवा रद्दा ल जोड़े जाय के सहमति बने हे।
विश्वकर्मा जयंती-श्रमिक सम्मेलन
विश्वकर्मा जयंती के मउका म सत्रह सितंबर रईपुर के इंदिरा गांधी कृषि विश्वविद्यालय म राज्य स्तरीय श्रमिक सम्मेलन के आयोजन करे जाही। ए मउका म मुख्यमंत्री विष्णुदेव साय संतावन हजार ले जादा पंजीकृत मजदूर अउ उंखर परिवार ल उनचास करोड़ तिरालीस लाख रूपिया ले जादा के धनरासि डीबीटी के माध्यम ले बांटही। कारीकरम के अध्यक्षता श्रम मंत्री लखनलाल देवांगन ह करही। ए कारीकरम म छत्तीसगढ़ भवन अउ आने सन्निर्माण कर्मकार कल्याण मंडल के श्रमिक अउ उंखर परिजन बर चलाय जावत तीस जन कल्याणकारी योजना के अंतर्गत सहायता रासि दे जाही।
मुख्यमंत्री-करमा तिहार
मुख्यमंत्री विष्णुदेव साय ह काली रईपुर म करमा तिहार कारीकरम म सामिल होइन। मुख्यमंत्री ह ए कारीकरम ल संबोधित करत हुए किहीन कि हमर संस्कृति हमर पुरखा मनके देन हवय। प्रगति के संगेसंग आदिवासी संस्कृति के संरक्षण ह घलो जरूरी हे। ओमन कंवर समाज के युवक मन कोति ले करमा तिहार मनाय जाय उपर खुसी जतइन। मुख्यमंत्री करमा तिहार कारीकरम म मांदर के थाप म झूमत घलो नजर आइन।
शैक्षणिक सत्र-अवकाश
लोक शिक्षण संचालनालय ह चालू शिक्षा सत्र बर राज्य के शैक्षणिक संस्थान मन म छुट्टी के सूची जारी कर देहे। आदेस अनुसार शैक्षणिक सत्र बर चौसठ दिन के छुट्टी घोसित करे गेहे। दसहरा के मउका म सात ले बारह अक्टूबर तक अउ देवारी बर अट्ठईस अक्टूबर ले दू नवंबर तक छुट्टी घोसित करे गेहे। उहें, जाड़ के मौसम म दे जाने वाले शीतकालीन अवकास ह तेईस ले अट्ठईस दिसंबर तक रइही अउ गरमी के छुट्टी ह एक मई ले पंद्रा जून तक घोसित करे गेहे।
अग्निवीर भर्ती-प्रशिक्षण
जांजगीर-चांपा जिला म अग्निवीर भर्ती प्रक्रिया म सामिल होवइया युवा मन ल पूर्व सैनिक मन कोति ले शारीरिक प्रसिक्षण दे जावत हे। एला लेके युवा मन म बड़ उछाह हे अउ एमा बड़ संख्या म युवा मन सामिल होवत हे। प्रसिक्षण लेवत युवा मन बर जिला प्रशासन कोति ले भोजन के व्यवस्था करे गेहे।
चक्रधर समारोह
रायगढ़ के रामलीला मैदान म चलत चक्रधर समारोह म काली कुचिपुड़ी नृत्य करइया मन गणपति अउ शिव वंदना के प्रस्तुति दीन। एमा ओमन रामलला के जीवन दर्सन अउ गणेश वंदना ल नाच के माध्यम ले प्रस्तुत करीन।
उहें, कोलकाता के पौशाली चटर्जी ह मणिपुरी नृत्य म राधा-कृष्ण के होली, कृष्ण अउ सखा मनके माखन चोरी ल मंच म जीवंत करीन। एखर बाद मुंबई के कृष्णभद्रा नम्बूदरी ह भरतनाट्यम अउ संगीता कापसे के टीम ह कत्थक के प्रस्तुति दीन। एखर अलावा विनोद मिश्रा ह शास्त्रीय गायन, आलोक श्रीवास ह कत्थक नृत्य, रायगढ़ के अनंता पांडेय, शाश्वती बनर्जी अउ तब्बू परवीन ह कत्थक नृत्य म शिव जी के उपासना अउ कृष्ण रासलीला ले दर्सक मनके मन मोह लीस।
अउ अब थोरकुन समाचार सार म –
– दूरदर्शन ह आज अपन स्थापना के पैंसठवां वर्षगांठ मनावत हे। देस म टीबी प्रसारण के सुरूआत पंद्रह सितंबर उन्नीस सौ उनसठ के दूरदर्सन ले ही होय रिहीस, तबके राष्ट्रपति डॉक्टर राजेन्द्र प्रसाद ह एखर पहिली प्रसारण के उद्घाटन करे रिहीन।
– आज ओणम तिहार मनाय जावत हे। ए मउका म राष्ट्रपति द्रौपदी मुर्मू, उपराष्ट्रपति जगदीप धनखड़ अउ प्रधानमंत्री नरेंद्र मोदी के संगेसंग छत्तीसगढ़ के मुख्यमंत्री विष्णुदेव साय ह मलयाली समाज के मनखे मन ल सुभकामना दीन हे।
– मुख्यमंत्री विष्णुदेव साय ह प्रदेसवासी मन ल भुवनेश्वरी जयंती के बधई अउ सुभकामना दीन हे। ए मउका म ओमन किहीन हे कि आदिसक्ति स्वरूपा मइया भुवनेश्वरी देवी ह दस महाविद्या म एक महाविद्या माने जाथे।
– सामान्य प्रशासन विभाग ह काली सोलह सितंबर के मिलाद-उन-नबी के मउका म राज्य म सामान्य अवकास अउ सत्रह सितंबर के अनंत चतुर्दसी अउ विश्वकर्मा जयंती म ऐच्छिक अवकास घोसित करे हे।
– बालोद जिला के बगदई गांव म डायरिया ले पंद्रा झन बीमार होगे हे। एमन ल गुरूर के सामुदायिक स्वास्थ्य केंद्र म भर्ती कराय गेहे।