छत्तीसगढ़ म एम.बी.बी.एस. के पढ़ई अब हिंदी म घलो होही। ए घोसना अभी ले कुछेक देर पहिली मुख्यमंत्री विष्णुदेव साय ह हिंदी दिवस के अवसर म रायपुर के पत्रकार मनले चर्चा करत हुए किहीन। ओमन किहीन कि राज्य सरकार ह प्रधानमंत्री नरेंद्र मोदी के मंसा के अनुरूप छत्तीसगढ़ म चिकित्सा सिक्षा ल हिंदी म घलो उपलब्ध कराय के निर्णय लेहे। श्री साय ह किहीन कि एखर सबले बड़का फायदा राज्य के ग्रामीण क्षेत्र म रहइया विद्यार्थी मन ल होही अउ ओमन अपन मातृभाषा म विसय के गहराई ल समझ पाही।
एक ठन प्रश्न के उत्तर म मुख्यमंत्री ह किहीन कि हिंदी म एम.बी.बी.एस. के पढ़ई के सुविधा ऐच्छिक होही। विद्यार्थी एम.बी.बी.एस. के पढ़ाई बर अंग्रेजी या हिंदी भाषा म से कोनो भी भाषा ल चुन सकही।
छत्तीसगढ़ समेत देसभर म आज हिंदी दिवस मनाय जात हे। चौदह सितंबर उन्नीस सौ उनचास के संविधान सभा ह हिंदी भाखा ल देस के आधिकारिक भाखा के रूप म अपनाय रिहीस।
प्रधानमंत्री नरेंद्र मोदी, केंद्रीय गृहमंत्री अमित शाह अउ मुख्यमंत्री विष्णुदेव साय ह हिंदी दिवस के अवसर म सबो देसवासी मन ल सुभकामना दीन। श्री मोदी ह हिंदी भाखा के महत्व के बारे म एक ठन वीडियो साझा करीन। उहें, केंद्रीय गृहमंत्री ह वीडियो संदेस म किहीन कि हिंदी दिवस के पचहत्तर बछर पूरा होवत हे अउ ए उपलब्धि राजभाखा के रूप म हिंदी के हीरक जयंती के रूप म मनाय जात हे। गृहमंत्री ह किहीन कि राजभाखा विभाग जल्दी ही िंहंदी ले आठवी अनुसूची म सामिल सबो भाखा मन ल अनुवाद करे बर एक ठन पोर्टल के सुभारंभ करही। ए पहल के अंतर्गत पत्र या भाषण मनके बहुत कम समय म आर्टिफिसियल इंटेलिजेंस के माध्यम ले सबो भाषा म अनुवाद हो जही। ओमन देस के नागरिक मन ले हिंदी अउ क्षेत्रीय भाषा मन ल मजबूत करे बर एकजुट होय के अपील करीन।
ओति, केंद्रीय गृहमंत्री अमित शाह ह नवा दिल्ली म राजभाषा हीरक जयंती समारोह अउ चौथा अखिल भारतीय राजभाषा सम्मेलन म सामिल होइन। ओमन उद्घाटन सत्र ल संबोधित करत हुए किहीन कि सबो भाषा मन ल मजबूत करे ले ही एक मजबूत राष्ट्र के निर्माण होही। ओमन किहीन कि राष्ट्रीय शिक्षानीति म ए बात उपर विसेस जोर दे गेहे कि लइका मन ल ओखर मातृभाषा म ही शिक्षा मिलय।
उहें, मुख्यमंत्री श्री साय ह किहीन कि राजभाषा हिंदी राष्ट्रीय एकता अउ सद्भावना ल बनाय राखे म महत्वपूर्ण भूमिका निभावत हे। हिंदी के सहज-सरल होय के सेति ए ह देस ल एकसूत्र म बांधे म अहम भूमिका निभावत हे।
ऐति, छत्तीसगढ़ म घलो हिंदी दिवस के अवसर म स्कूल, कॉलेज समेत अलग-अलग संस्थान मन म परिचर्चा, गोष्ठी, सेमिनार अउ कार्यसाला जइसे कार्यक्रम आयोजित करे जात हे।
‘‘स्वच्छता ही सेवा‘‘ अभियान
प्रदेस के सबो नगरीय निकाय मन म आज ले ‘‘स्वच्छता ही सेवा‘‘ पखवाड़ा सुरू होगे हे। ए दौरान नगरीय निकाय मन म ‘‘स्वभाव स्वच्छता-संस्कार स्वच्छता‘‘ के थीम उपर अलग-अलग गतिविधि मन ल संचालित करे जात हे। ए संबंध म नगरीय प्रशासन विभाग ह सबो नगरीय निकाय मन ल परिपत्र जारी कर ‘‘स्वच्छता ही सेवा‘‘ अभियान के आयोजन के निरदेस देहे।
नगरीय निकाय मन म स्वच्छता पखवाड़ा के दौरान श्रमदान के माध्यम ले वृहद स्तर म स्वच्छता अभियान अउ स्वच्छ भारत कल्चर फैस्ट के आयोजन करे जात हे। संगेसंग स्वच्छता लक्षित इकाई मनके चिन्हांकन कर पोर्टल म मैपिंग करत हुए गंदा जघा मनके सफाई करे जात हे।
ए अभियान आगामी एक अक्टूबर तक चलही।
राज्यपाल-वृध्दा आश्रम
राज्यपाल रमेन डेका ह काली रायपुर के माना कैंप स्थित राज्य सरकार डहार ले संचालित नवा वृध्दाआश्रम के अवलोकन करीन। ए दौरान राज्यपाल ह आश्रम म रहइया सियान मनले गोठबात कर उंखर हालचाल जानिन। ए मउका म श्री डेका ह सियान मन ले किहीन कि समाज के वर्तमान परिदृश्य आधुनिक सभ्यता के देन आय। रोजगार बर लइका मन अपन माता-पिता ले दूर रहिथे, जेखर ले सियान मन अकेला हो जथे अउ जीवन-यापन म मुश्किल के सामना करथे। ओमन किहीन कि आश्रम म रहइया सियान मन अपन हौसला बनाय राखय अउ आनंद के संग जीवन गुजारय। ए अवसर म ओमन कंबल, फल अउ मिठाई के वितरण घलो करीन।
उहें, राज्यपाल ह माना कैंप म ही स्थित एसओएस बालिका गृह पहुंचिन अउ उंहा रहइया बालिका मनले मुलाकात कर हालचाल पुछिन। ए बालिका गृह म अनाथ अउ एकल अभिभावक वाले बालिका जेखर उमर अट्ठारा बछर तक हे, इंहा निवास करत हे।
साय-आभार
केंद्र सरकार ह किसान मन ल उंखर उपज के बेहतर मूल्य देवाय बर बासमती चांवल ले न्यूनतम निर्यात सुल्क हटाय के संगेसंग खाद्य तेल के आयात सुल्क म बढ़ोत्तरी अउ प्याज के निर्यात सुल्क म कमी करे के निर्णय ले हे। मुख्यमंत्री विष्णुदेव साय ह ए निर्णय के स्वागत करत हुए किहीन कि एखर फायदा छत्तीसगढ़ के किसान मन ल घलो मिलही। ओमन ए निर्णय बर प्रधानमंत्री नरेंद्र मोदी के आभार व्यक्त करे हे।
मुख्यमंत्री ह किहीन हे कि केंद्र सरकार के ए निर्णय ले निश्चित रूप ले सोयाबीन, बासमती, प्याज, सरसो, सूरजमुखी अउ मूंगफली के उत्पादक किसान मनके आय म वृध्दि होही।
अरूण साव-अमेरिका प्रवास
उपमुख्यमंत्री अरूण साव अपन अमेरिका प्रवास के दौरान काली वाशिंगटन म सड़क अउ भवन निर्माण स्थल के दउरा कर काम मनके जायजा लीन। ए दौरान ओमन निवास स्थल म आर्किटेक्ट अउ इंजीनियर मन ले चर्चा कर सड़क अउ भवन निर्माण म प्रयुक्त होवइया सामग्री, धातु अउ मसीनरी के जानकारी लीन।
आईपीएस-तबादला
राज्य सरकार ह भारतीय पुलिस सेवा के दू झन अधिकारी मन ल तबादला आदेस जारी करे हे। जारी आदेस के अनुसार भोजराम पटेल ल मुंगेली जिला के नवा पुलिस अधीक्षक बनाय गेहे। उहें, मुंगेली के पुलिस अधीक्षक गिरिजा शंकर जायसवाल ल पुलिस मुख्यालय म उप पुलिस महानिरीक्षक के पद म पदस्थ करे गेहे।
माओवादी मुठभेड़
सुकमा जिला म आज सुरक्षाबल अउ माओवादी मनके बीच होय मुठभेड़ म एक झन माओवादी मारे गीस। घटना स्थल ले हथियार अउ भारी मात्रा म माओवादी सामग्री बरामद करे गेहे।
मिले जानकारी के अनुसार चिंतागुफा थाना क्षेत्र ले जिला पुलिस बल, डिस्ट्रिक्ट रिजर्व गार्ड-डीआरजी अउ बस्तर फाइटर्स के संयुक्त टीम तलासी अभियान बर निकले रिहीन, इही दौरान तुमालपाड़ के जंगल म घात लगाय बैठे माओवादी मन ह सुरक्षाबल उपर फायरिंग सुरू कर दीस। जवाबी कार्रवाई म एक झन माओवादी मारे गीस।
विश्वकर्मा-जयंती
अवइया सत्रह सितंबर के विश्वकर्मा जयंती आय। ए अवसर म राजधानी रायपुर के बलबीर सिंह जुनेजा इंडोर स्टेडियम म प्रदेस स्तरीय श्रमिक सम्मेलन के आयोजन करे जाही।
ए मउका म संतावन हजार ले जादा पंजीकृत श्रमिक अउ ओखर परिवार के सदस्य मन ल अलग-अलग योजना के तहत करीब उनचास करोड़ चवालीस लाख रूपिया केंद्रीयकृत डीबीटी के माध्यम ले वितरित करही।
हल्बी/गोण्डी-समाचार बुलेटिन
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके 5 मिनट ले छै बजके 10 मिनट तक करे जाही। ए कारीकरम ल प्रदेस के जम्मों आकाशवाणी केंद्र मन ह एके संघरा रिले करही। ए बखत के अंक म ‘‘सक्ती‘‘ जिला के गतिविधि मन के बारे म जानकारी दे जाही।