मुख्यमंत्री विष्णुदेव साय ह राजधानी रईपुर म कलेक्टर-एसपी कॉन्फ्रेंस के दूसर दिन प्रदेस म कानून व्यवस्था के समीक्षा करीन। ए मउका म मुख्यमंत्री ह किहीन कि प्रदेस म अपराध के नियंत्रण बर कलेक्टर अउ पुलिस अधीक्षक आपसी समन्वय ले काम करय। ओमन किहीन कि अपराधी मनके मन म कानून के डर हो अउ पीड़ित मन ल तुरते न्याय मिलय। आम जनता म पुलिस प्रशासन के प्रति विस्वास बने रहय अउ बिना मतलब कोनो नागरिक ल परेसान झन करे जाय।
मुख्यमंत्री ह किहीन कि राज्य म नवा तरीका ले सोसल पुलिसिंग ल बढ़ावा दे जाय के जरूरत हे, एखर ले अपराध रोके म मदद मिलही। ओमन किहीन कि राज्य म गौ-तस्करी अउ नसाखोरी एक बड़का समस्या हे। अइसन मामला मन उपर कड़ा कार्रवाई करे जाय। ओमन किहीन कि अवैध सराब के परिवहन अउ बिक्री, जुआ सट्टा अउ गांजा के तस्करी रोके बर अभियान चलाके दोसी मन उपर कार्रवाही सुनिश्चित करय। मुख्यमंत्री ह किहीन कि अवैध सराब बिक्री पूरा बंद होना चाही। ओमन किहीन कि किसान सम्मान निधि म धोखाधड़ी के मामला घलो आगू आत हे, जेखर उपर तुरते कार्रवाई करे जाय।
मुख्यमंत्री ह बिलासपुर पुलिस रेंज म अपराध के कमी के सराहना करीन। त उहें, दुरूग पुलिस के कार्यप्रणाली ल लेके नाराजगी जतइन। मुख्यमंत्री रईपुर म भू-माफिया मन कोति ले सरकारी अउ आम नागरिक मन के जमीन उपर कब्जा के सिकायत उपर चिंता जतइन।
राज्यपाल-सैनिक कल्याण बोर्ड
राज्यपाल रमेन डेका ह सैनिक कल्याण बोर्ड के अधिकारी मन ले सहीद मनके परिवार वाला अउ भूतपूर्व सैनिक मनके कल्याण बर चलाय जात योजना के बेहतर क्रियान्वयन के निरदेस दीन हे। राजभवन म आज राज्यपाल ह छत्तीसगढ़ सैनिक कल्याण बोर्ड के गतिविधि मनके जानकारी लीन। सैनिक कल्याण संचालनालय के संचालक ब्रिगेडियर विवेक शर्मा ह प्रेजेंटेशन के माध्यम ले केंद्र अउ राज्य सरकार डहार ले भूतपूर्व सैनिक अउ परिजन मनके कल्याण बर संचालित योजना के विस्तृत जानकारी दीन।
राज्यपाल ह किहीन कि सैनिक कल्याण योजना, सैनिक अउ उंखर परिवार मन बर सुरक्षा, सम्मान अउ सहायता सुनिश्चित करे के उद्देस्य ले बनाय गेहे, ताकि देस के सेवा के बाद पूर्व सैनिक अउ ओखर परिवार सम्मान पूर्वक जीवन जी सकय। एखर बर ए योजना मनके संचालन बने रूप ले करे जाय।
प्रधानमंत्री आवास योजना-ग्रामीण
प्रधानमंत्री आवास योजना ग्रामीण के तहत प्रदेस के वित्त विभाग ह पहिली किस्त बर करीबन दू हजार पांच सौ चौरासी करोड़ रूपिया पंचायत विभाग ल जारी कर देहे। केंद्र सरकार ले आठ लाख छियालिस हजार नौ सौ इकतीस आवास के मंजूरी मिले हे। एखर बर केंद्र सरकार ह लगभग एक हजार पांच सौ पचास करोड़ रूपिया के रासि हितग्राही मन बर जारी करे हे। जेमा ल राज्यांश के रूप म लगभग एक हजार चौतीस करोड़ रूपिया सामिल हे। ए रासि हितग्राही मन ल पहिली किस्त के रूप म पंद्रह सितंबर के उंखर खाता म सीधा ट्रांसफर करे जाही।
खाद्य पदार्थ-निर्देश
भारतीय खाद्य सुरक्षा अउ मानक प्राधिकरण ह जम्मो राज्य अउ केंद्र शासित प्रदेस ल तिहार के दौरान मिलावटी मिठाई अउ दुग्ध उत्पाद बनाय अउ बेचे वाला मन उपर कड़ा नजर राखे के निरदेस दीन। प्राधिकरण ह अपन आदेस म किहीन हे कि ए गतिविधि मन उपर नजर रखे बर बेरा-बेरा म जांच घलो करना चाही। प्राधिकरण ह सुझाव दीन कि जिहां खाद्य उत्पाद के गुणवत्ता अउ सुरक्षा बर फूड सेफ्टी ऑन व्हील्स जइसन वैन मौजूद हे, ओमन ल प्रमुख बाजार अउ दूसर सार्वजनिक जघा मन म तैनात करे जाना चाही।
बातों-बातों में
आकाशवाणी रायपुर के प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ म ए बखत राष्ट्रीय पोषण माह उपर महिला अउ बाल विकास विभाग के संयुक्त संचालक दिलदार सिंह मरावी ले लेगे भेंटवार्ता प्रसारित करे जाही। ए कारीकरम आकाशवाणी केन्द्र रायपुर ले काली चौदह सितंबर के बिहनिया साढ़े दस बजे ले प्रसारित होही। एला छत्तीसगढ़ स्थित आकाशवाणी के जम्मो केन्द्र रिले करही।
केंद्रीय राज्यमंत्री-चक्रधर समारोह
केंद्रीय राज्य मंत्री तोखन साहू ह किहीन हे कि रायगढ़ म आयोजित चक्रधर समारोह अब छत्तीसगढ़ के पहिचान बन गेहे। ए हमर सांस्कृतिक धरोहर ल नवा पीढ़ी तक पहुंचाय के एक ठिन माध्यम घलो हरय। ए महोत्सव ह कला अउ संस्कृति ल पुनर्जीवित करे म महत्वपूर्ण भूमिका निभाय हे। श्री साहू ह किहीन कि चक्रधर समारोह म खेल अउ खिलाड़ी मन ल घलो प्रोत्साहित करे जात हे।
बतादन कि चक्रधर समारोह सोलह सितंबर तक चलही। एमा प्रसिध्द कलाकार मन कोति ले कला, संगीत अउ सांस्कृतिक कारीकरम प्रस्तुत करे जात हे।
स्टार्टअप-अनुबंध
प्रदेस म स्टार्टअप ल बढ़ावा देबर सुभाषचंद्र बोस बायो टेक्नोलॉजी इंक्युबेशन सेंटर अउ राष्ट्रीय प्रौद्योगिकीय संस्थान एनआईटी रईपुर के बीच अनुबंध करे गेहे। एनआईटी रईपुर म राखेगे एक ठिन कारीकरम म दूनो संस्थान के प्रमुख डॉक्टर एन.वी.रमना राव अउ डॉक्टर गिरीश चंदेल ह अनुबंध पत्र म हस्ताक्षर करीन। एमओयू के तहत एनआईटी के टीम सुभाषचंद्र बोस बायोटेक्नोलॉजी इंक्युबेशन सेंटर के स्टार्टअप ल तकनीकी सहयोग करही। संघरा दूनो इंक्युबेशन सेंटर नवाचार उद्यमिता अउ इंक्युबेशन के क्षेत्र म सहयोग ल बढ़ावा दे खातिर जानकारी के लेवई-देवई घलो करही।
उपमुख्यमंत्री-अमेरिका
छत्तीसगढ़ के उप मुख्यमंत्री अरूण साव ह अमेरिका के अपन अध्ययन प्रवास के दौरान काली न्यूयार्क म संयुक्त राष्ट्र संघ के मुख्यालय घूमिन। ओमन संयुक्त राष्ट्रसंघ के सामान्य सभा कक्ष, सुरक्षा समिति कक्ष समेत दूसर जघा मनके भ्रमण करके संघ के कार्यप्रणाली ल समझिन। अध्ययन दउरा म संगे म गे लोक निर्माण विभाग के सचिव डॉक्टर कमलप्रीत िंसंह घलो ओखर करा मौजूद रिहीन।
उप मुख्यमंत्री श्री साव न्यूजर्सी म राखेगे एक ठिन कारीकरम म घलो सामिल होइन। ओमन ए कारीकरम म देस के विकास बर करे जात काम के संघरा छत्तीसगढ़ के संस्कृति, पर्यटन, पौराणिक मान्यता अउ संसाधन मनके बारे म घलो गोठयाइन।
स्वच्छता अभियान-वेब पोर्टल
केंद्रीय मंत्री जितेंद्र सिंह ह विसेस स्वच्छता अभियान के प्रगति के निगरानी बर समर्पित वेब पोर्टल लॉन्च करीन हे। ए विसेस अभियान के उद्देस्य केंद्र सरकार के जम्मो कार्यालय मन म स्वच्छता अभियान चलाना हे। सरकार ह हरेक साल दू ले इकतीस अक्टूबर तक स्वच्छता अभियान चलाय के निर्णय लीन हे।
बलौदाबाजार-हत्या
बलौदाबाजार जिला के कसडोल स्थित छरछेद गांव म काली एके परिवार के चार मनखे मनके हत्या कर दे गेहे। पुलिस के मुताबिक पहिली देखव म आरोपी मन जादू-टोना के सक म दू महिला, एक पुरूष अउ एक नवजात लइका के हत्या करे हे। पुलिस ह संदेह के आधार म तीन आरोपी मन ल गिरफ्तार करे हे। कसडोल पुलिस घटना के जांच करत हे।
एसीबी-गिरफ्तार
एंटी करप्शन ब्यूरो-एसीबी के टीम ह काली पांच झिन कर्मचारी मन ल रिस्वत लेवत गिरफ्तार करे हे। एसीबी के टीम ह महासमुंद जिला के सरायपाली म पदस्थ उप पंजीयक लिली पुष्पलता बैग ल छब्बीस हजार रूपिया के रिस्वत लेत गिरफ्तार करीस। उहें, रायगढ़ के खम्हार शासकीय साला के लिपिक ल पच्चीस हजार रूपिया रिस्वत लेवत रंगेहाथ पकड़िस। एक ठिन दूसर कार्रवाई म एसीबी ह गौरेला-पेण्ड्रा-मरवाही जिला के पेण्ड्रा जनपद पंचायत के लोकपाल ल पच्चीस हजार रूपिया अउ कबीरधाम के बोडला म जनपद पंचायत के सहायक लेखाधिकारी ल एक लाख रूपिया के रिस्वत लेवत पकड़े हे।
मौसम विभाग के अनुसार सोलह, सत्रह अउ अट्ठारा सितंबर के प्रदेस म बरसा के गतिविधि बाढ़े के संकेत हे। उहें, काली एक-दू जघा म गरज-चमक के संग भारी बरसा होय अउ गाज गिर के चेतावनी दे गेहे। भारी बारिस के क्षेत्र मुख्यतः दक्षिण छत्तीसगढ़ रइही। एखरे संग कुछेक जघा मन म हल्का ले मध्यम बरसा होय या गरज-चमक के संग छींटा पड़े के संभावना हे।