मुख्यमंत्री विष्णदेव साय ह आज रईपुर म राज्य के आने-आने जिला के कलेक्टर मन संग योजना अउ कारीकरम मनके समीक्षा करत हे। ए कलेक्टर कॉन्फ्रेंस दू दिन तक चलही। ए मउका म मुख्यमंत्री ह किहीन कि सासन के योजना मन म पूरा पारदर्सिता के साथ काम करे जाय अउ एखर फायदा समाज के आखिरी मनखे तक पहुंचय। श्री साय ह कुछेक जिला म आम जनता अउ स्कूली लइका मन ले सासकीय अधिकारी मन डहार ले करे गे खराब व्यवहार उपर नाराजगी जतईन। ओमन किहीन कि अधिकारी मन ह पूरा सहानुभूति के संग आम लोगन के समस्या ल सुनय अउ ओखर जल्दी ले जल्दी निपटारा करय। मुख्यमंत्री ह कलेक्टर मन ले किहीन कि स्थानीय स्तर म समस्या के निपटारा करे जाय, जेखर ले लोगन ल भटके बर झन पड़य। मुख्यमंत्री ह सारंगढ़, बस्तर अउ खैरागढ़ म राजस्व मामला के धीमागति म नाराजगी जतइन। ओमन ह राजस्व ले जुड़े काम जइसे- नामांतरण, सीमांकन आदि ल देगे बेरा म पूरा करे के निरदेस दीन। मनरेगा के तहत बस्तर म मानव दिवस के सृजन कम होय म मुख्यमंत्री ह नाराजगी जतइन।
श्री साय ह प्रधानमंत्री आवास योजना म मकान बनाय के काम म तेजी लाय बर किहीन। ओमन बतईन कि पन्द्रह सितंबर के प्रधानमंत्री नरेन्द्र मोदी ह पीएम आवास योजना के पहला किश्त जारी करही। मुख्यमंत्री ह स्वास्थ्य योजना मनके स्थिति के समीक्षा करत गरियाबंद जिला के सुपेबेड़ा म किडनी के बीमारी ल रोके बर कदम उठाय के अउ जरूरी होय म दिल्ली ले बिसेसज्ञ बुलाके मदद ले जाय के बात किहीन।
कलेक्टर कॉन्फ्रेंस-02
मुख्यमंत्री ह प्रधानमंत्री विश्वकर्मा कौसल विकास योजना के समीक्षा करत खैरागढ़, सारंगढ़, सक्ति अउ रायगढ़ जिला म ए योजना म कोनो प्रगति नइ होय म कड़ा नाराजगी जाहिर करीन।
स्वास्थ्य विभाग के समीक्षा के दौरान मुख्यमंत्री ह आयुष्मान पंजीयन के काम ल सबो जिला म अवइया छै महिना के भीतर सत-प्रतिसत पूरा करे के निरदेस दीन। संगेसंग जउन पीएम जनऔषधि केंद्र अभी चलत नइ हे, ओमन ल जल्दीच सुरू करे बर अउ हर जिला म डायलिसिस के सुविधा देवाय बर निरदेस दीन।
शिक्षा विभाग के समीक्षा के दौरान मुख्यमंत्री ह सुकमा अउ बलरामपुर जिला म साइकिल वितरण नइ होय म नाराजगी जतइन। ओमन किहीन कि अइसन लापरवाही बर्दास्त नइ करे जाही। श्री साय ह किहीन कि सत्र सुरू होते साठ साइकिल वितरण हो जाना चाही।
जर्जर स्कूल के हालत उपर चिंता जतावत मुख्यमंत्री ह निर्माण काम म खराबी के जांच करके संबंधित ठेकेदार मनके खिलाफ कड़ा कार्रवाई करे के निरदेस दीन हे। मुख्यमंत्री ह समाज कल्याण विभाग के काम के समीक्षा के दौरान दिव्यांग मन बर बिसेस स्कूल अउ अस्पताल के बारे म अवइया छै महिना म योजना तियार करे के निरदेस दीन हे।
केंद्रीय मंत्रिमंडल-मंजूरी
प्रधानमंत्री नरेन्द्र मोदी के अध्यक्षता म काली केंद्रीय मंत्रिमंडल के बइठका म कतकोन बड़े फइसला ले गीस। ऐमा सत्तर बछर अउ उंखर ले जादा उमर के सब्बां वरिष्ठ नागरिक मन ल आयुष्मान भारत प्रधानमंत्री जन.आरोग्य योजना म सामिल करनाए प्रधानमंत्री ग्राम सड़क योजना के चौथा चरण ल मंजूरी देना ए मौसम मिशन योजना अउ अड़तीस हजार ले जादा इलेक्ट्रिक बस ल संचालित करना जइसन योजना सामिल हे। केंद्रीय सूचना अउ प्रसारण मंत्री अश्विनी वैष्णव ह बतइन कि आयुष्मान भारत प्रधानमंत्री जन-आरोग्य योजना म वरिष्ठ नागरिक मन ल पांच लाख रूपिया तक के निःसुल्क इलाज के सुविधा मिलही।
बइठका म मौसम अउ जलवायु संबंधी जानकारी बर केंद्रीय मंत्रिमंडल ह मिशन मौसम योजना ल मंजूरी दीस।
राज्यपाल-स्काउट गाइड
राज्यपाल रमेन डेका ल आज राजभवन म छत्तीसगढ़ स्काउट गाइड डहार ले मुख्य संरक्षक अलंकरण बैज लगाके सम्मानित करे गीस। राज्यपाल ल संस्था के पदाधिकारी मन ह भारत स्काउट गाइड के राष्ट्रीय मुख्यालय ले मिले बैज ल पहनईन अउ स्मृति चिन्ह भेंट करीन। राजभवन म राखे गे ए कारीकरम म राज्यपाल ह किहीन कि स्काउट गाइड के समाज के बड़े भूमिका हे। ओमन किहीन कि जादा ले जादा लइका मन ल स्काउट-गाइड ले जुड़ना चाही, जेखर ले ओमन म अनुशासन अउ देशभक्ति के भावना ल बढ़ावा मिलही।
ओडिसा म बने हीराकुंड बांध के डूबान क्षेत्र म अवइया छत्तीसगढ़ के गांव मन ल बाढ़ ले बचाय खातिर मुख्यमंत्री विष्णुदेव साय ह ओडिसा के मुख्यमंत्री मोहन चरण मांझी ले चर्चा करीन हे, ओमन ह ओडिसा के मुख्यमंत्री ले हीराकुंड बांध ले पानी छोड़े के अनुरोध करीन। जेखर ले रायगढ़ जिला के गांव म बाढ़ के आसंका झन रहय। एखर बाद ओडिसा के मुख्यमंत्री ह तुरते अधिकारी मन ल हीराकुंड बांध ले पानी छोड़े के निरदेस दीन हे।
मुख्यमंत्री-बस्तर दशहरा
पचहत्तर दिन तक चलइया ऐतिहासिक बस्तर दशहरा पर्व के आयोजन के संबंध म मुख्यमंत्री विष्णुदेव साय ह काली रईपुर म समीक्षा बइठका लीन। ए दउरान ओमन किहीन कि बस्तर दशहरा पर्व के गरिमा के अनुसार कारीकरम कराय जाय। बइठका के दउरान मुख्यमंत्री ल बस्तर दशहरा समिति के सदस्य मन ह बतईन कि पर्व के दउरान पन्द्रह अक्टूबर के मुरिया दरबार लगाय जाही। उहें, बस्तर दशहरा ल भव्य रूप दे जाय बर बस्तर मड़ई, सोशल मीडिया इन्फ्लुएंसर्स मीट, एक पेड़ बस्तर के देवी-देवताओं के नाम, बस्तर टूरिस्ट सर्किट, दसरा-पसरा, नगरगुड़ी टेंट सिटी, टूरिज्म ट्रेवलर्स ऑपरेटर मीट, देव सराय अउ स्वच्छता पखवाड़ा जइसन आने-आने कारीकरम कराय जाही। बइठका म बस्तर दशहरा पर्व के दउरान लोगन के सुविधा ल ध्यान म राखत बिसेस यात्री बस चलाय के बारे म घलो चर्चा करे गीस।
प्रधानमंत्री-आवास प्लस एप्लीकेशन
उप मुख्यमंत्री विजय शर्मा ह बतइन कि अवइया पंद्रह सितंबर के प्रधानमंत्री नरेंद्र मोदी ह ‘‘आवास प्लस‘‘ एप्लीकेसन के सुरूआत करही। ए मउका म प्रधानमंत्री ह रईपुर के इंडोर स्टेडियम म राखेगे कारीकरम म वर्चुअल रूप म जुड़ के करीबन साढे़ पांच लाख पात्र नागरिक मनके खाता म प्रधानमंत्री आवास योजना के पहिली किस्त जारी करही। ए कारीकरम ल मुख्यमंत्री विष्णुदेव साय घलो संबोधित करही। श्री शर्मा ह बतइन कि आवास प्लस सूची म ए निश्चित करे जा सकही कि जउन पात्र मन अभी तक छूटे हे, उंखर मन के नाव पंद्रह सितंबर के बाद जोड़े जा सकही। उप मुख्यमंत्री ह पात्रता के नवा नियम के जानकारी घलो दीन। ओमन बतइन कि प्रदेस म भाजपा के सरकार बने के बाद करीबन दू लाख नवा प्रधानमंत्री आवास के निर्माण पूरा होगे हवय, जिखर गृह प्रवेस घलो पंद्रह सितंबर के कराय जाही। अवइया एक-दू महिना म बांकी बचे करीबन साढ़े नौ लाख नागरिक मन ल घलो प्रधानमंत्री आवास योजना के किस्त दे जाही।
पुलिस विभाग-भर्ती प्रक्रिया
राज्य म आने-ओन विभाग म खाली पद मन म भर्ती प्रक्रिया सुरू होगे हवय। पुलिस विभाग म खाली पद म भर्ती बर वित्त विभाग डहार ले तीन सौ इकचालीस पद के मंजूरी मिले हे, जेमा सबले जादा दू सौ अठहत्तर पद सब इंस्पेक्टर के हवय। उहें, उन्नीस पद सूबेदार के, ग्यारा पद उपनिरीक्षक विसेस साखा के अउ चौदह प्लाटून कमांडर संघरा आने-आने विभाग म उन्नीस ठन पद म उप निरीक्षक के भर्ती करे जाही।
चिकित्सा अधिकारी-वेतन वृध्दि
स्वास्थ्य विभाग ह प्रदेस के शासकीय चिकित्सा महाविद्यालय के सीनियर रेसीडेंट अउ प्रदर्सक, सहायक प्राध्यापक, सह प्राध्यापक अउ प्राध्यापक के वेतन म बढ़ोत्तरी के आदेस जारी करीन हे। ए आदेस ए सितंबर ले राज्य के शासकीय मेडिकल कालेज बर प्रभावी होही। उहें, शासकीय चिकित्सा महाविद्यालय के संविदा चिकित्सक मनके वेतन म घलो बढ़ोत्तरी करे गेहे।
आज रईपुर के भाजपा प्रदेस कार्यालय म भाजपा सदस्यता अभियान समिति के बइठका होइस, जेमा क्षेत्रीय संगठन मंत्री अजय जामवाल ह किहीन कि संगठन के मजबूती अउ नवीनता बर जादा ले जादा सदस्य बनाय के प्रण लेना होही। ए भाजपा संगठन के महापर्व हे, जेमा सबके सहभागिता जरूरी हे। ओमन किहीन कि केंद्रीय संगठन ह जउन लक्ष्य राज्य बर तय करे हे ओला पूरा करे बर सबो झन ल समाज के आखिरी मनखे तक पहुंच के सदस्यता अभियान ल बढ़ाना होही।