पाछु दू दिन ले छत्तीसगढ़ के कई ठिन जिला मन म झमाझम बरसा होवत हे। बीजापुर जिला म होवत सरलग बरसा ले जनजीवन अस्त-व्यस्त होगे हे। भोपालपट्टनम के मट्टीमरका गांव जाय के रद्दा म पानी सड़क के उपर ले बोहावत हे, जेखर सेती ए रद्दा म अवई-जवई बंद होगे हे। उहें, इंद्रावती नंदियां के जलस्तर घलो सरलग बाढ़त हे, जेखर ले तिमेड, वोडागुडा, भटपल्ली, चंदनगिरी, लिंगापुर, गंगाराम, रामपुरम, बामनपुर, अर्जुनपल्ली, अटुकपल्ली, कोंडामौसम, चंदूर अउ तारलागुडा समेत कई ठिन गांव म बाढ़ के खतरा बने हवय। कलेक्टर संबित मिश्रा ह लोगन मन ल सावधानी बरते के अपील करीन हे। जिला प्रसासन ह लोगन मनके मदद बर बाढ़ नियंत्रण कक्ष के नंबर – सात पांच आठ सात दू नौ एक आठ चार आठ जारी करे हे।
उहें, दंतेवाड़ा जिला म भारी बरसा के सेती डंकनी अउ शंखनी नंदी उफान म हवय। दंतेवाड़ा-किरंदुल रद्दा म दंतेश्वरी मंदिर के आगू बने जुन्ना पुलिया बाढ़ ेके सेती ले बुढ़ गेहे। गंजेनार-मसेनर म टेमरू नाला म जलस्तर बाढ़े ले रद्दा म अवई-जवई बंद होगे हे। मांझीपदर म कुछेक घर ल नुकसान पहुंचे हे। उहें, वार्ड नंबर दस म एक मकान के दीवाल गिर गेहे।
सुकमा जिला म घलो पाछु छत्तीस घंटा ले होवत बरसा के सेती कोंटा अउ दोरनापाल म लोगन मनके घर म पानी भर गेहे। उहें, बस्तर ल हैदराबाद ले जोड़इया राष्ट्रीय राजमार्ग म अवई-जवई बंद हे। एखर चलत कई झिन लोगन सुकमा जिला के आने-आने हिस्सा म फंसे हे। चिंतलनार अउ लखापाल के बीच पचास सड़क पानी म बोहा गे, जेखर ले कई गांव के संपर्क जिला मुख्यालय ले टूट गेहे।
बारिश-02
कांकेर जिला म पाछु दू दिन ले होवत बरसा के सेती दुर्गुकोंदल-कोदापाखा रद्दा म सिंहारी गांव के तीर जुन्ना पुलिया बोहा गेहे, जेखर सेती ए रद्दा म अवई-जवई बंद होगे हे। कोदापाखा क्षेत्र के करीबन पच्चीस गांव के संपर्क दुर्गुकोंदल ले टूट गेहे।
उहें, बस्तर जिला म कई ठिन नंदियां-नरवा उफान म हे। इंद्रावती नदी के जलस्तर खतरा के निसाना ले पार कर गेहे, जिहां पानी करीब डेढ़ फीट उपर बोहवत हे। उहें, जगदलपुर ले सुकमा के सड़क संपर्क घलो टूट गेहे। गीदम नाला उफान म होय के सेती सुकमा रद्दा बंद हे, जेखर सेती गाड़ी मनके लंबा कतार लग गेहे।
ऐति, धमतरी जिला म सरलग पानी गिरत हे, जेखर सेती कई ठिन गांव के संपर्क जिला मुख्यालय ले टूट गेहे। जल संसाधन विभाग ले मिले खबर के मुताबिक गंगरेल बांध म एक लाख पैंतीस हजार क्यूसेक पानी आय के सेती बांध के नौ गेट खोल दे गेहे, जिहां ले पचास हजार क्यूसेक पानी महानदी म छोड़े जावत हे। उहें, सोंढूर बांध के पांच, मुरूमसिल्ली बांध के बत्तीस अउ रूद्री बैराज के बत्तीस गेट ले महानदी म पानी छोड़े जावत हे।
राजनांदगांव जिला म घलो बरसा के सेती नंदियां-नरवा उफान म हे। बाघनदी क्षेत्र म भारी बरसा ले एक गांव म पानी भर गेहे। पुलिस थाना घलो आधा बुढ़ गेहे, जेमा कई झिन जवान फंस गे रिहीन, जउन मन ल गांव वाले मनके मदद ले बाहिन निकाले गीस। मोहला-मानपुर-अंबागढ़ चौकी क्षेत्र म घलो पानी भरे के सेती कई ठिन रद्दा बंद होगे हे। राजनांदगांव ले अंबागढ़ चौकी के बीच कुमरदा म यातायात परभावित होय हे।
खैरागढ़ म काली संझा ले होवत बरसा के सेती आमनेर नंदिया के जलस्तर बढ़ गेहे। एखर ले इतवारी बाजार अउ धरमपुरा अंबेडकर वार्ड म जलभराव होगे हे। पानी भरे के सेती खैरागढ़ के राजनांदगांव, दुरूग अउ रईपुर ले सड़क संपर्क टूट गेहे।
ऐति, बालोद जिला के चिराईगोड़ी गांव म सरलग बरसा के सेती एक ठिन कच्चा घर गिर गे, जेमा ले चपाके दू ठिन मवेसी के मउत होगे।
बारिश-03
दुरूग जिला के शिवनाथ नंदियां म घलो बाढ़ के स्थिति बन गेहे। शिवनाथ नंदियां म करीबन दू लाख क्यूसेक ले जादा पानी छोड़े जाय के सेती महमरा एनीकट ले बारह फीट उपर पानी बोहावत हे। जल संसाधन विभाग के मुताबिक पाछु रतिहा मोंगरा बैराज ले एक लाख तेरह हजार, खातूटोला बैराज ले बीस हजार, घुमरिया बैराज ले छब्बीस हजार अउ सूखा नाला ले चवालीस हजार क्यूसेक पानी शिवनाथ नदी म छोड़े गेहे, जेखर सेती शिवनाथ नदी के जलस्तर खतरा के निसान के करीब पहुंच गेहे। सावधानी के तौर म नदी के तीर-तखार म बसे बत्तीस गांव मन ल चेतावनी दे गेहे। एसडीआरएफ के टीम ल घलो कोन्हों भी परिस्थिति ले निपटे बर तैनात करे गेहे। इहे अछोटी गांव म एक ठिन ईटा भट्टा म पानी भरे ले सोलह झिन मनखे फंस गे रिहीस, जउन मन ल एसडीआरएफ के टीम ह सुरक्षित बाहिर निकाल लेहे।
इही बीच, प्रसासन ह लोगन मन ले अपील करे गेहे कि जादा पानी वाले जघा म सेल्फी ले बर मत जावय।
मुख्यमंत्री-जांच निर्देश
मुख्यमंत्री विष्णुदेव साय ह सरगुजा जिला के सिलसिला गांव म चलत एल्युमीनियम प्लांट म होय हादसा के जांच के आदेस देहे। एखर बाद जिला कलेक्टर ह जांच दल गठित कर देहे। ए जांच दल म लुण्ड्रा अउ अंबिकापुर के आने-आने विभाग के अधिकारी मन ल सामिल करे गेहे। जांच दल घटनास्थल के निरीक्षण करके दू दिन के भीतर कलेक्टर ल अपन प्रतिवेदन दीहीं।
खबर के मुताबिक सिलसिला गांव के एक एल्युमीनियम प्लांट म पाछु आठ सितंबर के होय हादसा म चार झिन लोगन के मउत होगे रिहीस।
महिला कांग्रेस-प्रदर्शन
राज्य म बिगड़त कानून व्यवस्था ल लेके कांग्रेस सरलग प्रदर्सन करत हे। इही कड़ी म आज महिला कांग्रेस के कार्यकर्ता अउ पदाधिकारी मन ह मुख्यमंत्री निवास के घेराव के कोसिस करीन। प्रदेस अध्यक्ष अउ राज्यसभा सांसद फूलोदेवी नेताम के अगुवई म निकले महिला प्रदर्सनकारी मन ल पुलिस ह रद्दाच म रोक लीस। महिला कांग्रेस के ए प्रदर्सन म प्रदेस कांग्रेस अध्यक्ष दीपक बैज, पूर्व मुख्यमंत्री भूपेश बघेल, नेता प्रतिपक्ष डॉक्टर चरणदास महंत अउ सांसद ज्योत्सना महंत घलो सामिल होइन।
जीएसटी-बैठक
केन्द्रीय वित्तमंत्री निर्मला सीतारमण के अगुवई म काली नई दिल्ली म माल अउ सेवा कर-जीएसटी परिषद के बइठका होइस। ए बइठका म जीएसटी ले जुड़े आने-आने मुद्दा म गोठबात करे गीस। एमा आने-आने राज्य अउ केन्द्रसासित प्रदेस के वित्त मंत्री अउ प्रतिनिधि मनके संगेसंग छत्तीसगढ़ के वित्त मंत्री ओपी चौधरी घलो सामिल होइन।
कोरबा-लैब ऑन व्हील्स
कोरबा जिला के दूरिहा जघा म रहवइया गांव वाले मन ल सुघ्घर स्वास्थ्य सुविधा देवाय बर उद्योग मंत्री लखनलाल देवांगन ह काली लैब ऑन व्हील्स कारीकरम के सुरूवात करीन। ए मउका म श्री देवांगन ह किहीन कि लैब ऑन व्हील्स के माध्यम ले दूरिहा रहइया ग्रामीण मन ल बीमारी के जांच के निःशुल्क सुविधा घर बइठे मिल सकही। एखर माध्यम ले प्राथमिक स्वास्थ्य केन्द्र म इकट्ठा करे गे सैंपल मन ल लैब ऑन व्हील्स राइडर्स डहार ले विकासखंड के सामुदायिक स्वास्थ्य केन्द्र म पहुंचाय जाही, जिहां सैंपल के जांच करे जाही अउ रिपोर्ट तैयार करे के बाद राइडर्स डहार ले रिपोर्ट ल प्राथमिक स्वास्थ्य केन्द्र तक पहुंचाय जाही। ए मउका म श्री देवांगन ह कटघोरा सामुदायिक स्वास्थ्य केन्द्र म बायो केमेस्ट्री लैब के सुभारंभ घलो करीन, जिहां प्राथमिक स्वास्थ्य केन्द्र ले लाने गे सैंपल मनके जांच करे जाही।
दामिनी ऐप
बलौदाबाजार अउ प्रदेस के आने-आने जिला मन म पाछु दिन गाज गिरे ले होय मउत के बाद मुख्यमंत्री विष्णुदेव साय ह अधिकारी मन ल जागरूकता अभियान चलाय के निरदेस देहे। उहें, ए घटना के जानकारी बर केन्द्र सरकार डहार ले पहिलीच ले दामिनी ऐप विकसित करे गेहे। ए मोबाइल ऐप ले बीस से तीस किलोमीटर के दायरा म गाज गिरे के पहिली ले जानकारी मिल सकत हे। राज्य सासन ह जम्मों विभाग प्रमुख अउ मैदानी अमला मन ल दामिनी ऐप डाउनलोड करे के निरदेस देहे। एखर संगेसंग आम लोगन मन ल घलो ए ऐप ल डाउनलोड करे के अपील करे गेहे। दामिनी ऐप ल गूगल प्ले स्टोर के माध्यम ले कोनों भी मोबाइल म आसानी ले डाउनलोड करे जा सकत हे।
अरूण साव-अमेरिका
उपमुख्यमंत्री अउ लोक निर्माण मंत्री अरूण साव ह नौ दिन के अध्ययन दउरा म अमेरिका बर रवाना होगे हे। लोक निर्माण विभाग के सचिव डॉक्टर कमलप्रीत सिंह घलो उंखर संग अमेरिका गेहे। अपन अमेरिका प्रवास के दउरान श्री साव न्यूयॉर्क, वाशिंगटन, केलिफोर्निया अउ सेन फ्रांसिस्को म सड़क परियोजना ल देखे के संग सड़क निर्माण तकनीक के जानकारी लीही। ए दउरान ओमन एशियन डेवलपमेंट बैंक डहार ले राखे गे कार्यशाला-सह-प्रशिक्षण म घलो भाग लीहीं।
चक्रधर समारोह-कुश्ती/कबड्डी
रायगढ़ के रामलीला मैदान म राखे गे चक्रधर समारोह म महिला अउ पुरूष मनके अखिल भारतीय अउ राज्य स्तरीय कुश्ती प्रतियोगिता ग्यारह अउ बारह सितंबर के होही। उहें, तेरह ले पन्द्रह सितंबर तक कबड्डी प्रतियोगिता के आयोजन करे जाही। कुश्ती प्रतियोगिता म सामिल होय बर हरियाणा, मेरठ, कर्नाटक, गोवा, महाराष्ट्र अउ दिल्ली के महिला अउ पुरूष पहलवान मन ल आमंत्रण भेजे गे रिहीस।