आज अंतर्राष्ट्रीय साक्षरता दिवस हरय। ए मउका म राजधानी रईपुर के पंडित दीनदयाल उपाध्याय ऑडिटोरियम म राज्य स्तरीय ‘‘उल्लास साक्षरता अभियान कारीकरम राखे गीस। मुख्यमंत्री विष्णदेव साय ह दीप प्रज्वलित करके कारीकरम के सुभारंभ करीन। कारीकरम के अगुवई वन मंत्री केदार कश्यप ह करीन। मुख्यमंत्री ह उल्लास मेला म बुनियादी साक्षरता अउ संख्या ज्ञान बर नवाचारी गतिविधि म केंद्रीत राज्य स्तरीय प्रदर्सनी ल देखिन। एमा छै ठिन स्टाल लगाय गे हे, जेमा पांच ठिन स्टाल संभाग के उल्लास कारीकरम म अउ एक स्टाल एससीईआरटी के हे। अंतर्राष्ट्रीय साक्षरता दिवस के ए मउका म मुख्यमंत्री विष्णुदेव साय ह प्रदेसवासी मन ल बधई अउ सुभकामना दीन हे। श्री साय ह अपन संदेस म किहीन कि साक्षरता के विकास ले सोज्झे संबंध हे। साक्षरता समाज म समानता, सांति अउ विकास के मूल आधार हे। अंतर्राष्ट्रीय साक्षरता दिवस अक्षर ज्ञान के महत्ता बताय के दिन हे। ए ज्ञान के प्रकास ले समाज म सुख-समृध्दि बगराय के संकलप लेके दीन हे। मुख्यमंत्री ह प्रदेसवासी मनले आह्वान करीन कि सबो झन साक्षरता कारीकरम म अपन भागीदारी निभावय अउ छत्तीसगढ़ ल सतप्रतिसत साक्षर बनाय बर होय डिजीटल साक्षरता जागरूकता समेत जीवन भर सिक्षा म बढ़वार करय।
किसान दिवस
भगवान बलराम के जयंती म काली नौ सितंबर के प्रदेसभर म किसान दिवस मनाय जाही। रईपुर के इंदिरा गांधी कृषि विश्वविद्यालय म राखेगे कारीकरम म मुख्यमंत्री विष्णुदेव साय माई पहुना के रूप म संघरही। उहें, कारीकरम के अगुवई कृषि मंत्री रामविचार नेताम करही। किसान दिवस के आयोजन इंदिरा गांधी कृषि विश्वविद्यालय रईपुर, कृषि विकास किसान कल्याण, जैव प्रौद्योगिकीय विभाग अउ भारतीय किसान संघ मिलके करही। कारीकरम म मुख्य वक्ता के रूप म भारतीय किसान संघ के अखिल भारतीय संगठन मंत्री दिनेश कुलकर्णी सामिल होही। ए मउका म ‘‘प्राकृतिक एवं गौ आधारित कृषि‘‘ बिसय म एक दिवसीय राज्य स्तरीय कार्यसाला राखे जाही। एमा छत्तीसगढ़ के आने-आने जिला ले दू हजार ले जादा किसान सामिल होही। इही दिन छत्तीसगढ़ के कतकोन जिला म चलाय जात सत्ताईस कृषि विज्ञान केंद्र म घलो श्री बलराम जयंती-किसान दिवस समारोह मनाय जाही।
श्रमिक-मोबाइल कैंप
प्रदेस के सबो जिला म श्रम विभाग कोति ले करीबन दू हजार मोबाइल कैंप लगाके श्रमिक मन ल योजना अउ पंजीयन के संबंध म जानकारी दे गीस। संगेसंग सत्ताईस हजार ले जादा नवा हितग्राही मनके पंजीयन करे गीस। उहें, मउका म ही आठ हजार सात सौ ले जादा अर्जी के तुरते निराकरण करे गीस।
खबर के मुताबिक श्रम विभाग कोति ले हितग्राही मनके पंजीयन के नवीनीकरण इकतीस दिसंबर तक करे जाही।
स्वाइल फ्लू
बिलासपुर जिला म स्वाइन फ्लू ले एक अउ मरीज के मउत होगे हे। ए महिला मरीज ल इकतीस अगस्त के सिम्स मेडिकल कालेज म भर्ती कराय गे रिहीस। काली इलाज के दौरान एखर मउत होगे। जिला म स्वाइन फ्लू ले मउत होय लोगन के संख्या बाढ़ के नौ होगे हे। उहें, जिला म संक्रमित मरीज के संख्या एक सौ उनसठ तक पहुंच गेहे।
इही बीच, बिलासपुर के मुख्य चिकित्सा अउ स्वास्थ्य अधिकारी डॉक्टर प्रभात श्रीवास्तव ह बतइन कि स्वाइन फ्लू के मरीज बर मेडिकल कालेज सिम्स जिला अस्पताल अउ सबो सामुदायिक स्वास्थ्य केंद्र मन म आइसोलेसन वार्ड दवई अउ आक्सीजन सिलेंडर के व्यवस्था करे गेहे। जरूरत पड़े म मरीज मन ल डीगर जघा म भेजे बर एम्बुलेंस घलो तैनात हे। ओमन लोगन ले अपील करीन हे कि बुखार, सरीर म दरद अउ बलगम के सिकइत होय म तुरते डॉक्टर ल देखावय अउ कोनो भी कीसम के जानकारी बर फोन नं.-एक सून्य चार म संपर्क कर सकत हे। उहें, दुरूग म स्वाइन फ्लू अउ मौसमी बीमारी के बाढ़त मामला ल देखत मुख्य चिकित्सा अउ स्वास्थ्य अधिकारी डॉक्टर मनोज दानी ह सबो स्वास्थ्य संस्था ले केंद्र सरकार कोति ले जारी करे दिसा-निरदेस के पालन करे के निरदेस दीन। संगेसंग स्वाइन फ्लू बर सतर्क रेहे के अपील करीन।
आकाशीय बिजली-मौत
बलौदाबाजार जिला के ग्राम मोहतरा म आकाशीय बिजली के चपेट म आय ले सात लेगन के मउत होगे हे। बताय जावत हे कि ए जम्मो लोगन तेज बरसा ले बांचे बर तरिया के तीर एक पेड़ के नीचे रूके रिहीन। इही दौरान पेड़ म आकाशीय बिजली गिरगे, जेखर ले मउकच म एखर मनके मउत होगे।
चक्रधर समारोह
रायगढ़ म काली ले चक्रधर समारोह सुरू होगे हे। मुख्यमंत्री विष्णुदेव साय ए समारोह के सुभारंभ करीन। ए मउका म ओमन किहीन कि संगीत सम्राट महाराज चक्रधर ह शास्त्रीय कला संगीत ल विश्व म एक नवा पहिचान देवाय हे। ए दौरान ओमन उंहा के कला संस्कृति के संगेसंग पारंपरिक विरासत ल सहेजे बर हर संभव मदद के भरोसा देवाइन। उहें, रायगढ़ संगीत महाविद्यालय खोले के घोसना करीन। मुख्यमंत्री ह ए बेरा म रायगढ़ के सैल चित्र म बने अभिलेखीकरण पुस्तिका अउ चक्रधर समारोह के परिचय पुस्तिका के विमोचन करीन। समारोह के पहिली दिन जाने माने शास्त्री नृत्यांगाना अउ अभिनेत्री पद्मश्री हेमा मालिनी नृत्य नाटिका, ‘‘राधारास बिहारी‘‘ के प्रस्तुति दीन। एखर पहिली पत्रकार मनले गोठबात करत शास्त्रीय नृत्यांगना अउ अभिनेत्री हेमा मालिनी ह मुख्यमंत्री विष्णुदेव साय के अगुवई म प्रदेस म करे जात काम के प्रसंसा करीन।
खबर के मुताबिक दस दिन तक चलइया देस अउ प्रदेस के जानेमाने कलाकार अपन प्रस्तुति दीही।
प्लांट हादसा-मौत
सरगुजा जिला के एक एल्युमीनियम प्लांट म आज होय एक हादसा म तीन झिन मजदूर के मौत होय के खबर हे। खबर के मुताबिक सिलसिला गांव म चलत एल्युमीनियम प्लांट म कोयला ले भरे हॉपर गिर गे एमा पांच ले छै झिन मजदूर के दबे के आसंका हे। ए मजदूर मन ल निकाले बर बचाव अभियान चलाय जात हे।
हत्या
दुरूग जिला के गांव नंदनी खुंदनी म पाछू रतिहा दू गुट के बीच होय विवाद म तीन झन के मउत होगे। ए मामला म पुलिस ह ग्यारा झिन आरोपी मन ल गिरफ्तार करे हे।
दुरूग के पुलिस अधीक्षक जितेंन्द्र शुक्ला ह बतइन कि गांव म गणेश उत्सव मनाय जात हे। इही बेरा डीजे म नाचे गाय ल लेके दू गुट आपस म भीड़ गे विवाद जादा बाढ़े ले दूनो गुट लाठी ले हमला कर दिन। हमला म घायल चार झन ल अस्पताल ले जाय गीस, जिहां तीन झन के मउत होगे। उहें, एक आने मनखे के इलाज अस्पताल म चलत हे। घटना के बाद गांव के लोगन मन नंदनी थाना के घेराव करीन। पुलिस अधीक्षक ह बतइन कि गांव म तनाव ल देखत पुलिस बल तैनात करे गेहे। अभी स्थिति नियंत्रण म हवय।
चलित थाना
कांडागांव जिला के गांव सिंगनपुर के शासकीय उच्चतर माध्यमिक विद्यालय के केसकाल थाना अउ तालुका विधिक सेवा प्राधिकरण कोति ले चलित थाना ले बिसेस सिविर लगाय गीस। एमा स्कूल पढ़इया लइका अउ कर्मचारी मन ल नवा कानून मन ल अउ नोनी मन ले जुड़े अपराध पॉक्सो एक्ट मोटर गाड़ी एक्ट समेत आने महत्वपूर्ण बिसय म जानकारी दे गीस।
अउ अब थोरकुन समाचार सार म –
– मुख्यमंत्री विष्णुदेव साय ह एक पेड़ मां के नाम अभियान म रायगढ़ जिला के पूंजीपथरा थाना परिसर म पीपल के पौधा लगइन।
– मोहला-मानपुर-अंबागढ़ चौकी जिला के औंधी क्षेत्र म माओवादी मन ह अपन संगी एलओएस सदस्य के हत्या कर दीन।
– रईपुर जिला के सबो ब्लाक के स्कूल म जाति, मूल निवास अउ आय प्रमाण पत्र बनाय बर काली नौ सितंबर के सिविर के आयोजन करे जाही।
– बलौदाबाजार जिला के गिधौरी पुलिस ह गांव घटमडवा के तीर दूपहिया वाहन ले अवैध गांजा के तस्करी करत एक आरोपी ल गिरफ्तार करे हे। आरोपी के तीर ले चौहत्तर हजार रूपिया के करीबन सात किलो गांजा बरामद करे गेहे।
अउ
– बलौदाबाजार जिला के लवन पुलिस ह दू झिन माईलोगन के हत्या के आरोप म एक मनखे ल गिरफ्तार करे हे।