केंद्रीय पंचायती राज मंत्रालय डहार ले 9 ले 13 सितंबर तक आवासीय प्रबंधन विकास कारीकरम आयोजित करे जाही। ए कारीकरम म छत्तीसगढ़ समेत 11 ठिन राज्य अउ केंद्रसासित प्रदेस मनके पंचायती राज संस्था के निर्वाचित प्रतिनिधि अउ पदाधिकारी मन भाग लिही। एमा जिला पंचायत, ब्लॉक पंचायत समिति के अध्यक्ष अउ उपाध्यक्ष, ग्राम पंचायत के प्रमुख अउ आने पंचायत अधिकारी मन घलो सामिल होही। पांच दिवसीय ए कारीकरम म पंचायती राज संस्था के प्रतिभागी मन बर नेतृत्व, प्रबंधन अउ नैतिकता, संसाधन जुटाना अउ अभिसरण, ग्रामीण नवाचार, परियोजना के प्रभावी प्रबंधन अउ आर्टिफिसियल इंटेलिजेंस के आने-आने पहलु ल सामिल करे जाही। एखर अलावा, ए कारीकरम के उद्देस्य वित्तीय स्थिरता पाय खातिर अउ पंचायत मन ल सक्षम पंचायत म बदले बर खुदे के स्त्रोत ले राजस्व बढ़ाना हवय।
बलराम जयंती/किसान दिवस
प्रदेस म परनदिन 9 सितंबर के बलराम जयंती अउ किसान दिवस मनाय जाही। रईपुर के इंदिरा गांधी कृषि विश्वविद्यालय म आयोजित राज्य स्तरीय कारीकरम के सुभारंभ मुख्यमंत्री विष्णुदेव साय ह करही। उहें, समारोह के अध्यक्षता कृषि मंत्री रामविचार नेताम करही। कारीकरम के मुख्य वक्ता भारतीय किसान संघ के अखिल भारतीय संगठन मंत्री दिनेश कुलकर्णी होही।
जानबा के मुताबिक बलराम जयंती राज्य के जम्मो 27 ठिन कृषि विज्ञान केंद्र मन म मनाय जाही। ए मउका म इंदिरा गांधी कृषि विश्वविद्यालय म ‘‘प्राकृतिक एवं गौ आधारित कृषि‘‘ बिसय म राज्य स्तरीय कार्यसाला आयोजित करे जाही। ए कार्यसाला म विसेसज्ञ मन डहार ले किसान मन ल ‘‘प्राकृतिक और गौ आधारित कृषि‘‘ के संकल्पना, एखर प्रविधि अउ एखर ले होवइया फायदा ले अवगत कराय जाही। ए कार्यसाला म राज्य के आने-आने जिला के दू हजार ले जादा किसान मन सामिल होही।
मुख्य सचिव अमिताभ जैन ह आज वीडियो कॉन्फ्रेंसिंग के जरिया बस्तर संभाग के अधिकारी मनके बइठका लेके नियद नेल्लानार योजना के तहत करे जावत कामबूता के प्रगति के समीक्षा करीन। ए दौरान ओमन किहीन कि नियद नेल्लानार योजना के तहत हितग्राही मन तक जम्मो योजना के लाभ पहुंचाना निश्चित करय। ओमन बइठका म माओवाद प्रभावित अउ आत्मसमर्पण करइया माओवादी मन ल शासन के योजना के माध्यम ले रोजगार ले जोड़े खातिर कौसल प्रसिक्षण देवय के निरदेस दीन। एखर अलावा मुख्य सचिव ह सड़क निर्माण अउ मोबाइल नेटवर्क स्थापित करे बर स्वीकृत कार्य के प्रगति के जानकारी घलो लीन।
मोबाइल लाइब्रेरी वैन
प्रदेस म राज्य शैक्षिक अनुसंधान अउ प्रसिक्षण परिषद अउ रूम-टु-रीड के संयुक्त तत्वाधान म ‘पठन अभियान‘ के चलत दू ठिन मोबाइल लाइब्रेरी वैन के सुभारंभ करे गीस हवय। कारीकरम के सुरूआत एस.सी.ई.आर.टी. के संचालक राजेन्द्र कुमार कटारा ह करीन। मोबाइल लाइब्रेरी के उद्देस्य लइका अउ लोगन मन के बीच पढ़े के कौशल ल बढ़ावा देना हे। ए कारीकरम के चलत प्रदेस के जम्मो प्राथमिक स्कूल म 6 हफ्ता के योजना बनाय गे हवय, जेमा पठन, लेखन, चित्रकला अउ सामुदायिक सहभागिता जइसन सीखे के रोचक गतिविधिया सामिल हवय। मोबाइल लाइब्रेरी वैन लइका मन ल किताब अउ पढ़े के जिनिस उपलब्ध कराही अउ ओमन ल पढ़े के महत्व ल समझाय खातिर आने-आने कार्यसाला के आयोजन करही। लाइब्रेरी वैन अवइया 10 दिन तक महासमुंद जिला के बागबाहरा विकासखंड के 30 ठिन स्कूल अउ संकुल मन म लइका अउ समुदाय सदस्य के आगू आने-आने पढ़े के गतिविधि के आयोजन करही।
हाथी-हमला मौत
कोरबा जिला के वनांचल क्षेत्र के ग्राम पंचायत माखुरपानी के गढ़कटरा गांव म बीते रतिहा एक ठिन दंतैल हाथी के हमला ले एक सियान माईलोगिन पहाड़ी कोरवा के मउत होगिस। उहें, हाथी ह दू ठिन मवेसी मन ल घलो मार डालिस, जेखर ले क्षेत्र म डर के माहौल बने हवय। मिले जानबा के मुताबिक सियान माईलोगन अपन घर म सोय रिहीस। ए दौरान हाथी ह घर ल तोड़के माईलोगिन उपर हमला कर दीन। घटना के जानबा होते ही गांव के सरपंच अउ वन विभाग के टीम ओ जघा म पहुंचिन अउ काय होय हे, एखर पूछताछ करीन। गांव के मनखे मन ह वन विभाग ले मांग करे हवय कि हाथी के हमला ले बचाव खातिर कोनो कड़ा कदम उठाय जावय।
इही बीच, बालको वन क्षेत्र के रेंजर जयंत सरकार ह बतइन कि दंतैल हाथी गांव के तीर-तखार म घूमत हवय। ओमन बतइन कि सुरक्षा के दृष्टि ले चुईया-अगरबाहर ले सतरेंगा जाय के रद्दा ल बंद कर दे हवय। अभी तक वन अमला अउ पुलिस विभाग के टीम दंतैल हाथी के गतिविधि उपर नजर राखे हुए हे।
गणेश चतुर्थी
छत्तीसगढ़ समेत जम्मो देस म आज गणेश चतुर्थी के तिहार बड़ उछाह अउ श्रध्दा के संग मनाय जावत हे। बुध्दि, विवेक अउ सौभाग्य-समृध्दि के प्रतीक गणपति जी के 10 दिन के उत्सव आज ले सुरू होके चतुर्दशी म सिराही। राजधानी रईपुर समेत प्रदेस के जम्मो जिला मन म भगवान गणेश के मूर्ति ल बइठाय जावत हे। जघा-जघा ढोल-नंगाड़ा अउ ‘‘गणपति बप्पा मोरिया‘‘ के जयकारा के संग गणेश प्रतिमा ल सार्वजनिक पंडाल अउ घर म स्थापित करे जावत हे।
मुख्यमंत्री विष्णुदेव साय ह रईपुर स्थित अपन निवास कार्यालय म भगवान गणेश के प्रतिमा के स्थापना करीन। ओमन अपन परिवार संग पूजा-अर्चना कर प्रदेस के सुख, समृध्दि अउ खुसहाली के कामना करीन।
राज्यपाल रमेन डेका अउ मुख्यमंत्री विष्णुदेव साय ह गणेश चतुर्थी के मउका म जम्मो प्रदेसवासी मन ल अपन सुभकामना अउ बधाई दीन हे।
खेल समाचार
बैंगलूरू म आयोजित तिरसठवां राष्ट्रीय ओपन चैंपियनशिप म भारतीय रेलवे के महिला टीम ह पहिली अउ पुरूष टीम ह दूसरइया स्थान हासिल करे हवय। विजेता टीम म दक्षिण पूर्व मध्य रेलवे के 3 महिला अउ 3 पुरूष खिलाड़ी मन सामिल हवय। ए प्रतियोगिता म भारतीय रेलवे टीम म दक्षिण पूर्व मध्य रेलवे डहार ले 12 खिलाड़ी मन भाग ले रिहीन। एमा फ्लोरेंस बरला ह 400 मीटर दौड़ म स्वर्णपदक, रितेश ओहरे किरण ह 15 सौ मीटर दौड़ म स्वर्णपदक अउ रवि ह हैमर थ्रो म स्वर्ण पदक हासिल करीन हवय। अइसनेच, महिला वर्ग म दीक्षा ह 15 सौ मीटर दौड़ म रजत पदक, अभिलाषा सक्सेना ह गोला फेक म रजत पदक अउ योगिता ह गोला फेंक म कांस्य पदक जीतिन हवय।
दक्षिण पूर्व मध्य रेलवे के ए खिलाड़ी मनके शानदार प्रदर्सन करे के खुसी म महाप्रबंधक नीनू इटियेरा ह ओमन ल अपन सुभकामना अउ बधई दीन हवय।
हल्बी/गोण्डी-समाचार बुलेटिन
काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन प्रसारित करे जाही। ए दूनों बुलेटिन आकाशवाणी केंद्र, जगदलपुर ले प्रसारित होही। जेला बस्तर संभाग म ही सुने जा सकही। हल्बी म समाचार बुलेटिन बिहनिया साढ़े सात बजे ले अउ गोण्डी म समाचार बुलेटिन संझा साढ़े छै बजे ले प्रसारित करे जाही।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके 5 मिनट ले छै बजके 10 मिनट तक करे जाही। ए कारीकरम ल प्रदेस के जम्मों आकाशवाणी केंद्र मन ह एके संघरा रिले करही। ए बखत के अंक म ‘‘सुकमा‘‘ जिला के गतिविधि मन के बारे म जानकारी दे जाही।
अउ अब मौसम के हाल…
प्रदेस म काली एक-दू जघा मन म गरज-चमक के संग भारी बरसा होय अउ गाज गिरे के संभावना हवय। भारी बरसा के मुख्य क्षेत्र दक्षिण छत्तीसगढ़ रइही। मौसम विभाग ले मिले जानबा के मुताबिक उत्तर-पश्चिम बंगाल के खाड़ी अउ ओखर ले लगे पश्चिम-मध्य बंगाल के खाड़ी के उपर एक निम्न दाब के क्षेत्र बने हुए हे। एखर असर ले प्रदेस म काली जादातर जघा मन म हल्का ले मध्यम बरसा हाये अउ गरज-चमक के संग छींटा पड़े के संभावना हे।