समारोह म राज्यपाल ह किहीन कि सिक्षक मन ह विद्यार्थी मन ल बड़े सपना देखे बर अउ ओला पूरा करे बर प्रेरित करय। ओमन किहीन कि सिक्षक दिवस हमन ल विकसित राष्ट्र बनाय बर हमर जिम्मेदारी के सुरता देवाथे। उहें, मुख्यमंत्री ह किहीन कि भारत म सिक्षक दिवस के जतका उछाह अउ महत्व हे, ओतका अउ कहूं देखे बर नइ मिलय। ओमन बतईन कि राष्ट्रीय सिक्षा नीति ल प्रदेस म लागू कर दे गेहे। बस्तर म घलो अब सिक्षा के उजास फइलत हे। उहां कतकोन बछर ले बंद उनतीस ठिन स्कूल ल फेर खोले गेहे। माओवाद परभावित जिला के लइका मन ल उच्च सिक्षा बर बिना ब्याज के सिक्षा ऋण घलो दे जावत हे।
उहें, मुख्यमंत्री विष्णुदेव साय ह आज अपन निवास कार्यालय म पूर्व राष्ट्रपति भारत रत्न डॉक्टर सर्वपल्ली राधाकृष्णन के चित्र म फुल चघाके ओमन ल नमन करीन।
हीराबाई झरेका-सम्मान
छत्तीसगढ़ के हीराबाई झरेका बघेल ल हस्तसिल्प के क्षेत्र म बड़े योगदान बर राष्ट्रीय पुरस्कार ले सम्मानित करे जाही। ए पुरस्कार वस्त्र मंत्रालय भारत सरकार कोति ले दे जाथे। सारंगढ़-बिलाईगढ़ जिला के ग्राम पंचायत बैगीनडीह के रहइया श्रीमती बघेल ह ढोकरा बेलमेटल सिल्प के प्रसिध्द सिल्पकार हे। मुख्यमंत्री विष्णुदेव साय ह ए उपलब्धि बर हीराबाई झरेका बघेल ल अपन सुभकामना दीन हे।
लखनलाल देवांगन-उद्योग समागम
प्रदेस के उद्योगमंत्री लखनलाल देवांगन ह आज नई दिल्ली म राखेगे ‘‘उद्योग समागम‘‘ सम्मेलन म हिस्सा लीन। सम्मेलन म देसभर के उद्योगपति अउ निवेशक मन ह व्यापार, उद्योग अउ आर्थिक विकास ले जुड़े बड़े मुद्दा उपर चर्चा करीन। ए दौरान श्री देवांगन ह छत्तीसगढ़ म निवेस के संभावना अउ राज्य सरकार डहार ले व्यापारिक गतिविधि ल बढ़ावा देबर करे जावत परयास के जानकारी दीन। ओमन बतइन कि राज्य सरकार ह उद्योंग मन ल प्रोत्साहित करे बर कतकोन योजना चलावत हे। एखरे संग ओमन ल कतकोन सुविधा घलो दे जावत हे, जेखर ले न सिरिफ राज्य के आर्थिक विकास होही, बल्कि स्थानीय युवा मन बर ए रोजगार के अवसर बाढ़ही।
सहकारिता-बैठक
राज्य के सबो ग्राम पंचायत म सहकारी समिति के नेटवर्क बनाय जाही। संगेसंग हर पंचायत म सहकारी समिति बनाय जाही। सहकारिता विभाग के सचिव डॉक्टर सी.आर. प्रसन्ना ह ‘सहकार से समृध्दि‘ उपर बनाय गे कार्य योजना के समीक्षा बइठका के बारे म अधिकारी मन ल निरदेस जारी करीन। बइठका म पंचायतवार, पेक्स, मत्स्य अउ दुग्ध समिति मनके जानकारी दे के साथ क्रियासील अउ अक्रियासील समिति मनके चिन्हांकन करके ओमन ल सक्रिय करे के निरदेस घलो दे गीस। डॉक्टर प्रसन्ना ह किहीन कि अइसन ग्राम पंचायत जिहां एको ठन समिति नइ हे, उहां नवा समिति बनाय जाय अउ सबो जुन्ना समिति के पुराना काम के ऑडिट कराय जाय।
मुख्य सचिव-स्वच्छता ही सेवा
प्रदेस के मुख्य सचिव अमिताभ जैन के अगुवई म काली वीडियो कॉन्फ्रेंसिंग के माध्यम ले स्वच्छता ही सेवा अभियान बर बने राज्य स्तरीय स्टेयरिंग कमेटी के बइठका होइस, जेमा स्वच्छता ही सेवा अभियान के तैयारी के समीक्षा करे गीस। बइठका म बताय गीस कि ए अभियान प्रदेस म चौदह सितंबर ले दू अक्टूबर तक चलाय जाही। स्वच्छता कार्यक्रम के दउरान सफाई मित्र अउ स्वच्छता कार्यकर्ता मन बर सफाई मित्र अउ सुरक्षा सिविर कराय जाही। ए सिविर म स्वच्छता हितग्राही मन ल सासन के आने-आने कल्याणकारी योजना ले लाभान्वित करे जाही। मुख्य सचिव ह ए अभियान म जनप्रतिनिधि, छात्र-छात्रा अउ आम लोगन के सहभागिता निश्चित करे के निरदेस अधिकारी मन ल दीन हे।
मुख्यमंत्री-प्रतिनिधिमंडल
मुख्यमंत्री विष्णुदेव साय ह काली रईपुर के उंखर निवास कार्यालय म छत्तीसगढ़ सर्व आदिवासी समाज के प्रांताध्यक्ष शिशुपाल शोरी के नेतृत्व म प्रतिनिधिमंडल ले भेंट करीन। प्रतिनिधिमंडल ह मुख्यमंत्री ल समाज के नवा चुनेगे पदाधिकारी मनके सपथ ग्रहण समारोह म मुख्य अतिथि के रूप म सामिल होय के नेवता दीन।
माओवादी मुठभेड़-आत्मसमर्पण
छत्तीसगढ़ के सीमा ले लगे तेलंगाना के कोत्तागुड़म जिला के गुंडाला म आज सुरक्षा बल संग होय मुठभेड़ म छै झिन माओवादी मारे गीन। ए मुठभेड़ म दू झन जवान मन घलो घायल होय हे, जेमा ले एक झन के हालत गंभीर हे। घायल जवान मनके इलाज भद्राचलम के अस्पताल म चलत हे। सर्चिंग के दौरान मउका ले आधुनिक हथियार संघरा भारी मात्रा म माओवादी सामग्री बरामद करे गेहे, उहें, मारेगे सबो माओवादी मनके शिनाख्त कर ले गेहे।
ऐति, दंतेवाड़ा पुलिस डहार ले चलत लोन वर्राटू अभियान म एक झन माईलोगिन संघरा दू झन माओवादी ह आत्मसमर्पण करीन हे। ए दूनो माओवादी मन ह मलांगेर एरिया कमेटी के सक्रिय सदस्य रिहीन। ए माओवादी मन उपर बंद के दौरान सड़क खोदे के अउ बैनर-पोस्टर लगाय के घटना मन म सामिल रहे के आरोप हे। आत्मसमर्पण करइया ए माओवादी मन ल राज्य सरकार के पूर्नवास नीति के तहत पच्चीस-पच्चीस हजार रूपिया के सहायता रासि दे गीस।
महाविद्यालय-प्रवेश
राज्य के शासकीय अउ निजी कालेज मन म बी.एड. अउ डी.एल.एड., बीए. बीएड. अउ बीएससी बीएड पाठ्यक्रम म प्रवेस बर ऑनलाइन आबंटन के प्रक्रिया सुरू होगे हे। इच्छुक अभ्यर्थी मन ह जउन मन ह प्री-टेस्ट म सामिल होय हे। ओमन ह आज ले ग्यारा सितंबर तक चिप्स के आधिकारिक वेबसाइट म जाके सुल्क के भुगतान करके ऑनलाइल फार्म ले सकत हे।
चक्रधर समारोह
रायगढ़ म सात सितंबर ले सुरू होवइया उनचालीसवां चक्रधर समारोह म छत्तीसगढ़ के संगेसंग देस के आने-आने राज्य के संस्कृति के झलक देखे बर मिलही। समारोह म देस भर के प्रसिध्द कलाकार मन ह शास्त्रीय नृत्य अउ लोकसंगीत के प्रस्तुति दीही। ए समारोह म भरत नाट्यम, कथक,कुचिपुड़ी, मोहिनीअट्टम, असमिया, ओडिशी अउ मणिपुरी नृत्य के प्रस्तुति दे जाही। उहें, पद्मश्री हेमा मालिनी अउ देवयानी अउ मीनाक्षी शेषाद्री मन शास्त्रीय नृत्य के प्रस्तुति दीही।
अउ अब मौसम के हाल…
मौसम विभाग ह प्रदेस म काली कतकोन जघा म हल्का ले मध्यम बरसा होय के अउ गरज-चमक के संग छींटा पड़े के संभावना जताय हे। उहें, दक्षिण छत्तीसगढ़ म एक-दू जघा म भारी बरसा होय के अउ आकाशीय बिजली गिरे के चेतावनी जारी करे गेहे। मौसम विभाग के अनुसार पश्चिम मध्य बंगाल अउ उत्तर-पश्चिम बंगाल के खाड़ी म एक ठिन निम्नदाब के क्षेत्र बने हे, जेखर असर से प्रदेस म कुछेक जघा म बरसा होवत हे। आज राजधानी रईपुर म तेज बरसा दर्ज करे गीस।
इही बीच, बीजापुर जिला म आकाशीय बिजली के चपेट म आय ले केन्द्रीय रिजर्व पुलिस बल-सीआरपीएफ के एक जवान के मउत होगे, जउन ह कांवड़गांव कैम्प ले सर्चिंग अभियान म निकले रिहीस। ए जवान बीजापुर थाना क्षेत्र के संतोषपुर गांव के रिहीस, जउन ह पच्यासीवां वाहिनी सीआरपीएफ कैंप कांवड़गांव म पदस्थ रिहीन।
अउ अब थोरकुन समाचार सार म –
– छत्तीसगढ़ माध्यमिक शिक्षा मंडर डहार ले संचालित हाईस्कूल अउ हायर सेकेंडरी स्कूल स्वध्यायी परीक्षा बर आवेदन के तारीख ल बढ़ा दे गेहे। अब परीक्षार्थी विलंब शुल्क के संग नौ ले पच्चीस सितंबर तक आवेदन कर सकत हे।
अउ
– कोरबा जिला के पाली वनमंडल के धारपखना-घुईचुआ सर्किल म दंतैल हाथी के हमला म एक झिन ग्रामीण के मउत होगे।