प्रधानमंत्री आवास योजना-ग्रामीण म छत्तीसगढ़ ल करीबन आठ लाख सैंतालीस हजार घर बनाय के मंजूरी मिले हे। एमा एस.ई.सी.सी. दू हजार ग्यारह के सूची के मुताबिक छह लाख निन्यानवे हजार ले जादा अउ आवास प्लस सूची के मुताबिक एक लाख सैंतालीस हजार छह सौ आवास सामिल हे।
मुख्यमंत्री विष्णुदेव साय ह आवास के मंजूरी बर प्रधानमंत्री नरेन्द्र मोदी के आभार जतईन हे। ए योजना ले गांव-गंवई लोगन के जीवन स्तर म सुधार होही। संगेसंग लाखों परिवार के अपन घर के सपना पूरा हो सकही।
राज्यपाल-शिक्षक सम्मान
शिक्षक दिवस के मउका म काली दुरूग जिला के वैशाली नगर भिलाई म शिक्षक सम्मान समारोह राखे गीस। राज्यपाल रमेन डेका माईपहुना के रूप म ए समारोह म सामिल होके आने-आने स्कूल के चौबीस झिन सबले बने सिक्षक मनके सम्मान करीन। समारोह म बोलत राज्यपाल ह किहीन कि सिक्षक के भूमिका सिरिफ पढ़ाय तक सीमित नइ हे, भलूक विद्यार्थी मन ल नैतिक मूल्य अउ समाज कोति उंखर जिम्मेवारी बर घलो जागरूक बनाय बर पड़ही। राज्यपाल ह सम्मान समारोह म सम्मानित जम्मों सिक्षक मन ल बधाई दीन हे।
एनआईए-छापा
राष्ट्रीय जांच एजेंसी-एनआईए ह काली नारायणपुर जिला म सीपीआई माओवादी संगठन के सदस्य अउ उंखर सहयोगी मनके कई ठिन जघा म तलाश्ी लीन। ए कार्रवाई पाछु बछर बीस मार्च के रद्दा रोके के घटना के संबंध म करे गेहे। ए मामला म एनआईए ह कुल पैंतीस झिन ल आरोपी बनाय हे। ए लोगन उपर माड़ बचाव मंच ले जुड़े होय के संदेह हवय। ए संगठन माओवादी मनके सहयोगी संगठन माने जाथे। काली मंगलवार के एनआईए ह ए संगठन ले जुड़े चार झिन संदिग्ध लोगन के नारायणपुर जिला के कस्तूरमेटा, मदाली अउ मलकल गांव के ठिकाना म छापा मारीन।
माओवादी-शिनाख्त
दंतेवाड़ा अउ बीजापुर जिला के सीमावर्ती क्षेत्र म काली होय मुठभेड़ म मारे गे सबो नौ झिन माओवादी के चिन्हारी कर ले गेहे। एमा माओवादी मनके बड़े नेता रणधीर उपर पच्चीस लाख रूपिया अउ छै झिन माओवादी उपर पांच-पांच लाख अउ आने दू झिन माओवादी उपर दू-दू लाख रूपिया के इनाम घोषित रिहीस। अइसन किसम ले ए सबो माओवादी मन उपर कुल साठ लाख रूपिया के इनाम घोसित रिहीस। ए माओवादी डिवीजन सदस्य, दरभा डिवीजन सदस्य, पश्चिम बस्तर दरभा डिवीजन अउ पीएलजीए कंपनी सदस्य के रूप म सक्रिय रिहीन।
डीकेएस-किडनी ट्रांसप्लांट
राजधानी रईपुर के डीकेएस अस्पताल म लीवर अउ किडनी ट्रांसप्लांट के सुविधा जल्दी सुरू होही। स्वास्थ्य मंत्री श्यामबिहारी जायसवाल ह बतईन कि डीकेएस अस्पताल म पहिली ले आधुनिक आई.सी.यू. तैयार करे गेहे अउ लीवर, किडनी ट्रांसप्लांट के उपकरण बर छह करोड़ रूपिया मंजूर करे गेहे। ए सुभिता के फायदा प्रदेस के मरीज मनके संगेसंग दिगर राज्य ले अवइया मरीज मन ल घलो मिलही। उहें, प्रदेस के छह ठिन जिला म आधुनिक मॉडल अस्पताल बनाय जाही, जेमा सुपर स्पेशलिटी सेवा मिलही। ओमन बतईन कि अंबेडकर अस्पताल म आधुनिक पोस्टमार्टम हाउस बनाय जाही, जेमा नवा उपकरण के संगेसंग विशेषज्ञ स्टाफ के तैनाती होही। स्वास्थ्य मंत्री ह किहीन कि प्रदेस के सरकारी अस्पताल मन म नवा सेवा के संख्या बढ़ाय बर आधुनिक उपकरण के संग विशेषज्ञ चिकित्सक मनके होना तय करे जाही।
स्वास्थ्य मंत्री-फॉर्मेसी काउंसिल
स्वास्थ्य मंत्री श्यामबिहारी जायसवाल ह आज छत्तीसगढ़ स्टेट फार्मेसी काउंसिल के पंजीयन के ऑनलाइन सुभीता के सुभारंभ करीन। ए मउका म स्वास्थ्य मंत्री ह किहीन कि पंजीयन काम के ऑनलाइन होय ले अरजी देवइया मन ल अब काउंसिल के चक्कर नइ लगाय बर पड़ही। अभी राज्य म करीबन तैंतीस हजार तीन सौ फार्मासिस्ट पंजीकृत हवय। ए फार्मासिस्ट रिटेल दवा दुकान, थोक दवा दुकान, दवा बनाय के इकाई जइसन काम ल चलावत हे। एखर संगेसंग ए आने-आने फार्मेसी शिक्षण संस्थान म सिक्षक के रूप म काम करत हे।
मुख्यमंत्री-नुआखाई
मुख्यमंत्री विष्णुदेव साय काली रईपुर म उत्कल समाज कोति ले राखे गे नुआखाई कारीकरम म सामिल होइन। ए मउका म ओमन ऋषि पंचमी नुआखाई के दिन उत्कल समाज के बहुलता वाले जिला म छुट्टी के घोसना करीन। ओमन समाज के मांग म उत्कल समाज ल रईपुर म सामाजिक भवन बर भूईंया देवाय अउ बुढ़ही मां मंदिर के जीर्णोद्धार के घलो घोसना करीन। मुख्यमंत्री ह उत्कल समाज के पढ़ईया लइका मन ल जाति प्रमाण पत्र म आवत परेसानी ल दुरिहा करे के भरोसा दीन।
कांग्रेस-प्रेसवार्ता
नेता प्रतिपक्ष डॉक्टर चरणदास महंत ह राज्य सरकार उपर धान के सुरक्षा अउ रखरखाव समेत कई ठन मुद्दा ल लेके गंभीर आरोप लगाय हे। ओमन किहीन कि समर्थन मूल्य म उपार्जित धान के मिलिंग कराय अउ ओखर सुरक्षा अउ रखरखाव म राज्य सरकार असफल साबित होय हे, जेखर ले एक हजार करोड़ रूपिया ले जादा के धान खराब होगे हे। रईपुर म पत्रकार मन ले गोठबात करत डॉक्टर महंत ह प्रदेस के सबो जिला के आंकड़ा पेस करीन अउ बतईन कि सबले जादा नकसान मुंगेली जिला म होय हे। इहां धान खरीदी केन्द्र मन म करीबन छब्बीस करोड़ रूपिया के लागत के पैंसठ हजार कुंटल ले जादा धान खराब होय हे। ओमन किहीन कि कांग्रेस ए मामला ल विधानसभा सत्र उठाही अउ लोकायुक्त ले एखर सिकायत करही।
दुष्कर्म-एफ.आई.आर.
भिलाई के एक प्राईवेट स्कूल म चार साल के नोनी संग होय दुष्कर्म के मामला म पॉक्सो एक्ट के धारा म एफ.आई.आर. दरज करे गेहे। उहें, ए मामला के विवेचना बर एक वरिष्ठ महिला अधिकारी के अगुवई म टीम बनाय गेहे। सूत्र के मुताबिक ए टीम म आने-आने जिला ले महिला अधिकारी मन ल सामिल करे गेहे। एमा अतिरिक्त पुलिस अधीक्षक, थाना प्रभारी, निरीक्षक अउ उप निरीक्षक स्तर के अधिकारी सबो महिला होही।
भिलाई ठगी
भिलाई म भिलाई इस्पात संयंत्र ले रिटायर होय मनखे ले करीबन एक करोड़ चार लाख रूपिया के ठगी के मामला आगू आय हे। अज्ञात आरोपी ह खुद ल सीबीआई के अधिकारी बताके पीड़ित के बैंक खाता म गड़बड़ी के हवाला दीस अउ किहीस कि आपके जो खाता बैंक म हवय, उहां आपराधिक काम होवत हे, जेखर जांच करना हे। एखर ले पीड़ित मनखे उंखर झांसा म आ गे अउ आरोपी ल बैंक खाता के जम्मों जानकारी दे दीस। एखर बाद आरोपी ह आने-आने सात किश्त म पीड़ित मनखे के खाता ले रकम निकाल लीस। पीड़ित मनखे के विदेश म रहइया बेटा ह ए मामला के सिकईत भिलाई नगर पुलिस ले करे हे। पुलिस मामला के जांच करत हे।
अउ अब जानन मौसम के हाल…
मौसम विभाग के मुताबिक एक निम्नदाब के क्षेत्र पश्चिम मध्य बंगाल के खाड़ी अउ ओखर ले लगे उत्तर पश्चिम बंगाल के खाड़ी के उपर बनत हे, जेखर परभाव ले प्रदेस म एक घांव फेर मानसून म बढ़वार होय के संभावना हे। मौसम विभाग ह प्रदेस म काली कतकोन जघा हल्का ले मध्यम बरसा होय अउ गरज-चमक संग छींटा बौछार होय के संभावना जताय हे। उहें, बस्तर संभाग के एक-दू जघा म भारी बरसा होय के चेतावनी दे गेहे।
अडाणी फाउंडेशन-शिविर
रईपुर जिला के तिल्दा ब्लॉक म अडाणी फाउंडेशन डहार ले निःशुल्क स्वास्थ्य सिविर लगाय गीस। ए सिविर म रईपुर के मल्टी स्पेशलिटी हॉस्पिटल ले आए अस्थि रोग, हृदय रोग, स्त्री रोग अउ मेडिसीन विभाग के विशेषज्ञ डॉक्टर मन ह लोगन मनके स्वास्थ्य के जांच करके ओमन ल निःशुल्क दवई दीन। सिविर म ग्राम पंचायत मुरा, मोहरेंगा, बंगोली, खौली डबरी अउ भाटापारा के चार सौ ले जादा लोगन मन ह जांच करवइन।
अउ अब थोरकुन समाचार सार म –
– श्रीराम लला दर्शन योजना म सारंगढ़ ले काली तीस झिन श्रद्धालु के दल आयोध्या धाम बर रवाना होइन।
– छत्तीसगढ़ राज्य विधिक सेवा प्राधिकरण बिलासपुर कोति ले हिन्दी ले अंग्रेजी के अनुवादक के एक पद बर अट्ठारह सितंबर के कौशल परीक्षा राखे जाही। उहें, वाहन चालक के एक पद बर कौशल परीक्षा तेईस सितंबर के होही।
– नारायणपुर जिला म ओरछा बाजार तीर आज माओवादी मन ह बम विस्फोट करीन। एमा काखरो हताहत होय के सूचना नइ मिले हे। उहें, एक चौपइया गाड़ी के नकसान होय हे।
अउ
– राजनांदगांव जिला के इंदामरा गांव तीर चौपइया गाड़ी के टक्कर ले फटफटी सवार एक मनखे के मउत होगे। उहें, एक आने मनखे घायल होगे हे।