केंद्रीय मंत्रिमंडल ह कुल दू हजार आठ सौ सत्रह करोड़ रूपिया के लागत वाला डिजीटल कृषि मिसन ल मंजूरी दे देहे। आज नई दिल्ली म मीडिया ले ए जानकारी साझा करत सूचना अउ प्रसारण मंत्री अश्विनी वैष्णव ह किहीन कि मंत्रिमंडल के बइठका म किसान मनके जीवन म सुधार अउ उंखर आय बढ़ाय बर कतकोन जरूरी फैसला ले गीस।
उहें, केंद्रीय मंत्रिमंडल ह खाद्य अउ पोषण सुरक्षा बर तीन हजार नौ सौ उनयासी करोड़ रूपिया के लागत वाले योजना ल मंजूरी दीन।
केंद्र सरकार ह दू हजार दू सौ इंक्यानवे करोड़ रूपिया के लागत ले किसानी शिक्षा अउ प्रबंधन ल मजबूत करे के घलो निर्णय लेहे। मंत्रिमंडल के बइठका म एक हजार सात सौ दू करोड़ रूपिया के लागत ले पशुधन स्वास्थ्य अउ उंखर जनसंख्या बढ़ाय के योजना ल घलो मंजूरी दे गीस। एखर अलावा आठ सौ साठ करोड़ रूपिया के लागत ले बागवानी के सतत विकास कारीकरम ल अनुमति दे गीस। एक हजार दू सौ दू करोड़ रूपिया के लागत ले कृषि विज्ञान केंद्र अउ एक हजार एक सौ पंद्रह करोड़ रूपिया के लागत ले प्राकृतिक संसाधन प्रबंधन ल घलो मजबूत करे के निर्णय ले गेहे।
मुख्यमंत्री-पोषण माह-शुभारंभ
मुख्यमंत्री विष्णुदेव साय ह रईपुर के निवास म होवइया तीजा-पोरा महतारी वंदन योजना कारीकरम के दौरान प्रदेस म राष्ट्रीय पोषण माह के सुरूआत करीन। ए बेरा म ओमन ह सुपोषण रथ ल हरा झंडी दिखाके रवाना करीन। संगेसंग ओमन ह उंहा उपस्थित माईलोगन मन ल पोषण माह के सपथ दिलाइन। ए सुपोषण रथ राज्य के आने-आने गांव मन म घूम के लोगन मन ल पोषण के संदेस दिही। ए रथ म सुपोषण उपर केंद्रीय फिल्म के प्रदर्सन करे जाही। सुपोषण रथ के जरिया ले प्रदेस के आने-आने जिला मन म पोषण अउ स्वास्थ्य संबंधी ऑडियो, वीडियो संदेस के प्रसारण करे जाही।
ए बेरा म मुख्यमंत्री ह किहीन कि स्वस्थ्य अउ सुपोषित छत्तीसगढ़ के अवधारना ल साकार करे बर राज्य सरकार कृत संकल्पित हे। कुपोषण अउ एनीमिया जइसन चुनौती के सामना करे बर छत्तीसगढ़ शासन डहार ले गंभीर प्रयास करे जात हे। मुख्यमंत्री ह किहीन कि पोषण माह के दौरान ए बछर एनीमिया वृध्दि निगरानी, पूरक पोषण आहार, पोषण भी पढ़ाई भी, गुणवत्ता पूर्ण सेवा देबर तकनीक के प्रयोग अउ पूरा पोषण उपर धियान केंद्रीत करे जात हे। जानबा के मुताबिक प्रदेस म काली एक सितंबर ले पोषण माह के सुरूआत होगे हे, जउन तीस सितंबर तक चलही।
पोला
छत्तीसगढ़ के लोकपर्व पोला आज प्रदेस भर म पारंपरिक उछाह के संग मनाय जात हे। ए बेरा म किसान मन ह अच्छा फसल के कामना के संग अपन हल अउ बइला के पूजा-पाठ करीन। पोला तिहार किसानी संस्कृति म पशुधन के महत्व ल देखाने वाला परब हे। आज लइका मन ह मिट्टी ले बने बइला अउ आने-आने खिलौना के आनंद उठाइस।
रईपुर के मुख्यमंत्री निवास म घलो आज तीजा-पोरा तिहार धूमधाम ले मनाय गीस। एमा बड़ संख्या म महिला मन ह उछाह के संग भाग लीस।
मुख्यमंत्री विष्णुदेव साय ह अपन निवास म होवइया तीजा-पोरा महतारी वंदन तिहार के मउका म महतारी वंदन योजना के सातवां किस्त के रासि एक-एक हजार रूपिया माईलोगन मनके खाता म भेजिस। योजना के तहत सत्तर लाख महिला मन ल छै सौ तिरपन करोड़ रूपिया के भुगतान करे गीस। एला मिलाके अब तक चार हजार पांच सौ अठहत्तर करोड़ रूपिया के रासि के भुगतान करे जा चुके हे।
कारीकरम म उप मुख्यमंत्री अरूण साव, वनमंत्री केदार कश्यप, राजस्व मंत्री टंकराम वर्मा, महिला अउ बाल विकास मंत्री लक्ष्मी राजवाडे़ मौजूद रिहीन।
उहें, पोला तिहार के बेरा म राजधानी रईपुर के रावणभाठा म बइला दौड़, बइला सजावत अउ किसान सम्मान समारोह के आयोजन घलो करे गीस। मुख्य अतिथि के रूप म खेल अउ युवा कल्याण मंत्री टंकराम वर्मा सामिल होइन।
ई-संजीवनी टेलीमेडिसिन
दंतेवाड़ा जिला प्रशासन डहार ले संचालित ई-संजीवनी टेलीमेडिसिन सेवा अति संवेदनसील क्षेत्र मन म स्वास्थ्य सेवा के विस्तार म अहम भूमिका निभावत हे। जिला के अरनपुर, पालनार अउ आने दूरस्थ उप स्वास्थ्य केंद्र मन के माध्य म ले लोगन मन के घर तक गुणवत्तापूर्ण स्वास्थ्य सेवा पहुंचाय जावत हे। वर्तमान म रोज पचास ले जादा मरीज ई-संजीवनी के माध्यम ले टेलीमेडिसिन सेवा के लाभ उठावत। ए सुविधा सुरू होय ले अब मरीज मन ल इलाज बर गांव ले बाहिर नइ जाना पड़ही। मरीज वीडियो काल के जरिया ले डॉक्टर मन ले सीधा गोठबात करके अपन स्वास्थ्य संबधी परेसानी बतावत हे।
संपूर्णता-अभियान
मोहला-मानपूर-अंबागढ़ चौकी जिला के दूसरइया सालगिरह के बेरा म जिला मुख्यालय म आज संपूर्णता अभियान के तहत कारीकरम म आयोजित करे गीस। ए दौरान आने-आने विभाग डहार ले स्टाल लगाके उत्पाद अउ उपकरण मन ल प्रदर्सित करे गीस। उहें, कारीकरम म सामिल होय बर पहुंचे सांसद संतोष पाण्डेय ह कलेक्टर अउ पुलिस अधीक्षक के संग स्टाल के अवलोकन करीन। कारीकरम के दौरान जिला के दूरस्थ इलाका के मरीज मन बर ‘‘डॉक्टर आपके द्वार‘‘ योजना के तहत एम्बुलेंस सुविधा के सुरूआत घलो करे गीस। सांसद ह हरी झंडी देखाके एम्बुलेंस ल रवाना करीस। उहें, कारीकरम म सांसद ह स्कूली लइका मन ल साइकिल बांटिन।
बीजापुर-जनदर्शन
बीजापुर कलेक्टर संबित मिश्रा ह जिलावासी मनके समस्या के निवारण बर जिला कार्यालय बीजापुर म हफ्ता म दू दिन सोमवार अउ गुरूवार के जनदर्सन कारीकरम आयोजित करे के घोसना करे हे। जनदर्सन कारीकरम के दिन जिला कलेक्टर बिहनिया ग्यारा बजे ले आमलोगन मन ले मिलही अउ उंखर समस्या के समाधान बर संबंधित विभाग मन ल जरूरी निरदेस दीन।
क्रीडा-प्रतियोगिता
जांजगीर-चांपा जिला के हाईस्कूल मैदान म काली ले चौबीसवां राज्य स्तरीय शालेय क्रीडा प्रतियोगिता सुरू होगे हे। चार दिन तक चलइया ए प्रतियोगिता के सुरूआत सांसद कमलेश जांगड़े ह करीन। ए प्रतियोगिता म पांच जोन-बस्तर, बिलासपुर, दुर्ग, रईपुर अउ सरगुजा के खिलाड़ी सामिल होवत हे। शालेय क्रीडा प्रतियोगिता म बालक अउ बालिका दूनो वर्ग म फ्रीस्टाइल कुस्ती, ग्रीको रोमनो, मलखंभ, हैण्डबॉल अउ साफ्टबॉल जइसन खेल के आयोजन करे जाही। एखर समापन चार सितंबर के होही।
कांग्रेस-प्रदर्शन
प्रदेस म माईलोगन मन संग होवत आपराधिक घटना अउ उंखर सुरक्षा ल लेके कांग्रेस काली तीन सितंबर के प्रदेस के सबो जिला मन म प्रदर्सन करही। ए मामला ल लेके आज कांग्रेस ह पूरा प्रदेस म प्रेस कांफ्रेंस करीन। ओमन ह आरोप लगाइन कि भाजपा सरकार के नौ माह के कार्यकाल म प्रदेस के माईलोगन मन असुरक्षित होगे हे।
अउ अब थोरकुन समाचार सार म –
– गौरेला-पेंड्रा मरवाही जिला के शिक्षिका स्वपनिल पवार अउ अर्चना सेमुएल मसीह ल राज्य शिक्षक सम्मान पुरस्कार ले सम्मानित करे जाही। अवइया पांच सितंबर के शिक्षक दिवस के दिन राजधानी रईपुर म होवइया राज्य स्तरीय शिक्षक सम्मान समारोह म राज्यपाल शिक्षक मन ल पुरस्कृत करही।
– साक्षरता कारीकरम के तहत जन-जागरूकता लाय अउ शिक्षा के प्रचार-प्रसार करे के उद्देस्य ले गौरेला-पेंड्रा मरवाही जिला के कलेक्टर लीना कमलेश मंडावी ह आज उल्लास साक्षरता रथ ल हरा झंडी देखाके रवाना करीन।
अउ
– बालोद जिला के राजहरा थाना पुलिस ह अवैध सराब परिवहन करइया एक आरोपी ल गिरफ्तार करे हे। आरोपी तीर ले देसी सराब के तीस बोतल जब्त करे गेहे।