देसभर म आज ले राष्ट्रीय पोषण माह मनाय जात हे। केंद्रीय महिला अउ बाल विकास मंत्री अन्नपूर्णा देवी ह गुजरात के गांधी नगर ले पोषण माह के सुभारंभ करही। ए मउका म ओमन नान्हे अउ बाढ़े लइका मनके सुघ्घर स्वास्थ्य तय करे के संगे रेहे बसे के ढंग उपर धियान केंद्रीत करके कुपोषण के समस्या ले निजात पाय उपर जोर दीन। ए ह सातवां राष्ट्रीय पोषण माह ह -एनीमिया , विकास निगरानी, पूरक आहार, पोषण भी पढ़ाई भी, सुघ्घर शासन बर टेक्नोलॉजी अउ एक पेड़ मां के नाम ए अभियान उपर केंद्रीत रइही।
साक्षरता सप्ताह
राष्ट्रीय शिक्षा नीति के तहत लागू करे गे ‘उल्लास नवभारत साक्षरता कारीकरम‘ बर लोगन मन ल जागरूक करे के उद्देस्य ले आज ले आठ सितंबर तक देसभर म साक्षारता सप्ताह के आयोजन करे जात हे। ए दौरान शिक्षा अउ साक्षारता उपर केंद्रीत कई ठिन कारीकरम राखे जाही। उहें, एखर आखिरी दिन आठ सितंबर के अंतर्राष्ट्रीय साक्षारता दिवस के रूप म मनाय जाही।
स्कूल शिक्षा विभाग के सचिव सिध्दार्थ कोमल सिंह परदेशी ह बतइन कि साक्षारता सप्ताह के दौरान जिला, ब्लॉक, नगरीय क्षेत्र अउ ग्राम पंचायत के संगेसंग प्रदेस के शैक्षणिक संस्थान मन म अब्बड़ अकन कारीकरम राखे जाही।
बइठका म बताय गेहे कि के भाजपा के राष्ट्रीय अध्यक्ष जे.पी. नड्डा ह दू सितंबर के प्रधानमंत्री नरेंद्र मोदी ल अउ भाजपा प्रदेस अध्यक्ष किरण सिंह देव ह तीन सितंबर के मुख्यमंत्री विष्णुदेव साय ल सबले पहिली सदस्यता देवाके ए अभियान के सुरूआत करही।
बइठका म क्षेत्रीय संगठन महामंत्री अजय जामवाल ह किहीन कि भाजपा के विस्तार अउ मजबूती खातिर जादा ल जादा सदस्य बनाय जाही। ओमन बतइन कि पार्टी के सबो जिला, मंडल, मोर्चा अउ प्रकोष्ठ मन ल सदस्यता के राखेगे लक्ष्य पूरा करे बर केहे गेहे।
उहें, प्रदेस अध्यक्ष किरण सिंह देव ह किहीन कि छत्तीसगढ़ म बीते आठ-नौ महिना म राज्य सरकार ह जउन काम करे हे ओला लोगन मनले बताके ओमन ल पार्टी ले जोड़े जाही।
कांग्रेस/एनएसयूआई-प्रदर्शन
प्रदेस म नारी प्राणी मन संग होवत आपराधिक घटना अउ उंखर मनके सुरक्षा ल लेके कांग्रेस ह तीन सितंबर के प्रदेस के सबो जिला मन म प्रदर्सन करही। एखर पहिली प्रदेस कांग्रेस अध्यक्ष दीपक बैज ह आज रईपुर म एक ठिन पत्रकारवार्ता राखके कई घटना बारे म जिकर करत राज्य सरकार ले आरोपी मनके खिलाफ कड़ा कार्रवाई करे के मांग करीन। श्री बैज ह रईपुर म एक झिन माईलोगिन अउ दुरूग म चार बछर के एक झिन नोनी संग होय दूष्कर्म के मामला म पुलिस उपर आरोपी ल बचाय के आरोप लगाय हे।
ऐति, भारतीय राष्ट्रीय छात्र संगठन-एनएसयूआई के कार्यकर्ता मन प्रदेस म दुष्कर्म के घटना अउ बाढ़त अपराध के विरोध म काली संझा बेरा मसाल रैली निकाले रिहीन।
कांग्रेस नेता-खुदखुशी
जांजगीर-चांपा जिला के बोंगापार गांव म कांग्रेस नेता पंचराम यादव ह अपन गोसाइन अउ दू झिन लइका संग जहर पीके आत्महत्या कर लेहे। मिले जानकारी मुताबिक परिवार के सबो सदस्य मन बीते तीस अगस्त के घर म बाहिर ले तारा लगाके जहर खा ले रिहीन। फेर ए सबो झिन मन ल उपचार बर बिलासपुर लाय गे रिहीस हे। ए दौरान ए तीनो झिन के मउत होगे। पुलिस ह ए मामला के जांच म जुट गेहे।
एनआईए-जांच
राष्ट्रीय अन्वेषण अभिकरण-एनआईए ह गरियाबंद जिला म दू हजार तेइस के विधानसभा चुनाव के दौरान होय आईईडी बिस्फोट मामला म काली कई जघा म जांच करीस। एजेंसी ह आधिकारित तौर म बतइस कि ए बिस्फोट ल माओवादी डहार ले करे गे रिहीस। एनआईए के बयान म केहे गे हे कि हमला म आईटीबीपी के एक झिन हेड कांस्टेबल सहीद होगे रिहीस।
चक्रधर समारोह आमंत्रण
रायगढ़ कलेक्टर कार्तिकेया गोयल अउ पुलिस अधीक्षक दिव्यांग पटेल ह राज्यपाल रमेन डेका अउ मुख्यमंत्री विष्णुदेव साय ले आज मुलाकात कर रायगढ़ म होवइया उनचालीसवां चक्रधर समारोह म आय बर नेवता दीन।
इंहा बतादन कि अवइया सात ले सोलह सितंबर तक रायगढ़ के रामलीला मैदान म चक्रधर समारोह राखे जाही। एखर उद्घाटन बेरा म पद्मश्री हेमा मालिनी नृत्य नाटिका राधा रास बिहारी के प्रस्तुति देइही अउ समापन समारोह म डॉक्टर कुमार विश्वास ह कविता पाठ करहीं। समारोह के दौरान देसभर ले अवइया नामी कलाकार मन घलो अपन प्रस्तुति देखाही।
ओपी चौधरी-ड्रोन ट्रेनिंग अकादमी
वित्त मंत्री ओ.पी.चौधरी ह काली नवा रईपुर स्थित आईटीएम युनिवर्सिटी एक ठिन निजी संस्था के सहयोग ले स्थापित आईटीएम ड्रोन ट्रेनिंग अकादमी के उद्घाटन करीन। ओमन किहीन कि आईटीएम ड्रोन ट्रेनिंग अकादमी ह छत्तीसगढ़ के पहला अकादमी होही, जिहां सात दिन के ट्रेनिंग बाद ड्रोन दीदी अउ ड्रोन पायलट तियार होही। एमन डीजीसीए सर्टिफाइड पायलट कहलाही।
रायपुर पुलिस निजात-अभियान
रईपुर पुलिस डहार ले चलाय जावत ‘निजात अभियान ले अब बॉलीवुड अउ छालीवुड के बड़झन नामी हस्ती मन घलो जुड़ गेहे। ए फिल्मी हस्ती मन वीडियो के माध्यम ले जवान लइका मन ल नसा पानी ले दूरिहा रेहे के अपील करे हे। बॉलीवुड हस्ती मन म आसुतोष राणा, आदित्य पंचोली, अदा शर्मा, प्रभू ेदेवा अउ अरबाज खान समेत कई झिन कलाकार सामिल हे। उहें, ए बारे म छत्तीसगढ़ के विधायक अउ फिल्मी कलाकार अनुज शर्मा के संगे प्रकाश अवस्थी, राकेश शर्मा, मोना सेन, लोक गायिका ममता चंद्राकर, तीजन बाई समेत कई झिन कलाकार मन घलो वीडियो संदेस जारी करे हे।
आरक्षक निलंबित
गांजा तस्कर मन ल सहायता देके आरोप म सक्ति जिला के कांस्टेबल किशोर साहू ल पुलिस के गिरफ्तार करे बाद एसपी अंकिता शर्मा ह ओला सस्पेंड करीस। उहें, मानपुर के तहसीलदार संध्या नामदेव ल ट्रैक्टर ड्राइवर ल पिटे के आरोप म सस्पेंड कर दे गेहे।
पोला पर्व
छत्तीसगढ़ के लोकपरब पोरा तिहार काली प्रदेस भर म पारंपरिक उछाह संग मनाय जाही। पोरा तिहार ह खेती-बाड़ी म पसुधन के महत्तम ल बताने वाला परब हरय। ए तिहार म किसान मन अपन नांगर बइला मनके पूजा-पाठ करके अच्छा फसल होवय कइके कामना करथे। एखर संगे बइला दौड़ घलो राखे जथे। उहें, गांव-गंवई म तीजा बर मइके आय बहिनी अउ बेटी मन पोरा पटक के परिवार ल आसिस देथे।
ए मउका म राजधानी रईपुर म घलो जघा-जघा चुकी-पोरा अउ नंदिया बइला बाजार म मिलत हे।
अउ अब मौसम के हाल…
मौसम विभाग ह अवइया चौबीस घंटा के दौरान बीजापुर जिला म एक-दू जघा म जोरदरहा बरसा होय के चेतावनी देहे। उहें, दंतेवाड़ा, सुकमा अउ नारायणपुर जिला म घलो एक-दू जघा म गरजई-चमकई के संगे पानी गिर सकत हे।
अफीम-आरोपी गिरफ्तार
रईपुर के सिविल लाईन पुलिस ह प्रतिबंधित मादक पदार्थ अफीम के संग पंजाब के रहवइया एक झिन अंतर्राज्यीय आरोपी ल गिरफ्तार करे हे। एखर तीर ले दू किलो ले जादा अफीम बरामद करे गेहे, जेखर कीमत करीबन बत्तीस लाख रूपिया बताय गेहे।
मुख्यमंत्री-बिलासपुर
मुख्यमंत्री विष्णुदेव साय काली बिलासपुर म होय उद्योग संघ के स्वर्ण जयंती समारोह म सामिल होइन। ए मउका म ओमन किहीन कि छत्तीसगढ़ के कारखाना मन इंहा के विकास अउ अर्थव्यवस्था के इंजिन हरय। ए दौरान मुख्यमंत्री ह उद्योग ले जुड़े समस्या मन ल दूरिहाय बर आस्वासन दीन। श्री साय ह बतइन कि अवइया एक नवंबर के छत्तीसगढ़ राज्य स्थापना दिवस के मउका म राज्य के विजन डाक्यूमेंट संग नवा उद्योग घलो लांच करे जाही।