प्रधानमंत्री नरेंद्र मोदी ह किहीन हे कि माईलोगिन मन उपर अत्याचार अउ लइका मनके सुरक्षा समाज बर गंभीर चिंता के बिसय हे। माईलोगिन मनके खिलाफ अत्याचार के मामला म कड़ा कानून अउ तुरंत फैसला करे जाय के जरूरत हे। श्री मोदी ह आज नई दिल्ली के भारत मंडपम म जिला न्यायापालिका के दू दिन के राष्ट्रीय सम्मेलन के उद्घाटन करे के बाद ए बात ल किहीन कि माईलोगिन मनके खिलाफ अत्याचार ले जुड़े मामला म जतका जल्दी फैसला करे जाही, ओतकेच जल्दी माईलोगिन मनके सुरक्षा निश्चित हो सकही।
दीक्षांत समारोह-01
बिलासपुर के अटल बिहारी वाजपेयी विश्वविद्यालय म आज पांचवां दीक्षांत समारोह आयोजित करे गीस। ए मउका म राज्यपाल रमेन डेका अउ मुख्यमंत्री विष्णुदेव साय ह चौसठ ठन बिसय म विद्यार्थी मन ल बियानवे ठन गोल्ड मेडल अउ अड़तालीस झन ल पीएचडी अउ पैंतीस हजार ले जादा विद्यार्थी मन ल उपाधि प्रदान करीन। कारीकरम म मुख्य अतिथि के रूप म भारत के सर्वोच्च न्यायालय के न्यायधीश प्रशांत कुमार मिश्रा सामिल होइन अउ ओमन ल भारतीय न्याय व्यवस्था म अमूल्य योगदान बर पीएचडी के मानद उपाधि ले विभूषित करे गीस।
दीक्षांत समारोह म राज्यपाल ह किहीन कि विश्वविद्यालय हमर ज्ञान अउ संस्कृति के संरक्षक हे। ओमन किहीन कि राष्ट्रीय शिक्षानीति दूरदर्सिता के प्रतिनिधित्व करथे।
उहें, मुख्यमंत्री श्री साय ह किहीन कि राज्य सरकार विकसित छत्तीसगढ़ वीजन के लक्ष्य ल लेके काम करत हे। कारीकरम म केंद्रीय राज्यमंत्री तोखन साहू, उपमुख्यमंत्री अरूण साव, अउ कुलपति आचार्य अरूण दिवाकरनाथ वाजपेयी घलो मौजूद रिहीन।
दीक्षांत समारोह-02
एखर पहिली राज्यपाल रमेन डेका अउ मुख्यमंत्री विष्णुदेव साय ह आज बिलासपुर के अटल बिहारी वाजपेयी विश्वविद्यालय परिसर म स्थापित पूर्व प्रधानमंत्री भारत रत्न स्वर्गीय अटल बिहारी वाजपेयी के प्रतिमा म माला चढ़ाके ओमन ल श्रध्दांजलि दीन। ए मउका म राज्यपाल अउ मुख्यमंत्री ह विश्वविद्यालय के प्रकल्प ज्ञानपथ, अटल मुक्ताकाशी मंच अउ अटल सरोवर के लोकार्पण करीन। राज्यपाल अउ मुख्यमंत्री ह विश्वविद्यालय परिसर म ‘एक पेड़ मां के नाम‘ अभियान के तहत पौधा घलो लगाइन।
राष्ट्रीय पोषण माह
प्रदेस म स्वास्थ्य पोषण अउ स्वच्छता ले जुड़े प्रचार-प्रसार बर ए बछर घलो ‘राष्ट्रीय पोषण माह‘ काली ले सुरू होही। तीस सितंबर तक चलइया ए पोषण माह के मुख्य उद्देस्य पंचायत मन ल सक्रिय करना अउ जन आंदोलन म परिवर्तन करना हे। ए दौरान एनीमिया, वृध्दि निगरानी, पूरक आहार, पोषण भी पढ़ाई भी, बेहतर प्रशासन, पारदर्सिता अउ कुसल सेवा वितरण बर प्रौद्योगिकीय, समग्र पोषण के थीम म आने-आने गतिविधि आयोजित करे जाही। एमा जनप्रतिनिधि, विभाग, स्वयं सेवी संस्था, सार्वजनिक अउ निजी क्षेत्र, महिला समूह, नेहरू युवा केंद्र, नेशनल कैडट कोर, राष्ट्रीय सेवा योजना के भागीदारी रइही।
महिला अउ बाल विकास विभाग के संचालक तुलिका प्रजापति ह सबो कलेक्टर अउ जिला कारीकरम अधिकारी मन ल ‘राष्ट्रीय पोषण माह‘ के सफल आयोजन बर निरदेस जारी करीन हे।
महतारी वंदन योजना
महतारी वंदन योजना म प्रदेस के लाभार्थी माईलोगिन मन ल अवइया दू सितंबर के सातवां किस्त के रासि जारी करे जाही। मुख्यमंत्री विष्णुदेव साय ह अपन निवास म होवइया तीजा-पोरा तिहार के मउका म लगभग सत्तर लाख हितग्राही मनके बैंक खाता म एक-एक हजार रूपिया के रासि ऑनलाइन भेजही। ए योजना म शादीशुदा माईलोगिन मन ल हर बछर बारह हजार रूपिया दे जाय के प्रावधान हे।
गांजा तस्कर-गिरफ्तार
छत्तीसगढ़ पुलिस ह अंतर्राज्यीय गांजा तस्करी के बड़े रैकेट के खुलासा करत मुख्य आरोपी संघरा आठ झन लोगन ल गिरफ्तार करीन हे। मिले जानकारी के अनुसार रायगढ़ के जुट मिल पुलिस डहार ले कोड़ातराई के तीर एक झिन माईलोगिन संघरा पांच झन आरोपी मन ल पकड़े गे रिहीस। ए आरोपी मन के तीर ले एक सौ पछहत्तर किलो गांजा बरामद करे गे रिहीस। ए आरोपी मन ले पूछताछ म पुलिस ल गांजा तस्कर के कार्यप्रणाली अउ गिरोह के दूसर सदस्य मनके जानकारी मिलीस। एखर बाद रायगढ़ अउ बिलासपुर पुलिस के आने-आने टीम बनाके बिलासपुर जिला के ग्राम पिहरीद अउ सक्ति जिला के ग्राम चारपारा अउ ओडिसा के जिला बउत म दबिस देके सबो आरोपी मन ल गिरफ्तार करे गीस। ए पूरा मामला म आरोपी मनके तीर ले एक सौ पछहत्तर किलो गांजा, नगदी, चार पहिया वाहन अउ मोबाइल संघरा बहत्तर लाख रूपिया के संपत्ति जब्त करे गेहे।
पुलिस ह बतइस कि गांजा तस्करी के वित्तीय जांच करत आरोपी मनके बैंक अकांउट ल होल्ड करवाय जावत हे। उहें, राष्ट्रीय एजेंसी नार्कोटिक्स कंट्रोल ब्यूरो अउ अंतर्राज्यीय सहयोग ले विवेचना जारी हे।
तेंदुआ हमला-मौत
धमतरी जिला के नगरी क्षेत्र के ग्राम धौराभाठा म तेंदुआ के हमला ले तीन बछर के एक झन नोनी के मउत होगे। उहें, एक झन सियान गंभीर रूप ले घायल होगे हे। सियान ह अपन घर म सोवत रिहीस। इही दौरान तेंदुआ ह ओखर उपर हमला कर दीस। तेंदुआ के हमला करे म चीख-पुकार मचे के बाद परिवार के मनखे मन जागिन अउ तेंदुआ भाग गीन। जेखर बाद वन विभाग के टीम ह तीर-तखार के गांव मन म तेंदुआ के निगरानी करत हे अउ ओला जंगल कोति भगाय के परयास करत हे।
राष्ट्रीय टीम-स्वर्णप्राशन
राष्ट्रीय आयुष मिशन के टीम ह रईपुर के शासकीय आयुर्वेद महाविद्यालय चिकित्सालय म हर पुष्य नक्षत्र म होवइया स्वर्णप्रासन के तारीफ करीन हे। टीम के सदस्य मन ह काली होय स्वर्णप्रासन के अवलोकन करीन अउ अधिकारी मन ले जानकारी लीन। ए दौरान राष्ट्रीय आयुष मिशन के अंतर्गत करीबन सोलह सौ लइका मन ल स्वर्णप्रासन कराय गीस। केंद्रीय टीम ह आयुर्वेदिक कालेज के डॉक्टर मन ले लइका मन उपर स्वर्णप्रासन के प्रभाव के अध्ययन करे बर किहीन हे। स्वर्णप्रासन समन्वयक डॉक्टर लवकेश चन्द्रवंशी ह बतइन कि नियमित रूप ले स्वर्णप्रासन कराय ले लइका मनके प्रतिरोधक क्षमता बाढ़े के संगेसंग उंखर मनके शारीरिक अउ मानसिक विकास होवत हे।
पर्युषण-पर्व
मुख्यमंत्री विष्णुदेव साय ह प्रदेसवासी मन ल खास करके जैन धरम के अनुयायी मन ल पर्युषण पर्व के सुभकामना दीन हे। ए मउका म मुख्यमंत्री ह किहीन कि पर्युषण पर्व जैन समाज के महत्वपूर्ण तिहार हे। मान्यता हे कि भगवान महावीर ह ए तिहार के दौरान अपन शिक्षा दीन अउ जैन धरम के मुख्य सिध्दांत बनाइन। ए परब अहिंसा, दया, क्षमा, प्रेम के रद्दा म चलना सिखाथे।
हल्बी/गोण्डी-समाचार बुलेटिन
सुनइया मन ल बतादन कि काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन प्रसारित करे जाही। ए दूनों बुलेटिन आकाशवाणी केंद्र, जगदलपुर ले प्रसारित होही। जेला बस्तर संभाग म ही सुने जा सकही। हल्बी म समाचार बुलेटिन बिहनिया साढ़े सात बजे अउ गोण्डी म समाचार बुलेटिन संझा साढ़े छै बजे प्रसारित करे जाही।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल प्रदेस के जम्मों आकाशवाणी केंद्र मन ह एके संघरा रिले करही। ए बखत के अंक म ‘‘कांकेर‘‘ जिला के गतिविधि के बारे म जानकारी दे जाही।
अउ अब पेस हे मौसम के हाल…
प्रदेस के बस्तर संभाग के कुछेक जिला म अवइया चौबीस घंटा के दौरान भारी बरसा हो सकत हे। उहें, प्रदेस के आने-आने हिस्सा म हल्का ले मध्यम बरसा होय के संभावना हे। मौसम विभाग ह एक-दू जघा म गरज-चमक के संग गाज गिरे के चेतावनी घलो देहे।
मुख्यमंत्री-खिलाड़ी मुलाकात
जु-जित्सु खिलाड़ी सानिया परवीन अउ शबा परवीन ह काली मंत्रालय म मुख्यमंत्री विष्णुदेव साय ले भेंट करीन। ए खिलाड़ी मन ह मध्यप्रदेस के निवास म उन्नीस ले इक्कीस जुलाई तक राखेगे राष्ट्रीय स्तर के प्रथम वेस्ट जोन जु-जित्सु चैंपियनशिप म गोल्ड, सिल्वर अउ ब्रॉंज मेडल संघरा कुल चार ठन पदक जीते हवय। मुख्यमंत्री ह ए खिलाड़ी मनके शानदार उपलब्धि मन बर ओमन ल बधई अउ सुभकामना दीन हे।