ए मउका म डॉक्टर सिंह ह किहीन कि सरकार जीवन सुगम बनाय बर प्रतिबध्द हवय। ओमन किहीन कि सरलीकृत पेंसन आवेदन पत्र अउ ई-एचआरएमएस के संग भविष्य के डिजीटल एकीकरण होय ले पेंसन भोगी मन बर प्रक्रिया ल सरल होय म मदद मिलही।
पेंसन विभाग के सचिव वी श्रीनिवास ह किहीन कि पेंसनभोगी मन ल एसएमएस अउ ई-मेल के जरिया स्थिति के जानकारी दे जाही।मुख्यमंत्री कृषि अवसंरचना
मुख्यमंत्री विष्णुदेव साय ह किहीन कि हाले म केंद्रीय मंत्रिमंडल डहार ले कृषि अवसंरचना कोष‘ के बिस्तार ल मंजूरी दे गेहे, जेखर ले कृषि परियोजना मन ल सुदृढ़ करे अउ कृषि उत्पादकता म बढ़ोत्तरी ल बढ़ावा मिलही। मुख्यमंत्री ह किहीन कि ए पहल ले किसान मन के आय बाढ़ही अउ कृषि उत्पादन म सुधार होही। संघरा ग्रामीण अर्थव्यवस्था ल घलो मजबूती मिलही। ए कदम कृषि अवसंरचना के विकास के माध्यम ले किसान मन बर आर्थिक समृध्दि सुनिश्चित करे के सरकार के प्रतिबध्दता ल दिखाथे।
रेडियो-मंजूरी
प्रदेस के अंबिकापुर, जगदलपुर अउ कोरबा जिला मन म जल्द ही निजी एफएम रेडियो स्टेसन सुरू होही। मुख्यमंत्री विष्णुदेव साय ह एफएम रेडियो स्टेसन सुरू करे के मंजूरी बर प्रधानमंत्री के आभार जतइन हे।
मुख्यमंत्री ह किहीन कि ए पहल ले न सिरिफ स्थानीय भाखा म कंटेंट ल प्रोत्साहन मिलही, बल्कि रोजगार के नवा अवसर घलो बनही। ‘वोकल फॉर लोकल‘ अभियान ल अउ जादा ससक्त बनाय बर ए कदम महत्वपूर्ण हरय। ओमन किहीन कि छत्तीसगढ़ म नवा एफएम रेडियो स्टेसन के सुरू होय ले स्थानीय कलाकार, संगीतकार अउ कंटेंट क्रिएटर मन ल अपन मातृभासा म प्रतिभा दिखाय बर एक बड़का मंच मिलही। ए कदम न सिरिफ संकेतिक विरासत ल बढ़ावा दिही, बल्कि आर्थिक रूप ले घलो मनखे मन ल मजबूत बनाही।
‘‘देखो अपना देश‘‘
मुख्यमंत्री विष्णुदेव साय ह नागरिक मन ले अपील करीन हे कि ओमन भारत सरकार के पर्यटन मंत्रालय डहार ले चलाय जात ‘‘देखो अपना देश‘‘ अभियान म सक्रिय भागीदारी निभावय। ए अभियान छत्तीसगढ़ के अद्वितीय अउ सुंदर जघा मन ल राष्ट्रीय मंच म प्रदर्सित करे के अच्छा मउका हे। मुख्यमंत्री ह लोगन मनले किहीन कि ओमन अपन राज्य के स्थल बर पंद्रह सितंबर के पहिली वेबसाइट म जाके वोट करय अउ ए अभियान ल सफल बनाय म अपन योगदान देवय।
‘एक पेड़ मां के नाम‘
राज्यपाल रमेन डेका ह आज महासुमंद प्रवास के दौरान पुरातात्विक नगरी सिरपुर के लक्ष्मण मंदिर परिसर म ‘एक पेड़ मां के नाम‘ अभियान के तहत आम के पउधा लगाइन। ए मउका म महासमुंद जिला प्रशासन के अधिकारी मौजूद रिहीन।
स्वाइन-फ्लू
बिलासपुर जिला म स्वाइन फ्लू ले होय एक अउ मरीज के मउत के संगेच अब इंहा मरने वाला मन के संख्या तीन होगे हे। बताय जात हे कि स्वाइन फ्लू ले पीड़ित तैंतीस बछर के महिला के मउत इलाज के दौरान होगे, जबकि दू ठिन नवा मरीज मनके घलो पुष्टि होय हे। जिला म स्वाइन फ्लू के मरीज मनके संख्या सौ के करीब पहुंचने वाला हे। अब तक स्वाइन फ्लू के छियानवे मरीज मनके पहिचान हो चुके हे, जेमा ले चालीस ठन एक्टिव केस हरय। स्वास्थ्य विभाग ह स्वाइन फ्लू अउ डेंगू के बाढ़त खतरा ल देखत अलर्ट जारी करे हे।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ म ए बखत स्वाइन फ्लू अउ मंकी पॉक्स रोग के कारण अउ बचाव म अखिल भारतीय आयुर्विज्ञान संस्थान-एम्स रईपुर के डॉक्टर सजल डे ले लेगे भेंटवार्ता प्रसारित करे जाही। ए कारीकरम आकाशवाणी केन्द्र रायपुर ले काली इकतीस अगस्त के बिहनिया साढ़े दस बजे ले प्रसारित होही। एला छत्तीसगढ़ स्थित आकाशवाणी के जम्मो केन्द्र रिले करही।
महुआ पेड़-संरक्षण
बस्तर अउ सरगुजा क्षेत्र म महुआ के रूख के संरक्षण बर प्रदेस सरकार महुआ बचाव अभियान चलात हे। ए अभियान के तहत मनेंद्रगढ़ वनमंडल म तीस हजार महुआ के पौधा लगाय गे हे। एखर अलावा अब ए पौधा मनके निगरानी , देखभाल अउ संरक्षण घलो राज्य सरकार ह करही।
ऐति, ग्राम-कछौड़ म राखेगे महुआ बचाव अभियान म भरतपुर-सोनहत विधायक अउ पूर्व केंद्रीय मंत्री रेणुका सिंह सामिल होइन। ए मउका म क्षेत्रवासी मन ल महुआ पेड़ के उपयोगिता के बारे म बताय गीस।
जशपुर-अस्पताल निर्माण
जशपुर जिला के कुनकुरी म बत्तीस करोड़ के लागत ले दू सौ बीस बिस्तर के अस्पताल बनाय जाही, जेखर बर राज्य सरकार ह निविदा जारी कर देहे। ए अस्पताल म मरीज मन बर अत्याधुनिक सुविधा उपलब्ध होही, जेखर ले न सिरिफ जशपुर जिला म बल्कि तीर-तखार के मरीज मन ल घलो बेहतर स्वास्थ्य सुविधा मिल सकही। ए अस्पताल म मरीज मनके सुविधा बर पचीस ठन अतिरिक्त एम्बुलेंस उपलब्ध कराय गेहे। बतादन कि राज्य सरकार ह बजट म कुनकुरी म दू सौ बीस बिस्तर के क्षमता वाला अत्याधुनिक अस्पताल बनाय के घोसना करे रिहीस।
चक्रधर-समारोह
छत्तीसगढ़ शासन के संस्कृति विभाग अउ पर्यटन मंडल डहार ले रायगढ़ के रामलीला मैदान म उनतालीसवां चक्रधर समारोह के आयोजन करे जाही। सात ले सोलह सितंबर तक चलइया ए समारोह के सुभारंभ के मउका म पद्मश्री हेमा मालिनी नृत्य नाटिका ‘राधा रासबिहारी‘ के प्रस्तुति दीही। उहें, ग्यारा सितंबर के मीनाक्षी शेषाद्रि भरत नाट्यम अउ समापन समारोह म डॉक्टर कुमार विश्वास कविता पाठ करही। दस दिन तक चलइया ए समारोह म देस अउ प्रदेस के प्रसिध्द कलाकार हरेक दिन अपन प्रस्तुति दीही।
एनएमडीसी-जुर्माना
दंतेवाड़ा कलेक्टर ह किरंदुल स्थित राष्ट्रीय खनिज विकास निगम-एनएमडीसी ल नोटिस जारी करके स्वीकृत खनिज पट्टा मन म अनियमितता उपर एक हजार छह सौ बीस करोड़ रूपिया के जुर्माना लगाय हे। संघरा ए रासि ल पंद्रह दिन के भीतर जमा करे बर कहे गेहे। खनिज निरीक्षक के प्रतिवेदन के बाद एनएमडीसी प्रबंधन ल कारण बताओ नोटिस जारी करे गे रिहीस, जेमा एनएमडीसी ह जवाब प्रस्तुत करे रिहीस, फेर जवाब संतोषजनक नइ पाय गीस।
बतादन कि एनएमडीसी केंद्र सरकार के मिनीरत्न कंपनी हरय। संघरा लौह अयस्क खदान मनके स्वामित्व रखइया सबले बड़का लौह उत्पादक सरकारी कंपनी घलो हरय। एनएमडीसी के अस्सी फीसदी उत्पादन दंतेवाड़ा ले होथे।
खेलकूद प्रतियोगिता
सत्ताईसवां अखिल भारतीय वन खेलकूद प्रतियोगिता बर चयन प्रतियोगिता काली ले रईपुर के कोटा स्टेडियम म सुरू होगे हे, जेखर सुभारंभ प्रधान मुख्य वन संरक्षक व्ही. श्रीनिवास राव ह करीन। प्रतियोगिता के सुरूआत म छह ठिन वन वृत्त ले आय लगभग पांच सौ खिलाड़ी मन ल श्री राव ह सपथ दिलाइन। ए प्रतियोगिता म बिलासपुर, दुरूग, जगदलपुर, कांकेर, सरगुजा, रईपुर ल आए खिलाड़ी मन मार्च पास्ट करीन।
राज्य स्तरीय ए चयन प्रतियोगिता उनतीस ले इकतीस अगस्त तक राखे जाही। एमा चयनित खिलाड़ी मन सोलह ले बीस अक्टूबर के बीच रईपुर म होवइया राष्ट्रीय वन खेलकूद प्रतियोगिता म हिस्सा लिही।
अउ अब पेस हे मौसम के हाल…
मौसम विभाग ह काली प्रदेस के अधिकांश जघा मन म हल्का ले मध्यम बरसा होय या गरज-चमक के संग छींटा पड़े के संभावना बताय हे। बस्तर, रईपुर अउ दुरूग संभाग के कुछेक जिला मन म भारी बारिश हो सकत हे। उहें, एक -दू जघा म गरज-चमक के संग गाज गिरे के घलो संभावना हे।
इही बीच, सूरजपुर जिला के कुसमुसी गांव म मवेशी चराय के दौरान औचक गाज गिरे ले एक किसनहा के मउत होगे।
त्रिपुरा/केरल-मदद राशि
त्रिपुरा अउ केरल म प्राकृतिक आपदा ले होय बड़क जन-धन हानि के बाद मदद खातिर मुख्यमंत्री विष्णुदेव साय ह दूनो राज्य मन ल पंद्रह-पंद्रह करोड़ रूपिया देके निर्णय लीन हे। मुख्यमंत्री ह दूनों राज्य म पाछू दिन होय प्राकृतिक आपदा ल दुखद बतात अपन संवेदना जतइन हे। ओमन किहीन कि छत्तीसगढ़ सरकार ए विपरीत परिस्थिति म दूनो राज्य मनके सहायता बर तियार हे।