राष्ट्रीय खेल दिवस
राष्ट्रीय खेल दिवस म आज रईपुर म राखे गे कारीकरम म मुख्यमंत्री विष्णुदेव साय ह राज्य के प्रतिभावान खिलाड़ी मन ल इनाम दीन। ए दउरान मुख्यमंत्री ह बछर दू हजार इक्कीस-बाईस अउ बाईस-तेईस बर संतानवे खिलाड़ी मन ल छिहत्तर लाख रूपिया के पुरस्कार रासि प्रदान करीन। उहें, पदक विजेता पांच सौ दू खिलाड़ी मनके बैंक खाता म साठ लाख तैंतीस हजार रूपिया ट्रांसफर करीन।
ए मउका म मुख्यमंत्री ह ओलंपिक खेल म स्वर्ण पदक जीतइया छत्तीसगढ़ के खिलाड़ी मन ल तीन करोड़ रूपिया, रजत पदक जीतइया खिलाड़ी मन ल दू करोड़ रूपिया अउ कांस्य पदक जीतइया खिलाड़ी मन ल एक करोड़ रूपिया के पुरस्कार रासि देके घोसना करीन। मुख्यमंत्री ह किहीन कि रईपुर म लक्ष्मी बाई राष्ट्रीय सारीरिक शिक्षा संस्थान के ऑफ सेंटर सुरू करे जाही, जउन ह खेल के क्षेत्र म प्रदेस के एक बड़े उपलब्धि होही। ओमन किहीन कि प्रदेस म खेल ल बढ़ावा दे बर राज्य सरकार ह छत्तीसगढ़ क्रीड़ा प्रोत्साहन योजना‘‘ सुरू करे के फइसला लेहे। ए योजना म खेल मैदान सुघ्घर करे के संगेसंग खिलाड़ी मन बर उच्च स्तरीय खेल उपकरण के व्यवस्था, खेल प्रतिभा के खोज, खेल क्लब ल आर्थिक सहायता अउ पारंपरिक खेल प्रतियोगिता के आयोजन घलो करे जाही।
कारीकरम म केन्द्रीय आवास अउ सहरी विकास राज्यमंत्री तोखन साहू, विधानसभा अध्यक्ष डॉक्टर रमन सिंह, मंत्रिमंडल के आने-आने सदस्य अउ विधायक मन मौजूद रिहीन।
राष्ट्रीय खेल दिवस म आज प्रदेस के आने-आने जिला मन म घलो कारीकरम के आयोजन करे गीस। ए दउरान जांजगीर के हॉकी मैदान ले डाइट तक रैली निकाली गीस। उहें, जिला के बत्तीस प्रतिभावान खिलाड़ी मनके सम्मान घलो करे गीस।
उच्च शिक्षा ऋण ब्याज अनुदान योजना
प्रदेस के माओवाद प्रभावित जिला म कमजोर आर्थिक स्थिति वाले परिवार के लइका मन ल तकनीकी अउ व्यावसायिक उच्च सिक्षा बर ‘मुख्यमंत्री उच्च शिक्षा ऋण ब्याज अनुदान योजना‘ के तहत ब्याज मुक्त ऋण दे जाही। मुख्यमंत्री विष्णुदेव साय ह ए जिला मन म जादा ले जादा विद्यार्थी मन ल लाभ देवाय के निरदेस देके संगेसंग बिसेस अभियान चलाय बर घलो कहिन हे। मुख्यमंत्री ह राज्य के आने-आने जिला के कलेक्टर मन ल अइसन लइका मनके तकनीकी अउ व्यावसायिक उच्च सिक्षा बर एक प्रतिसत के ब्याज दर म दे जावत ऋण सुविधा के लाभ देवाय के निरदेस घलो दीन हे। योजना के तहत ब्याज अनुदान बर शिक्षा ऋण के जादा सीमा चार लाख रूपिया तय हवय। ए योजना म डिप्लोमा, स्नातक अउ स्नातकोत्तर स्तर के पैंतीस तकनीकी अउ आने-आने व्यावसायिक पाठ्यक्रम मन ल सामिल करे गेहे।
राज्यपाल-कार्यशाला
राज्यपाल रमेन डेका ह किहीन हे कि जलवायु परिवर्तन आज विश्व के सबले बड़े समस्या आय। एखर प्रभाव के सामना करे बर हमन ल जादा सक्षम होना होही। ए बात राज्यपाल ह आज रईपुर म मौसम विज्ञान विभाग डहार ले राखे गे एकदिवसीय कार्यशाला के उद्घाटन करत बेरा किहीन। ओमन किहीन कि मौसम विज्ञान विभाग ए बछर अपन सेवा के एक सौ पचासवां बछर मनावत हे।
ए मउका म राज्यपाल ह किहीन कि मौसम विज्ञान विभाग के सेवा के सेती आज हमन प्राकृतिक आपदा अउ जलवायु परिवर्तन ले जुड़े जोखिम के सामना बने ढंग ले कर सकत हन। इहां के खेती म मौसम विज्ञान के बढ़िया योगदान हे, जेखर ले किसान मन ल मौसम के सटीक खबर मिलथे।
कारीकरम म भारत मौसम विज्ञान विभाग के महानिदेशक डॉक्टर मृत्युंजय महापात्रा ह विभाग के कामकाज के बारे म बतईन।
कृमि मुक्ति दिवस
प्रदेस म आज राष्ट्रीय कृमि मुक्ति दिवस मनाय गीस। ए दउरान एक ले उन्नीस बछर तक के जम्मों लइका मन ल कृमि के दवई खवाय गीस। मुख्यमंत्री विष्णुदेव साय ह रईपुर के जे.आर. दानी कन्या साला म राष्ट्रीय कृमि मुक्ति दिवस म आयोजित कारीकरम म लइका मन ल एलबेंडाजोल के गोली खवा के कारीकरम के सुभारंभ करीन।
शिशु स्वास्थ्य कारीकरम के उप संचालक डॉक्टर व्ही.आर. भगत ह बतईन कि प्रदेस म एक करोड़ सात लाख संतानवे हजार लइका अउ किशोर-किशोरी मन ल कृमिनाशक दवई खवाय के लक्ष्य राखे गेहे। आज जउन लइका मन दवई खाय ले छूट गेहे, ओमन ल चार सितंबर के मॉप-अप दिवस म दवई खवाय जाही।
मतदाता सूची-पुनरीक्षण
भारत निर्वाचन आयोग ह मतदाता सूची म नाम जोड़े, हटाय, स्थानांतरण अउ प्रविष्टि म कोनों प्रकार के जरूरी संशोधन बर फोटोयुक्त निर्वाचक नामावली मनके बिसेस संक्षिप्त पुनरीक्षण कारीकरम जारी कर देहे। आयोग डहार ले जारी कारीकरम के मुताबिक अवइया उनतीस अक्टूबर के प्रदेस के सबो मतदान केन्द्र मन म मतदाता सूची के प्रारंभिक प्रकासन करे जाही अउ एखरे संग दावा-आपिŸा प्राप्त करे के कार्रवाई चालू हो जही। मतदाता अट्ठाइस नवंबर तक दावा-आपिŸा प्रस्तुत कर सकत हे। ए दउरान नौ, दस, सोला अउ सत्रह नवंबर के जम्मों मतदान केन्द्र म बिसेस सिविर के घलो आयोजन करे जाही। मिले दावा-आपिŸा के निराकरण पूरा करके छै जनवरी के निर्वाचक नामावली के आखिरी प्रकासन करे जाही। अइसे युवा जउन एक जनवरी दू हजार पच्चीस के स्थिति म अट्ठारा बछर के उमर पूरा करत हे, ओमन प्रारूप-छै म आवेदन प्रस्तुत कर अपन नाम मतदाता सूची म जुड़वा सकत हे।
माओवादी मुठभेड़
नारायणपुर जिला म आज सुरक्षा बल मनके संग होय मुठभेड़ म तीन वर्दीधारी महिला माओवादी मारे गेहे, जेखर मनके सव बरामद कर ले गेहे। संगेसंग घटनास्थल ले भारी मात्रा म हथियार अउ माओवादी सामान बरामद करे गेहे। मिले जानकारी के अनुसार नारायणपुर अउ कांकेर जिला के सीमा म माड़ क्षेत्र म माओवादी मनके मौजूदगी के सूचना मिले म डीआरजी, एसटीएफ अउ बीएसएफ के सामलात टीम सर्चिंग म निकले रिहीन। इही दउरान पहिली ले घात लगाय बइठे माओवादी मन ह सुरक्षा बल मन उपर फायरिंग सुरू कर दीन। जवाबी कार्रवाई म सुरक्षा बल मन ह तीन महिला माओवादी मन ल मार गिरईन। इलाका म अभी घलो सर्चिंग अभियान चलत हे।
दुर्घटना-जवान मौत
बीजापुर जिला के मिरतुर थाना क्षेत्र म पाछु रतिहा डीआरजी के सहायक उप निरीक्षक तेलम चमरू के सड़क दुर्घटना म मउत होगे। उहें, बस्तर फाइटर्स के एक आरक्षक उदय कुमार पटवा घायल होगे हे। मिले खबर के मुताबिक ए हादसा ग्राम बेचापाल के तीर होइस। घायल आरक्षक ल इलाज बर डिमरापाल मेडिकल कॉलेज म भर्ती कराय गेहे।
उहें, मृतक जवान तेलम चमरू ल आज बीजापुर म विधायक, कलेक्टर अउ पुलिस अधीक्षक ह श्रद्धांजलि दीन। एखर बाद उंखर पार्थिव सरीर ल गृहग्राम बर रवाना करे गीस।
गांजा-बरामद
रायगढ़ जिला के जूटमिल थाना के पुलिस ह एक सौ पचहत्तर किलो गांजा के संगेसंग पांच झिन आरोपी मन ल गिरफ्तार करे हे, जेखर कीमत करीबन पैंतीस लाख रूपिया आंके गेहे। उहें, आरोपी मनके तीर ले तिरालीस लाख रूपिया के संपत्ति जब्त करे गेहे। पुलिस के मुताबिक आरोपी मन ह ओडिशा ले गांजा लान के सक्ती, कोरबा अउ तीर-तखार के क्षेत्र म बेचे के योजना बनाय रिहीस।
भूपेश बघेल-मुख्यमंत्री पत्र
भिलाई-तीन म कांग्रेस कार्यकर्ता मन उपर लाठीचार्ज अउ उंखर खिलाफ आपराधिक प्रकरण दर्ज करे के मामला म पूर्व मुख्यमंत्री भूपेश बघेल ह मुख्यमंत्री विष्णुदेव साय ल चिट्ठी लिखे हे। चिट्टी म ओमन ए मामला के निष्पक्ष जांच कराय अउ कांग्रेस कार्यकर्ता मन उपर दरज मामला ल वापिस लेके मांग करे हे।
इह बीच, पूर्व मुख्यमंत्री भूपेश बघेल के काफिला ल रोके अउ नाराबाजी के संगेसंग कांग्रेस कार्यकर्ता मन उपर लाठीचार्ज ल लेके कांग्रेस के एक प्रतिनिधिमंडल ह आज नवा रईपुर स्थित पुलिस मुख्यालय पहुंच के महानिदेसक के नाम ज्ञापन सौंपीन। प्रतिनिधिमंडल ह डीजीपी ले चोबीस अउ सŸाईस अगस्त के होय घटना के उच्च स्तरीय जांच कराय के मांग करे हे अउ दोषी मन के खिलाफ कड़ा कार्रवाई करे बर किहीन हे।
यूपीएससी-आधार सत्यापन
केन्द्र सरकार ह संघ लोक सेवा आयोग-यूपीएससी ल स्वैच्छिक आधार म उम्मीदवार मनके पहिचान प्रमाणित करे बर आधार आधारित सत्यापन के मंजूरी दे देहे। पंजीकरण के बेरा अउ परीक्षार्थी, भर्ती के आने-आने चरण के दउरान ए सत्यापन करे जा सकत हे। ए फइसला पूजा खेडकर के अंतरिम उम्मीदवारी ल रद्द करे संग फर्जी पहिचान दिखाके सिविल सेवा परीक्षा म निर्धारित संख्या ले जादा प्रयास करे बर ओमन ल भविष्य के जम्मों परीक्षा ले वंचित करे के बाद आय हे।