राज्यपाल रमेन डेका ह किहीन हे कि प्रधानमंत्री टी.बी. मुक्त भारत अभियान म देस म बछर दू हजार पच्चीस तक टी.बी. ल जड़ ले समाप्त करे बर सबो ल एक संघरा जुल मिलके काम करना होही। राज्यपाल आज टीबी उन्मूलन बर चलाय जावत एलाइस परियोजना के राज्य स्तरीय प्रसार कारीकरम म सामिल होइन। ए मउका म ओमन किहीन कि केन्द्र अउ राज्य सरकार टीबी बीमारी ल जड़ ले खतम करे बर प्रतिबद्ध हवय। ओमन सबो झन ले आग्रह करीन कि प्रधानमंत्री के पहल म चलाय जावत टीबी मुक्त भारत अभियान के तहत निक्षय मित्र बनके एक या एक ले जादा टीबी मरीज मन ल पोषण आहार या आने मदद देवयं।
खबर के मुताबिक छत्तीसगढ़ समेत देस के चार राज्य म रीच संस्था के मदद ले एलाइस परियोजना चलाय जात हे। ए परियोजना के तहत नौ सौ चार टीबी चैम्पियंस ल प्रसिक्षित करे गेहे, जउन सरकार के संग मिलके टीबी उन्मूलन अउ स्वास्थ्य सेवा ल अंतिम मनखे तक पहुंचाय बर काम करत हे।
प्रधानमंत्री जन-धन योजना
प्रधानमंत्री जन-धन योजना के आज दस बछर पूरा होगे हे। योजना म अभी तक तिरपन करोड़ ले जादा लाभार्थी मन ल बैंकिंग सुभीता दे गेहे। ए मउका म प्रधानमंत्री नरेन्द्र मोदी ह जम्मों लाभार्थी मन ल बधाई दीन हे अउ योजना ल सफल बनाय बर धन्यवाद करीन हे। प्रधानमंत्री ह एक सोशल मीडिया पोस्ट म किहीन कि जन-धन योजना ह करोड़ों लोगन ल बिसेस रूप ले माईलोगिन, युवा जउन आगू नइ आत रिहीन, ओमन ल सम्मान दे म महत्ता के भूमिका निभाय हे।
उहें, केन्द्रीय वित्त मंत्री निर्मला सीतारमन ह किहीन कि ए योजना म सड़सठ प्रतिशत खाता गांव या छोटे सहर म खोले गेहे। योजना म खोले गे कुल खाता म पचपन प्रतिसत खाता माईलोगिन मन कोति ले खोले गे हवय।
कैबिनेट-एफ.एफ. चैनल
केन्द्रीय मंत्रिमंडल ह दू सौ चौंतीस नवा सहर म सात सौ तीस निजी एफ.एम. चैनल के ई-नीलामी कराय के प्रस्ताव मंजूर कर लेहे। एमा छत्तीसगढ़ के जगदलपुर, अंबिकापुर अउ कोरबा सामिल हे, जिहां तीन-तीन एफ.एम. रेडियो केन्द्र के स्थापना करे जाही। ए फइसला ले मात्र भाषा म प्रसारण ल बढ़ावा मिलही। केन्द्रीय सूचना अउ प्रसारण मंत्री अश्वनी वैष्णव ह बतईन कि मंत्रिमंडल के फइसला ले श्रेणी-दू अउ तीन के सहर म एफ.एम. रेडियो के पहुंच बनही।
सीबीआई-तलाशी
केन्द्रीय जांच ब्यूरो सीबीआई ह भ्रष्टाचार के आरोप म ई.पी.आई.एल. भिलाई के तत्कालीन डीजीएम अउ एक प्राईवेट कंपनी के पार्टनर समेत दू आरोपी के खिलाफ मामला दरज करे हे। उत्तरप्रदेश के बिजनौर अउ भिलाई म दूनों आरोपी के आधिकारिक अउ आवासीय परिसर म सीबीआई ह आज तलाशी लीन। इंखर मन उपर आरोप हे कि ई.पी.आई.एल. के डीजीएम ह प्राईवेट कंपनी संग कच्चा माल ले अउ हैंडलिंग सुविधा के बढ़वार बर जउन अनुबंध करे गे रिहीस, ओमा गड़बड़ी करे गेहे। एखर संगेसंग प्राईवेट कंपनी ह जाली गेट मटेरियल, एंट्री चालान के संग स्टोर के पर्ची घलो जाली देखाय रिहीस, जेखर सत्यापन तत्कालीन डीजीएम ह करे रिहीस।
आरोप हे कि प्राईवेट फर्म के साझेदार ह जाली चालान देखाके करीबन चौरासी लाख रूपिया के अनुसूचित फायदा लीस।
राष्ट्रीय कृमि मुक्ति दिवस
प्रदेस म काली उनतीस अगस्त के राष्ट्रीय कृमि मुक्ति दिवस मनाय जाही। ए दउरान एक बछर ले उन्नीस बछर तक के जम्मों लइका अउ किशोर-किशोरी मन ल आंगनबाड़ी केन्द्र, सरकारी स्कूल, स्वास्थ्य केन्द्र अउ तकनीकी सिक्षा संस्थान मन म कृमि के दवई खवाय जाही।
शिशु स्वास्थ्य कार्यक्रम के उप संचालक डॉक्टर व्ही.आर. भगत ह बतईन कि प्रदेस म एक करोड़ सात लाख संतानवे हजार लइका अउ किशोर-किशोरी मन ल कृमिनाशक दवई खवाय के लक्ष्य राखे गेहे।
खेल अलंकरण समारोह
रईपुर के पंडित दीनदयाल उपाध्याय ऑडिटोरियम म काली खेल अउ युवा कल्याण विभाग कोति ले राज्य खेल अलंकरण समारोह के आयोजन करे जाही। समारोह म मुख्यमंत्री विष्णुदेव साय ह राज्य के प्रतिभावान खिलाड़ी मन ल इनाम दीहीं। मुख्यमंत्री ह बछर दू हजार इक्कीस-बाईस अउ बाईस-तेईस बर संतानवे खिलाड़ी मन ल छिहत्तर लाख रूपिया के पुरस्कार राशि दीहीं। उहें, पांच सौ दू पदक विजेता खिलाड़ी मन ल साठ लाख तैंतीस हजार रूपिया उंखर बैंक खाता म ट्रांसफर करही। कारीकरम के अध्यक्षता विधानसभा अध्यक्ष डॉक्टर रमन सिंह ह करही।
माओवादी-ग्रामीण हत्या
बीजापुर जिला म माओवादी मन ह एक पुलिस जवान के भाई के हत्या कर दीन। बताय जात हे कि तिमेनार गांव के किसान कारम सन्नू पाछु रतिहा अपन घर तीर बइठे रिहीस। इही बेरा कुछेक हथियार बंद माओवादी उहां पहुंचीन अउ ओखर हत्या कर दीन। मउत होय कारम सन्नू के भाई दंतेवाड़ा म प्रधान आरक्षक के पद म हवय।
जवान-खुदकुशी
भिलाई रिसाली के ट्रांजिट कैम्प म तैनात एस.एस.बी. के जवान ह पाछु रतिहा खुद ल गोली मारके आत्महत्या कर लीस। मउत होय जवान ह हरियाणा के रहवइया रिहीस अउ ओमन एस.एस.बी. के अट्ठाईसवां बटालियन म पदस्थ रिहीस। ड्यूटी के बेरा जवान ह अपन सर्विस रायफल ले खुद ल गोली मार लीस, जेखर ले ओखर मउकाच म मउत होगे।
दुर्घटना
कोरबा जिला म एक तेज रफ्तार कार ह पांच झन ल चपेट म ले लीस, जेमा एक मनखे के मउकाच म मउत होगे। उहें, एक आने मनखे ह अस्पताल म इलाज के बेरा दम तोड़ दीस। बताय जात हे कार चलइया सी.एस.ई.बी. म पदस्थ करमचारी के बेटा हवय।
खबर के मुताबिक कोरबा के निहारिका मुख्य मार्ग म लापरवाही ले गाड़ी चलावत सी.एस.ई.बी. कर्मी के बेटा ह दू ठिन फटफटी ल पाछु ले टक्कर मार दीस। ए घटना म तीन झिन आने मनखे गंभीर रूप ले घायल होगे, जिखर इलाज अस्पताल म चलत हे। कोरबा के पुलिस अधीक्षक ह बतईन कि दुर्घटना के बाद आरोपी ह थाना म सरेंडर कर दीस।
ठगी आरोपी-गिरफ्तार
लाखों रूपिया के ठगी करे के मामला म सरगुजा मार्ट कंपनी के मुख्य डायरेक्टर लता खुंटे ल जशपुर पुलिस ह गिरफ्तार करे हे। आरोपी ल प्रोडक्शन वारंट म अंबिकापुर जेल लाय गेहे अउ ओखर संपत्ति के जांच करके अटैच कराय के कार्रवाई करे जात हे। एखर पहिली कंपनी के डिप्टी डायरेक्टर निशांत तिर्की अउ एरिया मैनेजर फ्रांसिस पन्ना ल पुलिस ह गिरफ्तार करे हे। ए कंपनी म सस्ता कीमत बोर खनन के नाव म लोगन ले लाखों रूपिया के ठगी करे के आरोप हे।
रंग-तरंग
रईपुर के महंत घासीदास स्मारक संग्रहालय परिसर म काली ले ‘रंग तरंग‘ कारीकरम राखे जाही। संस्कृति विभाग डहार ले राखे गे ए तीन दिवसीय कारीकरम म छत्तीसगढ़ के लोक पारम्परिक वाद्ययंत्र अउ आने-आने वाद्ययंत्र के प्रस्तुति दे जाही। ए आयोजन मुक्ताकाशी मंच म हरेक दिन संझा सात बजे ले सुरू होही। संस्कृति विभाग के चिन्हारी पोर्टल म पंजीयन कराय इच्छुक कलाकार अउ संस्था अपन प्रस्ताव संचालनालय संस्कृति अउ राजभाषा, सेक्टर-सत्ताईस नवा रईपुर म जमा कर सकत हे।
सौम्या चौरसिया-याचिका खारिज
कथित कोयला घोटाला मामला म छत्तीसगढ़ उच्च न्यायालय ह राज्य प्रशासनिक सेवा के निलंबित अधिकारी सौम्या चौरसिया के जमानत याचिका तीसर घांव खारिज कर देहे। हाईकोर्ट ह चौम्या चौरसिया के जमानत याचिका म फैसला सुरक्षित राखे हे। मामला के सुनवाई करत न्यायमूर्ति एन.के. व्यास ह जमानत याचिका खारिज कर दीन। राज्य के उप महाधिवक्ता अउ ईडी के विशेष लोक अभियोजक सौरभ कुमार पांडेय ह जमानत खारिज करे जाय संबंधी हाईकोर्ट के आदेश के पुष्टि करे हे।
मंकी पॉक्स-दिशा-निर्देश
प्रदेस के स्वास्थ्य मंत्री श्यामबिहारी जायसवाल ह सबो जिला के स्वास्थ्य अधिकारी मन ल मंकी पॉक्स ले बचाव अउ रोकथाम बर केन्द्र सरकार ले जारी करे दिसा-निरदेस ल बने ढंग ले पालन करे के निरदेस दीन हे। ओमन स्वास्थ्य विभाग के अधिकारी मन ल सबो विकासखंड अउ ग्राम पंचायत म सिविर लगाके लोगन ल मंकी पॉक्स के संक्रमण अउ बचाव बर जागरूक करे बर किहीन।
खबर के मुताबिक आने-आने देस म मंकी पॉक्स संक्रमण के बढ़वार ल देखत केन्द्रीय स्वास्थ्य मंत्रालय कोति ले निगरानी, जांच अउ उपचार बर दिसा-निरदेस जारी करे गेहे।
अउ अब जानन मौसम के हाल…
मौसम विभाग के मुताबिक पूर्व मध्य बंगाल के खाड़ी अउ ओखर तीर-तखार के क्षेत्र के ऊपरी हवा म एक चक्रीय चक्रवाती घेरा बने हे। संगेसंग चौबीस घंटा म एक निम्नदाब के क्षेत्र उत्तर अउ पूर्व मध्य बंगाल के खाड़ी के उपर बने के संभावना हवय, जेखर प्रभाव ले प्रदेस म काली कतकोन जघा म हल्का ले मध्यम बरसा होय अउ गरज-चमक के संग छींटा-बौछार पड़े के आसार हवय। उहें, एक-दू जघा म भारी बरसा हो सकत हे।