देश म डॉक्टर अउ स्वास्थ्य कर्मी मनके कामकाज के जगह मन म सुरक्षा देवाय खातिर सर्वोच्च न्यायालय डहार ले बनाय गे राष्ट्रीय कार्यबल-एनटीएफ के पहिली बइठका आज दिल्ली म राखे गीस। कैबिनेट सचिव के अगुवई म होय ए बइठका म कई ठन मुद्दा उपर गोठबात करे गीस अउ सदस्य मन ह अपन सुझाव दीन। स्वास्थ्य मंत्रालय ह डॉक्टर अउ स्वास्थ्य कर्मी मनके सुरक्षा के बारे म एनटीएफ बर सुझाव मांगे बर सुझाव शीर्षक ले एक ठन राष्ट्रीय पोर्टल बनाय हे। मंत्रालय ह राज्य सरकार मन ले उंखर यहां चिकित्सा संस्थान मन म सुरक्षा उपाय के बारे म जानकारी देके अनुरोध घलो करीन हे। पोर्टल म मिले सुझाव ल स्वास्थ्य मंत्रालय राष्ट्रीय कार्यबल के सदस्य मन ल भेजे जाही। एखर बाद एनटीएफ सदस्य मनके संग केन्द्रीय स्वास्थ्य सचिव ह कई झन प्रमुख हितधारक मनके संग गोठबात करही।
उहें, काली वीडियो कॉन्फ्रेंस के माध्यम ले राज्य के मुख्य सचिव अउ पुलिस महानिदेशक के संग डॉक्टर मनके सुरक्षा के संबंध म अल्पकालिक उपाय उपर गोठबात करे जाही।
केन्द्र लोक शिकायत प्रणाली
केन्द्र सरकार ह लोक शिकायत के समयबद्ध, सुगम अउ सार्थक तरीका ले निवारण बर दिसा-निरदेस जारी करे हे। कार्मिक, लोक शिकायत अउ पेंशन मंत्रालय ह किहीन हे कि सार्वजनिक शिकायत के प्रभावी तरीका ले निराकरण करे बर जारी करे गे दिसा-निरदेस ह मनखे मन ल ससक्त करही अउ ए प्रक्रिया ल सरल अउ कारगर बनाय जाही।
लोगन मन ह अपन सिकायत ल डब्ल्यू डब्ल्यू डब्ल्यू डॉट पीजी पोर्टल डॉट जीओवी म दर्ज करा सकत हे। ए पोर्टल ह सिकायत के निपटारा बर सिंगल विंडो सुविधा के रूप म काम करही। केन्द्रीय मंत्रालय अउ विभाग मन ल ए सिकायत के झटकुन निराकरण करे खातिर नोडल अधिकारी नियुक्त करे बर पड़ही। ओमन ल एखर बर एक ठन सिकईत सेल बनाय बर केहे गेहे, जउन ह आधुनिक संसाधन के जानकारी रखय। निपटाय गे सिकायत के बारे म जानकारी लोगन मन ल एसएमएस अउ ई-मेल के माध्यम ले भेजे जाही।
इंदर सिंह उबोवेजा-शपथ
राज्यपाल रमेन डेका ह आज राजभवन म न्यायमूर्ति सेवानिवृत्त इंदर सिंह उबोवेजा ल छत्तीसगढ़ लोक आयोग के प्रमुख लोकायुक्त पद के सपथ देवईन। अतिरिक्त मुख्य सचिव रेणु पिल्ले ह सपथ प्रक्रिया ल पूरा करईन। ए मउका म मुख्यमंत्री विष्णुदेव साय, विधानसभा अध्यक्ष डॉक्टर रमन सिंह, सांसद बृजमोहन अग्रवाल, पूर्व सांसद सुनील सोनी के संगेसंग कई झन जनप्रतिनिधि अउ बड़का अधिकारी मन ह मौजूद रिहीन।
भाजपा सदस्यता अभियान
भारतीय जनता पार्टी डहार ले दू सितंबर ले सदस्यता अभियान के सुरूवात करे जाही। नई दिल्ली म आज मीडिया ल जानकारी देवत भाजपा के महासचिव विनोद तावड़े ह बतईन कि अभी जम्मों झन सदस्य मन ल अपन सदस्यता के नवीनीकरण कराय बर पड़ही। ओमन किहीन कि प्रधानमंत्री नरेन्द्र मोदी ह दू सितंबर के पार्टी अध्यक्ष जे.पी. नड्डा ले अपन सदस्यता ग्रहण करही। एखर बाद देसभर म सदस्यता अभियान के सुरूवात करे जाही। श्री तावड़े ह बतईन कि भारतीय जनता पार्टी के संविधान के मुताबिक हरेक पांच बछर म एक घांव सदस्यता अभियान चलाथे। ए सदस्यता अभियान के पहिली चरण ल पच्चीस सितंबर तक चलाय जाही।
उहें, छत्तीसगढ़ म तीन सितंबर ले सदस्यता अभियान के सुरूवात करे जाही। भारतीय जनता पार्टी के प्रदेस अध्यक्ष किरण सिंह देव ह मुख्यमंत्री विष्णुदेव साय ल सबले पहिली सदस्यता देवाही। एखर बाद छह सितंबर ले जम्मों बूथ मन म ए अभियान के सुरूवात करे जाही।
भिलाई-प्रदर्शन
भिलाई म आज थाना घेरे बर जावत कांग्रेस कार्यकर्ता मनके पुलिस के संग झड़प होय के खबर हे। पुलिस ह ए बेरा लाठीचार्ज घलो करीस। मिले जानकारी के अनुसार भिलाई-तीन म आज सिरसा गेट के तीर कांग्रेस नेता अउ कार्यकर्ता मन ह प्रदर्सन करत रिहीन। एखर बाद ए कार्यकर्ता मन ह थाना घेरे के तैयारी म रिहीन। एखर पहिली पुलिस ह बल प्रयोग करके प्रदर्सनकारी मन ल धरनास्थल ले हटा दीन। ए बेरा पुलिस अउ प्रदर्शनकारी मनके बीच झड़प होइस, जेमा जामुल थाना प्रभारी ल चोट लगे हे, ओमन ल इलाज बर अस्पताल भेजे गीस।
एखर पहिली, आज पुलिस के टीम चरौदा नगर निगम के सभापति कृष्ण चंद्राकर ल गिरफ्तार करे बर ओखर निवास पहुंचे रिहीस। फेर ओखर गिरफ्तार नइ हो पईस। आरोप हे कि कृष्ण चंद्राकर अउ कुछु कांग्रेसी कार्यकर्ता मन ह काली दू भाजपा कार्यकर्ता मनके संग मारपीट करे रिहीन। एखर बाद भिलाई जिला भाजपा अध्यक्ष महेश वर्मा अउ विधायक रिकेश सेन के नेतृत्व म भाजपा कार्यकर्ता मन ह काली देर रात भिलाई-तीन थाना के घेराव करे रिहीन। एखर बाद पुलिस ह कृष्ण चंद्राकर अउ घटना म सामिल अन्य कांग्रेस कार्यकर्ता मनके खिलाफ अपहरण के मामला दर्ज करे रिहीस।
देवेन्द्र यादव-रिमांड
कांग्रेस विधायक देवेन्द्र यादव के न्यायिक रिमांड अवधि ल सात दिन बर अउ बढ़ा दे गेहे। रिमांड खतम होय के बाद रईपुर के जेल म बंद विधायक देवेन्द्र यादव के आज वीडियो कॉन्फ्रेंसिंग के माध्यम ले पेसी होइस हे। एखर बाद बलौदाबाजार कोर्ट ह तीन सितंबर तक उंखर रिमांड ल बढ़ा देहे। खबर के मुताबिक बलौदाबाजार म कलेक्टर अउ पुलिस अधीक्षक के आफिस म होय आगजनी अउ तोड़फोड़ के मामला म पुलिस डहार ले पाछु सत्रह अगस्त के कांग्रेस विधायक देवेन्द्र यादव ल गिरफ्तार करे गे रिहीस।
सूरजपुर/जगदलपुर-हादसा
सूरजपुर म काली संझौती बेरा एक ठन मकान के दीवाल गिरे ले दू झन लइका अउ एक झन सियान माईलोगिन के मउत होगे। खबर के मुताबिक जयनगर थाना क्षेत्र के फतेहपुर-करतमा गांव म ए घटना घटे हे। बताय जात हे कि ए गांव म एक ठन कच्चा मकान म एक झन सियान माईलोगिन अपन नतनीन मनके संग घर म रिहीन हे अउ लइका के दाई-ददा म खेत म काम करे बर गे रिहीन। उही समे घर के दीवाल गिरे ले ए तीनो झन मनखे मन ह दब गे रिहीन, जेखर बाद ए तीनों झन मनखे ल अस्पताल म भर्ती कराय बर लेगे गे रिहीन, जिहां डॉक्टर मन डहार ले जांच करे के बाद मृत घोसित कर दे गीस।
ओति, जगदलपुर के पिपलावंड गांव म डबरी तरिया म बुढ़े ले दू झन आदिवासी लइका मनके मउत होगे। बताय जात हे कि ए दूनों झन लइका मन ह अपन महतारी के संग नल म पानी भरे बर गे रिहीस हे। थोरिक देर बाद ओ लइका मन ह बाजू के तरिया म डूब गे।
रामलला दर्शन योजना
श्रीराम लला दर्शन योजना के तहत आज राजधानी रईपुर ले आठ सौ पचास झन भगत मन ल अयोध्याधाम बर रवाना करे गीस। राजस्व मंत्री टंकराम वर्मा ह रईपुर रेलवे स्टेसन म रेलगाड़ी ल हरियर झंडा देखाके रवाना करीन। ए मउका म विधायक मोतीलाल साहू, पूर्व विधायक रंजना डीपेन्द्र साहू, नन्दे साहू, सीएसआईडीसी के पूर्व अध्यक्ष छगनलाल मुंदड़ा के संगेसंग बहुत झन जनप्रतिनिधि मन ह मौजूद रिहीन।
मवेशी तस्करी-आरोपी गिरफ्तार
जांजगीर-चांपा सिटी कोतवाली पुलिस के टीम डहार ले ट्ररक म भरे बीस ठन मवेसी मनके संग दू झन आरोपी ल गिरफ्तार करे गीस। पुलिस के मुताबिक आरोपी मन ह ए मवेसी मन ल ओड़िसा लेगत रिहीन हे। पुलिस ह दूनों झन आरोपी उपर पशु क्रूरता अधिनियम के तहत मामला दरज करके ओमन ल जेल भेज दे गेहे। ए दूनों झन आरोपी मन ल उत्तरप्रदेश कानपुर के रहइया बताय जात हे।
कृषि विवि-संगोष्ठी
राजधानी रईपुर के इंदिरा गांधी कृषि विश्वविद्यालय म उनतीस अउ तीस अगस्त के कृषि अभियंता मनके छत्तीसवां राष्ट्रीय सम्मेलन अउ संगोष्ठी के कारीकरम करे जाही। ‘सतत विकास के लिए ग्रामीण अर्थव्यवस्था म सुधार हेतु कृषि अभियंताओं का योगदान‘‘ बिसय उपर ए कारीकरम ल करे जाही। ए कारीकरम के सुरूवात विधानसभा अध्यक्ष डॉक्टर रमन सिंह ह करही। उहें, कारीकरम के अगुवई कृषि मंत्री रामविचार नेताम ह करही। कारीकरम म वर्तमान समे म आधुनिक खेती-किसानी उपर चर्चा करे जाही।
अउ अब थोरकुन समाचार सार म –
– भारतीय डाक विभाग रईपुर मंडल डहार ले एक ठन प्राईवेट संस्था के मदद ले नवा आधार कार्ड के पंजीयन अउ सुधार बर इकतीस अगस्त अउ एक सितंबर के नवा रईपुर म एक ठन कैम्प के आयोजन करे जाही।
अउ
– राजनांदगांव म लोगन मन ल डरवाय अउ धमकाय के आरोप म एक झन मनखे ल पुलिस ह गिरफ्तार करीन। ए आरोपी तीर ले एक ठन देसी कट्टा घलो बरामद करे गेहे।