राज्य सरकार ह ऑनलाइन महादेव सट्टा ऐप के जांच सीबीआई ल सौंपे खातिर अधिसूचना जारी कर दे हवय। उपमुख्यमंत्री अउ गृहमंत्री विजय शर्मा ह बतइन कि ए मामला म प्रदेस के आने-आने थाना, ईओडब्ल्यू अउ ए.सी.बी. म दर्ज जम्मो 70 ठिन केस सीबीआई ल ट्रांसफर करे के प्रक्रिया सुरू कर दे गे हवय। ओमन बतइन कि केंद्रीय जांच ब्यूरो जल्दी मामला के जांच सुरू करही।
गौरतलब हे कि प्रवर्तन निदेसालय-ईडी ह ए मामला म 11 झिन लोगन मन ल गिरफ्तार करीन हवय।
माओवादी-आत्मसमर्पण
बीजापुर जिला म 25 झिन माओवादी मन ह आत्मसमर्पण कर दीन हे। 29 लाख रूपिया के इनामी ए माओवादी मन ह पुलिस अधीक्षक अउ सीआरपीएफ के डीआईजी के आगू आत्मसमर्पण करीन।
पुलिस अधीक्षक जितेन्द्र कुमार यादव ह बतइन कि आत्मसमर्पण करइया 3 झिन माओवादी मन उपर 8-8 लाख, एक माओवादी उपर 3 लाख अउ दू एल.ओ.एस. सदस्य मन उपर एक-एक लाख रूपिया के इनाम घोसित रिहीस। ओमन बतइन कि ए जम्मो माओवादी मन टेकलु गुड़ेम, मिनपा अउ गंगालूर म होय माओवादी घटना मन म सामिल रिहीन। ए घटना म उनतालिस जवान मन सहीद होगे रिहीन। पुलिस अधीक्षक ह बतइन कि राज्य सरकार के पुर्नवास नीति के चलत जम्मो खुद समर्पण करे माओवादी मन ल 25-25 हजार रूपिया दे गीस।
युनिफाइड पेंशन स्कीम-प्रेसवार्ता
केंद्र सरकार के यूनिफाइड पेंसन स्कीम-यू.पी.एस. के संबंध म दक्षिण पूर्व मध्य रेलवे के रईपुर रेल मंडल म आज बिस्तार ले जानकारी दे गीस। ए संबंध म अपर मंडल रेल प्रबंधक बजरंग अग्रवाल, वरिष्ठ मंडल वाणिज्य प्रबंधक अवधेश कुमार त्रिवेदी, मंडल कार्मिक अधिकारी राहुल गर्ग अउ मंडल वित्त प्रबंधक शिवाशिष कुमार ह प्रेसवार्ता लेके योजना के मुख्य बात के जानकारी दीन।
अधिकारी मन बतइन कि कर्मचारी मनके 25 बछर के न्यूनतम सेवा पूरा होय म रिटायर के पहिली आखिरी बारह महिना म मिले औसत मूल वेतन के 50 प्रतिसत निश्चित पेंसन के रूप म दे जाही। ओमन बतइन कि ए वेतन कम से कम 10 बछर के सेवा के बेरा तक कम सेवा अवधि खातिर अनुपातिक होही। उहें, सुनिश्चित परिवारिक पेंसन के रूप म कर्मचारी के मउत ले ठीक पहिली ओखर पेंसन के 60 प्रतिसत दे जाही। पत्रकारवार्ता म बताय गीस कि सुनिश्चित न्यूनतम पेंसन के रूप म कम से कम 10 बछर के सेवा के बाद रिटायर होय म 10 हजार रूपिया हर माह दे जाही।
उहें, औद्योगिक श्रमिक मन खातिर अखिल भारतीय उपभोक्ता मूल्य सूचकांक के आधार म महंगाई राहत दे जाही। एखर अलावा सैन्य कर्मचारी मनके मामला म रिटायर होय के बेरा ग्रेच्युटी के अलावा एकमुस्त भुगतान, सेवा के हरेक पूरा करे गे 6 महिना खातिर, रिटायर होय के तारिख म वेतन अउ डीए के 10वां हिस्सा दे जाही। ए भुगतान ले सुनिश्चित करे गे पेंसन के धनरासि कम नइ होही।
सरकार-फर्जी लिंक खंडन
केंद्र सरकार ह वित्त मंत्रालय ले 46 हजार रूपिया ले जादा के वित्तीय सहायता देवय के दावेदारी करइया लिंक ल फर्जी बताय हे। एक ठिन सोसल मीडिया पोस्ट म सूचना अउ प्रसारण मंत्रालय के फैक्ट चेक इकाई ह फर्जी समाचार के भंडाफोड़ करीन हे। इकाई ह बतइन कि एखर संचालन गरीबहा मन ल वित्तीय सहायता देवय के आड़ म मैसेजिंग ऐप के जरिया करे गे हवय। संदेस प्राप्त करइया मन ल एक ठिन फर्जी लिंक के जरिया अपन खुदके जानकारी देबर केहे गे हवय। मंत्रालय ह अइसन कोनो भी दावेदारी के खंडन करत ए लिंक ल फर्जी बताय हवय।
जवान-मौत
दंतेवाड़ा जिला के बारसूर थाना क्षेत्र के केंद्रीय रिजर्व पुलिस बल- सी.आर.पी.एफ. कैंप म पदस्थ एक झन जवान ह खुदेच ल गोली मारके आत्महत्या कर लीन। मिले जानबा के मुताबिक सी.आर.पी.एफ. के एक सौ पंचानवीं बटालियन के जवान विपिन्द्र चंद्र ह आज बिहनिया अपन बैरक म एके-सैंतालीस रायफल ले खुद के उपर फायर कर दीस। घायल जवान ल तुरते दंतेवाड़ा जिला अस्पताल पहुंचाय गीस, जिहां डॉक्टर मन ह ओला मृत घोसित कर दीन।
जन्माष्टमी
भगवान श्री कृष्ण के जन्मोत्सव, जन्माष्टमी आज छत्तीसगढ़ समेत देस के आने-आने जघा मन म श्रध्दा अउ आस्था के संग मनाय जावत हे। ए मउका म प्रदेस के कृष्ण मंदिर मन म जन्मोत्सव बर जरूरी तियारी करे गे हवय। मंदिर अउ घर मन म आज रतिहा भगवान श्रीकृष्ण के बिसेस रूप ले पूजा-पाठ करके जन्मोत्सव मनाय जाही। भगवान श्रीकृष्ण ल माखन-मिश्री के संग आने कई ठिन चीज के भोग लगाय जाही।
इही बीच, राजधानी रईपुर म घलो श्रीकृष्ण मंदिर मन म बिसेस साज-सज्जा करे गेहे। मंदिर मन ल रंग-बिरंगा रोसनी ले सजाय गे हवय। ए मउका म श्रीकृष्ण के बाल-गोपाल रूप के श्रृंगार कर बिसेस कपड़ा पहिराय जाही। राजधानी म टाटीबंध के इस्कॉन मंदिर, समता कॉलोनी के राधा-कृष्ण मंदिर अउ मठपारा के दूधाधारी मठ म बिहनियच ले श्रध्दालु मनके भीड़ लगे हुए हे।
राष्ट्रपति द्रौपदी मुर्मू, उपराष्ट्रपति जगदीप धनखड़, प्रधानमंत्री नरेंद्र मोदी अउ छत्तीसगढ़ के मुख्यमंत्री विष्णुदेव साय ह लोगन मन ल जन्माष्टमी के अपन सुभकामना दीन हे।
राज्य स्तरीय-उल्लास मेला
मुख्यमंत्री विष्णुदेव साय अंतर्राष्ट्रीय साक्षरता दिवस के मउका म अवइया 8 सितंबर के राज्य स्तरीय उल्लास मेला म ‘उल्लास साक्षरता‘ अभियान के सुरूआत करही। राज्य साक्षरता मिसन प्राधिकरण एस.सी.ई.आर.टी. के संचालक राजेन्द्र कटारा ह बतइन कि राजधानी रईपुर के पंडित दीनदयाल उपाध्याय ऑडिटोरियम म आयोजित होवइया राज्य स्तरीय उल्लास मेला म प्रदेस के आने-आने जिला ले चुने गे दस ठिन स्टाल लगाय जाही। उल्लास साक्षरता अभियान के सुरूआत कारीकरम अउ मेला के प्रसारण सोसल मीडिया के जरिया जम्मो ब्लाकमुख्यालय अउ पंचायत स्तर म करे जाही। ओमन किहीन कि उल्लास कारीकरम म ब्रान्ड एम्बेसडर घलो बनाय जाही। साक्षरता अभियान म योगदान देवइया दसवीं अउ बारहवीं बोर्ड परीक्षा के पढ़इया लइका मन ल बोनस अंक घलो दे जाही।
आईटीबीपी-फील्ड अस्पताल
माओवाद प्रभावित नारायणपुर जिला के अबूझमाड़ म भारतीय तिब्बत सीमा पुलिस बल -आईटीबीपी के तिरपनवीं वाहिनी डहार ले सीओबी आकाबेड़ा म 6 बिस्तर वाले फील्ड अस्पताल बनाय गे हवय। आईटीबीपी के महानिदेसक राहुल रसगोत्रा ह काली 25 अगस्त के अस्पताल के वर्चुअल उद्घाटन करीन। एखर ले जिहां स्थानीय रहइया मन ल अच्छा स्वास्थ्य सुविधा मिलही। उहें, सुरक्षाकर्मी मन ल घलो फायदा होही।
दुर्घटना
दुरूग जिला के पाटन थाना क्षेत्र म काली संझा होइस एक सड़क दुर्घटना म दू झिन लोगन मनके मउत होगिस। उहें, दू झिन आने मनखे मन घायल होगिन हवय, जेमन ल अस्पताल म भर्ती कराय गे हवय। पाटन थाना प्रभारी अनिल साहू ह बतइन कि एक ठिन चारपहिया गाड़ी गांव अरसनारा चौक के तीर अंते-तंते होके पेड़ ले टकरा गीस। ए हादसा म गाड़ी चलइया अउ एक झन आने मनखे के मउत होगिस।
आसिफ अली-गोल्ड मेडल
भिलाई के पावर लिफ्टर आसिफ अली ह राष्ट्रीय पॉवर लिफ्टिंग प्रतियोगिता म गोल्ड मेडल जीते हे। कोलकाता म 20 ले 25 अगस्त तक आयोजित पचासवां गोल्डन जुबली, सीनियर राष्ट्रीय पॉवर लिफ्टिंग प्रतियोगिता के आखिरी दिन 120 किलो हैवी वेट वर्ग म आसिफ अली ह कुल 760 किलो वजन उठाके बेंचप्रेस म स्वर्ण पदक हासिल करीन। छत्तीसगढ़ ओलंपिक संघ ह जीते के खुसी म आसिफ अली ल बधई दीन हे।
अउ अब थोरकुन समाचार सार म –
– बालोद जिला के संजारीचौकी क्षेत्र के खेरथा बाजार गांव म सरपंच विक्रम सिन्हा के हत्या कर देगे हवय। पुलिस ह आरोपी पोस्टमास्टर रामजी प्रजापति ल गिरफ्तार कर लेहे।
– राजनांदगांव के एक ठिन बेपारी ले केवाईसी अपडेट करे के नांव म 3 लाख 70 हजार रूपिया के ठगी करे के मामला आगू आय हवय। पुलिस ह ए मामला के जांच करत हे।