आज दिनभर के खबर ल अपन गुरतुर छत्तीसगढ़ी भाखा म पढ़व

आज आकाशवाणी ले ‘मन की बात‘ कारीकरम म प्रधानमंत्री नरेंद्र मोदी ह किहीन कि देस के जवान लइका मन ल अंतरिक्ष क्षेत्र म सुधार होय ले काफी फायदा होय हे। ओमन यहू किहीन कि ए महिना तेइस तारिख के देसवासी मन पहलइया राष्ट्रीय अंतरिक्ष दिवस अउ चंद्रयान-तीन के सफलता के तिहार मनाइन हे। प्रधानमंत्री ह किहीन कि ए उपलब्धि हासिल करइया भारत ह विश्व के पहलइया देस बन गेहे। ओमन किहीन कि स्पेस इको-सिस्टम ह बहुत जीवंत होवत हे। उहें, श्री मोदी ह स्पेस टैग स्टार्टअप गैलैक्सआई के सदस्य मन संग गोठबात घलो करीन।
श्री मोदी ह किहीन कि ए बछर लालकिला ले ओमन गैर राजनीतिक बैग्राउण्ड वाले एक लाख जवान लइका मन ले राजनीतिक व्यवस्था म जुरे के आरो दे रिहीन। जेखर ए लइका मन उपर जबरदस्त प्रभाव पड़े हे, अउ बड़ भारी संख्या म जवान लइका मन राजनीति म आय बर तइयार हे।
‘मन की बात‘ कारीकरम म प्रधानमंत्री ह हर घर तिरंगा अभियान बारे म घलो अपन बात राखिन। ओमन किहीन कि स्वतंत्रता दिवस ह अब एक ठिन सामाजिक परब घलो बनत जात हे। लोगन मन अपन घर-दुवार ल तिरंगा हार ले सजावत हे। स्व-सहायता ले जुड़े नारी प्राणी मन लाखो झंडा तइयार करथे। उहें, ई-कामर्स प्लेटफार्म म घलो तिरंगा म रंगे जिनिस मनके बिक्री बाढ़ जाथे।
प्रधानमंत्री ह लोगन मन ले बरसा के पानी ल सकेले वाले कैच द रेन मुमेंट अउ  ‘एक पेड़ मां के नाम‘ ए अभियान म  भाग लेके आग्रह करीन।
प्रधानमंत्री ह किहीन कि हमार परिवार समाज अउ देस के भविष्य ह हमर लइका मनके सेहत उपर निर्भर हे, अउ उंखर बढ़िया सेहत बर जरूरी हे, कि ओमन ल बने पोषण मिलत रहय।
प्रधानमंत्री मोदी ह पेरिस म होवइया पैरा ओलंपिक बर लोगन मन ले ‘हैस टैग चियर फॉर भारत‘ के संगे खिलाड़ी मनके उत्साह बढ़ाय के आह्वान करीन।

 

केंद्रीय गृहमंत्री-छत्तीसगढ़-01

केंद्रीय गृहमंत्री अउ सहकारिता मंत्री अमित शाह ह आज नवा रईपुर के नार्कोटिक्स कंट्रोल ब्यूरो के कार्यालय के उद्घाटन करीन। एखर बाद श्री शाह ह छत्तीसगढ़ म नसीला पदार्थ मन के रोकथाम बर समीक्षा बइठका घलो लीन। ए मउका म मुख्यमंत्री विष्णुदेव साय, केंद्रीय गृह राज्यमंत्री नित्यानंद राय अउ उप मुख्यमंत्री विजय शर्मा घलो उपस्थित रिहीन।
ए दौरान केंद्रीय गृहमंत्री श्री शाह ह अधिकारी मन ले किहीन कि ड्रग्स तस्करी के जांच ल वैज्ञानिक तरीका ले करय। टॉक टू बाटम अप्रोच ल स्वीकार करे ल पढ़ही। एक ठन दुकान म नसा के पुड़िया आही, त पता करना होही कि ए ह देस म कहा ले आय हे अउ कहा बने हे। केंद्रीय गृहमंत्री ह किहीन कि छत्तीसगढ़ ह सात ठिन राज्य मनके सीमा ले जुड़े हवय। उहें, बंगाल के खाड़ी के तीर म हवय। ओडिसा अउ आंध्रप्रदेस के समुद्री रस्ता ह घलो ड्रग्स बर एक ठिन रद्दा तैयार करथे। गांजा के तस्करी आंध्रा अउ ओडिसा सीमा ले होथे। नार्कोटिक्स ले अर्जीत करे गे धन ल आतंकवादी अउ नक्सलवादी मन काम म लेथे। एखरे सेति केंद्रीय एजेंसी के मदद ले एखर उपर रोकथाम जरूरी हे।
उहें, केंद्रीय गृहमंत्री अमित शाह आज नवा रईपुर म ‘प्यूपल फॉर पीपल‘ अभियान के चलत ‘एक पेड़ मां के नाम‘ ए कारीकरम म पीपल के पउधा लगइन। कारीकरम म श्री शाह ह स्मार्ट सिटी परियोजना के चलत करीबन दू सौ चार करोड़ रूपिया के कई ठिन विकास काम के उद्घाटन करीन।
एखर पहिली गृहमंत्री ह काली रईपुर म माओवाद प्रभावित राज्य मनके अंतर्राज्यीय समन्वय समिति के बइठका म किहीन कि माओवादी मनके खिलाफ लड़ई ह अब अंतिम चरण म हे। ओमन बतइन कि मार्च दू हजार छब्बीस तक नक्सल समस्या ले देस ह पूरा तरह ले मुक्त हो जही। छत्तीसगढ़ सरकार ह आत्मसमर्पण करइया माओवादी मन बर बहुत जल्द एक ठिन नवा आत्मसमर्पण नीति लेके आही।

केंद्रीय गृह अउ सहकारिता मंत्री अमित शाह के पगरइती म आज प्रदेस म सहकारिता के विस्तार ल लेके बइठका होइस। बइठका म मुख्यमंत्री विष्णुदेव साय, केंद्रीय सहकारिता राज्य मंत्री मुरलीधर माहोल, उप मुख्यमंत्री अरूण साव अउ सहकारिता मंत्री केदार कश्यप मौजूद रिहीन।
इही बीच, माओवाद प्रभावित बीजापुर जिला के पालनार कैंप के तीर-तखार के पांच ठिन गांव मनके इकतीस झिन जवान लइका मन आज केंद्रीय गृहमंत्री अमित शाह ले नवा रईपुर म मुलाकात करीन। एमा ले कई झिन जवान लइका अइसन रिहीन, जउन मन पहिली बेर बीजापुर ले राजधानी रईपुर आय रिहीन।
उहें, रईपुर के तीन दिन के दउरा बाद केंद्रीय गृहमंत्री आज नई दिल्ली बर रवाना होही।

प्रधानमंत्री-लखपति दीदी

प्रधानमंत्री नरेंद्र मोदी ह आज महाराष्ट्र के जलगांव म एक ठिन समारोह बेरा ग्यारा लाख नवा लखपति दीदी मन ल प्रमाण पत्र बांटिन। ए दौरान प्रधानमंत्री ह लखपति दीदी मन ल सम्मानित घलो करीन।
प्रधानमंत्री ह छत्तीसगढ़ के कोरिया मिलेट्स कैफे के सफलता उपर खुसी जतइन। प्रधानमंत्री ह लखपति दीदी सम्मेलन म कोरिया जिला के ग्राम पंचायत पटना के रोशनी स्व-सहायता समूह के हीना बेगम ले संवाद करीन अउ उंखर सामूहिक सफलता बर जनसमूह ले ताली बजवइन। ए दौरान हीना बेगम ह प्रधानमंत्री ल बतइन कि रोशनी स्व-सहायता समूह डहार ले चार आने समूह संग मिलके मिलेट्स कैफे चलाय जात हे।
ऐति, छत्तीसगढ़ के गौरेला-पेण्ड्रा-मरवाही जिला के डोंगरिया, सरबाहरा, पतगवा अउ सबो कलस्टर केंद्र मन म जिला के बारह ठिन एनआरएलएम संकुल संगठन मन म सात सौ लखपति बहिनी अउ सौ ठिन कैडर मन ल सम्मान पत्र  दे गीस। ए दौरान जिला मिसन प्रबंधक दुर्गा शंकर सोनी ह बतइन कि राष्ट्रीय ग्रामीण आजीविका मिसन के तहत जिला म महिला स्व-सहायता समूह मन ल आजीविका याने कमाय खाय के बड़ अकन गतिविधि बर एक सौ नौ ठिन महिला स्व-सहायता समूह मन ल करीबन दू करोड़ रूपिया ल कई ठिन बैंक के माध्यम ले लिंकेज कराय गेहे।

कांग्रेस प्रदर्शन

छत्तीसगढ़ युवा कांग्रेस डहार ले प्रदेसभर म आज जेल भरो आंदोलन करे गीस। बलौदाबाजार म होय आगजनी कांग्रेस नेता मन उपर कार्रवाही ल लेके ए प्रदर्सन करे गीस। रईपुर म प्रदेस अध्यक्ष आकाश शर्मा के अगुवई म सैकड़ो युवा कांग्रेस कार्यकर्ता गांधी मैदान ले रईपुर के केंद्रीय जेल सोज जाय के प्रयास करीन। ए दौरान पुलिस प्रदर्सनकारी मन ल बलपूर्वक छेक के कुछेक कांग्रेस के कार्यकर्ता मन ल गिरफ्तार घलो करे हे।

मुख्य न्यायाधीश-जशपुर

मुख्य न्यायाधीश रमेश सिन्हा ह आज जशपुर के तालुका न्यायालय, व्यवहार न्यायालय बगीचा अउ प्रधान जिला सत्र न्यायालय के इंसपेक्सन करीन। संगे अधिकारी अउ कर्मचारी मनके समस्या घलो सुनिन। मुख्य न्यायाधीश ह जिला सत्र न्यायालय जशपुर के फर्स्ट एड क्लिनिक, मालखाना, नान्हे लइका मन बर बनाय गे किलकारी कक्ष समेत आने कक्ष मन के घलो निरीक्षण करीन।

केंद्र-यूनिफाइड पेंशन स्कीम

केंद्रीय मंत्रिमंडल ह सरकारी कर्मचारी मन बर युनिफाइड पेंशन स्कीम यूपीएस ल मंजूरी दीस हे। एमा निश्चित पेंसन के प्रावधान राखे गेहे। केंद्रीय सूचना प्रसारण मंत्री अश्विनी वैष्णव ह मंत्रिमंडल के बइठका बाद आज नई दिल्ली म बतइन कि ए योजना ले पचीस बछर तक के सर्विस पूरा करे के बाद आखिरी बारह महिना के मूल वेतन के पचास प्रतिसत पेंसन के रूप म दे जाही। एखर संगे योजना म कर्मचारी के मउत होय बाद फैमिली पेंसन ल साठ प्रतिसत कर दे गेहे। श्री वैष्णव ह किहीन कि ए योजना ले करीबन तेइस लाख सरकारी कर्मचारी मन ल फायदा होही।

जन्माष्टमी

भगवान श्रीकृष्ण के जनम उपलक्ष्य म मनाय जाने वाला तिहार जन्माष्टमी याने आठे काली हरय। ए मउका म राजधानी रईपुर समेत प्रदेस के कृष्ण मंदिर मन म जन्मोत्सव मनाय बर सुघ्घर ढंग ले तइयारी करे जात हे।