केंद्रीय गृह मंत्री अमित शाह अपन तीन दिवसीय छत्तीसगढ़ प्रवास के दूसरइया दिन आज अलग-अलग कार्यक्रम म सामिल होइन। श्री शाह के अध्यक्षता म नवा रायपुर म माओवाद प्रभावित राज्य मनके अंतर्राज्यीय समन्वय समिति के बइठका होइस। बइठका म मुख्यमंत्री विष्णुदेव साय, केंद्रीय गृह राज्यमंत्री नृत्यानंद राय अउ उपमुख्यमंत्री अउ गृह मंत्री विजय शर्मा घलो सामिल होइन। संगेसंग बइठका म छत्तीसगढ़, झारखंड, ओडिशा, मध्यप्रदेस, आंध्रप्रदेस, तेलंगाना अउ महाराष्ट्र के मुख्य सचिव अउ पुलिस महानिदेशक के अलावा केंद्र अउ राज्य सरकार के वरिष्ठ अधिकारी मन घलो मौजूद रिहीन।
उहें, छत्तीसगढ़ प्रवास के आखिरी दिन काली केंद्रीय गृह मंत्री श्री शाह नवा रायपुर के सेक्टर-उन्नीस अटल नगर म ‘पीपल फॉर पीपल‘ अभियान के तहत ‘एक पेड़ मां के नाम‘ कार्यक्रम म सामिल होही। एखर अलावा श्री शाह नवा रायपुर म ही स्मार्ट सिटी परियोजना के तहत अलग-अलग विकास कार्य मनके उद्घाटन घलो करही। समारोह के अध्यक्षता मुख्यमंत्री विष्णुदेव साय करही।
कांग्रेस-प्रदर्शन
बलौदाबाजार हिंसा मामला म भिलाई विधायक देवेन्द्र यादव के गिरफ्तारी के विरोध म कांग्रेस ह आज प्रदेस के सबो जिला मुख्यालय मन म धरना-प्रदर्सन करीन। राजधानी रायपुर म प्रदेस अध्यक्ष दीपक बैज के नेतृत्व म सहर जिला कांग्रेस कमेटी डहार ले धरना-प्रदर्सन करे गीस।
उहें, दुर्ग म पूर्व मुख्यमंत्री भूपेश बघेल के नेतृत्व म कांग्रेस कार्यकर्ता मन ह प्रदर्सन करीन। ए दौरान कार्यकर्ता अउ पुलिस के बीच हल्का झूमाझटकी घलो होइस। धरना-प्रदर्सन ले पहिली सभा ल संबोधित करत श्री बघेल ह राज्य सरकार उपर आरोप लगाइन कि प्रदेस म विकास ठप्प हे अउ कांग्रेस नेता मन ल फर्जी मामला म गिरफ्तार करे जात हे।
एखर अलावा प्रदेस के आने-आने जिला मुख्यालय मन म घलो कांग्रेस कार्यकर्ता मन डहार ले धरना-प्रदर्सन करे जाय के खबर हे।
बलौदाबाजार घटना-आरोपी गिरफ्तार
बलौदाबाजार म पाछू दिन आयोजित धरना-प्रदर्सन म आगजनी अउ तोड़फोड़ के मामला म पुलिस ह पाछू रतिहा भिलाई ले पांच झन आरोपी मन ल गिरफ्तार करे हे। आरोपी मन ल न्यायालय म पेस करे गे, जिहां ले ओमन जेल भेज दे गेहे। बलौदाबाजार मामला म अब तक एक सौ चौरासी झन आरोपी मन ल गिरफ्तार करे जा चुके हे।
डिजिटल फसल सर्वे
एग्रीस्टेक परियोजना के तहत राज्य के सबो जिला मन म आगामी नौ सितंबर ले फसल मन के डिजिटल सर्वेक्षण करे जाही। एखर तहत पायलट प्रोजेक्ट के रूप म चयनित धमतरी, महासमुंद अउ कबीरधाम जिला के सब्बो गांव अउ दूसर जिला मनके चयनित गांव म डिजिटल फसल सर्वेक्षण होही। सर्वेक्षण के ए काम तीस सितंबर तक चलही। डिजिटल फसल सर्वेक्षण बर हर गांव म तीस झन सर्वेक्षणकर्ता मनके चयन करे जाही। एखर चयन पटवारी के माध्यम ले तहसीलदार डहार ले करे जाही। एखर बर न्यूनतम योग्यता दसवीं पास होना अनिवार्य हे। कृषि अउ विज्ञान विषय म स्नातक मन ल प्राथमिकता दे जाही। चयनित सर्वेक्षणकर्ता मन ल प्रसिक्षण सात सितंबर तक दे जाही।
राज्य स्तरीय-उल्लास मेला
मुख्यमंत्री विष्णुदेव साय ह अंतर्राष्ट्रीय साक्षरता दिवस के अवसर म आगामी आठ सितंबर के राज्य स्तरीय उल्लास मेला म ‘उल्लास साक्षरता‘ अभियान के सुभारंभ करही। राज्य साक्षरता मिसन प्राधिकरण-एससीईआरटी के संचालक राजेन्द्र कटारा ह बतइन कि राजधानी रायपुर के पंडित दीनदयाल उपाध्याय ऑडिटोरियम म आयोजित करे जात राज्य स्तरीय उल्लास मेला म प्रदेस के अलग-अलग जिला ले चयनित गतिविधि मन के दस स्टॉल लगाय जाही।
स्वाइन फ्लू-इलाज
मुख्यमंत्री विष्णुदेव साय ह प्रदेस म स्वाइन फ्लू के बाढ़त संक्रमण ल देखत हुए स्वास्थ्य विभाग ल अलर्ट रहिके अस्पताल मन म पर्याप्त इंतेजाम करे के निरदेस देहे। उहें, स्वास्थ्य विभाग ह स्वाइन फ्लू समेत मौसमी बीमारी मन ले बचाव अउ रोकथाम बर लोगन मन ल सतर्क रहे के अपील करे हे।
मन की बात
प्रधानमंत्री नरेंद्र मोदी काली बिहनिया ग्यारा बजे आकाशवाणी ले ‘‘मन की बात‘‘ कार्यक्रम म देस-विदेस के लोगन मन संग अपन विचार साझा करही। कार्यक्रम के ए ह एक सौ तेरहवीं कड़ी होही। कार्यक्रम आकाशवाणी अउ दूरदर्शन के जम्मो नेटवर्क, आकाशवाणी समाचार वेबसाइट अउ न्यूज ऑन एआईआर मोबाइल ऐप म प्रसारित करे जाही। एला आकाशवाणी समाचार, दूरदर्शन समाचार, प्रधानमंत्री कार्यालय अउ सूचना अउ प्रसारण मंत्रालय के यूट्यूब चैनल मन म घलो सीधा प्रसारित करे जाही। हिंदी प्रसारण के तुरंत बाद आकाशवाणी, प्रादेसिक भाषा मन म घलो एखर प्रसारण करहीं।
कार्यशाला
प्रधानमंत्री विश्वकर्मा योजना के संभावित लाभार्थी मन ल उपलब्ध होवइया ऋण सुविधा मनके बारे म जागरूक करे के उद्देश्य ले आज रायपुर म एक ठन कार्यसाला के आयोजन करे गीस। ए कार्यसाला केंद्र सरकार के वित्तीय सेवा विभाग के तहत काम करइया राज्य स्तरीय बैंकर्स समिति अउ छत्तीसगढ़ स्टेट बैंकर्स समिति के संयुक्त तत्वाधान म आयोजित करे गीस।
छत्तीसगढ़ उच्च न्यायालय के उच्च न्यायाधीश रमेश सिन्हा ह काली सिविल न्यायालय कटघोरा के आकस्मिक निरीक्षण करीन। ए दौरान ओमन न्यायालय म उपस्थित न्यायिक अधिकारी मनले प्रकरण मनके संबंध म जानकारी लीन। उहें, न्यायालय परिसर अउ भवन के निरीक्षण घलो करीन। ए मउका म न्यायालय के रजिस्ट्रार जनरल बलराम प्रसाद वर्मा, संयुक्त रजिस्ट्रार सह पीपीएस एम.वी.एल.एन. सुब्रमण्यम अउ प्रोटोकॉल अधिकारी आर.एस.नेगी घलो उपस्थित रिहीन।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल प्रदेस के जम्मों आकाशवाणी केंद्र एके संघरा रिले करही। ए बखत के अंक म ‘‘दंतेवाड़ा‘‘ जिला के बारे म जानकारी दे जाही।
हल्बी/गोण्डी-समाचार बुलेटिन
सुनइया मन ल बतादन कि काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन प्रसारित करे जाही। ए दूनों बुलेटिन आकाशवाणी केंद्र, जगदलपुर ले प्रसारित होही। जेला बस्तर संभाग म ही सुने जा सकही। हल्बी म समाचार बुलेटिन बिहनिया साढ़े सात बजे अउ गोण्डी म समाचार बुलेटिन संझा साढ़े छै बजे प्रसारित करे जाही।
हलषष्ठी
अपन लइका मनके लंबा उमर के कामना ले जुड़े कमरछठ के तिहार ल आज प्रदेसभर म परंपरा के संग दाई-दीदी मन बड़ उछाह के संग मनावत हे। ए मउका म दाई-दीदी मन उपास रखथे अउ माटी के छोटे से कुंड बनाके पूजा-पाठ करथे। पूजा सामाग्री म महुआ, लाई अउ पसहर चांउर चढ़ाय जाथे। संगेसंग उपास रखइया माईलोगन मन कमरछठ के कथा घलो सुनथे।
कमरछठ के ए मउका म मुख्यमंत्री विष्णुदेव साय ह प्रदेसवासी मन ल विसेसकर महिला मन ल सुभकामना देहे।
अउ अब पेस हे मौसम के हाल…
प्रदेस म अवइया चौबीस घंटा के दौरान एक-दू जघा म गरज-चमक के संग आकासीय बिजली गिरे के संभावना हे। उहें, छब्बीस अगस्त ले बरसा के गतिविधि म कमी आ सकत हे। मौसम विभाग ले मिले जानकारी के अनुसार उत्तर बंगाल के खाड़ी के उपर एक ठन चक्रीय-चक्रवात बने हुए हे। एखर प्रभाव ले अवइया चौबीस घंटा म एक ठन निम्नदाब के क्षेत्र बने के संभावना हे, जेखर सेति काली प्रदेस म कई जघा म हल्का ले मध्यम बरसा होय या गरज-चमक के संग छींटा पड़े के आसार हे।
ओति, कोरबा जिला म पाछू चार दिन ले होवत लगातार बरसा ले नदी-नाला उफान म हे। आज दर्री डैम ले बाईस हजार सात सौ बीस क्यूसेक पानी छोड़े गीस। एखर ले हसदेव नदी के जलस्तर बाढ़ गेहे। जेखर ले तीर- तखार म बाढ़ के हालत बन गेहे। हसदेव बैराज के कार्यपालन अभियंता पी.के.वासनिक ह बतइन कि लगातार बरसा ले बांध के जलस्तर घलो बाढ़त हे।
भारतीय खाद्य संरक्षा-कीटनाशक
भारतीय खाद्य संरक्षा अउ मानक प्राधिकरण ह राज्य मनले कीटनाशक के उपयोग ल कम करे बर अंतर-मंत्रालयीन समिति स्थापित करे के आग्रह करे हे। केंद्रीय सलाहकार समिति के चवालीसवां बइठका म प्राधिकरण के मुख्य कार्यकारी अधिकारी जी.कमला वर्धन राव ह किहीन हे, कि ए पहल के उद्देश्य कृषि पध्दति मन ल सुरक्षित अउ टिकाऊ बनाना आय। ओमन किहीन कि ए ह उपभोक्ता मन ल भोजन म कीटनाशक अवसेष ले जुडे़ संभावित स्वास्थ्य जोखिम ले घलो बचाही।
चुनाव प्रबंधन-व्याख्यान
भारतीय लोक प्रशासन संस्थान छत्तीसगढ़ के अध्यक्ष अउ सेवा निवृत्त मुख्य सचिव सुयोग्य कुमार मिश्र के अध्यक्षता म काली रायपुर म ‘चुनाव प्रबंधन के चुनौतियां विगत चुनाव के अनुभव‘ विषय उपर व्याख्यान अउ परिचर्चा आयोजित करे गीस। परिचर्चा म मुख्य वक्ता के रूप म मुख्य निर्वाचन पदाधिकारी रीना बाबासाहेब कंगाले ह अपन व्याख्यान दीन। श्रीमती कंगाले ह किहीन कि बछर दू हजार चौबीस पूरा विश्व म चुनाव के दृष्टिकोण ले एक ऐतिहासिक बछर होही। काबर कि विश्व के अस्सी देस मनके चार बिलियन ले जादा लोगन मन चुनाव म अपन मताधिकार के प्रयोग करही अउ अपन राजनीतिक प्रतिनिधि मनके घलो चयन करही। परिचर्चा म अजय सिंह, पी.सी.दलई, आर.एस. विश्वकर्मा अउ अनूप श्रीवास्तव समेत कई झन अधिकारी मन ह अपन विचार राखिन।
राष्ट्रीय अंतरिक्ष दिवस
राज्य शैक्षिक अनुसंधान अउ प्रशिक्षण परिषद-एनसीईआरटी रायपुर म राष्ट्रीय अंतरिक्ष दिवस म काली अलग-अलग कार्यक्रम आयोजित करे गीस। ए दौरान ‘आओ तुम्हें चांद पे ले जाएं‘ के विसेस प्रस्तुति दे गीस। उहें, कक्षा दसवीं के संस्कृत पाठ्यक्रम उपर आधारित वीडियो के प्रदर्सन घलो करे गीस। ए मउका म गणित अउ विज्ञान के सहायक प्राध्यापक अउ विसेसज्ञ मन ह छात्र बनके खगोल विज्ञान अउ चंद्रयान-तीन के चांद म लैंडिंग के जानकारी लीन। कार्यक्रम म केंद्र सरकार अउ एनसीईआरटी डहार ले विकसित पोर्टल ‘भारत ऑन द मून‘ के प्रदर्सन करे गीस, जेमा चंद्रयान-तीन के लैंडिंग के वीडियो दिखाय गीस। ए अवसर म इसरो के गतिविधि अउ पोर्टल म उपलब्ध सामाग्री मन के जानकारी घलो ले गीस।