राष्ट्रपति द्रौपदी मुर्मू ह किहीन कि भारतीय अंतरिक्ष अनुसंधान संगठन-इसरो ह न केवल अंतरिक्ष के क्षेत्र म बल्कि देस के सामाजिक आर्थिक विकास म घलो अमूल्य योगदान देहे। ओमन ए बात आज नई दिल्ली म देस के प्रथम राष्ट्रीय अंतरिक्ष दिवस कारीकरम के मउका म किहीन राष्ट्रपति ह किहीन कि अंतरिक्ष के क्षेत्र म प्रगति ले स्वास्थ्य, परिवहन, पर्यावरण, ऊर्जा सुरक्षा, सूचना प्रौद्योगिकीय अउ कई ठिन दूसर क्षेत्र ल फायदा होय हे। ओमन किहीन कि इसरो के चंद्रयान के चांद म उतरई ह जम्मो भारतीय मन बर गौरवसाली क्षण रिहीस। राष्ट्रपति मुर्मू ह किहीन कि राष्ट्रीय अंतरिक्ष दिवस मनाना एक सराहनीय कदम हरय। ओमन किहीन कि अंतरिक्ष के क्षेत्र म भारत के उपलब्धि आसाधारण रहे हे, जेमा न्यूनतम संसाधन मनके के जरिया मंगलयान मिसन ल पूरा करना अउ एके संग सौ ठिन उपग्रह छोड़े जइसन काम सामिल हरय। ए मउका म राष्ट्रपति ह इसरो के रोबोटिक्स चुनौती अउ भारतीय अंतरिक्ष हैकथॉन के विजेता मन ल पुरस्कार घलो दीन।
ऐति, छत्तीसगढ़ के जम्मो स्कूल मन म विज्ञान अउ अंतरिक्ष म रूचि पैदा करे बर आज राष्ट्रीय अंतरिक्ष दिवस के आयोजन करे गीस। ए दौरान एनसीईआरटी डहार ले विकसित बिसेस चंद्रयान उपर आधारित मॉड्यूल प्रदर्सित करके चंद्रयान मॉड्यूल उपर व्याख्यान के आयोजन घलो करे गीस। ए मउका म अंतरिक्ष ले जुड़े आने-ओन बिसय मन उपर पोस्टर अउ निबंध, मॉडल बनाय, क्विज अउ पेंटिंग प्रतियोगिता मन म स्कूली छात्र-छात्रा मनके संग अउ ओमन ल अंतरिक्ष विज्ञान ले जुड़े तीस मिनट के एक ठिन वीडियो घलो दिखाय गीस।
महाअभियान-पीएम-जनमन-01
केंद्र सरकार ह प्रधानमंत्री जनजाति आदिवासी न्याय महा अभियान पीएम जनमन उपर राष्ट्रव्यापी सूचना, शिक्षा अउ संचार आईईसी अभियान सुरू करे हे। अवइया महिना के दस तारिख तक चलने वाला ए अभियान के उद्देस्य जागरूकता बढ़ाना अउ बिसेस रूप से कमजोर आदिवासी समूह-पीवीटीजी तक केंद्र सरकार के योजना मनके लाभ पहुंचाना हे।
मंत्रालय ह ए बयान म केहे हे कि ए अभियान के दौरान दूसर योजना मन बर आधारकार्ड सामुदायिक प्रमाण पत्र, जनधन खाता अउ वन अधिकार अधिनियम के लाभार्थी मन ल पट्टा दे जाही। छात्रवृत्ति, मातृत्व लाभ योजना, किसान क्रेडिट कार्ड, किसान सम्मान निधि अउ सिकल सेल बीमारी के रोगी मन ल विकलांगता प्रमाण पत्र जइसे आने-आने योजना के तहत लाभ पीवीटीजी लाभार्थी तक पहुंचाय के परयास करे जाही।
महाअभियान-पीएम-जनमन-02
ऐति, छत्तीसगढ़ के अट्ठारह जिला मन घलो प्रधानमंत्री जनजाति, आदिवासी न्याय महाअभियान पीएम जनमन सुरू करे गेहे। एखर तहत बिसेस पिछड़ी जनजाति, बैगा, पहाड़ी कोरवा, कमार, अबूझमाड़ियां अउ बिरहोर बहुल बसाहट मन म राज्य अउ केंद्र सरकार कोति ले संचालित योजना मनके लाभ देवाय जाही। ए जिला मन म आदिमजाति अउ अनूसूचित जाति, विकास विभाग डहार ले अवइया सितंबर महिना म मेगा ईवेंट अउ आईईसी कैंपेन राखे जाही। सितंबर के पहिली हफ्ता म प्रधानमंत्री नरेंद्र मोदी राज्य म आयोजित कारीकरम म वर्चुअल रूप ले सामिल होके बिसेस पिछड़ी जनजाति परिवार मन संग गोठबात करही।
आदिमजाति अउ अनुसूचित जाति विकास मंत्री रामविचार नेताम ह बतइन कि प्रधानमंत्री नरेंद्र मोदी पीएम जनमन योजना के तहत झारखंड म आयोजित करे जात राष्ट्रीय मेगा ईवेंट म सामिल होही। ए दौरान ओमन देस के जम्मो पीवीटीजी बसाहट वाला जिला मन ल वर्चुअली संबोधित करही। श्री नेताम ह बतइन कि छत्तीसगढ़ म बिसेस पिछड़ी जनजाति वाला कोनो एक जिला ल राज्य स्तरीय मेगा ईवेंट बर चिन्हे जाही। ओमन बतइन कि मेगा ईवेंट के अलावा दूसर पीएम जनमन के जिला मन म जिला स्तरीय कारीकरम राखे जाही।
अमित शाह-छत्तीसगढ़
केंद्रीय गृह अउ सहकारिता मंत्री अमित शाह अब ले कुछ देर बाद अपन तीन दिन के छत्तीसगढ़ दउरा बर रईपुर पहुंचही। अपन प्रवास के दौरान केंद्रीय गृहमंत्री श्री शाह काली चौबीस अगस्त के चंपारण स्थित वल्लभाचार्य आश्रम के दउरा करही। एखर बाद ओमन रईपुर म छत्तीसगढ़ अउ पड़ोसी राज्य मनके मुख्य सचिव अउ पुलिस महानिदेसक मन संग अंतर्राज्यीय समन्वय बइठका म सामिल होही। इही दिन श्री शाह छत्तीसगढ़ के वामपंथी उग्रवाद प्रभावित क्षेत्र मन म सुरक्षा अउ विकास संबंधी बइठका घलो लिही।
उहें, पचीस अगस्त के केंद्रीय गृहमंत्री रईपुर स्थित नार्कोटिक्स कंट्रोल ब्यूरो- एनसीबी आफिस के उद्घाटन करही अउ समीक्षा बइठका म हिस्सा लिही। एखर बाद ओमन छत्तीसगढ़ म सहकारिता के बिस्तार ले जुड़े एक ठिन दूसर बइठका म घलो सामिल होही।
प्रधानमंत्री नरेंद्र मोदी ईतवार के बिहनिया ग्यारा बजे आकाशवाणी म ‘‘मन की बात‘‘ कारीकरम म देस-विदेस के लोगन मन संग अपन बिचार साझा करही। ए मासिक रेडियो कारीकरम के एक सौ तेरहवां कड़ी होही। कारीकरम आकासवाणी अउ दूरदर्सन के पूरा नेटवर्क, आकासवाणी समाचार वेबसाइट अउ न्यूज ऑन एआईआर मोबाइल ऐप म प्रसारित करे जाही।
पिछड़ा वर्ग आयोग-अध्ययन
छत्तीसगढ़ पिछड़ा वर्ग कल्याण आयोग डहार ले प्रदेस म पिछड़ा वर्ग समुदाय के आर्थिक, सामाजिक, शैक्षणिक अउ राजनैतिक भागीदारी उपर अध्ययन करे जाही। आयोग के अध्यक्ष आर.एस.विश्वकर्मा ह बतइन कि बारह अगस्त ले सर्वे के काम सुरू होगे हे। ओमन किहीन कि आयोग डहार ले पिछड़ा वर्ग म सामिल जाति समूह के संदर्भ म यदि कोनो शोध अध्ययन करना चाहथे त, अइसे शोधार्थी तीस सितंबर तक आयोग ल आवेदन प्रस्तुत कर सकत हे।
मेडिकल कॉलेज-फीस निर्धारित
छत्तीसगढ़ के निजी मेडिकल कॉलेज डहार ले जादा फीस वसूली ल लेके प्रवेस अउ फीस विनियामक समिति ह अंतरिम फीस निर्धारित करे हे। एखर तहत तीन ठन निजी मेडिकल कॉलेज के एमबीबीएस अउ दू ठिन निजी मेडिकल कॉलेज म संचालित स्नात्कोत्तर पीजी सीट के फीस तय कर दे गेहे। ए फीस बछर दू हजार चौबीस ले दू हजार सत्ताईस तक मान्य होही। समिति ह निजी मेडिकल कॉलेज मनके निरीक्षण, जांच पड़ोसी राज्य मन म प्रचलित फीस के दर अउ छत्तीसगढ़ के स्थिति, प्रति व्यक्ति आय जइसे तथ्य के आधार म फीस तय करे हे। फीस विनियामक समिति ह केहे हे कि कोनो भी तरह के फीस तय रासि ले जादा के वसूली म निजी मेडिकल कॉलेज मन म कार्रवाही करे जाही।
इही बीच, प्रवेस अउ फीस विनियामक समिति ह छत्तीसगढ़ के तीन ठिन डी. फॉर्मेसी कॉलेज के खिलाफ कार्रवाही करे के निरदेस देहे। ए कॉलेज मन पूरा सुविधा जुटाय बिना कॉलेज सुरू कर दे रिहीन।
केंद्र-दवा प्रतिबंध
केंद्र सरकार ह एंटीबायोटिक्स, दर्द निवारक अउ मल्टीविटामिन समेत एक सौ छप्पन दवा मन उपर प्रतिबंध लगा देहे, काबर कि एक समीक्षा के बाद एमन करा ले स्वास्थ्य ल खतरा पाय गेहे। केंद्रीय स्वास्थ्य मंत्रालय ह एक अधिसूचना म केहे गे हे कि ए एक सौ छप्पन दवा मन म निश्चित मात्रा म खुराक संयोजन तर्कहीन हरय। मंत्रालय ह केहे हे कि दवा मनके बउरे ले लोगन मन ल खतरा होय के संभावना हरय, जबकि एखर सुरक्षित विकल्प मौजूद हरय।
माओवादी-आत्मसमर्पण
सुकमा जिला म आज दू झिन इनामी माओवादी मन आत्मसमर्पण कर दीन। ए दूनों माओवादी मन उपर आठ-आठ लाख रूपिया के इनाम घोसित रिहीस। ए दूनों झिन मन पुलिस अउ सीआरपीएफ के अधिकारी मनके आगू आत्मसमर्पण करीन। दूनो माओवादी बछर दू हजार इक्कीस म होय टेकलगुड़ा हमला म सामिल रिहीन। एखर अलावा ए दूनो झिन उपर क्षेत्र म होय कई ठिन बड़का माओवादी वारदात म सामिल रहे के आरोप घलो हरय। आत्मसमर्पण करइया माओवादी मन ल शासन के पुर्नवास नीति के फायदा देवाय जाही।
कांग्रेस प्रदर्शन
बलौदाबाजार हिंसा मामला म भिलाई विधायक देवेन्द्र यादव के गिरफ्तारी के विरोध म प्रदेस कांग्रेस डहार ले काली चौबीस अगस्त के जम्मो जिला मुख्यालय मन म प्रदर्सन करे जाही। इही कड़ी म प्रदेस अध्यक्ष दीपक बैज के अगुवई म सहर जिला कांग्रेस कमेटी डहार ले रईपुर के जेल रोड म धरना प्रदर्सन करे जाही।